Мученица Татиана, моли Бога о нас.

Богатство тленное, мученице, совершенно пренебрегла еси, на Небесех нетленное и пребывающее ищущи усердно, и, радующися, прошла еси мученическое страдание.

 

Мученица Татиана, моли Бога о нас.

 

К ранам, к болезнем и биением многовидным безбоязненно, мученице, отлучилася еси: споспешествующую бо имела еси благодать Спасову и укрепляющую тя.

 

Слава Отцу и Сыну и Святому Духу, и ныне и присно и во веки веков. Аминь.

 

Богородичен.

Источник безстрастия рождшая, уязвеннаго страстьми, Отроковице, исцели и огня вечнаго исхити мя, Едина Богоблагодатная.

 

Песнь 3.

 

Не поколеба столпа твоего сердца стекшее мук треволнение, утвердися бо на камени любве Христовы, всехвальная, к Немуже взывала еси: яко несть свят, паче Тебе, Господи.

 

Мученица Татиана, моли Бога о нас.

 

Человеческую немощь Понесый, впери силою немощь твою на некрепкаго змия. Тем, мученице, на землю низвергла еси, верно зовущи: яко несть свят, паче Тебе, Господи.

 

Мученица Татиана, моли Бога о нас.

 

Потоки изсушила еси беззакония струями кровей твоих, блаженная, сладости же потока ныне наслаждаешися и во Свете Невечернем обитаеши, зовущи: яко несть свят, паче Тебе, Господи.

 

Слава Отцу и Сыну и Святому Духу, и ныне и присно и во веки веков. Аминь.

 

Богородичен: Зачатие и рождество Твое паче слова, веки бо Создавшаго словом родила еси, Избавльшаго безсловесия мира концы, Отроковице Неискусомужная, Егоже моли всегда, еже спасти нас.

 

Припев.

Моли Бога о нас, мученица Татиано, яко мы усердно к тебе прибегаем,  скорой помощнице и молитвеннице о душах наших.

 

Господи, помилуй (40 раз).

 

Заступи, спаси, помилуй, сохрани, Господи рабы Твоя (имена поминаемых).

 

Молитвами святых отец наших, Господи Иисусе Христе, Боде наш, помилуй нас. Аминь.

 

Тропарь, глас 4.

Агнцу Пречистому и Пастырю последуя, агнице словесная Татиано мысленных зверей не убоялася еси, но знамением крестным вооружившися, до конца тех низложила еси, и вошла еси в Небесную ограду, идеже помяни и нас, мученице Христова многомудрая.

Песнь 4.

Красно душевное устроение благолепием благочестия Татиана носящи, еще же мучения светом преславно сияющи, к чистому Жениху вселяется.

Мученица Татиана, моли Бога о нас.

Железом твое лице стружущия пребеззаконныя невидением Небеснии Ангели мучаху, посланнии к твоей от Бога, мученице, помощи, иже твоему терпению удивишася.

Мученица Татиана, моли Бога о нас.

Законно Христа проповедающи, победила еси пребеззаконнующия, жертва же непорочна благоприятна совершеннейшая Тому принеслася еси, взывающи: Тебе любящи, Спасе, закалаюся.

Слава Отцу и Сыну и Святому Духу, и ныне и присно и во веки веков. Аминь.

Богородичен.

Ко пристанищу тихому мя направи, Богоневесто Всесвятая: буря бо мя волнует и смущение греха люте, ветры колеблемь лукавых духов, оскорбляющих мя.

Песнь 5.

Твою честную и блаженную страсть подражающи, безстрастием Тебе сочтавшаяся страждет преусердно, на уды ссекаемая, Жизнодавче Христе, зовущи: иного, разве Тебе, бога не знаю.

Мученица Татиана, моли Бога о нас.

Страх Божий во утробе мыслию приемши, дух спасительнаго исповедания и мучения родила еси преславно, доблемудрая, твердым страданием и сопротивная начала посрамила еси.

 

Мученица Татиана, моли Бога о нас.

Светлыми сияеши зарями, уясняема Духа Святаго светолитием, и озаряеши верных сердца, греховный мрак разоряющи, мученице, страстотерпице Христова досточудная.

Слава Отцу и Сыну и Святому Духу, и ныне и присно и во веки веков. Аминь.

Богородичен.

Светлый Солнца Облаче, осияй ми зарю, решащу мрак моих прегрешений, даждь ми руку, впадшему в тину греховную, воздвигни мя, лежащаго, Едина падшаго Адама исправление.

Песнь 6.

На древе яко позна простерта Тя мученица честная, терпит повешение и строгания телесная за любовь Твою, Всемощне.

 

⇐ Предыдущая12345Следующая ⇒

Поделиться: