О княженіи, прочихъ Сибирскихъ князей.

По князѣ же Маметѣ княжилъ на Сибири Ябалаковъ сынъ Агишъ, по немъ же Маметовъ сынъ Казымъ, посемъ же Казыевы дѣти Етигеръ, Бекбулатъ, Бекбулатовъ сынъ Сейдакъ.

О царѣ Кучумѣ.

Пріиде же степью изъ Казацкой орды царь Кучумъ Муртазеевъ сынъ со многими воинскими людьми и доиде до города Сибири, и градъ Сибирь взя, князей Етигера и Бекъбулата уби, и прозвася Сибирскій царь, и мнози языцы повинны себѣ сотвори, и превознесеся мыслію своею, и сего ради погибе, по глаголющему: Господь гордымъ противится, смиреннымъ же даетъ благодать. Бекбулатовъ же сынъ Сейдякъ отъ убіенія царя Кучума соблюденъ бысть и изведенъ въ Бухарскую землю; царь же Кучумъ царствовова въ Сибири лѣта довольна во изобиліи и радости и въ веселіи, дани и оброки со многихъ языкъ имаше, даже до лѣта Господня повелѣнія, въ няжъ Богъ возхотѣ царство его разрушить и предати его Православнымъ Христіанамъ.

О вѣрѣ Царя Кучума.

Законъ же царя Кучума и иже подъ его властію быша Махмета проклятово, и ниже кумиромъ покланяющеся[5]… Аще кто предлежитъ Махметовымъ заповѣдемъ и внемлетъ ученикомъ его анаѳема. Сирѣчь, да будетъ проклятъ, паче же идолопоклонникъ … проклятіе же есть неправленіе во царѣхъ и нестроеніе въ воинствѣ его, во всѣхъ же людехъ пря и мятежъ, многа рати воздвиженіе, чадъ не наслѣдіе; бѣдами жъ и напастьми скорбе многа, яко сего ради посла на сихъ гнѣвъ свой[6] на сего царя Кучума и иже подъ его властію бысть, яко закона Божія не вѣдуще и покланяющеся идоламъ и жруще бѣсомъ, а не Богу благому, ихъ же не вѣдуще, яко же древле при законодавцѣ Моисеѣ и сотвориша Израительскіе люди тельца и вмѣсто Бога поклонишася ему и рѣкоша: се боги твои Израилю, и сего ради посла на нихъ Господь гнѣвъ свой, зміемъ повелѣ поучати ихъ, кіиждо ихъ уязвляеми отъ змія умираху, и паки Господь милосердова о нихъ и вложи въ сердце блаженному Моисею. Онъ же Божіимъ мановеніемъ подвижимъ, сотвори змію мѣдну и превознесе ю на трость, прообразуя Христово разпятіе, уязвляемижъ отъ зміи зазираху на ону змію изцѣлеваху; … они же и сію обожиша и начаша ю тако Богохвалить, и сего ради тьмами казнишася, гладомъ и язвами, плѣномъ и ратію и различными раззореньми, яко же блаженъ Моисей въ спѣніи[7] и въ девтеромін (второзаконіи), предвозвѣщая непокорливымъ Іудеямъ въ будущее имъ послѣднимъ озлобленіи ихъ, глагола Господь и возревновавъ, и разгнѣвася гнѣвомъ, ради сыновъ своихъ и дщерей, имѣя бо бѣсомъ пожрети я, и рече Богъ, отвращу лице мое отъ нихъ, яко прогнѣваша Мя въ идолѣхъ своихъ, и ещежъ отеческое Божіе Его попеченіе разумѣемъ, имъ же о насъ печется и покрываетъ, яко птица птенцы своя, такожъ и отъ сихъ идолопоклонникъ отврати Богъ лице свое, идолъ ради и жертвъ ихъ кровныхъ и казни ихъ, ни гладомъ же, ни моромъ, ни огнемъ жги, ни каменіемъ побивая, но сопротивъ посла мечъ обоюду остръ, постигая, и поядая и изкореняя, и шли предавая бѣсовская идоложертвія и ихъ поклонники и служители.

О пришествіи Ермаковѣ и прочихъ въ Сибирь.

Посла Богъ очистить мѣсто и побѣдить бусорманскаго царя Кучума и раззорить Богомерзкая и нечестивая капища, и о еже быша возгнежденіе звѣремъ и водвореніе сириномъ; избра бичь не отъ славныхъ мужъ, ни Царска повелѣнія воеводъ, и вооружи славою и ратоборствомъ атамана Ермака Тимоѳѣева сына и съ нимъ 540 человѣкъ; Забыта бо сіи свѣта сего честь и славу, но смерть въ животъ преложиша, и возириемши щитъ истинныя вѣры, и утвердившеся мужественно, и показавше храбрость предъ нечестивыми; не поскорбѣша бо о суетныхъ міра, сладкое и покойное житіе отринутша, жестокоежъ и бранно дѣло, оружія и щитъ возлюбиша, не даша бо покоя своимъ скрапіямъ, ни зенницамъ дреманіе, доиде же Божію помощь прияша на окаянныхъ бусорманъ; не оскудно бо излитіе крови своея и сихъ возприяша и учащаеми ранами отъ стрѣлъ ихъ верженія окаянныхъ Агарянъ. Вдаша плещи своя на раны, они бо окаянни яростію претяше имъ и гордяся паче … но храними Божіими дланьми; писано бо есть: не убойся исполинъ, ни звѣря устрашися, ниже возтрепещешь желѣза, ни крокодила устъ, имя бо поборника паче всякаго каменія твердости. Такожъ и сіи воини положиша упованіе на Господа твердо и вси глаголюще: достойно умреть за истинную вѣру и пострадать за православіе и Благочестивому Царю послужити, не отъ многихъ бо вой побѣда бываетъ, но отъ Бога свыше. Истинны убо воистинну сія словеса, немногимъ вой побѣдиша шатаніе поганыхъ, и быстро ихъ низверзиша превысшая и омириша гордыя, и по всей Сибирстѣй земли ликоваху стонами свободными, ни отъ когожъ возбраняеми, и отъ сихъ поставиша грады и Святыя Божіи церкви воздвигоша. Аще древле Сибирская земля идоложертвіемъ помрачишася, и нынѣ же благочестіемъ сія отпаде, бѣсовская служба изтребиша , идольская сокрушишася, Боговидѣніе всади, Троица единосущная несозданное Божество прославляя, да по глаголющему: во всю землю изыдоша вѣщанія ихъ и въ концы вселенныя глаголы ихъ, Божественнымъ бо апостоломъ, аще и не благослови Богъ произходить сія страна, на проповѣждь ихъ повсюду изыдоша.

⇐ Предыдущая12345Следующая ⇒

Поделиться: