Катавасиа: ирмос 3-й песни последнего канона.

Таже ектения малая:

Па́ки и па́ки ми́ром Го́споду помо́лимся.

Лик : Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик : Тебе́, Го́споди.

Священник : Я́ко Ты еси́ Бог наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик : Ами́нь.

И чтутся кондак и седален святого:

Конда́к, гла́с 4.

Подо́бен: В ознесы́йся:

Возгоре́вся раче́нием Го́рним,/ же́стость пусты́ни Иорда́новы, па́че все́х ми́ра сла́дких предпоче́л еси́:/ отону́дуже повину́ся тебе́ зве́рь да́же до сме́рти, о́тче,/ послу́шне и жа́лостне на гро́бе твое́м сконча́ся,/ просла́вльшу тя́ та́ко Бо́гу:/ к Нему́же моля́ся, и о на́с,/ о́тче Гера́симе, помина́й.

Седа́лен, гла́с 4.

Подо́бен: Я ви́лся еси́ дне́сь:

Де́монов, преподо́бне, кова́рства Крестною благода́тию и де́йством преше́д,/ положе́нием бо́г бы́л еси́./ Те́мже тя́ ве́рно почита́ем, Гера́симе.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен:

Пречи́стыя ру́ки Твоя́, Де́во Ма́ти, просте́рши,/ покры́й упова́ющия на Тя́, и Сы́ну Твоему́ зову́щия:/ все́м пода́ждь, Христе́, ми́лости Твоя́.

Пе́снь 4.

Ирмо́с: У слы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Боже́ство́.

Припев: Преподо́бне о́тче Гера́симе, моли́ Бо́га о нас!

Хра́м бы́сть Ду́ха, просвеще́нное, о́тче, се́рдце твое́:/ те́м то́чит дарова́ния,/ исцеля́я неду́ги Боже́ственною благода́тию.

Припев: Преподо́бне о́тче Гера́симе, моли́ Бо́га о нас!

Зако́ну Боже́ственному повину́яся, о́тче,/ от ю́ности после́довал еси́ Го́споду,/ облобыза́я безпло́тных житие́ с те́лом.

Припев: Преподо́бне о́тче Гера́симе, моли́ Бо́га о нас!

Ше́ствия твоя́, преподо́бне, к спаси́тельней стези́ испра́вишася,/ наставле́нием Боже́ственнаго Ду́ха, в тя́, преподо́бне, все́льшагося.

Припев: Пресвята́я Богоро́дица, спаси́ нас!

Богоро́дичен: Иису́са Человеколю́бца,/ Его́же несказа́нно чревоноси́ла еси́,/ умоли́, Всенепоро́чная, спасти́ вся́, пою́щия Тя́.

Пе́снь 5.

Ирмо́с: У́ тренююще, вопие́м Ти́,/ Го́споди, спаси́ ны:/ Ты́ бо еси́ Бо́г на́ш,/ ра́зве Тебе́ ино́го не ве́мы.

Припев: Преподо́бне о́тче Гера́симе, моли́ Бо́га о нас!

Умо́м очище́нным прие́м лучи́ Свята́го Ду́ха,/ све́т мона́шествующих бы́л еси́.

Припев: Преподо́бне о́тче Гера́симе, моли́ Бо́га о нас!

Житие́ твое́ ну́ждею естества́ сия́я,/ а́нгела земна́го с пло́тию тя́ показа́.

Припев: Преподо́бне о́тче Гера́симе, моли́ Бо́га о нас!

Во́д живото́чных Ду́ха испо́лнен,/ ре́ки источи́л еси́ чуде́с, о́тче Гера́симе.

Припев: Пресвята́я Богоро́дица, спаси́ нас!

Богоро́дичен: Я́ко ту́ча на Тя́ сни́де, Богоро́дице,/ Сло́во воплоща́емое в просвеще́ние ду́ш на́ших.

Пе́снь 6.

Ирмо́с: О чи́сти мя́, Спа́се,/ мно́га бо беззако́ния моя́,/ и из глубины́ зо́л возведи́, молю́ся:/ к Тебе́ бо возопи́х, и услы́ши мя́,/ Бо́же спасе́ния моего́.

Припев: Преподо́бне о́тче Гера́симе, моли́ Бо́га о нас!

Пло́ти твоея́ немощно́е, си́лою укрепля́емо,/ от Де́вы на́м Чи́стыя возсия́вшаго,/ всю́ смири́ си́лу, о́тче, вражде́бных безпло́тных, преподо́бне.

Припев: Преподо́бне о́тче Гера́симе, моли́ Бо́га о нас!

Сокруши́в мы́сленных льво́в че́люсти благода́тию,/ покори́л еси́ чу́вственных стремле́ния, преподо́бне:/ те́м повину́ется тебе́ ле́в,/ я́ко па́стырю, благопоко́рно служа́.

Припев: Преподо́бне о́тче Гера́симе, моли́ Бо́га о нас!

Житие́ а́нгельское, мудрова́ние, о́тче, смире́нно стяжа́в о Христе́,/ кро́ток бы́л еси́:/ и ны́не всели́лся еси́ в земли́ кро́тких,/ ра́дости Боже́ственныя исполня́емь.

Припев: Пресвята́я Богоро́дица, спаси́ нас!

Богоро́дичен: Всели́ся в Тя́ О́тчее, Чи́стая, озаре́ние,/ и ро́ждся пло́тию, ми́р просвети́, и тмы́ изба́ви многобо́жия:/ сего́ ра́ди воспева́ем Тя́.

Припев: Святи́и му́ченицы, моли́те Бо́га о нас!

Преидо́сте преде́лы плотски́я страда́льцы мно́гим терпе́нием, претерпе́вше му́ки и боле́зни. те́мже вся́кую боле́знь и ско́рбь облегча́ете, ва́с воспева́ющих.

Припев: Святи́и му́ченицы, моли́те Бо́га о нас!

Тьма́м а́нгел во́инство совокупи́ся святы́х страстоте́рпец, и мо́лит Всеблага́го Бо́га, согреше́ний тьмочи́сленных на́с изба́вити, я́ко христу́ угоди́вшии.

Припев: Слава Тебе, Боже наш, слава Тебе!

Умертви́вся и во гро́бе Христе́ усну́в, возста́вил еси́ ме́ртвыя, и в ве́ре уме́ршым дае́ши бла́гости бога́тство Христе́, поко́й я́ со все́ми святы́ми.

Припев: Пресвята́я Богоро́дица, спаси́ нас!

Богоро́дичен: Бо́жие Бо́г Сло́во, иски́й обожи́ти челове́ка Чи́стая, из Тебе́ воплоща́ется, и зе́млен ви́дится: Его́же непреста́нно моли́, обрести́ на́м ми́лость во вре́мя отве́та.

И́ный господи́на Фео́дора, гла́с то́йже.

Припев: Святи́и му́ченицы, моли́те Бо́га о нас!

Пло́ти и кро́ве святи́и не пощаде́вше, ко вся́кому муче́нию ста́сте небоя́зненни, Христа́ не отмета́ющеся: те́мже с небе́с низпосла́ Христо́с ва́м венцы́.

Припев: Святи́и му́ченицы, моли́те Бо́га о нас!

Му́ченик торжество́ усря́щим, просвети́вшеся де́тельми, и возопии́м богодухнове́нными пе́сньми: вы́ есте́ вои́стинну денни́цы на земли́, Христо́вы му́ченицы.

Сла́ва Отцу́, и Сы́ну, и Свято́му Ду́ху.

Тро́ичен: Тро́ице Свята́я сла́влю Тя́, Естество́ безнача́льное, еди́наго Бо́га, еди́наго Го́спода, три́ Ли́ца, Отца́, Сы́на и Ду́ха: нерожде́нна, рожде́нна, исхо́дна, Ту́южде и присносу́щну.

И ны́не, и при́сно, и во ве́ки веко́в, ами́нь.

Богоро́дичен: О, блаже́нная Богоневе́сто, ка́ко родила́ еси́ без му́жа, и пребыла́ еси́ я́коже пре́жде? Бо́га бо родила́ еси́, чу́до стра́шное: но моли́ спасти́ся пою́щым Тя́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Усече́ния удо́в ва́ших зря́ще, наслажда́стеся кровьми́ ра́дующеся: но моли́те о на́с приле́жно Го́спода, му́ченицы присносла́внии.

Сти́х: Ду́шы и́х во благи́х водворя́тся.

От земли́ созда́вый мя́, и оживи́вый мя́, и в зе́млю возврати́тися мне́ па́ки реки́й, я́же прия́л еси́ рабы́ твоя́ упоко́й, и от тли́ сме́ртныя возведи́, Го́споди.

Катавасиа: Б у́рею грехо́вною погружа́емь, я́ко во чре́ве ки́тове содержи́мь, с проро́ком зову́ Ти: возведи́ от тли́ живо́т мо́й Го́споди, и спаси́ мя.

Затем ектениа малая заупокойная:

Па́ки и па́ки ми́ром Го́споду помо́лимся.

Лик : Го́споди, поми́луй.

Еще́ мо́лимся о упокое́нии душ усо́пших рабо́в Бо́жиих пра́отец, оте́ц, и бра́тий на́ших, зде лежа́щих, и повсю́ду правосла́вных христиа́н, и о е́же прости́тися им вся́кому прегреше́нию во́льному же и нево́льному.

Лик : Го́споди, поми́луй.

Я́ко да Госпо́дь Бог учини́т ду́ши их, иде́же пра́веднии упокоя́ются.

Лик : Го́споди, поми́луй.

Ми́лости Бо́жия, Ца́рства Небе́снаго и оставле́ния грехо́в их, у Христа́, безсме́ртнаго Царя́ и Бо́га на́шего, про́сим.

Лик : Го́споди, поми́луй.

Го́споду помо́лимся.

Лик : Го́споди, поми́луй. (40 раз)

Священник : Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т миру Твоему́ дарова́вый: Сам, Го́споди, упоко́й ду́ши усо́пших раб Твои́х: пра́отец, оте́ц, и бра́тий наших, зде лежа́щих, и повсю́ду правосла́вных христиа́н, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное и́ми сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглас : Я́ко Ты еси́ воскресе́ние и живо́т, и поко́й усо́пших раб Твои́х: пра́отец, оте́ц, и бра́тий наших, зде лежа́щих, и повсю́ду правосла́вных христиа́н, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик : Ами́нь.

И поют:

Конда́к, гла́с 8:

Со святы́ми упоко́й/ Христе́, ду́шы ра́б Твои́х,/ иде́же не́сть боле́знь, ни печа́ль,/ ни воздыха́ние,/ но жи́знь безконе́чная.

И́кос:

Са́м Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся,/ и в зе́млю ту́южде по́йдем,/ я́коже повеле́л еси́ созда́вый мя́ и реки́й ми́:/ я́ко земля́ еси́, и в зе́млю оти́деши,/ а́може вси́ челове́цы по́йдем,/ надгро́бное рыда́ние творя́ще пе́снь:/ Аллилу́иа. [Три́жды.]

Пе́снь 7.

Ирмо́с: О́ троцы евре́йстии в пещи́/ попра́ша пла́мень дерзнове́нно,/ и на ро́су о́гнь преложи́ша, вопию́ще:/ бла́гослове́н еси́, Го́споди Бо́же, во ве́ки.

Припев: Преподо́бне о́тче Гера́симе, моли́ Бо́га о нас!

Све́т возсия́ тебе́, о́тче, и сопру́г сего́ весе́лие,/ в Небе́сных кро́вех при́сно водворя́ему, и песнопою́щу:/ благослове́н еси́, Го́споди Бо́же, во ве́ки.

Припев: Преподо́бне о́тче Гера́симе, моли́ Бо́га о нас!

Ту́чами сле́з напои́в твое́, Богоно́се, се́рдце,/ доброде́тельныя прозяба́еши плоды́,/ и́миже сла́дость Го́рнюю во ве́ки прия́л еси́ со все́ми преподо́бными.

Припев: Преподо́бне о́тче Гера́симе, моли́ Бо́га о нас!

Во усте́х нося́ пе́ние, в подража́нии непреста́нно а́нгельстем,/ бде́нным умо́м, Гера́симе, вопия́л еси́:/ благослове́н еси́, Го́споди Бо́же, во ве́ки.

Припев: Пресвятая Богородица, спаси нас!

Богоро́дичен: О́гнь ника́коже Тя́, Богоро́дице, Божества́ опали́, Де́во:/ Тя́ бо купина́ иногда́ образова́ше в горе́/ опаля́ема, Пречи́стая, и ника́коже сгара́ющи.

Припев: Святи́и му́ченицы, моли́те Бо́га о нас!

Обо́лкшеся страда́льцы в нетле́ние боже́ственное, обнаже́нием тле́нныя пло́ти, на́с ра́ди пло́ть от нетле́нныя Прие́мшему Жены́, ны́не предстоите́ све́тлии: сего́ ра́ди мя́ облецы́те во оде́жду свяще́нную обнаже́ннаго зло́бою.

Припев: Святи́и му́ченицы, моли́те Бо́га о нас!

Воздержа́нием пожи́вый, страда́льческий собо́р, воздержа́ния на́с по́прище укрепи́те тещи́ невозбра́нно, я́ко пропове́давый Христа́ на по́прищи му́жественно, и предстоя́й престо́лу венцено́сный, в наслажде́ние мы́сленно со а́нгелы.

Припев: Слава Тебе, Боже наш, слава Тебе!

Моли́твами, Бо́же, Твои́х святы́х му́ченик, усо́пшыя ве́рно рабы́ Твоя́, рая́ жи́тели покажи́, и све́та мы́сленнаго сподо́би я́, непреста́нно вопию́щыя Тебе́: благослове́н Бо́г отце́в на́ших.

Припев: Пресвятая Богородица, спаси нас!

Богоро́дичен: Тя́ еди́ну благу́ю мо́лим Де́во, озло́бленныя ны́ ублажи́, и приле́жно Христа́ моли́ естество́м су́ща блага́го, воздержа́ния вре́мя, блага́я де́ющым, испо́лнити на́м пою́щым Его́: благослове́н Бо́г отце́в на́ших.

И́ный.

Припев: Святи́и му́ченицы, моли́те Бо́га о нас!

Возвели́чивый святы́я Твоя́ вся́, зна́меньми удиви́в я́ в ми́ре: благослове́н еси́ во ве́ки Го́споди Бо́же отце́в на́ших.

Припев: Святи́и му́ченицы, моли́те Бо́га о нас!

Вся́кий ви́д ра́н проше́дше, и коле́на Ваа́лу не поко́ршеся преклони́ти, венцы́ сла́вы взя́сте от Бо́га, Христо́вы му́ченицы.

Сла́ва Отцу́, и Сы́ну, и Свято́му Ду́ху.

Тро́ичен: Во Еди́нице Тро́ице, покланя́емое Существо́, О́тче, Сы́не и Ду́ше, воспева́ющыя Тя́ сохраня́й, Бо́же отце́в на́ших.

И ны́не, и при́сно, и во ве́ки веко́в, ами́нь.

Богоро́дичен: Де́во Ма́ти Отрокови́це Всесве́тлая, еди́на к Бо́гу хода́тайство, не преста́й, Влады́чице, моли́ти спасти́ся на́м.

Сти́х: Святы́м, и́же су́ть на земли́ Его́, удиви́ Госпо́дь:

Безсме́ртному Царю́ во́инствовавше, и ве́ру к Нему́ показа́вше соверше́нную, кро́вь свою́ му́ченицы за Него́ излия́сте.

Сти́х: Блаже́ни, я́же избра́л, и прия́л еси́ Го́споди.

Иде́же све́т Тво́й жи́зни истека́ет, преложи́ я́же преста́вил еси́ от вре́менных, ве́рныя Твоя́ рабы́, Го́споди Бо́же оте́ц на́ших.

Катавасиа: Г лаго́лавый на горе́ с Моисе́ем, и о́браз де́вства явле́й в купине́, благослове́н еси́ Бо́же оте́ц на́ших.

Пе́снь 8.

Ирмо́с: Б огоглаго́ливии о́троцы, в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Припев: Преподо́бне о́тче Гера́симе, моли́ Бо́га о нас!

Просвеще́н предста́л еси́ Влады́це,/ по́стническими сия́ньми, чудоно́сче Гера́симе,/ и безпло́тных лико́м счи́слился еси́.

Припев: Преподо́бне о́тче Гера́симе, моли́ Бо́га о нас!

В беззло́бии житие́ проводи́в,/ лука́ваго седа́лище отню́д охуди́л еси́,/ по́стников красото́, Богому́дре Гера́симе.

Припев: Преподо́бне о́тче Гера́симе, моли́ Бо́га о нас!

Во оде́жду нетле́ния оде́ялся еси́,/ страсте́й совлече́нием, о́тче Богому́дре Гера́симе:/ и черто́г Боже́ственный досто́йно получи́л еси́.

Припев: Пресвятая Богородица, спаси нас!

Богоро́дичен: Я́ко благоуха́нный кри́н обре́т Тя́ во удо́лиих жития́, Пресу́щественный, Всечи́стая,/ Тобо́ю благоуха́ние ми́рови вдохну́.

Припев: Святи́и му́ченицы, моли́те Бо́га о нас!

Великоимени́тии Христо́вы страда́льцы, и честни́и в Бо́зе, вся́ воспева́ющыя па́мяти ва́шя, вели́ких согреше́ний, и та́мошних му́к изба́вите ны́, к Нему́ ва́шими вели́кими моли́твами.

Припев: Святи́и му́ченицы, моли́те Бо́га о нас!

Святоизбра́нное Христа́ Бо́га, и тве́рдое вои́стинну во́инство, му́ченик собо́ры освяти́те на́ш у́м и се́рдце, в сия́ святы́я дни́ по́стныя, ва́шими святы́ми моли́твами.

Припев: Слава Тебе, Боже наш, слава Тебе!

Изба́ви че́рвия му́чащаго, и скре́жета зу́бнаго, Го́споди, и вне́шния тьмы́ несвети́мыя, вся́ я́же ве́рою прия́л еси́: и учини́ сия́, иде́же све́т лица́ Твоего́ Христе́, сия́ет во ве́ки.

Припев: Пресвятая Богородица, спаси нас!

Богоро́дичен: Кре́ст Христо́в Честны́й, Богоро́дице Чи́стая, ви́девшыя и от се́рдца поклони́вшыяся ны́, Твои́ми ко Влады́це сподо́би моли́твами, ви́дети и Стра́сти Честны́я, страсте́й очище́нных.

И́ный.

Припев: Святи́и му́ченицы, моли́те Бо́га о нас!

О до́браго измене́ния, и́мже обрето́сте сме́ртию живо́т, священному́ченицы Христо́вы, огня́ и меча́, мра́за и звере́й ника́коже убоя́вшеся, и вопию́ще: по́йте Го́спода, и превозноси́те во вся́ ве́ки.

Припев: Святи́и му́ченицы, моли́те Бо́га о нас!

Горе́ ли́к а́нгельский, до́ле же мы́ земни́и, хва́лим му́ченицы Христо́вы, стра́нная страда́ния, и по́двиги ва́шего му́жества, благословя́ще, пою́ще Го́спода, и превознося́ще во вся́ ве́ки.

Благослови́м Отца́, и Сы́на, и Свята́го Ду́ха, Го́спода.

Све́т, Живо́т же и Животы́, почита́ю Тя́ Отца́, и Сы́на, и Ду́ха исхо́дна, Естество́ еди́но, три́ Ипоста́си, Бо́га Еди́наго поя́, благословлю́ Тя, пою́ Тя Го́спода, и превозношу́ тя во вся́ ве́ки.

И ны́не, и при́сно, и во ве́ки веко́в, ами́нь.

Кто́ не воспое́т Тя́ от земноро́дных, нескве́рная Чи́стая голуби́ца? Ты́ бо родила́ еси́ на́м Све́т вели́кий, жи́зни бога́тство, Иису́са Спа́са: Его́же пое́м хва́ляще я́ко Го́спода, и превозно́сим во вся́ ве́ки.

Сти́х: Ди́вен Бо́г во святы́х вои́х, Бо́г Изра́илев.

По́двиги чу́дныя, му́ченицы, сла́вяще ва́ша, благоде́теля и Бо́га благослови́м и покланя́емся, на по́прище по́двигов ва́с укрепи́вшаго: Его́же превозно́сим во вся́ ве́ки.

Сти́х: Ду́шы и́х во благи́х водворя́тся.

Ты́ сме́рти и живота́ Госпо́дь сы́й и Бо́г, преста́вльшихся благоче́стно воздвиза́яй, та́мо преложи́ в селе́ниих пра́ведных, благословя́щия, пою́щия Тя́, Го́споди, и превознося́щия во вся́ ве́ки.

Лик : Хва́лим, благослови́м, покланя́емся Го́сподеви.

И катавасию: З емля́, и вся́ я́же на не́й, мо́ре и вси́ исто́чницы, небеса́ небе́с, све́т и тьма́, мра́з и зно́й, сы́нове челове́честии, свяще́нницы благослови́те Го́спода, и превозноси́те Его́ во ве́ки.

Священник : Богоро́дицу и Ма́терь Све́та в пе́снех возвели́чим.

Лик : Вели́чит душа́ Моя Го́спода, и возра́довася дух Мой о Бо́зе, Спа́се Мое́м.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Я́ко призре́ на смире́ние ра́бы Своея́, се бо от ны́не ублажа́т Мя вси ро́ди. Честне́йшую:

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́. Честне́йшую:

Сотвори́ держа́ву мы́шцею Свое́ю, расточи́ го́рдыя мы́слию се́рдца их. Честне́йшую:

Низложи́ си́льныя со престо́л и вознесе́ смире́нныя, а́лчущия испо́лни благ и богатя́щияся отпусти́ тщи. Честне́йшую:

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его да́же до ве́ка. Честне́йшую:

Пе́снь 9.

Ирмо́с: У страши́ся вся́к слу́х/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва бы́в Челове́к./ Те́мже Пречи́стую Богоро́дицу, ве́рнии, велича́ем.

Припев: Преподо́бне о́тче Гера́симе, моли́ Бо́га о нас!

Стопа́м все́х, до́бре на земли́ ходи́вших, после́дуя,/ любо́вь име́л еси́, ве́ру, наде́жду,/ ме́рность, му́дрость и неоску́дную моли́тву,/ воздержа́ние неизрече́нное, о́тче Гера́симе,/ наслажда́яся чи́стыми восхожде́нии.

Припев: Преподо́бне о́тче Гера́симе, моли́ Бо́га о нас!

О, чу́до! Ка́ко, я́ко слове́сен повинова́шеся тебе́ зве́рь,/ повеле́нию твоему́, Гера́симе, со усе́рдием служа́,/ Бо́гу прославля́ющу твое́ житие́ равноа́нгельное,/ зна́мении, преподо́бне, и безчи́сленными дивесы́ и чудесы́?

Припев: Преподо́бне о́тче Гера́симе, моли́ Бо́га о нас!

Утвержде́ние яви́лся еси́ мона́шествующих и молча́щих, Богоно́се, наказа́ние:/ тесне́йшую бо воздержа́ния стезю́ ше́ствовал еси́,/ Боже́ственными наде́ждами ду́шу при́сно разширя́я./ Те́мже простра́нно в се́лех избра́нных обре́л еси́ селе́ние.

Припев: Преподо́бне о́тче Гера́симе, моли́ Бо́га о нас!

Процвел еси́, о́тче, во дво́рех Бо́га на́шего, я́ко фи́никс высокора́сленный,/ я́ко кипари́с возвели́чился еси́ Боже́ственными возноше́нии./ Отону́дуже па́мять твою́ ве́рно вси́ пра́зднуем:/ в ню́же мо́лимся, искуше́ний ны́ вся́ких спаси́.

Припев: Пресвятая Богородица, спаси нас!

Богоро́дичен: Нося́щи Емману́ила на руку́ Твое́ю, Чи́стая,/ я́коже Младе́нца, Богора́дованная, вопия́ла еси́:/ Ча́до Мое́ сладча́йшее,/ ка́ко пода́м Тебе́ сосе́ц, пита́ющему вся́ческая?/ Ка́ко повию́ Тя пелена́ми, мгло́ю повива́ющаго мо́ре?

Припев: Святи́и му́ченицы, моли́те Бо́га о нас!

Свети́льницы су́ще неле́стнии, Христо́вы страда́льцы, просвети́те на́шя по́мыслы, утверди́те твори́ти светоза́рная и чи́стая Бо́жия хоте́ния.

Припев: Святи́и му́ченицы, моли́те Бо́га о нас!

Ору́жия зрите́ся закала́ющая враги́, до́блии Христо́вы страда́льцы: но изба́вите на́с от стре́л лука́ваго предста́тельствы ва́шими.

Припев: Слава Тебе, Боже наш, слава Тебе!

Поко́й Ще́дре в не́дрех Авраа́мовых рабы́ Твоя́, ве́рою от на́с отше́дшыя, к Тебе́ вся́ческих Зижди́телю и Преблаго́му.

Припев: Пресвятая Богородица, спаси нас!

Богоро́дичен: Пло́ти моея́ умертви́ движе́ния, Бо́га пло́тию Ро́ждшая па́че ума́, и пода́ждь просвеще́ние мы́сли мое́й, чи́стый о́блак су́щи све́та.

Припев: Святи́и му́ченицы, моли́те Бо́га о нас!

Воспева́ем вси́ па́мяти ва́шя, му́ченицы прехва́льнии, по́двиги ви́дяще свяще́нных ва́ших страда́ний, и удиви́вшеся Христа́ велича́ем.

Припев: Святи́и му́ченицы, моли́те Бо́га о нас!

Дру́г ко дру́гу стра́ждуще глаго́лаху страстоте́рпцы: пло́ти не пощади́м, прииди́те, у́мрем о Христе́, да во вся́ ве́ки поживе́м лику́юще непреста́нно.

Сла́ва Отцу́, и Сы́ну, и Свято́му Ду́ху.

Тро́ичен: О, Тро́ице во еди́ном Естестве́, Тя́ воспева́ющия, О́тче нерожде́нный, и рожде́нный Сы́не, и Ду́ше исхо́дный, Твое́ю ми́лостию невреди́мы соблюди́.

И ны́не, и при́сно, и во ве́ки веко́в, ами́нь.

Богоро́дичен: Ра́дуйся Всечестна́я Чи́стая, де́вства похвало́, ма́терей утвержде́ние, челове́ков по́моще, и ми́ра ра́досте, Мари́е Ма́ти, и Рабо́ Бо́га на́шего.

Сти́х: Ди́вен Бо́г во святы́х Свои́х, Бо́г Изра́илев.

Ли́че святы́х, приими́ мольбу́ мою́: и я́ко сподо́бил мя́ еси́ Кре́ст целова́ти, и спаси́тельней стра́сти поклони́тися мне́, Христа́ моли́те.

Сти́х: Блаже́ни, я́же избра́л, и прия́л еси́, Го́споди.

Осла́би, оста́ви Ще́дре, к Тебе́ Человеколю́бцу преста́вленным, и си́х поко́й в селе́ниих избра́нных: Ты́ бо еси́ Жи́знь и Воскре́сние.

Катавасиа: В елича́ем вси́ человеколю́бие Твое́, Христе́ Спа́се на́ш, сла́во ра́б Твои́х, и ве́нче ве́рных, возвели́чивый па́мять Ро́ждшия Тя́.

Та́кже поем:

Досто́йно есть я́ко вои́стинну/ блажи́ти Тя, Богоро́дицу,/ Приснобла-же́нную и Пренепоро́чную/ и Ма́терь Бо́га на́шего./ Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Таже ектения малая:

Па́ки и па́ки ми́ром Го́споду помо́лимся.

Лик : Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик : Тебе́, Го́споди.

Священник : Я́ко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик : Ами́нь.

Чтец: Воздви́гни мя́, Го́споди, к Твоему́ песнопе́нию, и научи́ мя твори́ти во́лю Твою́, Святы́й, моли́твами, Го́споди, святы́х Твои́х, и спаси́ мя.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в, ами́нь.

Воздви́гни мя́, Го́споди, к Твоему́ песнопе́нию, и научи́ мя твори́ти во́лю Твою́, Святы́й, моли́твами, Го́споди, Богоро́дицы, и спаси́ мя.

⇐ Предыдущая123456Следующая ⇒

Поделиться: