Молитва перед Фёдоровскою иконою Пресвятой Богородицы

      (можно читать без иконы)

О, Премилосердная Мати, Царица Богородица!

Приими смиренное моление наше, и не отрини нас, заступление и прибежище наше, и не возгнушайся нас недостойных, но яко милосердая Мати, не престани молящи, Его же родила еси, да дарует нам прощение многих согрешений наших, да спасет нас ими же весть судьбами; помилуй нас, Владычица, помилуй нас, нет бо нам спасения от греховных дел.

Темже верно вопием к Тебе, помилуй чада Твои, и неплодное сердце наше покажи плодоносно делами благими; призри на нас недостойных, Ты бо еси упование и покров наш, жизнь и свет сердцу нашему; яко невечерний свет от чрева Твоего воздвигшая, озари душу нашу и отжени всяку мглу от сердца нашего; даруй нам умиление, покаяние и сокрушение сердечное, сподоби нас во все дни жизни нашей творити волю Сына Твоего и Бога нашего и во всем благоугождати Ему единому.

О, Богомати! Не престани молить рожденного от Тебе за всех притекающих с верою к сему святому (или чудотворному) образу Тво­ему, и подавая им скорую помощь и утешение в скорбях и напастях и злостраданиях, избави их от клеветы и злобы человеческой, от врагов видимых и невидимых, и всякой нужды и печали.

Спаси отечество наше, царствующий град наш, град сей (или святую обитель сию) и все грады и страны от всяких бед и нужд, и сотвори милостива нам быти Бога нашего, отврати всякий гнев Его, на нас движимый, и избави нас от належащего и праведного Его прещения.

О, Боголюбивая Владычица, ангелов украшение, мучеников слава и всех святых радость! С ними моли Отца нашего, да сподобит нас в покаянии скончати жизни нашей течение; в смерти же час, пресвятая Дева, избави нас от власти бесовской, и осуждения, и ответа, и страшного испытания, и мытарств горьких, и огня вечного, да сподобившеся славного Царствия Божия, величаем Тебя и славим воплощенного от Тебе Христа Бога нашего, Ему же слава со Отцом и Святым Духом ныне, присно и во веки веков.

4. Молитва Божией Матери пред иконой Её «Взыскание погибших » (можно читать без иконы)

Заступница усердная, Благоутробная Бога Мати! К Тебе прибегаю я, окаянный и паче всех человек грешнейший: прислушайся голосу моления моего, вопль мой и стенание услыши, яко беззакония мои превзошли гла­ву мою, и я, яко корабль в пучине, погружаюся в море грехов моих.

Но Ты, Всеблагая и Милосердная Владычица, не презри меня, отчаянного и во грехах погибающего; помилуй меня, кающегося во злых делах моих, и обрати на путь правый заблуждшую окаянную душу мою. На Тебя, Владычица моя Богородица, возлагаю все упование мое. Ты, Мати Божия, сохрани и соблюди меня под кровом Твоим, ныне и присно, и во веки веков.

 

5. Молитва из Благодарственного Канона Пресвятой Богородице        56.26-0

Нескверная, Неблазная, Нетленная, Пречистая Богородице, Пренепорочная Владычице, Небесная Царице, Мати Царя вышних Сил, Творца небесе и земли, едина радости Ходатаице всему миру, рождшая Бога нашего Иисуса Христа, земным всем Спасителя!

Вопию Ти, припадая; приими молебное сие пение благодарственное от вернаго чада Твоего и от скверных устен моих; не презри мене, Всегосподованная Царице, ибо никтоже притекаяй к Тебе, посрамлен бысть. или кто, призываяй Тя, не услышан от Тебе изыде; яко вся стихии, небо и земля, воздух и море повинуются Тебе, и все противнии дуси страхом обдержими трепещут, боящеся имене святаго Твоего, ведуще Тя, Матерь Божию.

Кто паки, надежду возложивый на Тя, погибе? Точию отметающиися покланятися образу Твоему написанному, егоже вся силы небесныя чтут; вся же колена земная, христианский род и всяк возраст верных, славословяще, покланяемся, Пречистая, благоговейно почитающе. Не имамы бо инаго Бога, разве Сына Твоего, со Отцем присно и Духом Святым, во Едином Божестве, от всея твари славимаго и покланяемаго; и Тебе, Госпожу Богородицу исповедуем, истиннаго Бога нашего Матерь, и любезно вси почитаем,

Госпоже, Милостива убо нам Сына Твоего сотвори, паче же покажи на мне обычное Твое милосердие, можеши бо елика хощеши; умоли о мне, яко удалихся от Него за безчисленная и скверная беззакония моя, и толико прогневах благоутробие Его, и огорчих человеколюбную Его благость и многое милосердие и милость; яко несмь достоин от Него помилован быти, аще не Ты умилостивиши Его о мне, Царице и Богомати, яко вся Тебе от Него возможна суть. Сего ради к Тебе прибегаю, теплой Помощнице и скорой Заступнице: не имам бо иныя разве Тебе к Нему Ходатаицы.

Ей, Царице моя Владычице, Пречистая Богородице, несть ми инаго высочайшаго на земли и на небеси, якоже Ты по Бозе моем Иисусе Христе, и на Тя всю мою надежду имам, Пречистая Дево. Темже на Твой пресвятьй образ взирая, яко истинную Самую Тя зрю Богородицу; верою сердечною и любовию от души припадая, покланяюся Тебе с Превечным Твоею на руку держимым Младенцем, Богом нашим Иисус Христом, боголепно почитая, и молебная пения и молитвы принося Ти, ужасаюся, и трепещу за недостоинство мое, и вопию Ти: помилуй мя, Мати Божия, и покажи на мне, убозем, древния милости Твоя.

Якоже иногда древле всесильным Твоим воеводством спасла еси царствующий град Твой от скифскаго воево­ды зверообразнаго, лукаваго вепря, предстателя бесом, онаго прегордаго кагана; и разсвирепеющим морем тьмочисленная воинства потопила еси, вопиющая и нападающая на град Твой; и паки, с небесе одождением горящих камык тьмы кораблей в мори вреющем разварила еси; и ныне, едина Богомати, едина Ты таяжде сущи, яви на мне человеколюбное Твое заступление.

Победи невидимыя полки сатанины, душевный мой град распленившия, царствующую душу мою в нем стрелою беззакония уязвившия, и всего мя мечи любодействия изсекшия, и греховным [увы! ] копием прободшия; ибо еле жива оставиша, и в рове греховном затвориша мя нечувствия, и окаменение сердечное наложиша ми, яко едва ощущаюся, не могий от порабощения тех свободитися. Но к Тебе, Матери Бога моего, рыданием слез зову: предстани ми в помощь скоро, да не до конца погибну; исхити мя из руки тех, и извлецы мя из греховнаго рова; возстави паки душевный мой град и ума владыку в нем воцари, и над всеми чувствы укрепи, неприступна и страшна врагом покажи; да все уведят, яко Тобою содержимь есмь.

Спасающи спаси, Владычице Дево, душу мою, якоже Твой град иногда, на Тя уповающий, спасла еси на славу и заступление верным, на посрамление же нечестивым, и во веки на безконечное их мучение: на величие же и похвалу от рода в роды правоверному христианскому роду. Темже Твою помощь проповедую велегласно, и онаго Твоего великаго заступления страшное воеводство воспоминая, Тебе, взбранной Воеводе победительная, восписую сын Твой, Богородице, и молебное сие акафистово приношу благодарение.

Приими е, и принеси Твоему Сыну и Богу, и о мне, Царице, с небесными вои и с лики святых всех, Ему предложи; в день же Судный не забуди мене и недостойнаго моего моления, и веры моея, яже к Тебе, я всё упование мое, возложенное на Тя, воспомяни.

Утеши оскорбленнаго мене, и телесное облегчи озлобление, душевные же болезни и страсти телесныя прежде всех потреби Твоим невидимым предстательством и ходатайством; да путь маловременнаго сего жития добре и непреткновенно возмогу прейти и вечная оная благая получу, и славословлю Твое твердое заступление; яко благословенна еси с рождшимся от Тебе Сыном и Богом ныне и в безконечныя веки.

 

⇐ Предыдущая25262728293031323334Следующая ⇒

Поделиться: