О посланіи къ Государю въ Москву атамана съ ясакомъ и отпискою.

Егдажъ изволи Богъ Христіанамъ Сибирскую землю взяти, и по взятіи того мѣста Ермакъ съ товарищи послаша къ Москвѣ съ ясакомъ атамана изъ Козаковъ, и писаша ко Благочестивому Царю и Великому Князю Ивану Васильевичу всея Россіи Самодержцу, что изволеніемъ Всемилостиваго въ Троицѣ славимаго Бога и Пречистой Его Богоматери и Великихъ всея Россіи Чудотворцевъ молитвами, егожъ Государя Царя и Великаго Князя Ивана Васильевича всея Россіи праведною молитвою ко Всеіщедрому Богу и щастіемъ, царство Сибирское взяша и царя Кучума съ вои его побѣдиша, и подъ его царскую высокую руку привелъ многихъ живущихъ тамо иноземцевъ: Татаръ, и Остяковъ, и Вогуличь и прочая языцы, и къ жертвованію (къ присягѣ) по ихъ вѣрѣ привелъ многихъ, что быть подъ его Государскою высокою рукою до вѣка; покажъ мѣстъ Богъ изволилъ вселеннѣй стояти, и ясакъ ихъ давать Государю всегда, по вся годы и лѣта безпереводно, а на Рускихъ людей зла никакова не творить, а которые похотятъ ко Государю въ его Государскую службу, и тѣмъ его Государская служба служить прямо, недругомъ его Государскимъ не пускать, елико Богъ помощи подастъ, и самѣмъ имъ не измѣнить къ царю Кучуму, и въ иные орды и улусы не отъѣхать, и зла на всякихъ Рускихъ людей никакого не мыслить и не думать, и во всемъ правомъ постоянствѣ стоять. Атаманъ же и Козаки къ Москвѣ приѣхаша, повѣдано же бысть Государю о сихъ; Благочестивый же Государь Царь и Великій Князь всея Россіи Иванъ Васильевичъ слыша, и повелѣ отписку отъ нихъ принять, и вычесть предъ своимъ Царскимъ лицомъ; и егда услыша Государь Божію помощъ и силу, яко снабди Господь, царство и пространство даруетъ, и покоряетъ непокоривые, и повинны творитъ враги его, подручны супостаты, тогда же прослави Бога и Пречистую Его Богоматерь, яко яви свою такову пребогатую и великую милость, не отъ многихъ вой такова побѣда бысть; Ермака же своимъ Царскимъ жалованьемъ, заочнымъ словомъ, пожаловалъ, Козаковъ же пожаловалъ Государь своимъ Государскимъ жалованьемъ деньгами и сукнами, и паки Государь отпусти ихъ въ Сибирь къ Ермаку съ товарищи; Ермаку же и прочимъ атаманомъ и козакамь посла Государь свое Государское жалованье многое, за ихъ къ нему Государю службу, и за пролитіе крови ихъ.

О взятіи въ плѣнъ Маметкуля.

Посемъ же пріиде во градъ къ Ермаку Татаринъ именемъ Сеибохта и повѣда Ермаку, что царевичъ Маметкуль, Кучума царя сынъ стоитъ на рѣцѣ Вагаѣ, суть же отъ града Сибири яко поприщъ 100; Ермакъ же посла нѣкоторыхъ товарищей полка своего юныхъ и искусныхъ мужей ратному дѣлу, пойдоша же сіи воини и дошедше на станы ихъ, и нападоша нощію, овѣмъ спящимъ, овѣмъ же не спящимъ еще,и многихъ поганыхъ побиша; царевичева жъ шатра дойдоша и обыдоша, и жива яша царевича Маметкуля со всѣмъ богатствомъ, приведоша же его во градъ Сибирь Ермаку съ товарищи; Ермакъ же приятъ его, повѣдуетъ же ему царское великое жалованье и ублажаетъ милосердыми словесы. Царь же Кучумъ ожидая сына своего Маметкуля много время; пріидошажъ къ нему вѣстницы и повѣдаша ему, яко плѣненъ бысть сынъ его Маметкуль, слышавъ же и болѣзнова о немъ много, въ болѣзни плакася царь и весь домъ его на много время.

О приходѣ князя Сейдяка Бекбулатова съ воинствомъ на Кучума.

Пріидоша же вѣстницы къ царю Кучуму и повѣдоша ему, яко идетъ на него съ воинствомъ многимъ князь Сейдакъ Бекбулатовъ сынъ изъ Бухарскія земли, иже отъ убіенія его крыестася; возпомяну же отечествіе свое и на семъ жити возхотѣ, отмстить кровь отца своего Бекбулата хощетъ; царь же Кучумъ слыша сія отъ повѣдающихъ ему и убояся страхомъ великимъ зѣло, еще бо изыдоша изобильно стражу перваго, въ ней же бысть отъ Рускова полку. О семъ же думной Карача его, иже бысть въ дому его съ своими людьми, отъиде отъ царя Кучума и не возхотѣ быть въ повиновеніи прежнемъ; слышавъ же сія царь возплакася плачемъ великимъ и рече: его же Богъ не помилуетъ, того и любиміи друзи оставляютъ, и бысть яко враги; Карача же пріиде къ Юломскому езеру, иже вверхъ Иртыша, межъ рѣки Тары и рѣки Оми, и ту пребываше.

О храбрости Ермаковѣ и о взятіи Назима Остяцкаго городка.

Храбровавшу Ермаку съ дружиною своею по всей Сибирстѣй землѣ, ликоваху стопами свободными, ни отъ кого же устрашающеся: страхъ бо Божій на всѣхъ бяше живущихъ тамо, яко мечь обоюду остръ идый предъ лицемъ Рускаго полка, устрашая всяко невѣріе. По воеваніи же многіе городки и улусы по рѣкѣ Иртышу и по великой Оби и Назимской городокъ взяша Остяцкой со княземъ ихъ и со всѣмъ богатствомъ, возвратишася во градъ Сибирь съ радостію веліею и съ корыстію.

О прибытіи въ Сибирь Воеводъ Князя Семена Волховскаго и Ивана Глухова и о гладѣ.

Лѣта 7091 Благочестивый Царь и Великій Князь Иванъ Васильевичъ всея Россіи Самодержецъ, посла во свою державу Царскую Сибирь, Воеводъ своихъ Князя Семена Боровскаго да Ивана Глухова со многими воинскими людьми, въ тожъ время бысть во градѣ Сибири гладъ великъ, да егда пріидоша воинскіе люди, наипаче гладу обдержащу: мнозижъ гладомъ умроша и Князь Семенъ умре, тужъ и погребенъ бысть. Бѣ же гладъ зимнею порою; егда же приде весна, тогда начаша Татарове и Остяки отъ ловлевъ своихъ приносити во градъ многіе запасы, и паки быша во градѣ изобильно житными, и овощными и прочими, юже на потребу.

О посланіи Царевича Маметкуля къ Москвѣ.

Тогожъ лѣта царевича Маметкуля Кучумова сына послаша изъ Сибири въ царствующій градъ Москву со многими воинскими людьми. До тогожъ ихъ приѣзду къ Москвѣ, Богу изволившу, Благочестивый Царь и Великій Князь Иванъ Васильевичъ всея Россіи Самодержецъ ко Господу отыде въ вѣчный покой; по своемъ же преставленіи на свой Царскій престолъ повелѣ возвести сына своего Благочестиваго Царя и Великаго Князя Ѳеодора Ивановича всея Россіи Самодержца. Еже бысть и приведоша воинскіе люди царевича Маметкуля въ царствующій градъ Москву, и по повелѣнію же Царя и Великаго Князя Ѳеодора Ивановича всея Россіи Самодержца, встрѣча ему была честна и на приѣздѣ Государь того царевича Маметкуля пожаловалъ своимъ Царскимъ жалованьемъ, многихъ тако же и служилыхъ людей, которые за нимъ присланы были, Государь пожаловалъ деньгами, и кормомъ, и сукнами.

О убіеніи атамана Ивана Кольцова и съ нимъ 40 человѣкъ.

Тогожъ лѣта пріидоша къ Ермаку отъ Карачи послы и просиша людей отъ обороны для Казачьи орды; даша же на томъ шерствованіе по своей вѣрѣ, что никакова зла не мыслятъ. Ермакъ же съ товарищи посовѣтова и повѣриша ихъ безбожному и лукавому шерствованію и отпустиша къ нему атамана именемъ Ивана Кольцова и съ нимъ 40 человѣкъ, и егда пріидоша сіи сыны къ нечестивому Карачѣ, и внезапу избіени быша отъ нечестиваго Карачи. Слышаножъ бысть во градѣ, яко сіи воини побіени быша отъ нечестиваго Карачи, Ермакъ же и козаки и съ дружиною плакаху и рыдаху на многъ часъ, аки о чадѣхъ. Внидежъ во умы сіе поганымъ, яко атамана Ивана Кольцова и прочихъ побиша, и начаша во многихъ мѣстѣхъ Козаковъ побивати, гдѣ обрѣтаеми бываху по волостемъ и по улусамъ.

О приходѣ Карачи подъ градъ Сибирь и о побѣдѣ надъ нимъ.

Тогожъ лѣта во время великаго поста пріиде Карача со многими воинскими людьми и облегоша градъ Сибирь обозомъ, и табары поставиша. Самъ же Карача ста въ нѣкоемъ мѣстѣ, иже зовомъ Саусканъ, отъ града яко три поприща, многую тѣсноту гражданомъ чиниша, и тако стояще до пролѣтія; еще егда же бысть мѣсяцъ Іюнь, въ то же время изыдоша изъ града козаки въ тай и пріидоша къ станомъ Карачинымъ въ Саусканъ и нападоша нощію, они же спяще безъ всякаго опасенія, и побиша множество нечестивыхъ Татаръ; двухъ сыновъ Карачиныхъ убиша, прочіи же Татара разбѣгошася въ рознь. Карача же и съ нимъ не мнози за езеро убѣгоша, и иніи бѣжаше идѣже прочіе стояху во вступленіи града и повѣдавше имъ вся бывшая; они же слышавше сія таже стояше во вступленіи града и прибѣгоша въ Саусканъ начаху козаковъ смерти предаши и нападоша на нихъ. Казакижъ крыяхуся отъ нихъ и на вылазку хождаше и біющеся съ погаными крѣпце, и бысть бранное ополченіе до полудне, и преста бранное ополченіе, Татарове же отступиша отъ нихъ, козаки же во градъ возвратишася. Видѣвъ же Карача, яко козаковъ одолѣти не возможе, и отыде во свояси съ срамомъ.

О смерти Ермаковѣ и съ нимъ бывшихъ козаковъ.

Въ лѣто 7092 (1584 отъ Р.Х.) посланіемъ Божіимъ уготовися часъ и пріидоша на воинскихъ людей смерть. Пріидоша вѣстницы въ Сибирь къ Ермаку съ товарищи и повѣдаша имъ, яко царь Кучумъ не пропустилъ въ Сибирь Бухарцовъ, Ермакъ же не со многими воинскими людьми пойде на встрѣчу ихъ по рѣкѣ Иртышу въ стругахъ, дошедше до рѣки Вагая, Бухарцовъ не обрѣте, и паки шедъ по Вагаю вверхъ до мѣста ихъ зовома Атбашъ, и не обрѣте и оттолѣ возвратишеся, пришедшей же нощи. Козаки жъ утрудишася отъ многаго пути, доидошажъ до перекопи и ту обначевашеся и поставиша станы своя. Стражижъ крѣпко не утвердиша, и ослабѣша умы своими, яко приходитъ смертный часъ. Царь узрѣ ихъ и повелѣ тоя нощи крѣпко стрещи, и многихъ Татаръ по многимъ мѣстамъ разсла. Тояжъ нощи бысть дождь велій; въ полунощи пріидоша множество поганыхъ, казакомъ же спящимъ безъ всякаго опасенія и нападоша на нихъ и побиша, токмо единъ козакъ утече. Ермакъ же егда видѣ своихъ воиновъ отъ поганыхъ побіенныхъ и ни отъ когожъ видя помощи имѣти животу своему и побѣже въ стругъ, и не возможе дойти, понеже одѣянъ бѣ желѣзомъ, стругъ же отплывше отъ брегу, и не дошедъ утону[16]. Божіими судьбами пріиде на воиновъ смерть, и тако живота своего гонзднуша (лишася). Убіеніежъ бысть мѣсяца Августа въ 5 день; слышавъ же во градѣ оставшая братія, яко атаманъ Ермакъ убіенъ бысть и съ прочими, плакаху по нимъ плачемъ великимъ, зѣло на много время[17].

О походѣ козаковъ къ Руси.

По убіеніижъ Ермаковѣ съ дружиною, оставшіеся во градѣ Сибири, видяще яко наставника ихъ Ермака злочестивые Татарове убиша и съ дружиною съ прочими козаками, и убояшася жити во градѣ, изыдоша изъ града и поплыша въ низъ по Иртышу и по великой Оби, и чрезъ камень къ Руси бѣжаша; градъ же Сибирь осшавиша пустъ.

О приходѣ во градъ Сибирь Алея и Сейдека.

Егда изъ града козаки побѣгоша, тогдажъ увѣдаша царевичь Алей Кучумовъ сынъ, яко козаки побѣгоша изъ града, градъ же оставиша пустъ, пріиде съ воинскими людьми, и вниде во градъ и водвористася ту[18]. Слышавъ же сіе князь Сейдекъ Бекбулатовъ сынъ, яко атаманъ Ермакъ съ товарищи на перекопи убіени быша, прочіи же бѣжаша изъ града, и яко облада градомъ царевичь Алей Кучумовъ сынъ, и собрася со всѣмъ домомъ своимъ и съ воинскими людьми, и пріиде ко граду Сибири, и градъ взяша, и царевича Алея и прочихъ побѣди изъ града изгна; приемлетъ же сей вотчину отца своего Бекбулата и тако пребыша во градѣ.

О приходѣ изъ Москвы Воеводы Мансурова.

Во второе же лѣто по Ермаковѣ убіеніи пріиде съ Москвы Воевода Иванъ Мансуровъ съ воинскими людьми, и доплыша до рѣки Иртыша[19]. Татаръ же множество собрашася въ уреченномъ мѣстѣ у рѣки Иртыша на брегу, Воевода жъ виде таковое собраніе поганыхъ и слыша, яко козаки побѣгоша изъ града, да и убояшася и не приста ко брегу, но поплыша въ низъ по Иртышу, доплышажъ до великой Оби, бѣ бо тогда уже осень и ледъ въ рѣкахъ смерзашеся. Иванъ же Мансуровъ видя, яко наставаетъ зима и повелѣ поставить городокъ надъ рѣкою Обью противъ Иртышскаго устья, и сѣдше въ немъ съ воинскими людьми, и тако озимѣвся козаки во градѣ.

⇐ Предыдущая12345Следующая ⇒

Поделиться: