Благословенъ Богъ, просвещаяй всякаго человека, грядущаго въ мiръ.

И присоединяемого вопрошает:

Чтиши ли соборы Вселенския: Халкидонский, Константинопольский 2-ой, Константинопольский 3-й, Никейский 2-ой, и приемлиши ли утвержденныя сими соборы догматы и правила?

О. Почитаю и приемлю.

В. Святейшему Патриарху и православным архипастыремъ, яко преемникомъ апостольскимъ, от Святаго Духа поставленнымъ, обещаеши ли достодолжное почитание и въ делехъ духовныхъ послушание?

О. Обещаю от искренняго сердца.

Посем предстоятель подает присоединяемому конец омофора, аще святитель, или конец епитрахили, аще иерей, и глаголет:

Вниди в Церковь Православную, и совершенно отринув заблуждения, в нихже был еси, чти Отца Вседержителя, Сына Его Иисуса Христа, и Духа Святаго, иже от Отца исходит, Троицу единосущную и нераздельную.

И тако введ, поставляет его пред амвоном, идеже на столе положени суть Крест и Евангелие. Идущим же им, поется псалом 66:

Боже, ущедри ны и благослови ны, просвети лице Твое на ны и помилуй ны: познати на земли путь Твой, во всех языцех спасение Твое. Да исповедятся Тебе людие, Боже: да исповедятся Тебе людие вси. Да возвеселятся и да возрадуются языцы: яко судиши людем правостию и языки на земли наставиши. Да исповедятся Тебе людие, Боже, да исповедятся Тебе людие вси. Земля даде плод свой: благослови ны, Боже Боже наш, благослови ны, Боже: и да убоятся Его вси концы земли.

Таже предстоятель повелит ему колена преклонити и глаголет сам стихи сия:

Посли Духъ Твой, и созиждутся, и обновиши лице Земли.

Спаси раба Твоего, Боже мой, уповающаго на Тя.

Буди ему, Господи, столпъ крепости отъ лица вражия.

Господи, услыши молитву мою, и вопль мой къ Тебе да приидетъ.

По изглаголании, диакону рекшу: Господу помолимся, и клиру: Господи, помилуй, чтет со умилением молитву сию:

Господи Боже Вседержителю, согрешающимъ образы покаяния предлагаяй и заблуждшимъ путь правый показуяй, во еже бы ни единому погибнути, но всемъ мощно бе спастися. Благодаримъ Тя, яко и сему рабу Твоему (имя рекъ) возсиялъ еси светъ познания Твоея истины, и сподобилъ еси его ко святей Твоей Православно-Кафоличестей Церкви прибегнути. Даждь убо ему соединитися оней нелицемерно и невозвратно: сопричти его избранному Твоему стаду: сотвори его сосудъ честенъ и жилище Святаго Твоего Духа, яко да темъ всегда просвещаемь и наставляемь, спасительныя заповеди Твоя нерушимо соблюдетъ, и тако небесныхъ Твоихъ благихъ восприятия сподобится. Ты бо еси Богъ милости и щедротъ и человеколюбия, и Тебе славу возсылаемъ, Отцу и Сыну и Святому Духу, ныне и присно и во веки вековъ. Аминь.

По молитве повелевает ему возстати,глаголя:

Стани добре, стани со страхомъ, и предъ Евангелиемъ и святымъ Крестомъ Спасителя утверди данное тобою обещание.

Он же, возстав, речет:

Веру православно-кафолическую, юже ныне добровольне исповедую, целу и ненарушиму даже до конечнаго моего издыхания, Богу помогающу, твердо содержати, и заповеди ея радетельно и радостно исполняти потщуся, соблюдая въ непорочности, елико мощно сердце мое. Во уверение сего моего обещания целую словеса и Крест Спасителя моего. Аминь.

По лобызании, предстоятель глаголет:

Благословенъ Богъ, хотяй всемъ человекомъ спастися и въ разумъ истины приити, сый благословенъ во веки.

Клир: Аминь.

Посем глаголет:

Приклони колена Твоя предъ Господемъ Богомъ, егоже исповедалъ еси, и приимеши оставление греховъ твоихъ.

Приклоншу ему колена и главу, предстоятель разрешает его, сице:

Господь нашъ Иисусъ Христосъ, ключи царствия небеснаго апостоломъ вручивый, и давый имъ и ихъ преемникомъ власть вязати и решити грехи человековъ, чрезъ мене, недостойнаго архиерея (иерея), прощаетъ тя, чадо (имя рекъ), и разрешаетъ от связания клятвеннаго или запрещения, и от всехъ греховъ Твоихъ. И азъ, данною мне от Него властию, присоединяю тя ко православней Церкви и привожду ко общению божественныхъ Таинствъ церковныхъ, и благословляю тя Именемъ Отца и Сына и Святаго Духа. Аминь.

Посем присоединенный станет, ожидая Литургии.

 

⇐ Предыдущая12

Поделиться: