Сура 67. аль-Мульк (Гьукум)

 

Мергьяметлу, Регьимлу Аллагьдин тIварцIелди!

1. Лап Берекатлу я – Вичин Гъиле* вири гьукум (вири ихтиярар и дуьньядани Ахиратдани) авайди ва Вич гьар са шейинал къудратлу тирди,

2. Вичи, кьиникь ва уьмуьр халкь авур квез имтигьан авун патал, вуж квекай виридалайни хъсанди жедатIа амалдиз. Ва Ам – Къудратлуди, Багъишламишдайди я.

3. Вичи, сад-садан винеллаз (ва сад-садахъ дуьз къвезвай) ирид цавар халкь авур. Ва ваз Мергьяметлудан халкь авунра (яратмишунра) сад-садав кьун тавун (дуьз татун) гьич аквадач, ва мад сеферда вил экъуьра, ваз гьич са фер (рехне) кьванни аквазвани?

4. Ахпа мад ва мад вил экъуьра, ви вилер вал хкведа «агъузвилеваз», юргъун (галат) хьанваз.

5. Гьакъикъатда, Чна дуьньядин цав чирагъралди чIагурнава (гуьрчегарнава), ва Чна абурукай шейтIанрал гьалчдай затIар яз авунва. Ва Чна абуруз «Саѓ ьи́ рдин» (къизгъинарнавай Ялавдин) азаб гьазурнава.

6. Ва чпи Раббидихъ чпин кафирвал авурбуруз Жегьеннемдин азаб жеда, ва элкъвена хкведай гьикьван пис чка я ам!

7. Абур аниз гадарайла, абуруз адан гужлу гу-у-вдин ван къведа, ам къизгъиндиз ргаз.

8. Ам (Жегьеннем) ажугълувиляй пад-пад жез гьазур (мукьвал) я, гьар сеферда аниз са жемят гадарайла, адан хазиначийри (тапшурмишнавай малаикри) абурувай хабар кьада: «Бес куь патав игьтиятлувал авунин хабар гудайди атаначирни? »

9. Абуру лугьуда: «Аксина, дугъриданни атанай чи патав игьтиятлувилин хабардар, амма чна (ам) таб яз кьунай, ва чна лагьанай: «Авуднавайди туш Аллагьди са шейни, ва куьн анжах еке ягъалмишвиле ава».

10. Ва абуру лугьуда: «Эгер чна яб ганайтIа ва я чна акьулдалди фикирнайтIа, чун «Саѓ ьи́ рдин» (къизгъинарнавай Ялавдин) агьалийрикай жедачир».

11. Абуру чпин гунагь хиве кьуна, ва къуй «яргъавал» (Аллагьдин регьимдикай) хьуй «Саѓ ьи́ р»- дин агьалийриз!

12. Гьакъикъатда чпиз Раббидикай чпин кичIезвайбур (чеб инсанрикай садазни такваз) кьилди авайла (ва Ам акунни тийиз)- абуруз багъишламишун ва еке саваб ава.

13. Чинеба ая куьне куь эхтилат ва я кIевиз ая ам (Адаз сад хьиз я) – гьакъикъатда, Адаз хурара авайди чизва!

14. Бес чир жедачни Халкь Авурдаз, ва Вич – Вири КьатIузвайди (Вири Чизвайди ва Юмшагъди), Хабар Авайди тирла?!

15. Ам я – квез чил муьтIуьгъди авунвайди, къекъуьгъ куьн адан кьуд пата (къерехра) ва неъ куьне Адан ризкьидикай (чилел алай), ва Адан патав я – (куь) хтун чан хкана.

16. Бес куьн Цава Авайда* куьн чилив туькьуьниз туникай саламатвиле авани мегер ва ингье ам юзаз галтад жезва.

17. Я тахьайтIа куьн Цава Авайда* квел къванер квай тIурфан ракъуруникай саламатвиле авани кьван ва квез чир жеда Зи «игьтиятлувал авунин хабар гун» гьихьтинди ятIа!

18. Ва гьакъикъатда абурулай вилик хьайибуруни таб яз кьунай, ва Зи «пислемишун» (туьгьмет-жаза абуруз)гьихьтинди хьанай!

19. Бес абур чпин винел алай (лувар ахъайиз цIакулар) жергейра тунвай ва (абур) кIватIзавай къушариз килигнавачни? Абур са Мергьяметлудалай гъейри садани (цава) кьунвач. Гьакъикъатда, Адаз гьар са шей аквазва.

20. Я тахьайтIа вуж я ам – куь кьушун тирди квез куьмекдай, Мергьяметлудалай гъейри? Амма кафирар анжах алдатмишвиле ава.

21. Я тахьайтIа вуж я ам – квез ризкьи гудайди, эгер Ада Вичин ризкьи акъвазарайтIа? Аксина, абуру мадни давамарна терсвиле (такабурлувиле) ва катунин карда (гьахъдикай).

22. Бес агъуз гьалтна чинихъ ярх жез къекъвезвайди (гьиниз фидатIа чин тийиз) дуьз рекьел алани я тахьайтIа дуьз (мягькемдиз) акъвазна къекъвезвайди дуьз (ачух) рекьел алаз?

23. Лагь: «Ам я – куьн арадал гъайиди ва квез ван атунин гьисс ва акунин гьисс ва рикIер авунвайди, бес гьикьван тIимил куьне шукур ийизва! »

24. Лагь: «Ам я – куьн гзафарна чукIурайди (гьарна), ва Адан патав куьн кIватI хъийида».

25. Ва абуру лугьузва: «Мус алукьда и ганвай гаф, эгер куьн гьахъбур ятIа? »

26. Лагь: «А чирвал анжах Аллагьдиз ава, ва зун анжах ачухарзавай игьтиятлувилин хабардар я».

27. Ва ам (хиве кьунвай азаб) абуруз акурла мукьвал хьанваз, кафирвал авурбурун чинриз лап пис жеда, ва лугьуда (абуруз): «Им я куьне жедайди туш лугьуз тестикьарай кар! »

28. Лагь: «Хабар це заз квез гьикI аквазва, эгер Аллагьди зи ва захъ галайбурун чан къахчуртIа (квез кIанзавайвал), ва я Ада чаз регьим авуртIа (чи уьмуьр мадни яргъи авуна), бес (куьн) кафирар (Адан) азиятлу азабдикай ни хуьда?! »

29. Лагь: «Ам я – Мергьяметлуди, чна Адахъ инамишвалнава, ва Гьадал чна таваккул* авунва, ва квез (ахпа) чир жеда вуж ятIа ам ачух ягъалмишвиле авайди».

30. Лагь: «Хабар це заз квез гьикI аквазва, эгер куь (къуйрин, булахрин) яд чилик хъфейтIа, ни хкида квез чилелай авахьна фидай яд? »

 

Сура 68. аль-Къалам (Къелем [кхьидай])

 

Мергьяметлу, Регьимлу Аллагьдин тIварцIелди!

1. Ну́ н*. Кьин кьазва Къелемдал ва (абуру) цIарара кхьизвайдал.

2. Вун – ви Раббидин нямет себеб яз – дилиди туш (джинар акатна, ва я акьулдиз кьезилди туш абуру лугьузвайвал).

3. Гьакъикъатда, ваз куьтягь тежедай саваб ава.

4. Ва гьакъикъатда, вахъ чIехи дережадин ахлакь ава (вун зурба ахлакьдал ала).

5. Ва ваз аквада ва абурузни аквада,

6. Вуж ятIа квекай фитнеда авайди (ник диливал кватIа).

7. Гьакъикъатда ви Раббидиз, Адаз хъсан чизва вуж Адан рекьикай ягъалмишвиле аватIа, ва хъсан чизва Адаз, дуьз рекьел алайбур.

8. Гьавиляй муьтIуьгъ жемир вун таб яз кьунвайбуруз!

9. Абуруз кIанзава вуна хъуьтуьлвал (ялтахвал) авуна (чпин бязи крариз) ва абуру чпини ийидай хъуьтуьлвал (ялтахвал ваз).

10. Ва муьтIуьгъ жемир вун гьар са лап гзаф кьинер кьазвайдаз алчахдаз,

11. Гъибет ийиз азият гузвайдаз, фитне гваз гзаф къекъвезвайдаз,

12. Хийирдин (мал-девлетдин) патахъай гзаф мискьивалзавайдаз, сергьятар чIурзавай тахсиркардиз, гзаф гунагькардиз,

13. Залум векъидаз, адалай алава яз вич тапан бубадин кIвачихъ янавайдаз (ва я вич писвилелди машгьур тирдаз),

14. Вич мал-девлетрин ва рухвайрин сагьиб я лагьана.

15. Адаз Чи аятар кIелайла, ада лугьузва: «Эвелимжи халкьарин кьисаяр (хкетар) я! »

16. Чна ам хуртIумдал (нерал) тагъма эцигна лишанламишда.

17. Гьакъикъатда Чна абур синемиш (имтигьан) авуна Чна бустандин сагьибар синемиш авурвал; ингье абуру кьин кьунай чпи пакамахъ лап фад абур (емишар) ахтIана кIватI хъийида лагьана (кесибриз аквадалди),

18. Ва са шейни (адакай кесибриз) хгуддач лагьана (ва я абуру къейд эцигначир – «ин ша́ -Аллагь» лагьаначир).

19. Ва элкъвена кьуна ам (бустан) ви Раббидин патай тир «элкъвена кьурда» (балади), абур ксанвайла.

20. Ва ам (бустан кана) чIулав йиф хьиз хьана.

21. Ва экуьнахъ абуру сада-садаз эверна:

22. «Алад куьн йикъан лап сифте кьиляй куь (герек бязи чкайриз) цан янавай никIел (бустандиз), эгер куьн ахтIузвайбур ятIа (бегьер)! »

23. Ва абур рекье гьатна (аниз) чпин арада кушкушиз:

24. «Къуй къе аниз (бустандиз) куь патав са кесибни гьахь тавурай».

25. Абур кIеви къаст аваз йикъан лап сифте кьиляй рекье гьатнавай чеб а кардал къудратлу я лагьана.

26. Ва абуруз ам акурла абуру лагьана: «Гьакъикъатда чун рекьелай алатнава! »

27. «Аксина, чун магьрум хьанвайбур я! »

28. Абурун виридалайни хъсанда лагьана: «Бес за квез лагьаначирни: АвунайтIа куьне (Аллагь) пак (Адаз асивал авуникай ва я ин ша Аллагь лагьана)! »

29. Абуру лагьана: «Пак я чи Рабби! Гьакъикъатда, чун зулумкарар тир».

30. Ва абур сада – садан чина акъвазна башламишна сада-садаз туьгьмет ийиз,

31. Абуру лагьана: «Бедбахтвал я чаз! Гьакъикъатда, чун (диндин) сергьятар чIурай тахсиркарар я.

32. Белки чи Раббиди чаз адалайни хъсандал дегишин, гьакъикъатда чна чи Раббидихъ тамарзувалзава».

33. Гьа ихьтинди я азаб, ва Ахиратдин азаб лапни еке я, эгер абуруз чиз хьанайтIа!

34. Гьакъикъатда, (Аллагьдикай) кичIебуруз чпин Раббидин патав няметрин (хушбатвилин) Женнетар гьазурнава.

35. Бес Чна мусурманар сад хьиз ийидани тахсиркаррихъ галаз?!

36. Квехъ вуч хьанва, куьне гьикI дуван ийизва?

37. Я тахьайтIа квехъ Ктаб авани а кар авай (ва я а карда) вични (ам) куьне фагьум гуз кIелзавай?

38. (АкI хьайила) Гьакъикъатда квез ана гьа куьне хкязавайди ава!

39. Я тахьайтIа квехъ Чахъ галаз ктIунвай кьинер-агьтер авани, Къияматдин Йикъалди кардик квай: «Гьакъикъатда квез, гьа куьне дуван авурди жеда»- лугьудай?

40. Хабар яхъ вуна абурувай, вуж абурукай а кардал замин я?

41. Я тахьайтIа абуруз шерикар авани, къуй гъурай абуру чпин шерикар эгер абур гьахъбур ятIа!

42. (РикIел гъваш) А югъ – Занг *ачухардай (чуплах, дуьздал ийидай. Занг* – и келимадиз алимри кьве тафсир гузва: 1-Аллагьдин Занг – Бухаридин сахIихIда хIадис ава №- 4919: «Ачухарда Чи Раббиди Вичин Занг…». 2- А гаф мисал я – четин, пис гьалдин. И месэла тафсиррин ктабра къалурнава: ибн Касир-4п 524-чин) ва эвердай абуруз сажда авуниз, амма абурувай алакьдач.

43. Абурун вилер чиле туна жеда, ва абур агъузвили кIевна кьада. Ва дугъриданни эвернай абуруз сажда авуниз чеб сагъ-саламат тирла.

44. (Гила) тур Зун и «Ихтилат» (Къуръан) таб яз кьазвайбурухъ галаз. Чна абур, абуруз гьич чирни тежедайвал, къвез-къвез тавламишда (жазадиз)!

45. Ва За абуруз муьгьлет гузва. Гьакъикъатда Зи амалдарвал зурбади я эхир!

46. Я тахьайтIа вуна абурувай гьакъи тIалабзавани ва абур чпел къачунвай буржийрикай четинвилевани?

47. Я тахьайтIа абурув гъайб* (чинебандакай чирвал) гвани ва абуру (анай) кхьизвани?

48. (Гьавиляй) Сабур ая вуна ви Раббидин гьукумдал ва вун «чIехи балугъдин юлдаш» (Й́ у́ нус пайгъамбар) хьиз жемир, ингье ада вич (балугъдин къене) агална кьунваз (ва гъамунивди ацIанваз) эверна (дуьа ийиз).

49. Эгер адав вичин Раббидин патай регьим ахгакьначиртIа, акъудна гадардай ам баябан чуьлдиз вичел айиб алаз.

50. Ва хкяна ам адан Раббиди ва ам Ада диндарбурукай авуна.

51. Ва гьакъикъатда, кафирвал авурбур гьазур я (мукьвал я) вун чпин вилералди цIуьдгъуьнарна ярхариз абуруз Зикр*-дин (Къуръандин) ван атайла, ва абуру лугьузва: «Гьакъикъатда, ам (джин акатна) дилиди я! »

52. Амма ам (Къуръан) – анжах алемар патал «РикIел гъун» я.

 

Сура 69. аль-ХIа́ къкъагь (Гьакъикъиди)

 

Мергьяметлу, Регьимлу Аллагьдин тIварцIелди!

1. Гьакъикъиди (Къияматдин Югъ)!

2. Вуч я ам – Гьакъикъиди (Къияматдин Югъ)?

3. Ва ваз гьинай чида, Гьакъикъиди – (ам) вуч ятIа!

4. «Саму́ д»-ди ва «гIа́ д»-ди Пис Къурхутмишдайди (Къияматдин Югъ) таб яз кьуна.

5. «Саму́ д»-лагьайтIа, абур гзаф кIеви гьарайдалди тергнай.

6. «ГIа́ д» – лагьайтIа, абур аяздин, гув-в алай пехъи гару тергна.

7. Мажбурна Ада ам (гар)абурал ирид йифен ва муьжуьд йикъан къене (ара)датIана, ва аквадай ваз инсанар чилел ярх хьанваз мейитар яз на лугьуди абур ктIана ярх хьанвай хумравдин тарарин буш танар я.

8. Ва аквазвани ваз абурун сад кьванни амукьна?

9. Фиръаванди, ва адалай вилик хьайибуру, ва «Муътафика́ т»-ди (яни чин пад кIаник хьайи хуьрери- ЛутI пайгъамбардин халкьдин хуьрер) гунагь (хатIа)крар авунай.

10. Абуру асивална чпин Раббидин расулдиз ва Ада абур (азабдалди) кьуна – артух (кIевиз) кьуналди (яни михьиз къирмишна).

11. Гьакъикъатда Чна, яд къерехрай алахьайла куьн «целай физвайдаваз» (гимидаваз) тухвана,

12. Чна ам квез рикIел гъун яз авун патал ва дикъет гун патал адаз дикъетлу япари (яни чирна фикирун патал).

13. Ва Карчуниз* уф гайила са (сефер) уф гуналди.

14. Ва алудна тухвайла чпин чкайрлай чил ва дагълар ва абур кьведни са кукIваруналди руг-руг авурла,

15. А юкъуз Вакъиа* (Алукьдайди, Къияматдин Югъ) алукьда.

16. Цав (хъиткьина) кьатI- кьатI жеда ва а юкъуз ам зайифди жеда.

17. Малаикар жеда адан къерехрал, ва а юкъуз муьжуьда (малаикри) ви Раббидин Арш (Тахт) чпин винелай кьуна тухуда (хкажна кьада).

18. А юкъуз куьн вилик гъида (Адан, гьахъ-гьисабдиз) ва куь са чинебандини чуьнуьхна амукьдач.

19. Ва нив вичин ктаб адан эрчIи гъиле вугайтIа, ада (шадвиляй) лугьуда: «Ингье, кIела куьне зи ктаб!

20. Гьакъикъатда, зун якъинлу (инанмиш) тир – зун зи гьахъ-гьисабдихъ гуьруьшмиш жедайди».

21. Ва ам рази тир хуш яшайишда жеда,

22. Вине авай (бустанда) Женнетда,

23. Вичин емишар (атIуниз) мукьвал авай.

24. Неъ ва хъухъ куьне хушдиз, куьне яргъал алатай йикъара «вилик авур» диндар амалдиз килигна!

25. Ва нив, вичин ктаб адан чапла гъиле вугайтIа, ада лугьуда: «Агь, вахгун тавунайтIа зав зи ктаб!

26. Ва чир тахьанайтIа заз, зи гьахъ-гьисаб!

27. Агь, хьанайтIа ам (дуьньядин кьиникь) куьтягьардайди (зи кар, чан хкин тийидайвал)!

28. Ганач заз (азабдикай хуьдай) куьмек зи девлетри!

29. Пуч хьана закай зи агъавал (ва я делилар)! »

30. (Ва Аллагьди малаикриз лугьуда): «Яхъ ам куьне ва ягъа адаз бухавар гъилер гардандив агудна,

31. Ахпа куьне адав «Джагьи́ м»*-да (Жегьеннемдин са тIвар) кана кармаш хьунин(къати кунин) азаб чIугваз тур,

32. Ахпа зунжурда тур ам алчудна, вичин «яргъивилин уьлчме» пудкъанни цIуд къулач* тир (яргъивилин куьгьне уьлчме, зур-метри кьван)!

33. Гьакъикъатда, ада ЧIехи Аллагьдихъ инанмишвал ийизвачир

34. Ва гьевеслу ийизвачир ада (масад) кесибдиз тIуьн гуниз.

35. Гила авач адаз къе ина (куьмекдай) мукьва кас,

36. Ва авач (адаз) тIуьнни -«гъисли́ н»-дилай гъейри (жегьеннем-эгьлийрин беденрин ивини ирин..),

37. Ва неда ам анжах гунагькарри».

38. (Туш, куьне фикирзавайвал эй мушрикар! ) Кьин кьазва (За) -квез аквазвай затIаралди,

39. Ва квез таквазвайбурални!

40. Гьакъикъатда ам (Къуръан) – багьа Расулдин гаф я (Аллагьдин келимаяр МухIаммад пайгъамбарди кIелзавай).

41. Ва туш ам -шаирдин гаф. ТIимил инанмишвал ийизва куьне!

42. Ва туш ам – фалчидин гаф. ТIимил рикIел гъана ибрет къачузва куьне!

43. (Ам я яни Къуръан)- Алемрин Раббидин патай Авудна Ракъурнавайди.

44. Ва эгер ада Чи тIварцихъ яна лагьанайтIа гзаф гафарикай бязиди,

45. Чна ам ЭрчIидалди* (зурба къуватдалди тадиз) кьадай,

46. Ахпа атIудай Чна адан «шагьдамар» (рикIин лап кьилин ивидин дамар),

47. Ва садни авач квекай (Чаз) манийвализ жедайбур адакай.

48. Гьакъикъатда ам (Къуръан) – РикIел Гъун я Аллагьдикай кичIебуруз.

49. Гьакъикъатда Чаз лап хъсан чизва куь арада ам (Къуръан) таб яз кьадайбур авайди.

50. Ва гьакъикъатда ам – гьайифвал ва пашманвал я кафирриз.

51. Ва гьакъикъатда ам – якъиндин гьакъикъат (якъинлу гьакь) я.

52. (Гьавиляй) Пак ая вуна ви ЧIехи тир Раббидин тIвар! («СубхIа́ на-Алла́ гьи-ль-ГIази́ м» лагь).

 

Сура 70. аль-МагIа́ ридж (Дережаяр [виневилин])

 

Мергьяметлу, Регьимлу Аллагьдин тIварцIелди!

1. Хабар кьуна (ва тIалабна чпин кьилел атун) хабар кьурда – алукьдай азабдикай,

2. Кафирриз тир, вичизни акъвазардайди (алуддайди) авачир,

3. Аллагьдикай – (Виневилин) Дережайрин Сагьиб тир.

4. Хкаж жеда Адан патав малаикар ва Руьгь (Джабраил)- вичин яргъивал яхцIурни цIуд агъзур йис тир юкъуз.

5. Сабур ая вуна хъсан сабурлувилелди.

6. Гьакъикъатда ам абуруз яргъал яз аквазва.

7. Ва Чаз ам мукьвал алайди аквазва.

8. А юкъуз цав жеда гъеридин кIанер хьиз,

9. Ва дагълар жеда ранг янавай сар хьиз,

10. Ва хабар кьадач мукьва касди мукьва касдикай,

11. Чпиз абур къалурзаваз (аквазваз) хьайитIани. Тахсиркарвал авурдаз (кафирдиз) кIан жеда ада (вич) азадун (хкудун) а Йикъан азабдикай вичин рухвайралди (абур гана),

12. Вичин папалди ва вичин стхадалди,

13. Вичин тухумдалди чпи вичиз архавалзавай (гъил алаз хуьзвай)

14. Ва чилел алай кьван вирибуралди, ахпа вич (а карди) къутармиш ийидайвал (а Йикъан азабдикай).

15. Ваъ (акI жедач)! Гьакъикъатда ам – «Лаза́ » (Къати Ялав) я, (*Жегьеннемдин са тIвар)

16. Кьилерин хамар кIевиз алаждай,

17. Эвердай, далу гана ва элкъвена фейидаз (гьакьдикай),

18. Ва кIватIна (девлетар) хазинайра турдаз (закат ва маса буржияр кьилиз акъуд тийиз).

19. Гакъикъатда, инсан халкьнава вичивай вич (вичин нефс) хуьз тежерди яз:

20. Адав писвал хкIурла, къалабулухлуди яз,

21. Адав хийир хкIурла, кIевиз кьадайди (тагудайди) яз.

22. КапI ийизвайбурулай гъейри;

23. Чпи, чпин капI кьиле тухунин кардал даимвалзавай,

24. Чпинни мал-девлетда тайин тир пай авай;

25. Саилдизни (тIалабзавайдаз), магьрумдаз,

26. Чпи Эвездин Йикъахъ инанмишвалзавай,

27. Чеб, чпин Раббидин азабдикай (къурху кваз) кичIела авай,

28. Бес гьакъикъатда абурун Раббидин азабдикай хатасузвал авач эхир,

29. Чпи, чпин «эркеквилин авратар» (гьаяяр гьарамдикай) хуьзвай,

30. Анжах чпин папар ва «чпин эрчIи гъилик* акатнавайбур» (лукI-дишегьлияр) квачиз, а чIавуз гьакъикъатда абурал туьгьмет алач.

31. Ва вуж адалай анихъ галайдахъ чалишмиш хьайитIа (низ адалай гъейри кIан хьайитIа), гьа абур – сергьятар чIурзавайбур я;

32. Чпи, чпин аманатар ва чпин кутIуннавай икьарар кьилиз акъудзавай,

33. Чпи, шагьидвал авунар чпин, дуьздиз кьиле тухузвай.

34. Чпи, чпин кпIар дуьздиз хуьзвай (шартIар кьилиз акъудиз, вахтунда ийиз, тамамвилелди ийиз),

35. Абур – гьуьрметар аваз Женнетра жеда.

36. Бес вуч кар хьанва кафирвал авурбуруз гьерекатиз ви патав гарданар яргъина

37. ЭрчIи патахъайни чапла патахъайни кIапIалралди?!

38. Яраб гзаф кIан (тамарзу) хьанва жал гьар касдиз абурукай вич (Аллагьди) няметрин Женнетда тун?

39. Ваъ (жедач акI)! Дугъриданни Чна абур халкьнава абуруз чизвай шейиникай (стIалдикай),

40. Ва – кьин кьазва (За) рагъэкъечIдай патарин ва рагъакIидай патарин Раббидалди – гьакъикъатда Чун къудратлу я

41. Дегишиз абурулай хъсанбуралди, ва Чи вилик пад кьаз жедач (са куьнивайни Чун ажиз ийиз, магълуб ийиз гьич жедач).

42. Ва тур абур (вуна), буш гзаф рахунар ва къугъунар ийиз (абуру), та абур абуруз хиве кьунвай чпин Йикъахъ галаз (сад- садахъ) гуьруьшмиш жедалди,

43. А Йикъахъ – абур сурарай экъечIдай гьерекатиз чпи, на лугьуди абуру бутрин патав тади ийизва,

44. КичIела чпин вилер чиле туна, ва чеб агъузвили кIевна. Ам я гьа Югъ абуруз (виликдай) хиве кьунвай.

 

Сура 71. Ну́ хI (Нугь)

 

Мергьяметлу, Регьимлу Аллагьдин тIварцIелди!

1. Гьакъикъатда Чна Нугь вичин халкьдин патав ракъурна: «Игьтиятвал авунин хабар це ви халкьдиз, чпиз азиятлу азаб къведалди».

2. Ада лагьана: «Эй, зи халкь! Гьакъикъатда, зун квез ачух «игьтиятвал авунин хабар гудайди» я;

3. Аллагьдиз ибадат ая куьне ва Адакай кичIе хьухь квез, ва муьтIуьгъ хьухь куьн заз!

4. (Эгер куьне акI авуртIа) Ада квез куь гунагьрикай (ва я гунагьар) багъишламишда, ва Ада квез тайин тир вахтуналди муьгьлет хгуда. Гьакъикъатда Аллагьди эцигнавай вахт (ажал) атайла (ам) кьулухъ вегьедач. Эгер квез (а кар) чиз хьанайтIа! »

5. Ада лагьана: «Рабби, гьакъикъатда за эверна зи халкьдиз югъди-йифди,

6. Ва зи эверуни абуруз анжах катун артухарна.

7. Ва гьакъикъатда за гьар сеферда абуруз (имандихъ) эверайла Вуна абуруз багъишламишун патал, абуру чпин япара тупIар тваз хьана ва абуру гьална чеб кIевиз хьана чпин парталралди (акун тавун патал), ва абуру кIевивална (куфрдал), ва такабурлувална абуру такабурлувал авуналди.

8. Ахпа гьакъикъатда за абуруз (диндиз) ачухдаказ эверна.

9. Ахпа за абуруз ашкарадаказ (халкьдин вилик) эверна ва за абуруз чинебани (кьилдини) эверна.

10. Ва за лагьана: «Астагъфир ая куьне куь Раббидиз, гьакъикъатда Ам – Гзаф Багъишламишдайди я,

11. (Эгер куьне акI авуртIа) Ракъурда Ада квел марф булдиз (сад садан гуьгъуьналлаз),

12. Ва гуда(гзафарда) Ада квез мал-девлетар ва рухваяр, ва ийида Ада квез багълар ва ийида Ада квез вацIар.

13. (Бес) вучиз куьне Аллагьдин гьуьрметдик умуд кутазвач? (Вучиз куьне Аллагьдин чIехивилиз икрамзавач ва Адан савабдик умуд кутазвач? ),

14. Вични Ада куьн халкьнавайла (девирралди) са гьалдай маса гьалдиз гъиз.

15. Бес квез акуначни, гьикI Аллагьди сад-садан винеллаз ирид цавар халкьнаватIа,

16. Ва анра варз нур яз авунвайди ва рагъ авунвайди чирагъ яз?

17. Ва Аллагьди куьн арадал гъана чиляй набататдив (чиляй) экъуьчIиз тур хьиз.

18. Ахпа Ада куьн элкъуьрна аниз (чилиз) рахкурда ва ахкъудда куьн ахкъудуналди.

19. Аллагьди квез чил экIянаваз авунва (гам хьиз),

20. Къекъуьн (фин) патал куьн анал гьяркьуь рекьерай.

21. Нугьа лагьана: «Рабби! Абуру заз асивална (таб яз кьуна аксивална) ва абур вичин мал-девлетди ва веледри вичиз анжах зиян артухардайдаз табий хьана» (яни девлет, тухум авай куфрда авай чIехи ксариз).

22. Ва амалдарвална абуру (чинебан чIуру къаст авуна) абуру – лап зурба амалдарвал!

23. Ва лагьана абуру (чIехи ксари): «Куьне куь гъуцар гьич тамир (гадармир), ва гьич тамир куьне «вадду», ва -«сува́ гI» сакIани, ва -«ягъу́ с» сакIани, ва «ягIу́ къ» ва «насру» (бутар яз кьунвайбурун тIварар).

24. Абуру (куфрда авай чIехи ксари) гзафбур рекьелай алуднава, ва ягъалмишвилелай гъейри артухармир Вуна зулумкарриз са шейни! »

25. Абурун хатIа-гунагьриз килигна абур батмишарнай ва ЦIа тунай абур, ва жагъанач абуруз Аллагьдикай хуьдай куьмекчияр.

26. Ва Нугьа лагьана: «Рабби! Вуна чилел кафиррикай яшамиш жез кас тамир!

27. Гьакъикъатда Вуна эгер абур туртIа, абуру Ви лукIар рекьяй акъудда, ва абуру анжах пис чIуру, лап кафир (несил) аладда.

28. Рабби! Багъишламиша заз ва зи диде-бубадиз, ва зи кIвализ муъмин яз атайдаз, ва (гьакIни) муъмин итимриз ва муъмин папариз, ва артухармир Вуна зулумкарриз телефвилелай гъейри са шейни! »

 

⇐ Предыдущая45678910111213Следующая ⇒

Поделиться: