Преподобне отче Давиде, моли Бога о нас (поклон).

Исцеление источает богатно, честная твоя рака Божиим Духом. И страсти многовременныя исцеляет отче, приходящим к тебе, и прогонит лукавыя духи лютыя. И воздвизает верных, восхвалити твоя светлыя подвиги.

Преподобне отче Давиде, моли Бога о нас  

Яко великое солнце нам, величием подвиг твоих восиял еси, и озарил еси богомудре вся земныя концы. Умер прешел еси от света, к Свету восиявшему. Тем вопием ти, просвети наша помышления отче преподобне Давиде.

Преподобне отче Давиде, моли Бога о нас  

Тело твое блаженне терпеливое связавшееся веригами, страсти неисцельныя прикосновением исцеляет. Богу и Спасу тя вельми прославльшу, отче богомудре и досточюдне Давиде, яко делы своими добрыми прославльшуся преподобне.

Слава Отцу, и Сыну, и Святому Духу.

Процвел еси в постнических удолиих, прехвальне отче наш, яко шипок благоуханен. И яко же крин объюхал еси совести верных, добродетельми и чюдесы. Тем же преподобне отжени от нас страсти смердящия.

И ныне и присно, и во веки веков. Аминь. Пресвятая Богородица, спаси нас!

Просвети чистая Дево сетующее сердце мое присно преступленьми, и житейскими многими молвами, не остави мене врагом быти в радость яко да славлю Тя, и любовию пою Препетая.

Отпуст:

Господи Исусе Христе, Сыне Божии, молитв ради пречистыя Твоея Матере, и преподобнаго Давида, и всех ради святых, помилуй и спаси нас, яко Благ и Человеколюбец. Аминь.

Господи помилуй! Господи помилуй! Господи помилуй! (с поклонами)

Молитва первая  

О, всесветле, богохвальне авва Давиде, святче Божий! Ты силою благаго Законоположителя явился еси нам, кознями лукавого связанным и обуреваемым, яко наставник в покаянии и помощник в молитве. Того ради дано тебе много даров благодати и чудотворения, разрешения грехов наших и прегрешений оставление, болезней исцеление и диавольских наветов отгнание. Темже твоею отеческою милостию в богоцарственном разумении, многотрудными молитвами и моленьми твоими, наипаче же непрестанным твоим заступлением о нас, да возставит Господь Бог ны, во грех впадшия, силою Своею непобедимою на всякаго видимаго и невидимаго врага, дабы благодаряще совершая святую память твою, желанием возжелали мы покланятися Превечному Богу в Троице Единому, Отцу и Сыну и Святому Духу, ныне и присно и во веки веков. Аминь.

Молитва третья

О, священная главо, преподобне отче Давиде, великий чудотворче! Припадаем к тебе с верою и любовию, и просим тя, небеснаго заступника нашего: яви велие милосердие твое нам, смиренным и грешным, и пролей теплыя молитвы твои о нас ко Господу Богу. Исходатайствуй нам здравие душевное и телесное, земли плодоносие, воздуха благорастворение, мирное и безмятежное житие, и сохрани рабов, предстоящих и молящихся тебе, и осени небесным твоим благословением, и вся прошения их во благо исполни. Ей, отче, не презри молитв наших, со умилением к тебе возносимых, но буди о нас теплый предстатель ко Господу Богу, да славословим великия щедроты и милости Отца и Сына и Святаго Духа, в Троице поклоняемаго Бога и твое отеческое заступление во веки веков. Аминь.

 

Молитва четвертая

О, преподобне и Богоносне отче Давиде, Ангелов собрат и Апостолом подражатель, мучеником сподвижник, иноческой жизни пленитель, пустынником кормчий, молящихся тебе помощниче, просвещенный чудесами, молнией блистания твоего темных сил невидимо отгонителю.

О, преблаженне отче, молитвами твоими избави нас от всяких зол и сетей лукавых, земных и воздушных, от геенны огненной. Умоли возлюбленнаго тобою Бога, да ополчит нас Ангелами Своими, силою непобедимою.

О, пресветлая звезда, Божественнаго великолепия, будь заступник пред Святою Троицею, пред которой ты предстоишь, да избавит нас от междоусобныя брани, и даждь нам мирное и безмятежное житие, здравие душевное и телесное, земли плодородие, воздуха благорастворение, Божественным светом просвещение и с праведными во веки веков упокоение, яко да подобает Тебе, Пресвятая Троице, всякая слава, честь и поклонение во веки веков. Аминь.

 

Молитва иная

Преподобный отче Давиде, угодник Божий, проповедник и справедливого суда не убоявшийся! Смиренно молю тебя: упроси Господа нашего Иисуса Христа даровать мне счастье продолжить род человеческий. Святой отче, исцели боль мою и яви чудо твоего покровительства. Аминь

 

⇐ Предыдущая123

Поделиться: