В конец, псалом Давиду, 108.

⇐ ПредыдущаяСтр 5 из 8Следующая ⇒

Бо́же, хвалы́ моея́ не премолчи́, я́ко уста́ гре́шнича и уста́ льсти́ваго на мя отверзо́шася, глаго́лаша на мя язы́ком льсти́вым, и словесы́ ненави́стными обыдо́ша мя, и бра́шася со мно́ю ту́не. Вме́сто е́же люби́ти мя, оболга́ху мя, аз же моля́хся, и положи́ша на мя зла́я за блага́я, и не́нависть за возлюбле́ние мое. Поста́ви на него́ гре́шника, и диа́вол да ста́нет одесну́ю его. Внегда́ суди́тися ему́, да изы́дет осужде́н, и моли́тва его́ да бу́дет в грех. Да бу́дут дни́е его ма́ли, и епи́скопство его́ да прии́мет ин: да бу́дут сы́нове его́ си́ри, и жена́ его́ вдова́: дви́жущеся да преселя́тся сы́нове его и воспро́сят, да изгна́ни бу́дут из домо́в свои́х. Да взы́щет заимода́вец вся, ели́ка суть его́, и да восхи́тят чужди́и труды́ его. Да не бу́дет ему́ засту́пника, ниже́ да бу́дет ущедря́яй сироты́ его. Да бу́дут ча́да его в погубле́ние, в ро́де еди́ном да потреби́тся и́мя его. Да воспомяне́тся беззако́ние оте́ц его пред Го́сподем, и грех ма́тере его да не очи́стится. Да бу́дут пред Го́сподем вы́ну, и да потреби́тся от земли́ па́мять их. Зане́же не помяну́ сотвори́ти ми́лость, и погна́ челове́ка ни́ща и убо́га, и умиле́на се́рдцем умертви́ти. И возлюби́ кля́тву, и прии́дет ему, и не восхоте́ благослове́ния, и удали́тся от него. И облече́ся в кля́тву я́ко в ри́зу, и вни́де я́ко вода́ во утро́бу его, и я́ко еле́й в ко́сти его. Да бу́дет ему я́ко ри́за, в ню́же облачи́тся, и я́ко поя́с, и́мже вы́ну опоясу́ется. Сие́ де́ло оболга́ющих мя у Го́спода и глаго́лющих лука́вая на ду́шу мою. И Ты, Го́споди, Го́споди, сотвори́ со мною и́мене ра́ди Твоего, я́ко бла́га ми́лость Твоя. Изба́ви мя, я́ко нищ и убо́г есмь аз, и се́рдце мое смяте́ся внутрь мене́. Я́ко сень, внегда́ уклони́тися ей, отъя́хся, стрясо́хся я́ко пру́зи. Коле́на моя изнемого́ста от поста́, и плоть моя измени́ся еле́я ра́ди. И аз бых поноше́ние им, ви́деша мя, покива́ша глава́ми свои́ми. Помози́ ми, Го́споди Бо́же мой, и спаси́ мя по ми́лости Твоей, и да разуме́ют, я́ко рука́ Твоя сия́, и Ты, Го́споди, сотвори́л еси́ ю́. Проклену́т ти́и, и Ты благослови́ши: востаю́щии на мя да постыдя́тся, раб же Твой возвесели́тся. Да облеку́тся оболга́ющии мя в срамоту́, и оде́ждутся, я́ко оде́ждею, студо́м сво́им. Испове́мся Го́сподеви зело́ усты́ мои́ми, и посреде́ мно́гих восхвалю́ Его, я́ко предста́ одесну́ю убо́гаго, е́же спасти́ от гоня́щих ду́шу мою.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. (Трижды.)

Го́споди, поми́луй. (Трижды.)

Таже ектения малая:

Па́ки и па́ки ми́ром Го́споду помо́лимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик : Тебе́, Го́споди.

Священник : Я́ко Твоя́ держа́ва, и Твое́ есть Ца́рство и си́ла и сла́ва, Отца́ и Сына и Свята́го Ду́ха, ны́не и при́сно и во ве́ки веко́в.

Лик : Ами́нь.

И чтутся седальны Предтечи, глас 4-й:

Я́ко Боже́ственное сокро́вище, сокрове́но в земли́,/ Христо́с откры́ главу́ твою́ нам, проро́че и Предте́че:/ вси у́бо, соше́дшеся в сея́ обре́тение,/ пе́сньми Богогла́сными Спа́са воспое́м,/ спаса́ющаго на́шу жизнь моли́твами твои́ми.

Сла́ва Отцу́ и Сы́ну и Свято́му Ду́ху.

Изда́вшися, я́ко зла́то от руды́,/ свяще́нная твоя́ глава́ пресла́вно/ от незаходи́мых недр земны́х,/ обогати́ ве́рных вся мы́сли разуме́нием Боже́ственным,/ ны́не пока́йтеся, вопию́щи обы́чно./ Е́йже покланя́ющеся, Предте́че, Христа́ велегла́сно ве́рою сла́вим.

И ны́не и при́сно и во ве́ки веко́в. Ами́нь.

Никогда́же премолчи́м, Богоро́дице,/ благода́рно пе́ти от души́ Твоя́ ми́лости, Влады́чице,/ раби́ Твои́, зову́ще и глаго́люще:/ Пресвята́я Де́во, предвари́/ и изба́ви от враг ви́димых и неви́димых и всякаго преще́ния,/ Ты бо еси́ нам заступле́ние.

И поем полиелей:

Лик : Хвали́те И́мя Госпо́дне, хвали́те, раби́ Го́спода. Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме. Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́. Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́. Аллилу́иа, аллилу́иа, аллилу́иа.

И величание:

Духове́нство : Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.

Лик : Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.

И избранный псалом.

Блажен муж, бояйся Господа: в заповедех Его восхощет зело.

Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.

В память вечную будет праведник.

Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.

Праведник яко финикс процветет, яко кедр, иже в Ливане, умножися.

Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. (Дважды.)

Духовенство: Аллилу́иа, аллилу́иа, аллилу́иа, сла́ва Тебе́, Бо́же. (Еди́ножды)

Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.

Таже ектения малая:

Па́ки и па́ки ми́ром Го́споду помо́лимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик : Тебе́, Го́споди.

Священник : Я́ко Благослови́ся И́мя Твое́, и просла́вися Ца́рство Твое́, Отца́ и Сы́на и Свята́го Ду́ха ны́не и при́сно и во ве́ки веко́в.

Лик : Ами́нь.

И чтутся седальны по полиелеи, глас 8-й:

Крести́телева глава́ кры́яшеся, я́ко би́сер, в земли́ вла́жней/ и, я́ко све́щник Богосве́тел, укра́шена,/ озаря́ет, чудотворя́щи, мир весь:/ я́ко у́тро, возсия́ всеблаголе́пно Со́лнцу Предте́ча/ и невечерни́м све́том возвеща́я па́ки нам:/ се, – взыва́я, – А́гнец Бо́жий! (Дважды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Благодари́м Тя при́сно, Богоро́дице,/ и велича́ем, Чи́стая, и покланя́емся,/ воспева́юще Рождество́ Твое́, Благода́тная, вопию́ще непреста́нно:/ спаси́ ны, Де́во Всеми́лостивая, я́ко Блага́я,/ и де́монов исхити́ словоположе́ния стра́шнаго в час испыта́ния,/ да не посрами́мся, раби́ Твои́.

И поем Степе́нна, 1-й антифо́н 4-го гла́са:

Лик : От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Священник : Во́нмем. Прему́дрость во́нмем, Проки́мен, глас 4: Та́мо возращу́ рог Дави́ду,/ угото́вах свети́льник пома́занному Моему́.

Лик : Та́мо возращу́ рог Дави́ду,/ угото́вах свети́льник пома́занному Моему́.

Священник : Помяни́, Го́споди, Дави́да/ и всю кро́тость его́.

Лик : Та́мо возращу́ рог Дави́ду,/ угото́вах свети́льник пома́занному Моему́.

Священник : Та́мо возращу́ рог Дави́ду.

Лик : Угото́вах свети́льник пома́занному Моему́.

Священник : Го́споду помо́лимся.

Лик : Го́споди, поми́луй.

Священник : Я́ко Свят еси́ Бо́же наш, и во святы́х почива́еши, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик : Ами́нь.

Священник : Вся́кое дыха́ние да хва́лит Го́спода.

Лик : Вся́кое дыха́ние да хва́лит Го́спода.

Священник : Хвали́те Бо́га во святы́х Его́, хвали́те Его́ во устверже́нии си́лы Его́.

Лик : Вся́кое дыха́ние да хва́лит Го́спода.

Священник : Вся́кое дыха́ние.

Лик : Да хва́лит Го́спода.

Священник : И о сподо́битися нам слы́шанию Свята́го Ева́нгелиа, Го́спода Бо́га мо́лим.

Лик : Го́споди, поми́луй. (Три́жды)

Священник : Прему́дрость, про́сти, услы́шим Свята́го Ева́нгелия. Мир всем.

Лик : И ду́хови твоему́.

Священник : От Луки́ Свята́го Ева́нгелия чте́ние.

Лик : Сла́ва, Тебе́, Го́споди, сла́ва Тебе́.

Священник : Во́нмем.

Во врéмя о́но, изы́де сло́во о Иису́се по все́й Иуде́и, и по все́й стране́. И возвести́ша Иоа́нну ученицы́ его́ о все́х сих. И призва́в два не́кая от учени́к свои́х Иоа́нн, посла́ ко Иису́су, глаго́ля: Ты ли еси́ Гряды́й, или́ ино́го ча́ем? Прише́дша же к Нему́ му́жа, ре́ста: Иоа́нн Крести́тель посла́ нас к Тебе́, глаго́ля: Ты ли еси́ Гряды́й, или́ ино́го ча́ем, в То́й же ча́с изцели́ мно́ги от неду́г и ра́н и ду́х злы́х и мно́гим слепы́м дарова́ прозре́ние. И отвеща́в Иису́с рече́ и́ма: ше́дша возвести́та Иоа́нну, я́же ви́деста и слы́шаста, я́ко слепи́и прозира́ют, хромии ходят, прокаже́ннии очища́ются, глуси́и слы́шат, ме́ртвии востаю́т, ни́щии благовеству́ют. И блаже́н е́сть, и́же а́ще не соблазни́тся о Мне́. Отше́дшема же ученико́ма Иоа́нновома, нача́т глаго́лати к наро́дом о Иоа́нне: чесо́ изыдо́сте в пусты́ню ви́дети, тро́сть ли ве́тром коле́блему? Но чесо́ изыдо́сте ви́дети? Челове́ка ли в мя́гки ри́зы оде́яна? Се, и́же во оде́жди сла́вней и пи́щи су́щии, во ца́рствии суть. Но чесо́ изыдо́сте ви́дети? Проро́ка ли? Е́й, глаго́лю вам, и ли́шше проро́ка. Се́й бо е́сть, о не́мже пи́сано есть: се, А́з послю́ А́нгела Моего́ пред лице́м Твои́м, и́же устро́ит путь Тво́й пред Тобо́ю. Глаго́лю бо ва́м: бо́лий в рожде́нных жена́ми проро́ка Иоа́нна Крести́теля никто́же е́сть, мни́й же во Ца́рствии Бо́жии бо́лий его е́сть. И вси́ лю́дие слы́шавше, и мытари́е оправди́ша Бо́га, кре́щшеся креще́нием Иоа́нновым. Фарисе́е же и зако́нницы со́вет Бо́жий отверго́ша о себе́, не кре́щшеся от него́.

Лик : Сла́ва, Тебе́, Го́споди, сла́ва Тебе́.

Чтец: Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Лик : Сла́ва Отцу́ и Сы́ну и Свято́му Ду́ху.

Молитвами святаго славнаго Пророка, Предтечи и Крестителя Иоанна,/ Ми́лостиве, очи́сти// мно́жество согреше́ний на́ших.

И ны́не и при́сно и во ве́ки веко́в. Ами́нь.

Моли́твами Богоро́дицы,/ Ми́лостиве, очи́сти// мно́жество согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

И поют стихи́ру самогла́сну, глас 6:

Я́же пе́рвее на блю́де,/ И́родову беззако́нную нечистоту́ обличи́вшая,/ покая́ние же всем пропове́давшая ве́рным,/ честна́я глава́ Крести́теля Христо́ва,/ от сокро́вищ земны́х я́вльшаяся, предлежи́т,/ ве́рно притека́ющим к ней,/ и прикаса́ющимся со стра́хом,/ и покланя́ющимся любо́вию душе́вною/ дару́ющая разреше́ние прегреше́ний,/ проше́нием подае́т потре́бная и ве́лию ми́лость.

Священник : Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших: святи́теля Михаи́ла, пе́рвого митрополи́та Ки́евскаго, первосвяти́телей Моско́вских и всея́ Руси́: Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона, митрополи́тов Моско́вских Филаре́та, Инноке́нтия и Мака́рия. Святы́х, сла́вных и добропобе́дных му́чеников, новому́чеников и испове́дников Росси́йских: Влади́мира, митрополи́та Ки́евскаго, Вениами́на, митрополи́та Петрогра́дского, Петра́, митрополи́та Крути́цкаго, Иларио́на, архиепи́скопа Вере́йскаго, святы́х ца́рственных страстоте́рпцев, преподобному́чениц вели́кия княги́ни Елисаве́ты и и́нокини Варва́ры, преподо́бных и богоно́сных оте́ц на́ших, преподо́бных оте́ц ста́рцев О́птинских, святы́х пра́ведных Иоа́нна Кроншта́дтскаго и Алекси́я Мос-ко́вскаго, святы́х блаже́нных Ксе́нии Петербу́ржския и Матро́ны Моско́вския, святы́х и пра́ведных богооте́ц Иоаки́ма и А́нны (и святаго имярек, егоже есть храм и егоже есть день), и всех святы́х. Мо́лим Тя́, многоми́лостиве Го́споди, услы́ши нас, гре́шных, моля́щихся Тебе́, и поми́луй нас.

Лик : Го́споди, поми́луй. (12 раз)

Священник : Ми́лостию и щедро́тами и человеколю́бием единоро́днаго Твоего́ Сы́на, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Лик : Ами́нь.

И поем каноны: Предтечи и трипеснец Триоди .

Песнь 1.

Пое́м Го́сподеви, славно бо просла́вися, коня́ и всадника вве́рже в мо́ре.

Стих: Помо́щник и Покрови́тель бысть мне во спасе́ние, Сей мой Бог, и просла́влю Его, Бог отца́ моего́, и вознесу́ Его.

Стих: Госпо́дь сокруша́яй бра́ни, Госпо́дь и́мя Ему: колесни́цы фарао́новы, и си́лу его вве́рже в мо́ре.

Стих: Пучи́ною покры́ их, погрязо́ша во глубине́, я́ко ка́мень.

Стих: Тогда́ потща́шася влады́ки Едо́мстии, и князе́й Моави́тских, прия́т я́ тре́пет, раста́яша вси живу́щии в Ханаа́не.

Ирмо́с: Я́ ко по су́ху, пешеше́ствовав Изра́иль/ по бе́здне стопа́ми,/гони́теля фарао́на ви́дя потопля́ема,/ Бо́гу, побе́дную песнь пои́м, вопия́ше.

Стих: Нападе́т на ня страх и тре́пет, вели́чием мы́шцы Твоея́ да ока́менятся.

Гряди́те, благохва́льным язы́ком/ и всеси́льным пле́щуще ду́хом, из усте́н нечи́стых/ глас Сло́ва – Предте́чу пе́сньми духо́вными, ве́рнии, просла́вим.

Стих: До́ндеже про́йдут лю́дие Твои́, Го́споди, до́ндеже про́йдут лю́дие Твои́ си́и, я́же стяжа́л еси́.

Стих: Соде́лал еси́, Го́споди, святы́ню, ю́же угото́васте ру́це Твои́.

Ми́рным устрое́нием утиша́ется/ и безме́рными мно́жествы Христо́ва Це́рковь благостоя́тельне упаса́ется,/ тебе́ ле́тнюю песнь вопию́щи, Предте́че.

Стих: Госпо́дь, ца́рствуяй ве́ки, и на век, и еще́, егда́ вни́де конь фарао́нов с колесни́цами и вса́дники в мо́ре.

Стих: Сы́нове же Изра́илевы проидо́ша су́шею посреде́ мо́ря.

Ю́же от Бо́га да́руемую я́ко сокро́вище нам неотъе́млемо/ Богоно́сную главу́ Предте́чеву, вси пе́сньми досто́йно, соше́дшеся, ве́рнии, почти́м.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в. Ами́нь.

Богоро́дичен: Твоего́ прие́мши Соде́теля,/ я́ко Сам восхоте́, из безсе́меннаго Твоего́ чре́ва па́че ума́ воплоща́ема, Чи́стая,/ тва́рей вои́стинну яви́лася еси́ Влады́чица.

Катавасиа: О тве́рзу уста́ моя́,/ и напо́лнятся Ду́ха,/ и сло́во отры́гну Ца́ри́це Ма́тери,/ и явлю́ся, све́тло торжеству́я,/ и воспою́ ра́дуяся Тоя́ чудеса́.

Песнь 3.

Стих: Утверди́ся се́рдце мое́ во Го́споде, вознесе́ся рог мой о Бо́зе мое́м, разшири́шася уста́ моя́ на враги́ моя́, возвесели́хся о спасе́нии Твое́м.

Стих: Я́ко не́сть свят, я́ко Госпо́дь, и несть пра́веден, я́ко Бог наш, и несть свят, па́че Тебе́.

Стих: Не хвали́теся и не глаго́лите высо́кая в горды́ни, ниже́ да изы́дет велере́чие из уст ва́ших.

Стих: Я́ко Бог ра́зумов Госпо́дь, и Бог уготовля́яй начина́ния Своя́.

Стих: Дая́й моли́тву моля́щемуся и благослови́ ле́та пра́веднаго.

Ирмо́с: Н есть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Стих: Госпо́дь не́мощна сотвори́ супоста́та Его́, Госпо́дь Свят.

Утро́ба непло́дна прозябе́ние тя изнесе́ Боже́ственно,/ я́же от язы́к це́рковь, сла́вна невестово́дца,/ Христу́, и́стинному Бо́гу и Жениху́, сию́ обруча́юща.

Стих: Да не хва́лится прему́дрый прему́дростию свое́ю, и да не хва́лится си́льный си́лою свое́ю, и да не хва́лится бога́тый бога́тством свои́м.

Стих: Но о сем да хва́лится хваля́йся, е́же разуме́ти и зна́ти Го́спода, и твори́ти суд и пра́вду посреде́ земли́.

Твоего́ Боговеща́ннаго гла́са, Предте́че Иоа́нне,/ ниже́ мече́м удержа́ окая́нная прелюбоде́йца:/ Боже́ственную бо твою́ нам явля́вши главу́ от земли́.

Стих: Госпо́дь взы́де на небеса́, и возгреме́, Той су́дит конце́м земли́, Пра́веден сый.

Стих: И даст кре́пость царю́ на́шему, и вознесе́т рог христа́ Своего́.

Торжеству́ющий све́тло, жела́ющ тя град учрежда́емь быва́ет,/ я́ко бога́тство обре́тш та́йное/ и исто́чник неоску́ден исцеле́ний, Предте́че, главу́ твою́.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в. Ами́нь.

Богоро́дичен: Боже́ственнаго Рождества́ Твоего́, Чи́стая,/ вся́кий естества́ чин прехо́дит чу́до:/ Бо́га бо преесте́ственно зачала́ еси́ во чре́ве/ и, ро́ждши, пребывае́ши при́сно Де́ва.

Катавасиа:Т воя́ песносло́вцы, Богоро́дице,/ живы́й и незави́стный исто́чниче,/ лик Себе́ совоку́пльшия духо́вно, утверди́,/ в Боже́ственней Твое́й сла́ве/ венце́в сла́вы сподо́би.

Посем ектениа малая:

Священник : Па́ки и па́ки ми́ром Го́споду помо́лимся.

Лик : Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик : Тебе́, Го́споди.

Священник : Я́ко Ты еси́ Бог наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик : Ами́нь.

И чтем седален Предтечи с Богородичным его:

Я́ко в храни́лищи сокро́вище вложена́ Предте́чева глава́ храня́шеся,/ в водоно́се кры́ющася, глас Сло́ва;/ я́ко пшени́ца покрове́на, во глу́бине земли́ изцвете́,/ плодонося́щи Боже́ственную жизнь./ Тоя́ вси почита́ем обре́тение, Христа́ сла́вяще,/ пода́вшаго той благода́ть источи́ти исцеле́ния.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Повеле́нное та́йно прие́м в ра́зуме,/ в кро́ве Ио́сифове тща́нием предста́ безпло́тный, глаго́ля Неискусобра́чней:/ приклони́вый схожде́нием Небеса́ вмеща́ется неизме́нно весь в Тя./ Его́же и ви́дя в ложесна́х Твои́х, прие́мша ра́бий зрак,/ ужаса́юся зва́ти Тебе́:/ ра́дуйся, Невесто́ Неневе́стная.

Песнь 4.

Го́споди, услы́шах слух Твой, и убоя́хся, Го́споди, разуме́х дела́ Твоя́, и ужасо́хся.

Стих: Внегда́ смути́тися души́ мое́й во гне́ве, ми́лость Твою́ помяне́ши.

Стих: Бог от ю́га прии́дет, и Святы́й из горы́ приосене́нныя ча́щи.

Стих: Покры́ небеса́ доброде́тель Его́, и хвалы́ Его́ испо́лнь земля́.

Стих: Зане́ смо́ковь не плодопринесе́т, и не бу́дет ро́да в лоза́х.

Ирмо́с: Х ристо́с моя́ си́ла,/ Бог и Госпо́дь,/ честна́я Це́рковь,/ Боголе́пно пое́т, взыва́ющи,/ от смы́сла чи́ста о Го́споде пра́зднующи.

Стих: Со́лжет де́ло ма́слинное, и поля́ не сотворя́т я́ди.

Ве́тхаго был еси́ печа́ть, всебога́те, я́ве заве́та,/ и проро́ков коне́ц извести́л еси́,/ и чертогокраси́тель же Боже́ственный Но́ваго яви́лся еси́, Предте́че.

Стих: Оскуде́ша о́вцы от пи́щи, и не бу́дет воло́в при я́слех.

Стих: Аз же о Го́споде возра́дуюся, возвеселю́ся о Бо́зе, Спа́се мое́м.

Власяны́ми ру́бы обы́чно, Предте́че,/ честну́ю претерпе́л еси́ и сла́вную главу́ твою́ покры́ти ца́рскою багряни́цею,/ я́ко ри́зою, ра́дуяся.

Стих: Госпо́дь Бог мой, си́ла моя́, и учини́т но́зе мои́ на соверше́ние.

Стих: И на высо́кая возво́дит мя победи́ти ми в пе́сни Его́.

Боже́ственную главу́ твою́ отбеже́нием ни́щий и скита́яйся/ твои́ми Боже́ственными наставле́ньми,/ я́коже незави́стно бога́тство, Иоа́нне, пока́зует.

Сла́ва Отцу́ и Сы́ну и Свято́му Ду́ху.

Заре́ю, Предте́че, Боже́ственнаго Ду́ха чту́щий тя град всегда́ моли́ уясни́ти/ и Боже́ственней па́мяти твое́й безплотным сра́доватися.

И ны́не и при́сно и во ве́ки веко́в. Ами́нь.

Богоро́дичен: Ме́ртва мя показа́ сада́ вкуше́ние,/ живо́тное же дре́во, из Тебе́ я́вльшееся, Пречи́стая, воздви́же/ и ра́йския пи́щи насле́дника мя сотвори́.

Катавасиа: С едя́й в сла́ве на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:/ сла́ва, Христе́, си́ле Твое́й.

Песнь 5.

Ирмо́с: Б о́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

От но́щи у́тренюет дух мой к Тебе́, Бо́же, зане́ свет повеле́ния Твоя́ на земли́.

Не был еси́ трость, Крести́телю, искуси́тельными злополуче́ния ве́тры все́гда коле́блемь,/ столп же Боже́ственных люде́й непоколеби́м,/ си́лою бо Илиино́ю яви́лся еси́ и Ду́ха.

Стих: Пра́вде научи́теся, живу́щии на земли́.

И́же Божество́ отмета́яй, и умаля́я сла́ву от тебе́ кре́щшагося Христа́,/ и Боже́ственную благода́ть твою́ утаева́я,/ пра́ведно от огра́д Боже́ственных возбраня́емь есть.

Стих: Да во́змется нечести́вый, да не ви́дит сла́вы Госпо́дни. Го́споди, высока́ Твоя́ мы́шца, и не ве́деша, разуме́вше же постыдя́тся.

Отверзл еси́ незави́стнаго Боже́ственнаго исто́чника дверь/ пою́щим тя любо́вию, сла́вный Предте́че,/ Боже́ственныя благода́ти источа́ющия во́ды и струи́ исцеле́ний, всех веселя́щия.

Стих: За́висть прии́мет лю́ди ненака́занныя, и ны́не огнь супоста́ты поя́ст.

Богоро́дичен: Нося́щи добро́ту мы́сленную красне́йшия души́ Твоея́,/ Неве́ста Бо́жия была́ еси́,/ запеча́тствованна де́вством, Чи́стая, и заре́ю чистоты́ мир просвеща́ющи.

Стих: Приложи́ им зла, Го́споди, приложи́ зла сла́вным земли́.

Исцели́ мя, Го́споди, и исцелю́ся я́звою Твое́ю, души́ моея́ очи́стив я́звы, пло́тию стра́сти, Христе́, прие́мый.

Стих: Го́споди, в ско́рби помяну́хом Тя, в ско́рби ма́ле наказа́ние Твое́ нам.

Тебе́, я́коже ви́де пло́тию ви́сима, Христе́, на Дре́ве, све́т во тьму́ прелага́ше со́лнце, и земля́ подви́жеся, и ка́мение распадо́шася.

Стих: И я́ко боля́щая приближа́ется роди́ти, и в боле́зни свое́й вопия́ше, та́ко бы́хом возлю́бленному Твоему́.

Те́рнием обра́стшую и олядене́вшую мою́ ду́шу, вся́ких страсте́й ви́ды, Го́споди очи́сти, венча́выйся те́рнием, за кра́йнюю бла́гость.

Стих: Не паде́м, но паду́т живу́щии на земли́.

Богоро́дичен: Но́во породила́ еси́, я́ко Младе́нца, Всечи́стая, Соде́теля моего́: Его́же моли́, обетша́вшаго мя́ во мно́зе зло́бе обнови́ти, Влады́чице.

Стих: Воскре́снут ме́ртвии, и воста́нут и́же во гробе́х, и возвеселя́тся и́же на земли́.

На ме́сте Ло́бнем иуде́и Тебе́ распя́ша, Христе́, покива́ша глава́ми свои́ми, смею́щеся и руга́ющеся: Ты́ же терпе́л еси́, во е́же спасти́ на́с.

Стих: Ро́са бо, я́же от Тебе́, исцеле́ние им есть, земля́ же нечести́вых паде́т.

На ти́тле Креста́ Твоего́, написа́в Пила́т трегу́бо, еди́наго от Тро́ицы Тя́, во́лею пострада́вша явля́ше, за все́х спасе́ние, Христе́.

Сла́ва Отцу́ и Сы́ну и Свято́му Ду́ху.

Тро́ичен: Пресве́тлыя Тро́ицы, трисо́лнечное воспои́м ве́рнии, Све́т Отца́ чту́ще, Све́т Сы́на сла́вяще, Све́т и Ду́ха возвеща́юще.

И ны́не и при́сно и во ве́ки веко́в. Ами́нь.

Богоро́дичен: А́нгел вы́шшую, из Тебе́ рожде́йся показа́ Тя Чи́стая: Его́же бо они́ трепе́щут я́ко Бо́га зре́ти, Ты́ на ру́ку но́сиши я́ко Сы́на Твоего́ Чи́стая.

Сла́ва Тебе́,Бо́же на́ш, сла́ва Тебе́.

Кре́сте всечестны́й, спаси́тельный, ми́ру храни́телю, соблюди́ мя́ постя́щася, и досто́йна покажи́ твоего́ честна́го поклоне́ния.

Катавасиа: О т но́щи у́тренююще, воспева́ем Тя́ Христе́ Бо́же, обнища́вшаго на́с ра́ди, и Кре́ст и сме́рть пло́тию претерпе́вшаго

Песнь 6.

Возопи́х в ско́рби мое́й ко Го́споду Бо́гу моему́, и услы́ша мя.

Стих: Отве́ргл мя еси́ во глуби́ны се́рдца морска́го, и ре́ки обыдо́ша мя.

Стих: Вся высоты́ Твоя́, и во́лны Твоя́ мне преидо́ша.

Стих: Еда́ приложу́ призре́ти ми ко хра́му свято́му Твое́му;

Стих: Возлия́ся вода́ до души́ моея́, бе́здна обы́де мя после́дняя.

Ирмо́с: Ж ите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Стих: Понре́ глава́ моя́ в разсе́ли гор, снидо́х в зе́млю, ея́же вереи́ ея́ закле́пи ве́чнии.

Проро́ка тя рече́ И́стина–Христо́с, и проро́ков превы́шша,/ Крести́теля же и Предте́чу Жи́зни:/ Того́ бо узре́л еси́, Его́же зако́н и проро́цы провозвести́ша.

Стих: И да взы́дет из истле́ния живо́т мой к Тебе́, Го́споди, Бо́же мой.

Стих: И да прии́дет к Тебе́ моли́тва моя́ ко хра́му свято́му Твоему́.

Не терпя́ше кры́тися чуде́с исто́чник, сокро́вище благода́ти,/ сла́вная глава́ твоя́, Крести́телю, проро́че и Предте́че,/ но, я́вльшися, пролива́ет исцеле́ний исто́чники.

Стих: Храня́щии су́етная и ло́жная, ми́лость свою́ оста́виша.

Стих: Ели́ка обеща́х, возда́м Тебе́ во спасе́ние мое́ Го́сподеви.

Всебога́тно похвале́ние, и украше́ние све́тло,/ и щит спаси́телен христолю́бный сей/ и благосла́вный предлага́ет град твой,/ честну́ю и Боже́ственную твою́ главу́, Предте́че.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в. Ами́нь.

Богоро́дичен: Вели́кий прописа́ во проро́цех Моисе́й Тя, киво́т, и трапе́зу, и све́щник,/ и ста́мну обра́зне, назна́менуя воплоще́ние,/ е́же из Тебе́, Вы́шняго, Ма́ти Де́во.

Катавасиа: Б оже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Посем ектениа малая:

Священник : Па́ки и па́ки ми́ром Го́споду помо́лимся.

Лик : Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик : Тебе́, Го́споди.

Священник : Ты бо еси́ Ца́рь ми́ра и Спас душ на́ших, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик : Ами́нь.

И поем кондак и икос Предтечи:

Конда́к, глас 2.

Подо́бен: В ы́шних ища́:

Проро́че Бо́жий и Предте́че благода́ти,/ главу́ твою́, я́ко ши́пок свяще́ннейший, от земли́ обре́тше,/ исцеле́ния всегда́ прие́млем,/ и́бо па́ки, я́коже пре́жде, в ми́ре пропове́дуеши покая́ние.

И́кос:

От Го́спода свиде́тельство прие́м, Иоа́нне, па́че всех челове́к вы́шший был еси́,/ отону́дуже похвалы́ пе́сней принести́ тебе́ ужаса́юся,/ но, любо́вию понужде́н, песнь нача́ти дерзну́х./ Те́мже да не унедосто́иши споспе́шник мне бы́ти, всехва́льне,/ да возмогу́ венча́ти твой верх, святы́й требога́те,/ и́бо ты в ми́ре пропове́дуеши покая́ние.

Песнь 7.

Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки.

Стих: И вся дела́ Твоя́ и́стинна, и пра́ви путие́ Твои́,

Стих: И вси суди́ Твои́ и́стинни и судьбы́ и́стинны сотвори́л еси́.

Стих: И на град святы́й оте́ц на́ших Иерусали́м.

Стих: Благослове́н еси́, Го́споди Бо́же оте́ц на́ших, и препе́тый и превозноси́мый во ве́ки.

Ирмо́с: Р осода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Стих: И благослове́но и́мя сла́вы Твоея́ свято́е, препе́тое и превозноси́мое во ве́ки.

Де́вы прозябе́ние, тя па́че всех рече́ в рожде́нных жена́ми,/ я́ко бо безпло́тен и равноа́нгелен на земли́ Тому́ пожи́л еси́, вопия́:/ благослове́н еси́, Бо́же оте́ц на́ших.

Стих: Благослове́н еси́ в хра́ме святы́я сла́вы Твоея́, препе́тый и превозноси́мый во ве́ки.

Стих: Благослове́н еси́ ви́дяй бе́здны, седя́й на Херуви́мех, препе́тый и превозноси́мый во ве́ки.

Во утро́бе де́вственней Все́льшася позна́л еси́ из непло́дна чре́ва/ и, употреби́в ма́терня, Предте́че, гла́са, игра́я взыва́л еси́ Ему́:/ благослове́н еси́, Бо́же оте́ц на́ших.

Стих: Благослове́н еси́ на престо́ле сла́вы Ца́рствия Твоего́, препе́тый и превозноси́мый во ве́ки.

Стих: Благослове́н еси́ на тве́рди небе́сней, препе́тый и превозноси́мый во ве́ки.

От пусты́ни, Пресвяты́м Ду́хом науче́н, яви́лся еси́,/ я́коже у́тро светоно́сно,/ А́́нгел Све́та, нас науча́я вопи́ти:/ благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху.

Ублажи́ся я́ко вои́стинну во граде́х сей ны́не, приснопа́мятне,/ стяжа́вый тя град сокро́вище, Предте́че Христо́в./ Те́мже, пра́зднуя, вопие́т:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Тобо́ю, Ма́ти Де́во, Свет возсия́ всей вселе́нней све́тлый,/ Ты бо Зижди́теля всех родила́ еси́, Бо́га:/ у Него́же испроси́, Пречи́стая, нам низпосла́ти ве́рным ве́лию ми́лость.

Катавасиа: Н е послужи́ша тва́ри Богому́дрии,/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог благослове́н еси.

Песнь 8.

Ирмо́с: И з пла́мене преподо́бным ро́су источи́л еси́/и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Благослови́те вся дела́ Госпо́дня, Го́спода, по́йте и превозноси́те Его во ве́ки.

По́слан бысть вопию́щаго глас – Предте́ча запусте́вшим сердца́м,/ Сы́на Бо́жия ве́ру благочести́вую водружа́яй, су́щаго Бо́га,/ Его́же превозно́сим во вся ве́ки.

Стих: Благослови́те А́нгели Госпо́дни, небеса́ Госпо́дня, Го́спода, по́йте и превозноси́те Его́ во ве́ки.

Угото́вите, глаго́лет и ны́не Предте́ча, Госпо́дню стезю́:/ Сей бо святы́ни ра́ди, прише́д, со Отце́м и Ду́хом/ в на́ша сердца́ всели́тся во ве́ки.

Стих: Благослови́те во́ды вся, я́же превыше небе́с, вся си́лы Госпо́дни, Го́спода, по́йте и превозносите Его́ во ве́ки.

Слу́хом у́бо гла́су Роди́телеву, очи́ма же Боже́ственнаго Ду́ха зре́нию,/ вся́чески же осяза́нием Иоа́нн Предте́ча, на Тебе́ ру́ку положи́вый, Христе́,/ Богоно́сец быва́ет.

Стих: Благослови́те со́лнце и ме́сяц, зве́зды небе́сныя, Го́спода, по́йте и превозноси́те Его́ во ве́ки.

Из чре́ва освяти́ся Боже́ственным Ду́хом/ и проро́к яви́ся, во чре́ве носи́м,/ ны́не же наслажде́ние и́же в не́дрех тя иму́щему гра́ду показа́ся, проро́че.

Стих: Благослови́те вся пти́цы небе́сныя, зве́рие и вси ско́ти, Го́спода, по́йте и превозноси́те Его во ве́ки.

Богоро́дичен: Златоза́рный Тя све́щник предъизобрази́,/ при́емшую неизрече́нно Свет Непристу́пный,/ позна́нием Того́ озаря́ющ вся́ческая,/ Его́же превозно́сим во вся ве́ки.

Стих: Благослови́те сы́нове челове́честии, да благослови́т Израиль, Го́спода, по́йте и превозносите Его́ во ве́ки.

Просте́рл еси́ на Кресте́ Христе́ Твои́ дла́ни, руки́ пра́отца невоздержа́нное потребля́я: Дре́вом же дре́ва исцели́л еси́ кля́тву. Те́мже Тя́ пое́м во вся́ ве́ки.

Стих: Благослови́те свяще́нницы Госпо́дни, раби́ Госпо́дни, Го́спода, по́йте и превозноси́те Его́ во ве́ки.

Тебе́ воли́телю спасе́ния Сло́ве припа́даю, хоте́ния лука́вая уста́ви вско́ре от моего́ се́рдца, Кре́ст и страда́ние во́лею претерпе́вый.

Стих: Благослови́те ду́си и ду́ши пра́ведных, преподо́бнии и смире́ннии се́рдцем, Го́спода, по́йте и превозноси́те Его́ во ве́ки.

Блу́дную жи́знь и оскверне́ное житие́ возжела́в, омрачи́хся а́з блу́дный: осия́й ми́ лучу́ обраще́ния Сло́ве, со́лнца сия́ние в страда́нии омрачи́вый.

Стих: Благослови́те Ана́ния, Аза́рия, Мисаи́л, Го́спода, по́йте и превозноси́те Его́ во ве́ки.

Что́ Тебе́ пострада́вшему принесе́м, все́х Влады́це мы́ окая́ннии: на́с бо ра́ди Кре́ст претерпе́л еси́ Христе́. пое́м безме́рныя ми́лости Твоея́ благода́ть.

Стих: Благослови́те апо́столи, проро́цы и му́ченицы Госпо́дни, Го́спода, по́йте и превозноси́те Его во ве́ки.

На дре́ве воздвиго́ша Христе́ иуде́е, за́вистию уби́вшии Тя́, не ума́лиша держа́вы сла́вы Твоея́ беззако́ннии: еси́ бо все́х Влады́ка во́лею пострада́вый.

Благослови́м Отца́ и Сы́на и Свята́го Ду́ха, Го́спода.

Тро́ичен: Пресу́щественнаго Божества́ три́ Лица́ почита́ю: Отца́ безнача́льна, Сы́на, и Ду́ха Свята́го, Естество́м несеко́мое Существо́ сла́влю во ве́ки.

И ны́не и при́сно и во ве́ки веко́в. Ами́нь.

Богоро́дичен: Небе́с вы́шшую, и херуви́м превы́шшую, святопе́рвую и нескве́рную Отрокови́цу все́х Бо́га пое́м, и превозно́сим во вся́ ве́ки.

Сла́ва Тебе́ Бо́же на́ш, сла́ва Тебе́.

Преблаже́нне Кре́сте Христо́в, небопи́санная побе́до, от земли́ на́м прозя́бл еси́, твоего́ поклоне́ния досто́йны покажи́ ны вся́, посто́м очи́стившыяся.

Лик : Хва́лим, благослови́м, покланя́емся Го́сподеви, пою́ще и превознося́ще во вся ве́ки.

И поем катавасию: П есносло́вцы в пещи́ спа́сшаго де́ти, и громопла́менную прело́жшаго на ро́су, Христа́ Бо́га по́йте, и превозноси́те во вся́ ве́ки.

Священник: Богоро́дицу и Ма́терь Све́та в пе́снех возвели́чим.

Лик : Вели́чит душа́ Моя Го́спода,/ и возра́довася дух Мой о Бо́зе, Спа́се Мое́м.

Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Я́ко призре́ на смире́ние рабы́ Своея́,/ се бо от ны́не ублажа́т Мя вси ро́ди. Честне́йшую:

Я́ко сотвори́ Мне вели́чие Си́льный,/ и свя́то И́мя Его́, и ми́лость Его́ в ро́ды родо́в боя́щимся Его́. Честне́йшую:

Сотвори́ держа́ву мы́шцею Свое́ю,/ расточи́ го́рдыя мы́слию се́рдца их. Честне́йшую:

Низложи́ си́льныя со престо́л, и вознесе́ смире́нныя;/ а́лчущия испо́лни благ, и богатя́щияся отпусти́ тщи. Честне́йшую:

Восприя́т Изра́иля о́трока Своего́, помяну́ти ми́лости,/ я́коже глаго́ла ко отце́м на́шим, Авраа́му и се́мени его́, да́же до ве́ка. Честне́йшую:

Песнь 9.

Ирмо́с: Б о́га/ челове́ком невозмо́жно ви́дети,/на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.

Я́ве исполне́ния десяти́цы, Предте́че, за́поведей ты храни́тель кре́пок быв,/ прили́чне от Христа́ почте́н был еси́ дарова́ний десяти́цею./ Те́мже тя, Ду́ха таи́нника и дру́га Сло́ву, ве́дуще, ублажа́ем.

Стих: И воздви́же рог спасе́ния нам, в дому́ Дави́дове о́трока Своего́.

Христо́в проро́к же и апо́стол, А́́нгел же и Предте́ча,/ Боже́ственнаго воплоще́ния Крести́тель,/ и свяще́нник, и му́ченик ве́рен,/ пропове́дник же су́щим во а́де ты был еси́,/ и де́вствующим пра́вило, и пусты́ни прозябе́ние.

Стих: Я́коже глаго́ла усты́ святы́х, су́щих от ве́ка проро́к Его́, спа́сение от враг на́ших и из руки́ всех ненави́дящих нас.

Души́ неве́рие облича́ется священноде́йственныя руки́ умерщвле́нныя чудесе́м,/ прозя́бший же па́ки ве́ре и твое́й я́вльшейся главе́, блаже́нне,/ поже́ртая длань обновля́ется.

Стих: Сотвори́ти ми́лость со отцы́ на́шими и помяну́ти заве́т святы́й Свой.

Твое́, явле́ние провозвеща́юще зри́телю,/ возвеща́ху А́нгельстии чи́ни нело́жно,/ Гаврии́ла подо́бящеся Боже́ственному благове́щению,/ е́же пре́жде Рождества́ твоего́ свяще́нный 3аха́рия прие́млет.

Стих: Кля́тву, е́юже кля́тся ко Авраа́му, отцу́ на́шему, да́ти нам без стра́ха, из руки́ враг на́ших изба́вльшимся.

Богоро́дичен: Страсте́й исцеле́ния да почерпа́ем, в сла́вный храм Предте́чев притека́юще:/ в той бо прихо́дят А́нгельстии ли́цы,/ ду́си же пра́ведных всех,/ Влады́чица с Крести́телем Иоа́нном, исцеле́ния подава́юще.

Стих: Служи́ти Ему́ преподо́бием и пра́вдою пред Ним вся дни живота́ на́шего.

Окамене́нное ожесточе́ние души́ моея́, Благоутро́бне Спа́се, омы́й, и исто́чник да́ждь ми́, Бла́же, Боже́ственнаго умиле́ния, из ре́бр источи́вый мне́ жи́знь, беззако́ния моего́ пото́ки потребля́ющую.

Стих: И ты, отроча́, проро́к Вы́шняго нарече́шися, преды́деши бо пред лице́м Госпо́дним угото́вати пути́ Его́.

Самаго́ себе́ вве́рг во глубины́ грехо́в, высоты́ оста́вив доброде́телей: но привлецы́ и спаси́ мя, возше́дый на Кре́ст, и челове́чество привлеки́й к Себе́, Го́споди.

Стих: Да́ти ра́зум спасе́ния лю́дем Его́, во оставле́ние грех их, милосе́рдия ра́ди ми́лости Бо́га на́шего.

Сла́дость сы́й, Го́споди, и наслажде́ние, я́ко Соде́тель, же́лчи вкуси́л еси́, Христе́, от сла́дости су́щее отпаде́ние, е́же из Ада́ма Ты́ исправля́я: те́мже Тя́ пое́м, спа́сшиися Твои́ми страстьми́.

Стих: В ни́хже посети́ нас Восто́к с высоты́, яви́тися во тьме и се́ни сме́ртней седя́щим.

Тебе́, Его́же беззако́ннии, Христе́, оде́яша руга́тельно в порфи́ру и вене́ц, я́ко Царю́ руга́ющеся, тро́стию главу́ Твою́ ударя́юще, распина́юще за́вистию, и же́лчию напая́юще, пе́сньми, вси́ ве́рнии, велича́ем.

Стих: Напра́вити но́ги на́ша на путь ми́рен.

Тя́, Его́же со́лнце ви́дящее стра́ждуща на Кресте́, све́т сокры́, все́й вку́пе тва́ри, Влады́чним досажде́нием преклоня́ющейся и распа́дающымся ка́мением, пе́сньми, Христе́ Спа́се, велича́ем.

Сла́ва Отцу́ и Сы́ну и Свято́му Ду́ху.

Тро́ичен: Све́т и Жи́знь и Вседе́тель, трисо́лнечное Еди́нство, Бо́г же и Госпо́дь, еди́нем све́том сия́я, сооблиста́я треми́ начерта́ньми во еди́ном Божестве́, Сего́, вси́ ве́рнии, велича́ем.

И ны́не и при́сно и во ве́ки веко́в. Ами́нь.

Богоро́дичен: Тебе́, Ю́же Дави́д певе́ц пропове́да Сио́н, в ню́же всели́ся небесы́ невмести́мый, и созда́ от утро́бы Твоея́, ми́ру очище́ние, пе́сньми, Ма́ти Чи́стая, велича́ем.

Сла́ва Тебе́ Бо́же на́ш, сла́ва Тебе́.

Тво́й спаси́тельный Кре́ст, просвети́теля ве́рных, сподо́би, Го́споди, воздержа́нием теку́щия предвари́ти, ви́дети, и поклони́тися, во освяще́ние на́ше, да Тя́ и́м велича́ем.

Катавасиа: Т я́, Ю́же ви́де Моисе́й неопали́мую купину́, и ле́ствицу одушевле́нную, ю́же Иа́ков ви́де, и две́рь небе́сную, е́юже про́йде Христо́с Бо́г на́ш, пе́сньми, Ма́ти Чи́стая, велича́ем.

Посем ектениа малая:

Священник : Па́ки и па́ки ми́ром Го́споду помо́лимся.

Лик : Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик : Тебе́, Го́споди.

Священник : Я́ко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик : Ами́нь.

И чтем светилен Предтечи с Богородичным его:

Светоявле́нная возсия́ честна́я твоя́ глава́ от незаходи́мых недр земны́х, Предте́че Иоа́нне,/ свети́льниче Све́та невеще́ственнаго,/ ея́же обре́тение любо́вию соверша́юще, мо́лим тя/ лю́тых обрести́ разреше́ние и вре́мя удо́бне соверши́ти воздержа́ния/ моли́твами твои́ми, всехва́льне, Крести́телю Спа́сов.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Утеша́ется, Всечи́стая, ве́рных Богому́дрое собра́ние слу́жащее/ и ве́рно воспева́ющее Тя, Богоро́дицу и́стинно./ Те́мже моли́твами Твои́ми поста́ тече́ние даждь нам соверши́ти Боголе́пно,/ и Кресту́ Честно́му поклони́тися, и страсте́м спаси́тельным Сы́на и Бо́га Твоего́.

⇐ Предыдущая 1 2 3 456 7 8 Следующая ⇒

Последнее изменение этой страницы: 2019-04-10; Просмотров: 293; Нарушение авторского права страницы