Слава Отцу и Сыну, и Святому Духу. И ныне, и присно, и во веки веков. Аминь.

Вышняго освященное Божие селение, радуйся, Тобою бо дадеся радость, Богородице, вопиющим Ти: благословена Ты в женах еси, Всенепорочная Владычице.

Песнь 8

Ирмос: Руце распростер, Даниил львов зияния в рове затче; огненную же силу угасиша, добродетелию препоясавшеся, благочестия рачители, отроцы, взывающе: благословите, вся дела Господня, Господа.

Святый благоверный княже Александре, моли Бога о нас.

Ангельстии чини хвалят тя, преславне, и человечестии роди поют непрестанно, творяще верно память твою, Александре великоимените.

Святый благоверный княже Александре, моли Бога о нас.

Тебе в чудесех славна Российским странам показа Бог, Александре, и украси тя Небесными дарми: Того моли помиловати всех нас.

Слава Отцу и Сыну, и Святому Духу.

Победы истинноименит, воистинну верным людем в бедах и крепок помощник явися еси, Александре блаженне.

Слава Отцу и Сыну, и Святому Духу. И ныне, и присно, и во веки веков. Аминь.

Священный Тя пророк благообразно проповеда, Дверь, и Гору, и Сень, и Землю Святую, и Облак Света, из Негоже во тьме сущим возсия Солнце, Дево, Един Светодавец.

Песнь 9

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.

Святый благоверный княже Александре, моли Бога о нас.

Красен телом и душею, и благочестием сияя, славне, Божественнаго разума, орган был еси Святаго Духа: и по смерти убо к безсмертной жизни и некончаемому блаженству прешел еси, радуяся, Александре Богомудре.

Святый благоверный княже Александре, моли Бога о нас.

Яко светозарное, блаженне, солнце, возсияв от запада, и всю зарями благочестия Российскую землю просветил еси, и отгнал еси тьму глубокую еретичествующих, Александре преславне.

Слава Отцу и Сыну, и Святому Духу.

Твое святое преставление днесь светло празднуем: исполни радости и веселия восхваляющия тя, Александре великоимените.

Слава Отцу и Сыну, и Святому Духу. И ныне, и присно, и во веки веков. Аминь.

Светом мя Твоего милосердия во тьме неразумия лежащаго озари, едина Светодавца рождшая, Избавителя и Бога, святых венчавшаго.

 

Молитва первая

О святый благоверный княже Александре! Призри милостивно на ны, недостойный рабы Божий (имена), и исходатайствуй нам житие тихое и безмятежное, и к вечному Царствию шествие неуклонное твоим предстательством устрой нам, да сохранит нас Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога в Троице Святей славимаго, Отца и Сына и Святаго Духа, ныне и присно и во веки веков.

 

Молитва иная

Скорый помощниче всех усердно к тебе прибегающих, и теплый наш пред Господем предстателю, святый благоверный великий княже Александре! Призри милостивно на ны недостойныя, многими беззаконии непотребны себе сотворившия, к раце мощей твоих ныне притекающия и из глубины души взывающия: ты в житии своем ревнитель и защитник православныя веры был еси, и нас в ней теплыми твоими к Богу молитвами непоколебимы утверди. Ты великое возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив полки супостатов, от пределов Российстих отгнал еси, и на нас ополчающихся всех видимых и невидимых врагов низложи. Ты, оставив тленный венец царства земнаго, избрал еси безмолвное житие, и ныне, праведно венцем нетленным увенчанный, на небесах царствующи, исходатайствуй и нам, смиренно молим тя, житие тихое и безмятежное, и к вечному Царствию Божию шествие неуклонное устрой нам. Предстоя же со всеми святыми престолу Божию, молися о всех православных христианах, да сохранит их Господь Бог Своею благодатию в мире, здравии, долгоденствии и всяцем благополучии в должайшая лета, да присно славим и благословим Бога, в Троице Святей славимаго, Отца и Сына и Святаго Духа, ныне и присно и во веки веков. Аминь.

 

⇐ Предыдущая123

Поделиться: