Слава Отцу, и Сыну, и Святому Духу.

Стягнув тело свое воздержанием, и чистотою, в вышняя селения к широте отче достигл еси.

И ныне и присно, и во веки веков. Аминь. Пресвятая Богородица, спаси нас!

Исцели недугующаго ума моего омрачение, врача рождьшая Христа, всенепорочная Владычице.

  Песнь 6. Ирмос

Молитву пролию ко Господу, и Тому возвещу печаль мою, яко зол душа моя наполнися, и живот мой аду приближися. Но молюся яко Иона, от тли Боже мой возведи мя.

Преподобне отче Давиде, моли Бога о нас  

Лукавыи умертвися змий, священными твоими молитвами богоблаженне. И от того разрешаются злобы, иже знамения от тебе испросившии. Еси бо угодник Божии всесветел, познан бысть верен.

Преподобне отче Давиде, моли Бога о нас  

Обновив прилежным ралом душу свою, священныи отче, добродетельная в ня ввергл еси премудрено, многоплодная семена. И пожал еси, многоразличных исцелении богатыя класы.

Слава Отцу, и Сыну, и Святому Духу.

Крепостию духа отче возмог, державу вражию и силу низложил еси. И похвалу победную почести приял еси преподобне, чюдесными сиянии.

И ныне и присно, и во веки веков. Аминь. Пресвятая Богородица, спаси нас!

Господь с Тобою Пречистая, яко же изволил есть быв Отроковице, всех нас от области льстиваго, ходатайством Твоим избавил есть. Тем же Тя ныне по долгу родове родов ублажаем.

Господи помилуй! Господи помилуй! Господи помилуй!

Слава Отцу, и Сыну, и Святому Духу. И ныне и присно, и во веки веков. Аминь.

Кондак, глас 2-й.

Чистотою душевною божествено вооружився, и непрестанныя молитвы, яко копие вручив крепко, пробол еси бесовская ополчения, Давиде, отче наш, моли непрестанно о всех нас.

Икос.

Возлюбив преподобне Христовы божественыя заповеди, и возненавидев мира сего наслаждение, прииде усердно к Тому, и бысть светильник просвещая концы, блистанием духовным. Тем припадая молю тя, просвети ми очи душевнии, воспети твоя подвиги. Пощение и бдение и слезы, болезни и измождение тела, блаженныя ради будущия жизни. Ея же ныне наслаждаешися, моли непрестанно о всех нас.

  Песнь 7. Ирмос

Иже от Июдеи дошедше отроцы в Вавилон древле, верою утвержени, пламень пещныи попраша глаголюще, отец наших Боже благословен еси.

Преподобне отче Давиде, моли Бога о нас  

Прошед подвиги постныя отче, умом крепким, ума прегордаго, божественным смирением смирил еси поя, благословен Бог отец наших.

Преподобне отче Давиде, моли Бога о нас  

Краснейше прозябление отче, в дому Божии прозябл еси, добродетельми украшен, и плоды чюдесными облагоухал еси.

Слава Отцу, и Сыну, и Святому Духу.

Просветив свое сердце, начальник бысть священнаго состава отче. Наказая и уча. И вся возводя к Божиим волям, поя, отец наших Боже благословен еси.

И ныне и присно, и во веки веков. Аминь. Пресвятая Богородица, спаси нас!

Ново Отроча рождьши пребезначальнаго Слова, обетшавших ны грехом, обновила еси Девице. И пети укрепила еси, отец наших Боже благословен еси.

Песнь 8. Ирмос

Богозрачныя дети в пещи, со огнем и лесть поправше, пояху, благословите дела Господня Господа.

Преподобне отче Давиде, моли Бога о нас  

Наследниче божественых селении, ангельски отче пожил еси. Тем со ангелы ликует дух твой.

Преподобне отче Давиде, моли Бога о нас  

Невозвратно шествовав, отче премудре и досточюдне, ведущими к небеси божествеными стезями, от зле ведущих до конца уклонился еси.

Слава Отцу, и Сыну, и Святому Духу.

Всельшаяся благодать в душу твою отче, лукавно живущии в человецех нечистии дуси отгоними бывают.

И ныне и присно, и во веки веков. Аминь. Пресвятая Богородица, спаси нас!

Вода еси неизчерпаемая Девице, от Нея же вси пиющии благодати исполняемся, душею и телом освящаеми.

Песнь 9. Ирмос

Устрашися всяк слух, неизреченнаго Божия схождения, яко Вышнии волею сниде и до плоти. От девическаго бо чрева быв убо человек. Тем же Тя пречистую Богородицу вернии величаем.

⇐ Предыдущая123Следующая ⇒

Поделиться: