Преподобная мати, Анна, моли Бога о нас.

Девственными добротами просвещена, богоблаженная, Анна, чистому Слову уневестилася еси, поживши пощением божественне, и Того живоносным стопам последовала еси, умерщвление страстей претерпевши.

Слава Отцу и Сыну, и Святому Духу!

Божественных отец наказанию последовала еси славная, Анна, и сих нраву чисте поревновала еси, воздержанием яко безплотна, и чистотою и девством поживши, преподобная, и истинным смирением.

И ныне, и присно, и во веки веков. Аминь

Божественную ручку и трапезу, хлеб животный понесшую, неделанную ниву, гору святую, Богородицу Деву песньми славим.

Катавасия:

Моли Бога о нас, преподобная мати, Анна, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Преподобная мати, Анна, моли Бога о нас.

В небесныя чертоги светозарныя вселилася еси, невеста избранна бывши Вседержителю, исцеления реки источаеши, Анна, страстная нам течения изсушающи.

Преподобная мати, Анна, моли Бога о нас.

Украсилася еси желанием крайним желающи Христа, премножеством благосердия, плотию обнищавшаго, и последовала еси животным Его словесем, житейская вся красная возненавидевши.

Слава Отцу и Сыну, и Святому Духу!

Позлащенне криле добродетели стяжавши, на высоту небесную возлетела еси блаженная, Анна, яко голубица нетленная.

И ныне, и присно, и во веки веков. Аминь

Род спасеся, Дево, человеческий благодатию обнищавшаго плотию, из чрева Твоего неизреченно; темже чтим Тя, и благочестно ублажаем, Пречистая Дево Богорадованная.

Моли Бога о нас, преподобная мати, Анна, яко мы усердно к тебе прибегаем, скорой помощнице и молитвеннице о душах наших. (Поклон.)

Господи, помилуй! Господи, помилуй! Господи, помилуй!

Кондак, глас 4

Днесь в светлой памяти твоей/ Великий Новград веселится,/ созывая всех верных светло праздновати память твою,/ и мы ныне, духовно ликовствующе,/ радостно славим тя и молим:/ святая благоверная княгине Анно,/ предстоя Святей Троице/ моли избавити Великий Новград и всю землю Русскую/ от всяких бед и обстояний и всем нам спастися.

Седален, глас 4

Красотами явилася еси девственно преукрашаема, постнических священных подвиг, яко невеста непорочная Дева Христова, и с Ним в нетленный вошла еси чертог, и красот Его наслаждаешися. Но моли спастися нам от всякия беды, любовию поющим тя.

Слава Отцу и Сыну, и Святому Духу! И ныне, и присно, и во веки веков. Аминь

Пресвятая Богородице — спаси нас!

Чистая всенепорочная, и неискусобрачная, едина безлетнаго Сына и Слово Божие в лете рождшая, Того со святыми и честными апостолы, мученики и пророки, и преподобными моли, даровати нам очищение, и велию милость.

Песнь 4

Ирмос: Услышах, Господи, смотрения Твоего таинство, разумех дела Твоя, и прославих Твое Божество.

Преподобная мати, Анна, моли Бога о нас.

Светлое твое торжество, светом сияющее Божия Духа, озаряет души наша верою поющих тя, Анна, преподобная.

Преподобная мати, Анна, моли Бога о нас.

Чудесы божественными уверила еси неведущих Владыку, и к познанию Его возвратила еси, прелести тьму оставльших.

Слава Отцу и Сыну, и Святому Духу!

Дары Христу принесла еси, чистое умерщвление удов, и труды воздержания, и противу прияла еси Небесное Царство, Анна, и вечнующее наслаждение.

И ныне, и присно, и во веки веков. Аминь

Смиривши спаси мя, высокомудрием живущаго, рождшая вознесшаго смирившееся естество наше, Пречистая.

Моли Бога о нас, преподобная мати, Анна, яко мы усердно к тебе прибегаем, скорой помощнице и молитвеннице о душах наших. (Поклон.)

Песнь 5

Ирмос: Утренююще вопием Ти: Господи, спаси ны, Ты бо еси Бог наш, разве Тебе иного не вемы.

⇐ Предыдущая123Следующая ⇒

Поделиться: