УСТАВ СВЯТЫХ АПОСТОЛ И ИЗЛОЖЕНИЕ СВ. БОГОНОСНЫХ ОТЕЦ СЕДМИ ВСЕЛЕНСКИХ СОБОРОВ СВ. КРЕЩЕНИЯ РОДУ ЧЕЛОВЕЧУ ВО ИМЯ ОТЦА И СЫНА И СВ. ДУХА, БЫВАЕМЫЙ НАД ОГЛАШЕННЫМ, СИРЕЧЬ ХОТЯЩИМ КРЕСТИТИСЯ

Чин Оглашения

 

Сего примечания нет ни в Иовлевском, ни в Филаретовском, ни в Православном Требниках, а есть еще только в Потребнике Иоасафовском.	По Иосифовскому Потребнику Аще будет по рождении болен младенец, и не ссет сосца матерня, но и к смерти будет, не подобает ждати, якоже нецыи зле рекоша, до пяти или до шести дней не крестити, но в той час токмо воньже родится, омывше и крестити е, да не умрет не просвещено.
Это примечание есть еще только в Филаретовском и Православном Требниках.	По Иовлевскому Служебнику: Аще ли в возрасте. первее совлечется от риз своих, и изует нозе. Священник же поставляет его пред дверми церковными к востоку лицем. и дунет на него 3-жды. и знаменает ему лице и уста его, и перси.
Следующее примечание находится во всех Потребниках.	Аще ли же младенец крестяися, развивают его, и разрешают от пелен. держимо бабою, стоит такоже на восток лицем.

 

По Иосифовскому Потребнику.

Священник же сотворит знамение крестное глаголя. благословен Бог наш. таже, Царю небесный. трисвятое, по Отче наш, возглас, яко твое есть царьство. посем, тропари дневные и храму, и прилучившемуся святому. Слава, и ныне, богородичен, молитвами Господи всех святых и Богородица (ы), твой мир даждь нам, и помилуй нас, яко един щедр. таже иерей, Господу помолимся. и глаголет молитвы сия.

Молитвы бабе. егда принесен будет младенец крестити до 40 дней.

Молитва 1. Господу помолимся.

Владыко Господи Вседержителю, исцеляяй всяк недуг, и всяку язю, сам и сию иже днесь принесшую рабу твою сию бабу, имрк, исцели ю, от грех. по словеси бо пророка твоего Давида, вси в беззакониих зачаты есмы, и сквернавы суть вси пред тобою. и сохрани ю, и со младенцем егоже принесе. покрой ю кровом крил твоих, от днешняго дне, даже до последняго его скончания, молитвами пречистыя Богородицы, и всех святых. яко благословен еси во веки веком, аминь.

Молитва 2. Господу помолимся.

Владыко Господи Боже наш, родивыйся от пречистыя Владычицы нашея Богородицы, и присно Девы Марии, и аки младенец в яслех возлегий, и аки детищ восприят быв, сам и сию рабу твою сию бабу, имрк, днесь принесшую, сие отроча, помилуй, и прости волная ей и невольная ея согрешения, и сохрани ю от всякаго диавольскаго искушения. и еже ею принесеннаго младенца соблюди, от всякия горести, от всякия злобы, от всякия сопротивныя бури, от духов нечистых и лукавых дневных же и нощных. и соблюди его под державною рукою твоею, и даждь ему скорое востание, и от скверны очисти его, и болезни исцели ему. и здравие и благомощие души же и телу даруй. и ангелы светлыми и сиятелными покрый его. и соблюди от всякаго наития невидимых духов, и от недуга и язи, от рвения и зависти, и от очеснаго призора. и помилуй отроча се по велицей милости твоей, и очисти его от телесныя скверны, и от различных ему находящих утробных стужений, и исцели его скорыя ради твоея милости. и сподоби его поклонитися земному храму егоже уготовал еси, да славится имя твое святое в нем. яко подобает ти всяка слава, честь и поклонение Отцу и Сыну и Святому Духу¹³⁸³, ныне и присно и во веки веком, аминь.

Таже молитва младенцу. Господу помолимся.

Господи Боже наш, иже в четыредесятый день младенец законно принесл (ся) еси, от Марии неискусобрачныя матере, и на объятиях Симеона праведнаго прият был еси, сам Владыко всесильне, и принесеное се младя, явитися тебе всех Творцу, благослови на всяко дело благо, и тебе благоугодно возрасти, отгоняя от него всяку сопротивную силу, знамением воображения креста твоего. ты бо еси храняй младенца Господи, да сподобився святаго крещения, получит части избранных царствия твоего, соблюдаемо сый с нами, благодатию святыя и единосущныя Троицы. тебе бо подобает всяко благодарение, и поклоняние, со безначалным ти Отцем, и с пресвятым и благим и животворящим ти Духом, ныне и присно и во веки веком, аминь.

 

Следующее находится во всех старых Требниках, а напечатано с Иовлевского Служебника.

 

Таже, иерей глаголет, молитву, во услышание всем. Господу помолимся.

 

О имени твоем Господи Боже истинный. и единороднаго ти Сына, и Святаго ти Духа. возлагаю руку мою на раба твоего, имрк. сподобльшагося прибегнути ко святому имени твоему. и под кровом крил твоих соблюдену быти. отстави же от него ветхия оноя прелести. и исполни его еже втя веры, и надежди и любве. яко да разумеет, яко ты еси един Бог истинный, и единородный твой Сын, Господь наш Ис҃ Хс҃, и Святый твой Дух. даждь ему во всех твоих заповедех шествовати, и угодная тебе творити и соблюсти. яко аще сотворит та человек, жив будет вних. и напиши его в книги животныя; и совокупи его стаду наследия твоего. да прославится имя твое святое о нем. и возлюбленнаго ти Сына Господа нашего Ис҃ а Ха҃, и животворящаго ти Духа, да будут очи твои призирающи нань милостивне всегда. и уши твои, еже послушати гласа моления его. возвесели его вделех руку его, и во всяком роде его. да исповестьтися поклоняяся, и славя имя твое великое и вышнее. и восхвалит тя всегда во вся дни живота своего. тебе бо поют вся силы небесныя, и твоя есть слава во веки¹³⁸⁴, аминь.

 

Запрещение 1-е. Господу помолимся.

 

Запрещает ти дияволе, Господь наш Ис҃ Хс҃. пришедый в мир и вселився в человецех. яко да твое упразднит мучительство, и человеки избавит. иже на древе сопротивныя силы победив. солнцу померкъшу, и земли колебящися и гробом отверзаемом и телесем святых востаемом¹³⁸⁵. иже разрушив смертию смерть. и упразднив имущаго державу смерти, еже есть тебе диявола; запрещаю ти Богом, показавшим древом живота. и уставившим херувимы пламенное оружие, обращающееся стрещи то. запрещен буди и отъиди. онембо ти запрещаю. походившим яко по суху, на плещу морьскую. и запретившему бури¹³⁸⁶ и ветром. егоже возрение изсушавает бездны, и запрещение таит горы. той бо и ныне запрещает ти нами. убойся изыди, и отступи от создания сего, и да не возвратишися, ниже утаишися внем. ниже усретиши сего, или действуеши, или укрепишися, ни внощи ни во дни, или часе или вполудне. но отъиди во свой тартар, даже до уготованнаго великого дне суднаго; убойся Бога седящаго на херувимех, и призирающаго бездны. егоже трепещут ангели и архангели, престоли, господьства. начала, власти, силы. многоочитая херувим, и шестокрилатая серафим. егоже трепещет небо и земля, море и вся яже внем; изыди и отъиди, от знаменанаго новоизбраннаго воина Ха҃ Бога нашего. онембо ти запрещаю. ходящим на крилу ветренюю. творящим ангелы своя духи, и слуги своя огнь палящ; изыди и отъиди от создания сего, со всею силою и аггелы¹³⁸⁷ своими. яко прославися имя Отца и Сына и Святаго Духа, ныне и присно и во веки веком, аминь.

 

Запрещение 2-е. Господу помолимся.

 

Бог святый, и страшный и славный. иже во всех делех своих и силе, непостижим и неизследованен сый. той предповелевый тебе диаволе, вечныя муки томления. нами недостойными его рабы повелевает ти, и всей споспешней ти силе. отступити от новознаменаннаго, именем Господа нашего Ис҃ а Ха҃, истиннаго Бога нашего; запрещаю ти убо диаволе вселукавый, и нечистый и скверный и омраченный, и туждий душе, силою Ис҃ Христовою. иже всю власть имущаго на небеси и на земли. рекшаго глухому и безгласному бесу. изыди от человека, и да нектому внидеши вонь. отъиди и познай свою суетную силу, юже ни во свиниях власть имуща. помяни повелевшаго ти, по твоему прошению во стадо свиное внити. убойся Бога создавшаго небо, егоже повелением земля на водах утвержена бысть, и поставльшаго горам предел, и холмом ярем. и положьшаго песок морю предел, и в водах зелных путь спасеный и крепкий. прикасающагося горах и воздымятся. одевающагося светом яко ризою. простершаго небо яко кожу. покрывающаго водами превыспреняя своя. основающаго землю на утвержении ея, не преклонится во век века. призывающаго воду морьскую и проливающаго тую на все лице земное. изыди и отъиди, от иже ко святому просвещению готовящагося; Запрещаю ти спасителным страданием Господа нашего Ис҃ а Ха҃. и честным его телом и кровию, и пришествием его страшным. приидет бо на облацех, приидет бо и не умедлит судяй всей земли. и тебе, и споспешествующую ти силу, умучит вгеоне¹³⁸⁸ огненей. предав во тму кромешьную, идеже червь неусыпая¹³⁸⁹ и огнь не угасает. яко держава Христа Бога нашего, со Отцем и Святым Духом. ныне и присно и во веки веком, аминь.

 

Запрещение 3-е, Господу помолимся.

 

Господи Саваоф, Боже израилев. исцеляяй всяку болезнь, и всяк недуг. призри на раба своего, имрк. взыщи истяжи, и изжени от него всяка действа дияволя. запрети духовом нечистым, и пожени¹³⁹⁰ их. и очисти дело рук твоих. и быстрое свое восприим действо, сокруши сатану под ноги его вскоре. и даруй ему победы нань, и на нечистыя его духи. яко да еже от тебе милости получив, сподобится безсмертных и небесных ти таиньств. и славу возслет тебе Отцу и Сыну и Святому Духу, ныне и присно и во веки веком, аминь.

 

Молитва. Господу помолимся.

Сый Владыко Господи. сотворивый человека по образу своему и по подобию. и дав ему власть живота присносущаго. таже отпадша грехом не презрев. но устроив¹³⁹¹ вочеловечением Христа твоего, спасение мирови. сам и создание свое се, избавль от работы вражия. приими во царьство свое небесное. отверзи ему очи мыслении, во еже просияти внем просвещению благовестия твоего. сопрязи животу его Ангела светла, избавляюща того от всякаго навета сопротивнаго. от срящи лукаваго, от беса полуденнаго, от привидений лукавых;

 

и дунет иерей нань, 3-жды. и знаменает, чело его и уста его, и груди его. и глаголет:

 

Изжени от него всяк лукавый, и нечистый дух, сокрытый гнездяйся в сердцы его. дух прелести и лукавьства. дух идолослужения, и всякаго лихоимьства. дух лъжи, и всякия нечистоты, действуемыя по научению дияволю отца их, и сотвори то овча словесное святаго стада Христа твоего. уд честен церкви твоея. сосуд освящен. сына свету, и наследника царствия твоего. яко да по заповедем твоим поживша, и сохраньша печать нерушиму, и соблюдъша¹³⁹² ризу неосквернену. получит блаженство святынь твоих, во царствии твоем. благодатию и щедротами и человеколюбием, единороднаго Сына твоего. снимже благословен еси, и со пресвятым и благим, и животворящим ти Духом, ныне и присно и во веки веком, аминь;

 

и посем обратит крещаемаго, к западу лицем. и горе¹³⁹³ руце ему воздвигшу. и вопрошает иерей, крещаемаго, имрк. отрицаешилися сатоны. и аще в возрасте, все отрицание сам крестящийся глаголет.

 

Аще ли же младенец есть, крестяйся. иерей, обращает бабу со младенцем, и восприемников на запад лицем и вопрошает младенца, имрк. Отрицаешилися сатоны. и вместо младенча слова, отвещают баба и восприемницы. Отрицаюся сатоны. и абие вопрошает се. и всех дел его. отвещают подобне. и прочая, вопросы. и всея службы его, и всех аггел его, и всего студа¹³⁹⁴ его. и сотворити, таковыя вопросы и ответы, потрижда. и паки, вопрошает крещаемаго и се, 3-жды. Отречелися сатоны. и отвещает, отрекохся сатоны. и речет иерей. и плюни на беса. трижда, кзападу. он же плюнет. посем иерей, повелит крестящемуся. обратитися на восток лицем. руце ему долу¹³⁹⁵ держащу. аще ли младенец. и повелит бабе обратитися со младенцем на восток, и приемником. и вопрошает подобне трижды, и се. Обещаваешилися Христу, имрк. и отвещает крестяйся. или во младенца место, баба и восприемницы рекут. обещеваюся Христу, и верую во единого Бога Отца Вседержителя. и глаголют исповедание православныя веры. верую во единого Бога. весь до конца, 3-жды. и паки вопрошает крещаемаго, 3-жды. Обещался ли Христу. и отвещает, обещахся Христу. веруеши ли во Христа. и отвещает, верую во Христа. Иерей глаголет. и поклонися ему. и поклонит главу крестяйся. или баба преклоняется со младенцем.

 

Это только в Иоасафовском и Иосифовском Потребниках

глаголя, поклоняюся Отцу и Сыну и Святому Духу, Троице единосущней и неразделимей.

Таже глаголет, священник, благословен Бог, всем человеком хотяй спастися, и вразум истинный приити, ныне и присно и во веки веком, аминь.

 

Иерей молится. молитвою сею.

Владыко Боже. призови раба своего, имрк, ко святому твоему просвещению. и сподоби его великия сея благодати святаго ти крещения. омый его скверности. породи его вжизнь вечную. и исполни того силы Святаго ти Духа, во приобщение Христа твоего. яко да нектому чадо телесное будет, но чадо твоего царствия. благоволением и благодатию, единороднаго ти Сына. снимже благословен еси и со пресвятым и благим и животворящим ти Духом. ныне и присно и во веки веком, аминь;

 

Чин Крещения

По всем Требникам

 

И восклонився, иерей. и того крестящего и повелит ему внити в церковь. и приходит к купели пад воду. преждеже принесенне воде быти от источника, и волияне внея. и свещам возженым четырем. и поставленым окрест ея и прием кадило, и покадив ея округ, креста образно. и по сем, знаменает свещами воду, 3-жды и погружает их¹³⁹⁶. и глаголет Благословено царство Отца и Сына и Святаго Духа ныне и присно и во веки веком аминь.

 

Таже. Диякон, глаголет ектению. над водою. аще ли несть. глаголет сам иерей.

 

Миром Господу помолимся. О свышнем мире и о спасении душ наших, Господу помолимся.

О мире всего мира, и о благостоянии святых божиих церквах¹³⁹⁷, и о совокуплении всех, Господу помолимся.

О святем храме сем и иже с верою и благоговением и со страхом божиим вхо-дящиих вонь, Господу помолимъся.

О патриархе нашем, имрк. и честнаго презвитерьства¹³⁹⁸, еже о Христе и дияконьства и всего причта и о людех, Господу помолимся.

О священьства и заступления пребывания и о делех руку его¹³⁹⁹, (чьих? пребывания или заступления? ) Господу помолимся.

О еже освятитися воде сей, силою и действом и пришествием Святаго Духа, Господу помолимся.

О еже низпослатися ей благодати избавления, благословения иорданова¹⁴⁰⁰ Господу помолимся.

 

Сих прошений нет в Иовлевском Служебнике и Потребнике Филаретовском, а есть только в Иоасафовском и Иосифовском

О еже приити на ню чистителному пресущественыя Троицы действу, Господу помолимся.

О еже просветитися нам просвещением разума, и благочестия пришествия ради Святаго Духа, Господу помолимся.

О еже прияти ей силу на отвращение всякаго, навета видимых и невидимых враг, Господу помолимся.

О еже быти достойну нетленнаго царствия в ней крещаемому, Господу помолимся.

О еже быти ему сообразну и приобщителну смертивоскресения Христа Бога¹⁴⁰¹ нашего, Господу помолимся.

О еже сохранити ему одежду крещения, и обручение Духа не скверно и непорочно во страшный день Христа Бога нашего, Господу помолимся.

 

О ныне приходящему, имрк. ко святому крещению и спасения¹⁴⁰² его, Господу помолимся.

О явитися чадо¹⁴⁰³ свету и дни, вней крещьшемуся, Господу помолимся.

О еже быти тому воде сей бани паки бытия, оставления грехом, и одеяние нетления¹⁴⁰⁴, Господу помолимся.

О еже услышати Господу Богу нашему глас моления нашего, Господу помолимъся¹⁴⁰⁵.

О избавитися томуже и нам, от всякия скорби, гнева и нужда, Господу помолимся;

Заступи, спаси, помилуй, и сохрани нас Боже своею благодатию;

Пресвятую чистую и преблагословеную Владычицу нашу Богородицу, и присно девицу Марию со всеми святыми помянувше, сами себе и друг друга, и весь живот наш Христу Богу предадим;

 

Иерей молится молитвою сею втайне.

 

Благоутробный и милостивый Боже. истязуяй сердца и утробы, и тайная человеческая ведый един. ни бо есть вещь неявленная пред тобою, но вся нага и объявленна пред очима твоима. ведый яже о мне, да не омразиши¹⁴⁰⁶ мя, ниже лица своего отвратиши от мене. но отложи¹⁴⁰⁷ ми согрешения вчас сий. презирая человеком согрешения в покаянии. и отмый мне страсть телесную, и скверну душевную. и всего мя освяти всесовершене, силою твоею невидимою, и духовною десницею. да не инем свободу возвещающу, и тую подавая верою совершену, твоим неисчетным человеколюбием. самже яко раб греху неискусен буду; ни Владыко, едине благий же и человеколюбивый, да не возвращуся смирен и посрамлен. но низъпосли ми силу свыше. и укрепи мя к службе предлежащаго таиньства, великого и небеснаго и вообрази Христа твоего, вхотящем порождатися¹⁴⁰⁸ святым крещением. от моего недостоиньства. и назидай того на основании апостольском и пророческом, и да не разрушиши. и насади его сад истинный, во святей твоей и апостольстей Церкви, и да не отсечеши. яко да предуспевающу тому во благочестии. славится и его ради пресвятое имя, Отца и Сына и Святаго Духа, ныне и присно и во веки веком, аминь.

 

И абие начинает иерей, молитву сию, велегласно.

 

Велий еси Господи, и чюдна дела твоя. и ни единоже слово довольно есть, к похвалению чюдес твоих. Велий еси Господи. и чюдна дела твоя. и ни единоже слово довольно есть, к похвалению чюдес твоих. Велий еси Господи и чюдна дела твоя, и ни единоже слово довольно есть, к похвалению чюдес твоих. Твоею бо волею от небытия в бытие привел еси всяческая. твоею державою содержиши тварь, и твоим промыслом строиши мир. ты от четырех стихий тварь составил еси. четырми времяны круг лету венчал еси. тебе трепещут умныя силы вся. тебе поет солнце, тебе славит луна. тебе молятся звезды, тебе послушает свет. тебе боятся бездны, тебе работают источницы. ты простерл еси небо яко кожу. ты утвердил еси землю на водах. ты оградил еси море песком. ты ко отдыханию воздух пролиял еси, ангельския силы тебе служат. архангельстии лицы тебе кланяются. многоочитая херувим, и шестокрилатая серафим¹⁴⁰⁹, окрест стояще и облетающе. страхом неприкосновенныя¹⁴¹⁰ ти славы покрываются. ты Бог сый неописанен, безначален же и несказанен. пришел еси на землю, зрак рабий приим в подобии человечестем быв. не бо стерпе Владыко ради благоутробия твоея милости, зрети от диавола мучима рода человеча. но прииде и спасе нас. Исповедаем благодать, проповедаем милость. не таим благодеяния. естества нашего роды свободил еси. девическая ложесна освятил еси рождеством твоим. Вся тварь воспевает тя явльшагося. ты бо Бог наш на земли явися, и с человеки споживе. ты иорданьския струя освятил еси. снебесе низпослав Святый свой Дух. и главы тамо гнездящихся змиев стерл еси. Сие глаголи, 3-жды.

 

Сам убо человеколюбче царю, прииди и ныне пришествием Святаго ти Духа, и освяти воду сию; И даждь ей благодать избавления, благословение Иорданово. сотвори ея¹⁴¹¹ нетления источник и освящения дар. согрешением разрешение. болезнем пременение. бесом погибельну, сопротивным силам неприступну. ангельския силы исполнену. да отбежат от нея наветующая созданию твоему, яко имя твое Господи призвах дивное и славное, и страшное сопротивным.

 

И дунет, на воду 3-жды. и знаменает ея¹⁴¹² рукою трищи, погружая персты, креста образно, и глаголет се.

 

Да сокрушатся под знамением, воображения креста твоего, вся сопротивныя силы. Трижды. Да отступят от нас вся воздушная и невидимая привидения. и да не утаится в воде сей бес темен, ниже да снидет со крещающимся дух лукав, помрачение помыслом, и мятеж мыслен на разум наводя. Но молимтися¹⁴¹³ Владыко, ты Господи всех. покажи воду сию, воду покоя. воду избавления, воду освящения. воду очищение¹⁴¹⁴ скверны плоти и духа. ослабу юзам, оставление согрешением просвещение души. баню паки бытия, обновление духа, сыноположения дар, одеяние нетления, источник живота. ты бо рекл еси Господи: измыйтеся. и чисти будете. отъимите лукавьствия от душ ваших. ты бо даровал еси нам свышнее порождение, водою и духом. явися Господи воде сей¹⁴¹⁵, и даждь претворитися еже в ней крещаемому, имрк. во еже отложити убо ветхаго человека тлеющаго по похотению прелести. одеятижеся вноваго обновляемаго, по образу твоему создавшаго его. яко да будет соединен уподоблению смерти твоей ради крещения¹⁴¹⁶, причастник и воскресения да будет. и сохранив дар Святаго ти Духа, и умножив предание¹⁴¹⁷ благодати. приимет мзду горняго звания, и сопричтется первородным написаным на небесех. тебе бо слава подобает и держава, честь и поклоняние, Богу и Господу нашему Ис҃ у Христу. вкупе со безначалным ти Отцем, и со пресвятым и благим и животворящим ти Духом, ныне и присно и в веки веком, аминь.

 

Мир всем. Диякон. Главы ваша Господеви преклоните. и преклоняет иерей главу свою, над сосудом масленым. держиму от кума, или бабою¹⁴¹⁸ и дунет в него, трижды. и знаменает рукою нань креста образно, трижды. глаголет молитву сию.

 

Владыко Господи Боже отец наших. иже сущим вковчезе ноеве. голубь послал еси, сучец масличен имущь во устех. пременения образ спасения еже от потопа¹⁴¹⁹, и благодати таиньство онеми предобразуя. и масличный плод во исполнение святых ти таин подав. и тем и еже взаконе Духом Святым исполнил еси, и сущих во благодати совершая. Сам благослови, и се масло. силою и действом и явлением Святаго ти Духа. яко быти тому помазание нетления. оружие правде, обновление души и телу. всякаго дияволя действа отбегателно¹⁴²⁰ в пременение всяких зол, мажущимся сверою, или и вкушающим от него;

и восклонився, возглашает.

Во славу твою, и единороднаго ти Сына, и пресвятаго и благаго и животворящаго ти Духа, и ныне и присно и во веки веком, аминь.

Таже вонмем. и приемлет иерей, спичку из сосуда масленаго смаслом. и тою погружая в воде, креста образно, 3-жды. поюще. аллилуйя, аллилуйя, аллилуйя, 3-жды. с сущими ту. таже, возглашает. Благословен Бог просвещая, и освящая всякого человека приходящаго вмир. ныне и присно и в веки веком, аминь.

и держим бывает крещаемый. или попом инем, или дияконом¹⁴²¹. и вземлет крестяй священник святое масло перстом, и помазуя творит кресту знамение, на челе на очию. на нозъдрях. на устнах. на скраниях. и на обе уши. на персях, и на руках на дланех по обе страны. и на сердцы. на главе на тылу. и на плечию. и между рам на ногах, на коленях, и на плесницах¹⁴²². и на коемъждо помазании глаголя. помазуется раб божий, имрк. маслом возрадования, во имя Отца и Сына и Святаго Духа аминь.

 

Все эти действия не требуются Православн. Требником, потому что не требуются Греческим и не упоминаются Сим. Солунским.

Или и инем священником помазуется, прилучившимся ту. внегда же помазатися крещаемому, возлагает иерей, на руки свои рукавы. сиречь обязует платом. Таже, и синдона связав оба уголная конца. и возлогает на выю куму. синдона именует плат бел нов. потомже оставляется в церкви.

 

Посем, иерей приемлет крестящагося руками. глаголет. Благословен Бог просвещая, и освящая всякаго человека, грядущаго вмир. ныне и присно и во веки веком, аминь. Таже. крещает приходящаго. глаголя: крещается раб божий, имрк. во имя Отца, аминь, и Сына аминь. и Святаго Духа аминь. на коеждо речение низводя того вкупели, погружением в воду, и возводя. держа ксебе лицем¹⁴²³. и аще убо младенец крещаемый. и погружает его иерей вкупели, поддерживая уста ему рукою искусне, от залития воды. занеже младенцу слабу сущу¹⁴²⁴. аще ли болен. то подобно быти вкупели, воде теплой. и погрузит его в воде по выю. и возливает ему на главу, воду от купели, десною рукою, 3‑ жды. глаголя. крещается раб Божий, имрк¹⁴²⁵. и абие по крещении полагаем бывает крестивыйся куму на руки, на синдон. аще в возрасте. полагаем бывает на выю его синдон. таже. священник умывая руце свои, и рукавы отлогая, Возглашает диякон. вонмем. аще несть диякона. глаголет иерей. вонмем. и поем стих сий. Блажени имже отпустишася беззакония, и имже прикрышася греси. се же глаголется 3-жды. Посем, ектения.

 

Миром Господу помолимся.

О свышнем мире и о спасении душ наших, Господу помолимся.

О мире всего мира и о благостоянии.

О Патриархе нашем, имрк.

О священьства и заступления. пребывания и о делех руку его¹⁴²⁶. Господу помолимся;

О облещиси силою божественною на противнаго, миром помазания¹⁴²⁷, Господу помолимся.

О быти ему сосуду священну, на восприятие богоданнаго мира Господу помолимся;

О сподобитися ему звания, внеже зван бысть Господу помолимся.

О избавитися нам от всякия скорби, гнева и нужда, Господу помолимся.

Заступи, спаси, помилуй, и сохрани его и нас Боже своею благодатию.

Пресвятую, чистую и преблагословенную.

 

Таже, иерей молится, молитвою сею, втай.

 

Благословен еси Господи Боже Вседержителю. источниче благих. солнце правде. просиявый сущим во тме свет спасения. ради явления единороднаго ти Сына и Бога нашего. и даровав нам недостойным, блаженное оцыщение во святой воде, и божественное освящение в животворном ти помазании. еже и ныне благоволил еси породити раба своего, ново просвещеннаго. имрк. водою и Духом. и волных и неволных согрешений оставление даровав; Сам Владыко царю благоутробне. даруй ему и печать дара, святаго и всесилнаго и споклоняемаго ти Духа. и причастие святаго тела, и честныя крови Христа твоего. сохрани его во освящении, утверди его в православной вере. изми от лукаваго, и всех козней его. и спасителным ти страхом, в чистоте и правде соблюди. яко да всяким делом и словом благоугождая тебе, сын и наследник небеснаго ти будет царствия; возглас. Яко ты еси Бог наш, Бог миловати и спасати. и тебе славу воссылаем, Отцу и Сыну и Святому Духу. и ныне и присно и во веки веком, аминь.

 

И посем, поют. Елицы во Христа крестистеся, во Христа облекостеся, аллилуйя.

 

Таже. помазует священник, крестившагося святым миром. и творя креста образно. на челе и на очию. и на ноздрью. и на устех, и на обе уши. и на грудех, и на руках. и на сердцы. и на плечью. и между рамома. глаголя, на коеждо помазание. на челе. печать дара Святаго Духа, аминь. да избудет студа, егоже первее преступив человек, всюду пошаше. на лицы. печать дара Святаго Духа, аминь. Да откровенным лицем славу Господню зрит. На очию печать дара Святаго Духа, аминь. Да зрит очима, свет Святыя Троица, первыя доброты образ. На ушию. печать дара Святаго Духа, аминь. Да приимет ушима, слышание таиньства духовнаго, евангелия Христова. якоже рече Христос, имеяй уши слышати да слышит. да не приложится ему злое слышание. По ноздрям. Печать дара Святаго Духа, аминь. Да обонявает божественых таин. яко да и той будет в миро Христова благоухания, и в добровоньство спасаемых. да не обонявает прочее смрадныя первыя льсти. По устом. Печать дара Святаго Духа, аминь. Да перваго вкуса вторым заградит, сиречь телом и кровию Христовою.

На персех. Печать дара Святаго Духа, аминь. Да оболкся во броня правды, противу художьству вражию станет, яко победитель непобедим.

На руках. Печать дара Святаго Духа, аминь. Да будут готовы па простертие во бла-готворение, и на отгребание всакаго зла.

 

И паки, глаголют. псалом, 31. Блажени имже отпустишася беззакония, и имже прикрышася греси. весь до конца, трижды.

 

И возлагает на крестившагося крест зъгойтаном, якоже истиннии христиане имут обычай, еже носити на себе знамение спасительных Христовых страстей, иже есть честнаго креста образ, на прогнание всякия неприязненныя детели, себе же на сохранение души и телу¹⁴²⁸.

 

И тако одевает того в срачицу. глаголя. Одевается раб Божий, имрк. Одеянием веселия, и возрадования, во Имя Отца и Сына и Святаго Духа, аминь. На верхнюю же одежу, глаголет. Да возрадуется душа моя о Господе, облече бо мя в ризу спасения, и одеяние веселия возложи на мя.

 

Посем поют ирмос. Ризу ми подаждь светлу, одеяйся светом яко ризою, многомилостиве Христе Боже наш. Посем, прокимен, глас. 3-й. Господь просвещение мое, и Спаситель мой когося убою; стих, Господь защититель животу моему, от когося устрашю; Апостол, к Римл. зачало 91. Братие слицы во Христа Ис҃ а крестихомся, в смерть его крестихомся. Конец. живый Богови о Христе Ис҃ е Господе нашем. аллилуиа. Глас Господень на водах. Евангелие, от Матф. зачал. 116. Во время оно, единннадесяте ученицы.

 

Посем, глаголет, молитву сию. в пострижение власом.

 

Владыко Господи Боже наш, иже образом своим почет человека. от душа словесныя, и плоти благолепотны составив того. яко да тело служит словесной души. главу же на высочайших поставль, и в ней множайшая чювьством¹⁴²⁹ утвердил еси. не забавляюща друг другому¹⁴³⁰. власы же главу покрыл еси. еже не вреждатися преложеньми ветреными. и вся уды его потребне насадил еси. яко да ради всех благодарит тя, добраго художника; Сам Владыко сосудом своим избранным, Павлом апостолом заповедал еси нам вся в славу твою творити. и сего пришедшаго раба твоего, имрк. благослови начало сотворити. пострищи власы главы его, с его совосприемником¹⁴³¹, и даждь им всегда поучатися в заповедех твоих, и благоугодная тебе творити;

 

возглас. Яко милостив и человеколюбец Бог еси. и тебе славу возсылаем Отцу и Сыну и Святому Духу. ныне и присно и во веки веком, аминь;

 

Посем иерей, взем ножица. постригает крестящагося, креста образно. глаголя, постригает раб Божий имярек. власов главы своея. во имя Отца и Сына и Святаго Духа, аминь. и рцем вси за него. Господи помилуй, потрижды. ко всякому месту¹⁴³².

 

И прием мало воску теплого. и влепляет вонь власы отрезаные. и тако сохранит их в стену церковную, аще камена церковь. аще ли древяна, то за олтарем вземлю вкопавают.

 

Таже. иерей, глаголет. мир всем. диякон. главы ваша Господеви преклоните. и тако молится молитвою, сею.

 

Господи Боже наш, иже от исполнения купелнаго твоея благости, освятил еси втя верующих. благослови настоящее младя. и на главу его благословение твое да снидет. и якоже благословил еси Давида рукою пророка твоего Самуила. и тако благослови главу раба твоего имрк. рукою моею грешною осиявая. того Духом Святым. яко да предспевающу тому возрастом и сединами старости. славу тебе возслет, и увидит благая иеросалимова, во вся дни живота своего; Возглас. Яко подобает ти всяка слава, честь и поклоняние Отцу и Сыну и Святому Духу, ныне и присно и во веки веком, аминь;

 

Таже. возлогает пань куколь. глаголя. Одевается раб Божий, имрк. в куколь незлобия. во Имя Отца и Сына и Святаго Духа. ныне и присно и во веки веком, аминь;

 

Посемже, обходит священник святую купель, среди церкви стоящую, 3-жды. последующу сему, и восприемнику с новокрещеным. аще в возрасте крещаемый. и приемлет его восприемник за десную руку. и синдону возложену быти на выях их связуему. поющим же всем, 3-жды. Елицы во Христа крестистеся, во Христа облекостеся, аллилуйя¹⁴³³. Иерей же приим крестившаго от кума. и приложит устнами его ко образом, на святых царских дверях. и ко странам святых дверей, во образ целования. Аще будет мужеский пол младенец, или в возрасте, вводит его во святый олтарь, северными дверми. и приложит ко святому престолу устнама его, по подобию целования. и поклоняется с ним. аще ли же будет крещаемо, женеский пол. не вводит во святый олтарь. но прикладывает ко святым образом, на святых дверех, такоже.

 

Посем иерей глаголет к себе. ныне отпущаеши раба своего Владыко. весь, до конца.

 

Таже. поставляет крестившаго, близ святых царских дверей, и восприемлет того кум. сиречь восприемник.

 

В Иовлевском Служебнике и Филаретовском Потребнике сего наставления нет.

По Иосифовскому Потребнику.

Иерей глаголет восприемнику сице, Яко да егоже приял еси от святыя купели, очищена божественным порождением, от всех прежних согрешениих¹⁴³⁴. тако да тщишися безлености и впредь о душевней его пользе, снабдевая его от пустошных дел. и совет благ везде предлагая ему, еже бы угодная Богу сотворити и совершити, и до последняго издыхания; да оба сугубу мзду приимете от Бога зде, и в будущий век¹⁴³⁵, Аще ли в возрасте будет младенец, и призовет иерей восприемника, и с крестным сыном в церковь, и глаголет восприемнику, поучение сие. О чадо внимай яже глаголю ти, яко егоже приял от святыя купели, очищена божественным порождением от всех прежних согрешениих¹⁴³⁶. все до конца. Таже глаголет и сие. Занеже сей сын твой, имрк, во Христа крестился есть, во Христа облечеся, с ним же буди всегда угодная творити во вся дни живота вашего, в православной вере твердо пребывати в добродетелех. житие совершая. к духовному же отцу послушание и повиновение имети. правила же церковнаго никогда же отлучатися, кроме великия нужди, но прилежным тщанием быти всегда в молитвах, и в воздержании, и руце простирати к милостыни требующим, и ко святым церквам, и ко убогой чади елика сила. правду же и любовь имети ко всем человеком, и не имети в сердцы своем никакоже, ни гордыни ни тщеславия, но все благое творите во смиреномудрии, и в чистоте телесней и в покаянии, и всегда во уме имети смертный час и воскресение мертвых, и страшное второе Христово пришествие, и воздаяние комуждо по делом, грешным огнь неугасимый, и червие неусыпающее, и тма кромешняя, и иныя муки не имущия конца, праведным же царствие небесное, и прочая благая в безконечней жизни, ихже уста человеческая не могут изрещи, яже уготова Бог любящим его во веки, аминь;

 

По всем Требникам:

И потом бывает ектения, сугубая. Помилуй нас Боже. в нейже поминает Царя и Святителя. и восприемников. и новопросвещеннаго.

 

Это есть только в Иоасафовском и Иосифовском Потребниках.

сице. Еще молимся о милости, животе, и оставлении грехов рабу Божию, имрк., восприемнику.

Еще молимся о новопросвещеннем рабе Божии, имрк, о еже сохранену ему пребыти чистаго исповедания¹⁴³⁷ во вся дни живота его.

 

Возглас. Яко милостив. Посем отпуст.

 

По Иовлевскому и Филаретовскому.	По Иоасафовскому и Иосифовскому.
Христос истинный Бог наш. молитвами пречистыя Его Матере. силою честнаго и животворящаго креста. святых славных и всехвалных Апостол. и поминает святаго, имрк. егоже есть храм и егоже есть день и всех святых;	Иже во Иордане от Иоанна нашего радиспасения креститися приемый, Христос истинный Бог наш. молитвами пречистыя Его Матере, силою честнаго и животворящаго креста, св. славных и всехвальных Апостол и поминает святаго, егоже есть храм и егоже день, и всех святых. Посем по обычаю аминь.

 

По всем Потребникам.

Достоит же ведати. Яко аще будет тогда литоргия. предносят и младенца новокрещенаго, со свещами, на великом переносе. аще ли же совершен человек, крестивыйся. то сам ходит пред переносом. держа во обеих руках своих, по свеще горящей, и причащают крестившагося святых таин Христа Бога нашего. и по отпусте изводят к дому со свещами. провожающим его своим ему. Аще убо совершен есть человек, то сам носит свещи. такоже и в прочия дни, приводим бывает к церкви. такоже держащу свещи горящи. на вечерню и на утреню, и на литоргию. даже и до осмаго дни;

 

По Иоасафовскому и Иосифовскому Потребникам.

Аще будет омыти святое миро в тоже время, и тогда начала, Царю небесный не глаголем, но по прикладывании ко святым образом, глаголем молитву омовению святаго мира, Иже избавление, и прочая. И по возгласе. Яко твое есть еже миловати и спасати. глаголет иерей, Ныне отпущаеши. И потом бывает ектения сугубая по обычаю. и отпуст.

 

⇐ Предыдущая26272829303132333435Следующая ⇒

Поделиться: