Сура 62. аль-ДжумугIагь (Жуьмя)

 

Мергьяметлу, Регьимлу Аллагьдин тIварцIелди!

1. Пакзава Аллагь цавара авайбуру ва чилел алайбуру – Гьаким, Михьи (Пакди), Гужлуди, Камаллуди тирди.

2. Ам я – савадсузбурун кьулаз (кIел-кхьин тийижирбурун кьилив) абурукай чпикай тир Расул ракъурайди, вични абуруз Адан аятар кIелзавай ва абур михьи ийизвай, ва абуруз Ктаб ва камаллувал (Сунна) чирзавай, адалай вилик абур ачух ягъалмишвиле авайтIани.

3. Ва масадбурузни абурукай (кIелзава аятар), чеб ибурув агакь тавунвай. Ам я – Гужлуди, Камаллуди.

4. Им – Аллагьдин мергьемат я, Ада ам Вичиз кIанидаз гузва. Аллагь – чIехи мергьематдин Сагьиб я.

5. Чпел (Аллагьди) «Таврат» кьиле тухун эцигнавайбур ахпа чпи ам кьиле тухун тавурбурун мисал, ухшар я ламран мисалдиз вичеллаз ктабрин пар ялзавай (адакай са менфятни къачуз тежезвай). Аллагьдин аятар таб яз кьур ксарин мисал гьикьван писди я! Аллагьди зулумкар ксар дуьз рекьел гъидач.

6. Лагь: «Эй, чувуд – диндин эгьлияр хьанвайбур! Эгер куьне, куьн Аллагьдин кIани мукьвал ксар яз гьисабзаватIа, амай инсанар квачиз, тIалаба куьне (кIан хьухь) квез кьиникь эгер куьн гьахъбур ятIа.

7. Ва абуру гьич са чIавузни ам (кьиникь) тIалабдач чпин гъилери къазанмишайдаз килигна. Ва Аллагьдиз зулумкаррикай хъсан чизва.

8. Лагь: « Гьакъикъатда, вичикай куьн катзавай кьиникь, дугъриданни ам квел гуьруьшмиш жеда (гьалтда), ахпа куьн элкъуьрна хкида чинебанди ва ашкаради Чизвайдан патав, ва Ада квез куьне авур амалрикай хабар гуда».

9. Эй, инанмишвал авунвайбур! Жуьмя юкъуз капIуниз эверайла, чалишмиш хьухь куьн «Аллагь рикIел гъунихъ», ва акъвазара куьне алишвериш (савда). Ам – квез хийирлу я, эгер квез чир хьанайтIа.

10. Ва капI кьиле тухвана куьтягь хьайила, чкIукI куьн чилел, ва тIалаба Аллагьдин мергьематдикай (няметрикай, ризкьидикай), ва Аллагь рикIел ва мецел гъваш куьне гзаф, квез агалкьунар хьун патал.

11. Ва абуруз алишвериш ва я машгъулат акурла, абур анихъ чкIана, ва абуру вун (жуьмя кпIун хутIба, вяз ийиз) акъвазнаваз туна. Лагь: «Аллагьдин патав гвайди (саваб), машгъулатдилай ва алишверишдилай лап хъсан я, ва Аллагь – ризкьи гузвайбурукай Виридалайни Хъсанди я».

 

Сура 63. аль-Муна́ фикъу́ н (Мунафикьар)

 

Мергьяметлу, Регьимлу Аллагьдин тIварцIелди!

1. Ви патав мунафикьар атайла, абуру лугьузва: «Чна гьакъикъатда вун Аллагьдин Расул тирди шагьидвалзава». – Аллагьдиз чизва вун Адан Расул тирди -, ва Аллагьди, гьакъикъатда мунафикьар тапархъанар тирди шагьидвалзава.

2. Абуру чпин кьинерикай чпиз хуьнуьхун (далда) яз кьунва, ва (а кардалди) абуру масадбур Аллагьдин рекьелай алудзава. Гьакъикъатда, лап писди я абуру авур амал.

3. Ам – абуру инанмишвал авуна ахпа кафирвал авурвиляй я, ва (гьавиляй) абурун рикIерал муьгьуьр эцигнава ва (гила) абур гъавурдани гьатзавач.

4. Ва ваз абур акурла абурун жендекри вун тажубзава, – ва абуру лугьудайла (гафар), вуна абурун гафариз кисна яб гузва, – «на лугьуди» абур агулдна акъвазарнавай гъварар я (герек текъвер). Абуру (кичIевиляй чпин кардикай мусурманриз чир жез) гьар са гьарай чпиз аксина гьисабзава. Гьабур я душманар – мукъаят хьухь абурукай. Аллагьди абур терграй, бес гьикI абур, гьакьдикай элкъуьрзава?

5. Ва абуруз лагьайла: «Куьн ша, Аллагьдин Расулди квез багъишламишун (астагъфир) тIалабун патал », – абуру чпин кьилер галтадна, ва ваз акуна абур такабурлувализ элкъвез ( а кардикай).

6. Сад я абуруз – вуна абуруз багъишламишун (астагъфир) тIалаб авуртIани ва я абуруз багъишламишун (астагъфир) тIалаб тавуртIани, – Аллагьди абуруз гьич багъишламишдач. Гьакъикъатда Аллагьди фасикь ксар дуьз рекьел гъидач.

7. Гьабур я лугьузвайбур: «Аллагьдин Расулдин патав гвайбурал харж ийимир куьне, та абур чкIидайвал». Ва (са) Аллагьдиз талукь я цаварин ва чилин хазинаяр, амма мунафикьар (а кардин) гъавурда авач.

8. Абуру лугьузва: «Эгер чун шегьердиз (Мединадиз) хтайтIа, (гьейбатлу) къудратлубуру анай «агъузвилевайбур» акъудда». Ва (са) Аллагьдиз ва Адан Расулдиз ва муъминриз талукь (хас) я къудратлувал (гьейбатлувал), амма мунафикьриз (а кар) чизвач.

9. Эй, инанмишвал авунвайбур! Къуй куьн я куь мал-девлетди я куь веледри «Аллагь рикIел ва мецел гъуникай» машгъул (ягъалмиш) тавурай. Ва ни ам авуртIа, гьабур я – зиянвал жедайбур.

10. Ва харж ая куьне Чна квез пай ганвайдакай, квекай садан патав кьиникь къведалди ва (ахпа) ада лугьуда: «Рабби! ХганайтIа Вуна заз муьгьлет мукьвал вахтуналди – за садакьаяр гудай, ва зун диндарбурукай жедай».

11. Ва гьич муьгьлет хгудач (кьулухъ вигьедач вахт) Аллагьди чандиз, адан ажал атана агакьайла. Ва Аллагьдиз куьне вуч (крар) ийизватIа хабар ава!

 

Сура 64. ат-Тагъа́ бун (Алдатмишун [паюникай магьрум авун] сада-сад)

 

Мергьяметлу, Регьимлу Аллагьдин тIварцIелди!

1. Пакзава* Аллагь цавара авайбуру ва чилел алайбуру. Адаз талукь я гьакимвал, ва Адаз талукь я гьамд. Ва Ам гьар са шейинал къудратлу я.

2. Ам я куьн халкьнавайди, ва ава куь арада кафир тирди ва ава куь арада муъмин тирди. Ва Аллагьдиз куьне вуч ийизватIа аквазва.

3. Ада цавар ва чил гьахъ патал (ва я гьакь себеб яз) халкьнава, ва Ада квез суьрет ганва, ва куь суьрет гуьрчегди авунва. Ва элкъвена хтун Адан патав я.

4. Адаз цавара вуч аватIани чизва ва чилелни, ва Адаз куьне чуьнуьхнавай крарни чизва ва винел акъуднавайдини. Ва Аллагьдиз хурара авай затIар чизва.

5. Бес квез виликдай кафирвал авурбурун хабар атанвачни, – абуру чпин кардин завал (зиян) дадмишнай. Ва абуруз азиятлу азаб жеда.

6. Ам (авиляй я хьи)- абурун патав ачух делилар гваз чпин Расулар къвез хьана, амма абуру лагьана: «Бес (чун хьтин) инсанри чун дуьз рекьеваз тухудани кьван?! » Ва абуру кафирвална ва элкъвена абур (гьакьдикай), вични, Аллагь гьич муьгьтеж тахьанвайла (абурун имандиз). Аллагь – Девлетлуди, Гьамддиз Лайихлуди я.

7. Кафирвал авурбуру чпел чан гьич хкидач лагьана гиманнава. Лагь: «Аксина! Кьин кьазва зи Раббидал, квел дугъриданни чан хкида, ахпа квез дугъриданни куьне авур амалрикай хабар гуда. Ва а кар – Аллагьдиз регьят я».

8. (Гьавиляй) Аллагьдихъ ва Адан Расулдихъ ва Чна авуднавай Нурдихъ инанмишвал ая куьне. Аллагьдиз куьне ийизвай амалрикай хабар ава.

9. Ада куьн КIватIунин югъ патал кIватI ийидай юкъуз. Ва ам – «Сада-сад паюникай магьрум ийидай Югъ» я (алдатмишвал, зиянвал винел акъатдай, чир жедай югъ, ва ам Къиямат Йикъан са тIвар я ва арабдалди адаз «Тагъа́ бун Югъ» лугьуда). Ва ни Аллагьдихъ инанмишвал авуртIа ва амал авуртIа диндарди, Ада адалай адан пис крар алудда (квадарда) ва Ада ам чпин кIаникай вацIар авахьна физвай Женнетра твада, гьамишалугъ чеб ана амукьиз, эбеди яз. Ам я – чIехи агалкьун.

10. Ва чпи кафирвал авурбур ва Чи аламатар (делилар, аятар) таб яз кьурбур – абур ЦIун агьалияр жеда, даим яз ана амукьиз. Ва элкъвена хкведай гьикьван пис чка я ам?!

11. Гьар са мусибат кьилел къвезва анжах Аллагьдин изиндалди. Ва ни Аллагьдихъ инанмишвал авуртIа Ада адан рикIиз дуьз рехъ къалурда (мусибатар агакьайла, муъминдиз ам Аллагьдин кьадардалди тирди чир жезва, разивалзава адал, ва ада сабурзава ва муьтIуьгъ жезва). Аллагьдиз гьар са шей чизва.

12. Ва муьтIуьгъ хьухь куьн Аллагьдиз ва муьтIуьгъ хьухь Расулдиз. Ва эгер куьн элкъвейтIа (а кардикай), бес Чи Расулдин хиве авайди – анжах ачух агакьарун я.

13. Аллагь – Адалай гъейри авач (маса) гъуц (ибадат авуниз лайихлу тир). Ва къуй муъминри са Аллагьдал «таваккул»* авурай.

14. Эй, инанмишвал авунвайбур! Гьакъикъатда, куь папарикай ва куь веледрикай квез душманар ава (куьн Аллагьдин рекьелай алуддай, гунагьра твадай), куьн абурукай мукъаят хьухь. Ва эгер куьне афивал авуртIа ва юмшагъвал авуртIа ва гъил къачуртIа, гьакъикъатда Аллагь – Гъил Къачудайди, Регьимлуди я.

15. Дугъриданни куь мал-девлет, куь веледар – анжах имтигьан (синагъ, фитнедин себебкар) я. Аллагьдихъ – Адахъ ава чIехи пишкеш (саваб).

16. (Гьавиляй) КичIе хьухь квез Аллагьдикай квелай алакьдай кьван, яб це куьне, ва муьтIуьгъ хьухь, ва харж ая (Аллагьдин рекье) – (ам) квез чпиз мадни хийирлу я. Ва вуж вичин нефсинин мутIлакьвиликай хвенватIа, гьабур я – агалкьунар авайбур.

17. Эгер куьне Аллагьдив хъсан бурж вугайтIа (Адан рекье харж ийиз), Ада квез ам са шумуд cеферда артухарда, ва квез багъишламишда (гунагьар). Аллагь – Шукурлуди, Милайимди я.

18. Гъайб* ва ачухди (чинебан ва ашкара крар) Чизвайди, Къудратлуди, Камаллуди я.

 

Сура 65. атI-ТIала́ къ» (ТIалакь)

 

Мергьяметлу, Регьимлу Аллагьдин тIварцIелди!

1. Эй, Пайгъамбар! Куьне папариз тIалакь гудайла тIалакь це абуруз чпин «идда*-дин вахт башламишдайла» (яни абур вацран кьилерикай михьи хьайила куь арада жинсвилин алакъа тахьанмаз михьи гьалдин сифте кьиляй) ва гьисаб твах а «идда*-дин»(йикъарин, «идда» – дишегьлидиз вичин итим кьейила ва я итимди тIалакь гайила, маса гъуьлуьз фин гуьзетун лазим тир вахт я. Ам са шумуд жуьре ава: 1) итим кьейила – 4 варзни 10 югъ акъвазна кIанда; 2) паб аялдик кваз итимдикай чара хьайитIа, ада аял хадалди; 3)вацран кьилер авай яшда авайбуру – 3 варз, ва я пуд – михьивал (вацран кьилерикай) – гуьзетна кIанда, яни а вахтунда гъуьлуьз фидай ихтияр авач, ва я итимдин кIваляй я йифиз я юкъуз экъечдай ихтиярни авач), ва кичIе хьухь квез Аллагьдикай – куь Раббидикай. Акъудмир абур куьне чпин кIвалерай ва къуй абур чебни экъечI тавурай, анжах эгер абуру ачухардай (вич) «мурдар кар» тавунваз хьайитIа. Ам – Аллагьдин сергьятар я! Ва вуж Аллагьдин сергьятрилай элячIайтIа, гьакъикъатда ада вичи-вичиз зулумнава. Ваз чизвач, белки Аллагьди адалай кьулухъ (тIалакьдилай кьулухъ иддада* авайла) са кар арадал гъин (абуруз кьведаз хийир авай)!

2. Ва абур чпин муддатдив (вахтунив) агакьдайла, куьне абур я кьуна тур (пабвиле) дуьзвилелди (адет тирвал) я чара хьухь куьн абурукай дуьзвилелди. Ва квекай кьве адатлу касдив шагьидвал ийиз тур, ва кьиле твах куьне шагьидвал авун Аллагь патал. А крар – гузвай несигьат я, вичи Аллагьдихъ ва Эхиримжи Йикъахъ инанмишвал авунвайдаз. Ва ни Аллагьдикай кичIевал авуртIа (Адан эмирар кьилиз акъудиз, къадагъайрикай яргъа жез), Ада адаз «экъечIдай рехъ» ийида (гьар са четин гьалдай),

3. Ва Ада адаз рузи (паяр) гуда, ада гьич гьисабани кьун тавунвай патахъай. Ва ни Аллагьдал «таваккул» ийизватIа, адаз Ам бес я. Гьакъикъатда, Аллагь – Вичин кардив (мураддив) агакьдайди (ам кьилиз акъуддайди) я. Дугъриданни Аллагьди гьар са шейиниз кьадар авунва.

4. Ва чпиз вацран-кьилер мад хьуникай умуд атIанвайбур куь дишегьлийрикай – эгер куьн шаклу хьанватIа – абурун «идда*» пуд варз я, ва (гьакIни) чпиз вацран-кьилер гьич тахьай дишегьлийринни. Ва руфунал залан папарин муьгьлет абуру аял хадалди я. Ва ни Аллагьдикай кичIевал авуртIа (Адан эмирар кьилиз акъудиз, ва къадагъайрикай яргъа жез), Ада адан кар (гьал) регьятарда.

5. Им – Аллагьдин эмир я, Ада квез авуднавай. Ва ни Аллагьдикай кичIевал авуртIа, Ада адалай адан пис крар алудда (гъил къачуда), ва адаз саваб чIехи ийида.

6. Куьне абур (тIалакь гана «идда*- да» авай папар) яшамиш жез ацукьара куьн чеб яшамиш жезвай чкада, куь агьваллувилиз килигна. Ва куьне абуруз (папариз) зарар гумир абур дарвиле тун патал. Ва эгер абур руфунал залан ятIа, харж ая абурал та абуру (аял) хадалди. Ва эгер абуру куьн патал куь аялриз хур гайитIа, куьне абуруз чпин гьакъи це ва куь арада адатлувилелди (дуьзвилелди) меслят ая. Ва эгер куь кьведан арада къал хьайитIа (аялдиз хур гунин карда), а чIавуз (адан аялдиз) маса дишегьлиди хур гуда.

7. Къуй агьваллувилин сагьибди вичин агьвалдикай харж авурай (тIалакь ганвай папал ва аялдал). Ва низ (ризкьи) дар авунватIа, къуй ада харжрай Аллагьди адаз ганвайдакай. Аллагьди чандин (инсандин) хиве твазва анжах Ада адаз ганвайди. Аллагьди четинвилелай гуьгъуьниз регьятвал ийида.

8. Гьикьван гзаф хуьрер (абурун агьалияр) такабурлувална элкъвена чпин Раббидин эмирдикай ва Адан Расулрикай ва Чна абуруз къати гьахъ-гьисабдалди гьахъ-гьисаб авуна, ва Чна абуруз «акьулдивай кьабулиз тежедай, инкарлу» азабдалди азаб гана.

9. Ва абуру чпин крарин завал (пис нетижаяр) дадмишна, ва абурун кардин эхир – зиянвал хьана.

10. Аллагьди абуруз кIеви азаб гьазурнава. Аллагьдикай кичIе хьухь квез, эй къанажагърин (акьулрин) сагьибар – чпи инанмишвал авунвай! Гьакъикъатда, Аллагьди квез авуднава Зикр* (РикIел Гъун), -

11. Расул, квез Аллагьдин аятар кIелзавай, чпи (гьакь) ачухарзавай инанмиш хьана диндар амал авурбур мичIивилерай нурдиз акъудун патал. Ва ни Аллагьдихъ инанмишвал авуртIа ва диндар амал авуртIа, Ада ам чпин кIаникай вацIар авахьна физвай Женнетра твада, гьамишалугъ абур ана амукьиз, даим яз. Аллагьди адаз хъсан (зурба) пай ганваз.  

12. Аллагь я ирид цавар халкьнавайди ва чиликайни гьабур хьтинди (ва я гьабур кьванди). Агъуз эвичIзава Эмир (вагьй*) абурун арадай квез чир хьун патал, гьакъикъатда Аллагь гьар са шейинал къудратлу тирди ва гьакъикъатда Аллагьди гьар са шей чирвилелди элкъвена кьунвайди!

 

Сура 66. ат-ТахIри́ м (Гьарам авун [Къадагъа])

 

Мергьяметлу, Регьимлу Аллагьдин тIварцIелди!

1. Эй, Пайгъамбар! Вучиз вуна (жуваз) гьарамзава Аллагьди ваз гьалалнавай кар, ви папарин разивилихъ чалишмиш жез?! Аллагь – Гъил Къачудайди, Регьимлуди я.

2. Дугъриданни Аллагьди тайинарнава (къанун яз эцигнава) квез куь кьинерикай азад хъжедай къайда. Аллагь я куь Арха. Ва Ам – Вири Чидайди, Камаллуди я.

3. Ингье Пайгъамбарди вичин папарикай бязидаз (садаз, са) эхтилат сир яз авуна. Ва ада (папа) адакай хабар гайила (маса папаз), ва Аллагьди адаз (Пайгъамбардиз) а кар ачухайла, ада (Пайгъамбарди) са бязиди (а папаз) «чирна» (жаза гана) ва са бязидакай ам элкъвена. Ва ада (Пайгъамбарди) адаз (вичин папаз) адакай хабар гайила (ада сир масадаз ахъаяйди), ада (папа) лагьана: «Ни ваз а кардикай хабар гана? » Ада лагьана: «Заз хабар гана – Вири Чидайда, Хабар Авайда».

4. Эгер куьне кьведани Аллагьдиз туба авуртIа, дугъриданни куь кьведан рикIер (а кардихъ) майил хьанва. Ва эгер куьне кьведани сада-садаз куьмек гуз хьайитIа адан аксина, гьакъикъатда Аллагь – Ам я адан Арха ва Куьмекчи, ва Джибрил ва муъминрин диндарбур. Ва малаикарни адалай кьулухъ – куьмекчи я (адаз).

5. Мумкин я адан Раббиди, эгер ада квез тIалакь гайитIа, дегишарун адаз квелай хъсан маса папаралди – (чеб) мусурманар, муъминар, гзаф муьтIуьгъбур (Аллагьдиз), туба ийизвайбур, (гзаф) ибадатзавайбур, сивер хуьзвайбур (ва я «гьижра» ийизвайбур), гъуьлуьк хьайибур ва я рушвал гумай дишегьлияр тир.

6. Эй, инанмишвал авунвайбур! Куьне куьн чеб ва куь хизанар, вичин кудай затI инсанар ва къванер тир ЦIукай хуьх. Адал лап векъи, къуватлу малаикар ала, чпи Аллагьди эмирнавай крара гьич садрани асивал тийизвай ва чпиз эмирнавай крар кьилиз акъудзавай.

7. Эй, кафирвал авурбур! Уьзуьрар (уьзуьрлу себебар) гъиз алахъмир къе куьн, квез гузвайди анжах куьне авур амалрин жаза я.

8. Эй, инанмишвал авунвайбур! Туба ая куьне Аллагьдиз «гунагьдихъ мад элхкъуьн тийидай» туба яз, белки куь Раббиди квелай куь пис крар алудин (куь пис крарилай гъил къачун), ва куьн чпин кIаникай вацIар авахьна физвай Женнетра тван, Пайгъамбар ва адахъ галаз инанмишвал авурбур Аллагьди беябур тийидай юкъуз. Абурун нур абурун виликай ва абурун эрчIи патахъай экв гуз физ жеда, абуру лугьуда: «Чи Рабби! Тамамара чаз чи нур ва багъишламиша чаз. Гьакъикъатда, Вун гьар са шейинал къудратлу я».

9. Эй, Пайгъамбар! Джигьад твах кафиррихъ ва мунафикьрихъ галаз ва лап векъивал (кIевивал) ая абуруз, абурун мескен (акъаздай чка, ери) Жегьеннем я, ва элкъвена хкведай гьикьван пис чка я ам?!

10. Аллагьди кафирвал авурбурун гьакъиндай мисал яз гъанва Нугьан паб ва ЛутIан паб. Абур (папар) кьведни Чи диндар лукIарикай тир кьве лукIрак гъуьлуьк квай, ва абуру кьведани (папари) абуруз кьведаз (чпин итимриз, динда) хаинвал авуна, ва абурувай кьведавайни (итимривай) абуруз кьведаз Аллагьдикай (Адан азабдикай) хуьнин са куьмекни гуз хьанач. Ва абуруз (папариз) лагьанай: «Гьахьа кьведни ЦIуз, а гьахьзавайбурухъ галаз (санал)».

11. Ва инанмишвал авурбурун гьакъиндай Аллагьди мисал яз гъанва фиръавандин паб. Ингье ада (папа) лагьана: «Рабби! Эцига заз Ви патав кIвал Женнетда! Ва къутармиша зун фиръавандикай ва адан зулум амалрикай ва къутармиша зун зулумкар ксарикай! »

12. Ва гьакIни Имранан руш – Марйам вичи, вичин «диши жинсвилин аврат» (гьаяяр, яни рушвилин михьивал) хвейи, ва Чна аниз (Джабраил малаикдилай, адан парталдин хуруда авай кьацIаз) Чи патай тир руьгьдикай уф гана. Ва ада инанмишвална вичин Раббидин Келимайрихъ ва Адан Ктабрихъ, ва ам гзаф муьтIуьгъбурукай (гзаф ибадатзавайбурукай) тир.

 

⇐ Предыдущая3456789101112Следующая ⇒

Поделиться: