Благословим отца и Сына, и Святаго Духа.

Храм яви́вся, Иулиа́не, Боже́ственнаго Ду́ха, нра́вов бла́гостию украси́лся еси́,/ испо́лнь у́бо благогове́ния и све́тлости,/ испо́лнь же ве́ры яви́вся, сожига́емь весь,/ благослови́те, вопия́, вся дела́ Госпо́дня, Го́спода.

И ныне, Богоро́дичен: Безма́терне Сло́во, из Отца́ Сый, пе́рвее,/ безо́тчее же бысть из Тебе́, второ́е, Всечи́стая,/ вопло́бщься пе́рвее Безпло́тный, за милосе́рдие восхоте́в спасти́ пою́щия:/ благослови́те, вся дела́ Госпо́дня, Го́спода.

Катавасия: Руце́ распросте́р, Дании́л/ львов зия́ния в ро́ве затче́:/ о́гненную же си́лу утаси́ша,/ доброде́телию препоя́савшеся,/ благоче́стия рачи́тели отроцы, взывающе:/ благослови́те, вся дела́ Госпо́дня, Го́спода.

Та́же пое́м пе́снь Богоро́дицы: Вели́чит душа́ Моя́ Го́спода: с покло́ны.

Песнь 9.

Канон Октоиха Честно́му и Животворя́щему Кресту́ со ирмосом на 6.

Ирмо́с: Не рыда́й мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно я́ко Бо́г, ве́рою и любо́вию Тя́ велича́ющыя.

Да сне́дию истле́вшаго сла́достною Дре́ва, еди́не Спа́се, я́ко бла́г изба́виши от тли́, распя́тися пло́тию, и умертви́тися изво́лил еси́: пое́м непреста́нно, Иису́се, мно́гое благоутро́бие и си́лу Твою́.

О ка́ко претерпе́л еси́ боле́зни, на Кресте́ простира́емь, от боле́зней лю́тых изъима́я мя́, Спа́се? Ка́ко те́рниями венча́выйся, все́ попали́л еси́ страсте́й те́рние? Ка́ко о́цта напои́выйся, весе́лия ча́шу на́м раствори́л еси́?

Му́ченичен: Стесня́еми вси́, и в темни́цы вмета́еми, и на у́ды страда́льцы разсеца́еми лю́те, и по колесе́х же́стоко протяза́еми, и во снеде́ние звере́м вдава́еми, Христа́ все́х Влады́ки не отверго́стеся.

Му́ченичен: Со́лнечных сия́ний мно́жайши сия́ет страда́лец всесве́тлая и благознамени́тая па́мять: и ду́шы благочести́вых просвеща́ет всегда́, и отгоня́ет тьму́ страсте́й, и искуше́ний, и де́монский расточа́ет мра́к глубоча́йший.

Богоро́дичен: Но́сиши Нося́щаго вся́, и держи́ши я́ко Младе́нца на руку́, изба́вльшаго на́с от руки́ бори́теля врага́, Пречи́стая Влады́чице, и зри́ши возвы́шена на Дре́ве Кре́стнем из я́мы зло́бы на́с изба́вльшаго.

Кано́н ко Пресвяте́й Богоро́дице, глас 6 на 4.

Ирмо́с: Не рыда́й мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно я́ко Бо́г, ве́рою и любо́вию Тя́ велича́ющыя.

Ра́дости на́м ве́чныя и жи́зни яви́лася еси́, преесте́ственне Богороди́тельнице, Хода́таица, Чи́стая, Спа́са все́х ро́ждшая, от лица́ земна́го вся́ку сле́зу я́ве оте́мшаго, и все́м ра́дость пода́вшаго.

Поя́ Дави́д Тво́й Пра́отец, ковче́г Тя́ прорече́ знамена́тельне: и Боже́ственныя ма́нны злату́ю ру́чку, Моисе́й, Богоро́дицу: и́бо Еди́на вмести́ла еси́ и́же в не́дрех Отчих Су́ща при́сно, Богоро́дице. Те́мже Тя́ пе́сньми сла́вим.

Я́ко вои́стинну превы́шши всея́ тва́ри еси́: Бо́га бо все́х родила́ еси́ пло́тию. Те́мже Тя́ предста́тельницу и́мамы, Влады́чице, и наде́жду изве́стну, и сте́ну тве́рду, Тобо́ю спасе́ние улучи́ти наде́ющеся.

Кано́н страстоте́рпцев, глас 4 на 4.

Ирмо́с: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христос, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Еди́ну Небе́сную име́ти жизнь жела́юще, страстоте́рпцы,/ привре́менную и тле́нную велему́дренно преоби́десте/ и ны́не сла́дости лу́чшия и блаже́нный наслажда́етеся.

Внутрь ны́не Боже́ственнаго ра́я лику́ете усе́рдно,/ озаре́ний Исто́чнику предстоя́ще, му́ченицы славнии,/ от Него́же почерпа́юще, заря́ми просвеща́етеся.

Слава: Всех ве́рою творя́щих пресве́тлую твою́ па́мять, дванадеся́тный ли́че,/ ны́не помина́я ко Влады́це Христу́,/ с тобо́ю жили́ща сподо́битися помоли́ся.

И ныне, Богоро́дичен: Я́ко Ма́ти Еди́наго Влады́ки, всех тва́рей превы́шши была́ еси́, Де́во Мари́е./ Те́мже, ве́рнии, Тя вси, Всенепоро́чная,/ ны́не ра́дующеся и веселя́щеся, велича́ем.

Катавасия: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христос, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

⇐ Предыдущая1234Следующая ⇒

Поделиться: