Преподобная мати, Анна, моли Бога о нас. Слава Отцу и Сыну, и Святому Духу!

Руце твои преподобно воздвизаеми к Зиждителю, мати, Анна, низложиша вражия шатания.

Преподобная мати, Анна, моли Бога о нас.

Удержав руку твою десную Вышний, наставил тя есть, мати, к небесному Своему наслаждению.

Слава Отцу и Сыну, и Святому Духу!

Стезю тесную прошедши в пощении, к широте приспела еси райстей, Анна, всечестная.

И ныне, и присно, и во веки веков. Аминь

Иже Богородицу Тя неведущии, Богомати, Света не имут видети, рождшагося из Тебе, Пречистая.

Моли Бога о нас, преподобная мати, Анна, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 6

Ирмос: Ризу мне подаждь светлу, одеяйся светом яко ризою, многомилостиве Христе Боже наш.

Преподобная мати, Анна, моли Бога о нас.

Умертвивши двизания плотская, над страстьми вельми воцарилася еси, и ныне, всечестная, Анна, в безстрастных живеши светлостех.

Преподобная мати, Анна, моли Бога о нас.

Образу Спасову навыкла еси покланятися, славная, делы и словесы твоими спасительная Его соблюдающи учения.

Слава Отцу и Сыну, и Святому Духу!

Облак тя Христос показа, мати, Анна, дождь источающий животный, верою просящим у тебе, преславная.

И ныне, и присно, и во веки веков. Аминь

Красен паче всех человек, Сын Твой, Пречистая, добротою Божества, аще и плоть бысть нас ради.

Моли Бога о нас, преподобная мати, Анна, яко мы усердно к тебе прибегаем, скорой помощнице и молитвеннице о душах наших. (Поклон.)

Господи, помилуй! Господи, помилуй! Господи, помилуй!

Слава Отцу и Сыну, и Святому Духу! И ныне, и присно, и во веки веков. Аминь

Кондак, глас 4

За любовь Господню, преподобная, покоя желание возненавидела еси, пощением дух твой просветивши, крепко бо звери победила еси, но молитвами твоими противных шатание разори.

Икос

Струи мне слова даждь, Боже мой, и источник благочиния сотвори мой ум, и благослови язык мой, да воспою Твою агницу, юже венчал еси Ты благостию Твоею; аще бо Сам не даси ми слова достойнаго, како принесу дар нищий, богатней в словесех и деяниих? Тем подаждь ми силу, исповедати ея натрижнения, крепко бо звери победила есть. Но молитвами ея противных шатание разори.

Песнь 7

Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: благословен еси, Господи Боже, во веки.

Преподобная мати, Анна, моли Бога о нас.

О доброте тлеющей, Анна, преподобная небрегла еси, смотряющи тамо сущая воздаяния и свет, и славу Божию нестареющуюся и красоту, и божественное селение.

Преподобная мати, Анна, моли Бога о нас.

Мир пременила еси тлеющий премирным животом нестареющим, и временную пищу пребывающим существом, и плотскаго обручника Небесным Женихом.

Слава Отцу и Сыну, и Святому Духу!

Разум боголюбив стяжала еси, Анна, с плотию ангелом уподобилася еси, бдящи тепле любовию, и поющи: благословен еси, Господи Боже, во веки.

И ныне, и присно, и во веки веков. Аминь

Виждь скорбь мою, Дево, юже ми наведе множество зол моих, и родства огненнаго исхити мя, вопиющаго: благословен еси, Господи Боже, во веки.

Моли Бога о нас, преподобная мати, Анна, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 8

Ирмос: Богоглаголивии отроцы, в пещи со огнем пламень попирающе, пояху: благословите, дела Господня, Господа.

Преподобная мати, Анна, моли Бога о нас.

Украшена сиянием чистоты, и чистым житием просвещена мати, предстоиши Жениху твоему, Христу Богу нашему.

Преподобная мати, Анна, моли Бога о нас.

Болезни различныя уврачует человеков, и прогонит бесовския пакости, тело твое святое, преподобная, во гробе преславно сокрываемое.

Слава Отцу и Сыну, и Святому Духу!

Священна жертва принеслася еси, и приношение светлое, преподобная мати, Анна, яко кадило благоуханное, всех Владыце Христу Богу нашему.

⇐ Предыдущая123

Поделиться: