Посем бывает вход с Евангелием. Иерей благословляет вход.

Священник: Прему́дрость, про́сти.

Лик: Све́те тихий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й, те́мже мир Тя сла́вит.

Священник: Во́нмем. Мир всем. Прему́дрость, во́нмем.

Чтец: П роки́мен, глас четвертый: Да́ждь на́м по́мощь от ско́рби, и су́етно спасе́ние челове́ческо.

Лик: Да́ждь на́м по́мощь от ско́рби, и су́етно спасе́ние челове́ческо.

Чтец: Бо́же отри́нул ны́ еси́, и низложи́л еси́ на́с.

Лик: Да́ждь на́м по́мощь от ско́рби, и су́етно спасе́ние челове́ческо.

Чтец: Да́ждь на́м по́мощь от ско́рби.

Лик: И су́етно спасе́ние челове́ческо.

Священник: Премудрость.

Чтец: Бытия́ чте́ние.

Священник: Во́нмем.

Чтец: Се́де ковче́г в ме́сяц седьмы́й в два́десять седьмы́й де́нь ме́сяца, на гора́х Арара́тских. Вода́ же уходя́щи умаля́шеся да́же до деся́таго ме́сяца: и в деся́тый ме́сяц, в пе́рвый де́нь ме́сяца яви́шася верси́ го́р. И бы́сть по четы́редесятих дне́х отве́рзе Но́е око́нце ковче́га, е́же сотвори́. И посла́ вра́на [ви́дети, а́ще уступи́ла вода́ от лица́ земли́,] и изше́д не возврати́ся, до́ндеже изся́че вода́ от земли́. И посла́ голуби́цу по не́м, ви́дети, а́ще уступи́ла вода́ от лица́ земли́. И не обре́тши голуби́ца поко́я нога́ма свои́ма, возврати́ся к нему́ в ковче́г, я́ко вода́ бя́ше по всему́ лицу́ всея́ земли́: и просте́р ру́ку свою́, прия́т ю́, и внесе́ ю́ к себе́ в ковче́г. И преме́длив еще́ се́дмь дне́й, па́ки посла́ голуби́цу из ковче́га: И возврати́ся к нему́ голуби́ца к ве́черу, и име́яше суче́ц ма́сличен с ли́ствием во усте́х свои́х: и позна́ Но́е, я́ко уступи́ вода́ от лица́ земли́. И преме́длив еще́ се́дмь дне́й други́х, па́ки посла́ голуби́цу, и не преложи́ возврати́тися к нему́ пото́м. И бы́сть в пе́рвое и шестьсо́тное ле́то жития́ Но́ева, в пе́рвый де́нь пе́рваго ме́сяца, изся́че вода́ от лица́ земли́ и откры́ Но́е покро́в ковче́га, его́же сотвори́, и ви́де, я́ко изся́че вода́ от лица́ земли́. В ме́сяц же вторы́й, в два́десять седьмы́й де́нь ме́сяца и́зсше земля́. И рече́ Госпо́дь Бо́г Но́еви, глаго́ля: Изы́ди из ковче́га ты́, и жена́ твоя́, и сы́нове твои́, и жены́ сыно́в твои́х с тобо́ю: И вся́ зве́ри ели́цы су́ть с тобо́ю, и вся́ку пло́ть от пти́ц да́же до ското́в, и вся́к га́д дви́жущийся по земли́ изведи́ с собо́ю: и расти́теся и мно́житеся на земли́. И изы́де но́е, и жена́ его́, и сы́нове его́, и жены́ сыно́в его́ с ни́м: И вси́ зве́рие, и вси́ ско́ти, и вся́ пти́цы, и вся́ га́ды дви́жущыяся по ро́ду своему́ на земли́, изыдо́ша из ковче́га. И созда́ Но́е же́ртвенник Го́сподеви: и взя́ от все́х ското́в чи́стых и от все́х пти́ц чи́стых, и вознесе́ во всесожже́ние на же́ртвенник. И обоня́ Госпо́дь воню́ благоуха́ния.

Священник: Во́нмем.

Чтец: П роки́мен, глас шесты́й: Услы́ши Бо́же моле́ние мое́, вонми́ моли́тве мое́й.

Лик: Услы́ши Бо́же моле́ние мое́, вонми́ моли́тве мое́й.

Чтец: От коне́ц земли́ к Тебе́ воззва́х.

Лик: Услы́ши Бо́же моле́ние мое́, вонми́ моли́тве мое́й.

Чтец: Услы́ши Бо́же моле́ние мое́.

Лик: Вонми́ моли́тве мое́й.

Священник же, взем обема рукама кадильницу, и свещник со свещею, стоит пред святою трапезою, зря к востоком, и назнаменуя крест, глаголет: П рему́дрость, про́сти.

Таже, обратяся на запад к народу, глаголет: С вет Христо́в просвеща́ет всех.

Чтец: При́тчей чте́ние.

Священник: Во́нмем.

Чтец: Уста́ пра́веднаго ка́плют прему́дрость: язы́к же непра́веднаго поги́бнет. устне́ муже́й пра́ведных ка́плют благода́ти, уста́ же нечести́вых развраща́ются. Ме́рила льсти́вая ме́рзость пред Го́сподем: ве́с же пра́ведный прия́тен Ему́. Иде́же а́ще вни́дет досажде́ние, та́мо и безче́стие: уста́ же смире́нных поуча́ются прему́дрости. умира́яй пра́ведник оста́ви раска́яние, удо́бна же быва́ет и посмея́тельна нечести́вых поги́бель. Соверше́нство пра́вых наста́вит и́х: и поползнове́ние отрица́ющихся плени́т и́х. не упо́льзуют име́ния в де́нь я́рости: пра́вда же изба́вит от сме́рти. Пра́вда непоро́чнаго исправля́ет пути́, нече́стие же впа́дает в непра́вду. Пра́вда муже́й пра́вых изба́вит и́х, безсове́тием же уловля́ются беззако́ннии. Сконча́вшуся му́жу пра́ведну, не поги́бнет наде́жда: похвала́ же нечести́вых поги́бнет. Пра́ведный от ло́ва убе́гнет, в него́же ме́сто предае́тся нечести́вый. Во усте́х нечести́вых се́ть гра́жданом, чу́вство же пра́ведных благопоспе́шно. Во благи́х пра́ведных испра́вится гра́д, и в поги́бели нечести́вых ра́дование. Во благослове́нии пра́вых возвы́сится гра́д, усты́ же нечести́вых раскопа́ется. Руга́ется гра́жданом лише́нный ра́зума, му́ж же му́др безмо́лвие во́дит.

Священник : Мир ти. Прему́дрость.

И по обычаю поется: Д а испра́вится моли́тва моя:

По исполнении великого прокимна и молитвы прп. Ефрема с треми поклонами:

Священник: Во́нмем. Мир всем.

Чтец: И ду́хови твоему́.

Священник: Прему́дрость.

Чтец: П роки́мен, глас седьмый: Возвесели́тся пра́ведник о Го́споде/ и упова́ет на Него́.

Лик: Возвесели́тся пра́ведник о Го́споде/ и упова́ет на Него́.

Чтец : Услы́ши, Бо́же, глас мой,/ внегда́ моли́ти ми ся к Тебе́.

Лик: Возвесели́тся пра́ведник о Го́споде/ и упова́ет на Него́.

Чтец : Возвесели́тся пра́ведник о Го́споде.

Лик: И упова́ет на Него́.

Священник : Прему́дрость.

Чтец : К Кори́нфяном посла́ние свята́го апо́стола Па́вла чте́ние.

Священник: Во́нмем.

Чтец :  Бра́тие, Бог реки́й из тмы све́ту возсия́ти, и́же возсия́ в сердца́х на́ших, к просвеще́нию ра́зума сла́вы Бо́жия о лице́ Иису́с Христо́ве. И́мамы же сокро́вище сие́ в скуде́льных сосу́дех, да премно́жество си́лы бу́дет Бо́ жия, а не от нас. Во всем скорбя́ще, но не стужа́ющеси, неча́еми, но не отчаява́еми, гони́ми, но не оставля́еми, низлага́еми, но не погиба́юще. Всегда́ ме́ртвость Го́спода Иису́са в те́ле нося́ще, да и живо́т Иису́сов в те́ле на́шем яви́тся. При́сно бо мы живи́и в смерть предае́мся Иису́са ра́ди, да и живо́т Иису́сов яви́тся в ме́ртвенней пло́ти на́шей. Те́мже смерть у́бо в нас де́йствует, а живо́т в вас. Иму́ще же то́йже дух ве́ры, по пи́санному: ве́ровах, те́мже возглаго́ лах, и мы ве́руем, те́мже и глаго́лем, ве́дяще, я́ко Воздви́гий Го́спода Иису́са, и нас со Иису́сом воздви́гнет, и предпоста́вит с ва́ми. Вся бо вас ра́ди, да благода́ть умно́ жившаяся, мно́жайшими благодаре́нии избы́точествит в сла́ву Бо́жию.

Священник: Мир ти, чтущему.

Чтец: И ду́хови твоему́.

Священник : Прему́дрость.

Чтец: Аллилу́иа, глас 4: Пра́ведник, я́ко фи́никс, процвете́т, я́ко кедр, и́же в Лива́не, умно́жится.

Лик: Аллилу́иа, аллилу́иа, аллилу́иа.

Чтец: И́стина от земли́ возсия́,/ и пра́вда с Небесе́ прини́че.

Лик: Аллилу́иа, аллилу́иа, аллилу́иа.

Священник : Прему́дрость, про́сти, услы́шим Свята́го Ева́нгелия. Мир всем.

Лик : И ду́хови твоему́.

Священник : От Матфе́а Свята́го Ева́нгелия чте́ние.

Лик : Сла́ва, Тебе́, Го́споди, сла́ва Тебе́.

Священник : Во́нмем.

Во вре́мя о́но, слы́шав Иоа́нн во узи́лищи дела́ Христо́ва, посла́ два от учени́к свои́х, рече́ Ему́: Ты ли еси́ Гряды́й, или́ ино́го ча́ем? И отвеща́в Иису́с рече́ им: ше́дша возвести́та Иоа́ннови, я́же слы́шита и ви́дита. Слепи́и прозира́ют и хро́мии хо́дят, прокаже́ннии очища́ются и глуси́и слы́шат, ме́ртвии востаю́т и ни́щии благовеству́ют. И блаже́н есть, и́же а́ще не соблазни́тся о Мне. Те́ма же исходя́щема, нача́т Иису́с наро́дом глаго́лати о Иоа́нне: чесо́ изыдо́сте в пусты́ню ви́дети? Трость ли ве́тром коле́блему? Но чесо́ изыдо́сте ви́дети? Челове́ка ли в мя́кки ри́зы облече́нна? Се, и́же мя́ккая нося́щии, в доме́х ца́рских суть. Но чесо́ изыдо́сте ви́дети? Проро́ка ли? Ей, глаго́лю вам, и ли́шше проро́ка. Сей бо есть, о не́мже есть пи́сано: се Аз посыла́ю А́нгела Моего́ пред лице́м Твои́м, и́же угото́вит путь Твой пред Тобо́ю. Ами́нь глаго́лю вам, не воста́ в рожде́нных жена́ми бо́лий Иоа́нна Крести́теля, мний же во Ца́рствии Небе́снем бо́лий его́ есть. От дней же Иоа́нна Крести́теля досе́ле Ца́рствие Небе́сное ну́дится, и ну́ждницы восхища́ют е́. Вси бо проро́цы и зако́н до Иоа́нна прореко́ша. И а́ще хо́щете прия́ти, той есть Илиа́ хотя́й приити́. Име́яй у́ши слы́шати да слы́шит.

Лик : Сла́ва, Тебе́, Го́споди, сла́ва Тебе́.

⇐ Предыдущая12345678

Поделиться: