О судьяхъ, яковые мають быти выбираны.

⇐ ПредыдущаяСтр 12 из 34Следующая ⇒

Уставуемъ, ижъ на тые вряды, яко на судъство, на подсудъство и на писаръство, не мають быти выбираны духовные особы, ани кашталянове, маръшалъки и старостове судовые, ани подкоморые, войские, ани хоружие земъские, дворъные и поветовые и нихто таковый, который бы инъшим врядникомъ земъскимъ былъ, але таковые и такъ мають быти выбираны, яко вышей в перъшомъ арътыкуле сего жъ розъделу описано. А где бы хто таковый былъ, жебы два вряды судовые або инъшие земские деръжачы, а напомненъный от шляхъты на рокохъ судовыхъ або на соймику пустити одного которого вряду не хотелъ, тогды тотъ обадва тые вряды тратить, а мы, г[о]с[по]д[а]ръ, водле статуту за обраньемъ и прозьбою шляхъты инъшыхъ на тые вряды маемъ подати и установити. Ведь же з ласки нашое, г[о]с[по]д[а]ръское, могуть тые врядъники земъские, судья, подъсудокъ и писаръ, такъже немней маръшалъки, подъкоморие, хоружие быть деръжавъцами и тивунами дворовъ и добръ столу нашого, только бъ не судовыхъ староствъ, такъ в томъ же, яко и в ынъшомъ повете.

Артыкулъ 3.

О моцы и владности суду земъского, ижъ кождый и въшелякого стану повиненъ передъ нимъ становитися, и о томъ, хто бы передъ нимъ не сталъ або ставъши с права передъ вырокомъ прочъ зышолъ.

Тежъ уставуем и даемъ моц вечными часы зверъхности владностью нашое, г[о]с[по]д[а]ръское, с призьволеньемъ пановъ радъ нашихъ и всихъ становъ всихъ земль того паньства нашого, великого князства литовъского, тымъ врядомъ поветовым в кождомъ повете суд[ь]и и подъсудъку на роки зложоные судовые запозваных передъ нихъ судити и справовати всих становъ, почавшы от вышшого ажъ до низшого, однако и одностайне, хто одно кольвекъ в томъ повете именья свои мети будуть, жадного з нихъ не выймуючы, ани з суду ихъ самыхъ и имене[й] ихъ не выпущаючы, кромъ добръ, столу нашому, г[о]с[по]д[а]ръскому, належачихъ, яко о томъ в трибунале и въ иншихъ артыкулех сего статуту на своих местъцахъ естъ описано. А хто бы кольвекъ, маючи именья свои в томъ повете, передъ ними се становити на часы певные, яко то нижей на своимъ местъцы постановено, за позвы не хотелъ, на таковыхъ, хто колвекъ будеть, такъ высокого, яко низшого стану, даемъ моцъ зуполъную оному вряду земъскому, судьи и подъсудьку, ижъ мають подле сего права и артыкуловъ, нижей о томъ постановеных и написаныхъ, поступкомъ сказанье и отправу чинити противъ кождого, яко хто во што на которомъ року упадаеть, ажъ до остатнего стопня права. А где бы сторона позваная, передъ врядомъ у суду ставъшы, будь на перъвшых або на другихъ рокохъ, хотя ещо не на завитомъ року, позву выслухавшы и до него такъ з стороны позванья, яко и з стороны збиванья позву мовившы, а врядъ бы ему того збуренья року, ани збиванья позву за слушное не призналъ, а онъ бы предъсе не хотечи на речъ самую отказывати, альбо пакъ и вступивши вжо в речъ и мовенье правное з стороною жалобною мевшы, а до конца розсудку и сказанья их не слухаючи, прочъ от суду отышолъ, не хотечи быти права послушонъ, тогды врядъ на таковомъ упорномъ вжо не нестанъное, але заразомъ речъ самую, о што позовъ идеть, за доводомъ слушнымъ правным сказати маеть. То жъ ся и о жалобной стороне розумети маеть, ижъ гдѣ бы вступивши з стороною своею противною в право, а прочъ от вряду отышолъ, тогды таковый речъ свою тратить. Нижли тотъ судъ земъский только тых арътыкулов судити не маеть и моцы мети не будеть, которые в особливыхъ арътыкулехъ суду нашому, г[о]с[по]д[а]ръскому, и суду врядовъ нашихъ кгродскихъ суть зоставлены и злецоны, обычаемъ, способомъ и поступкомъ, около того на своихъ местъцах описаны[м]. А декреты и вси сказанья судовые судья с подъсудъкомъ мають с писма чинити и тую цедулу рукою своею судья або подъсудокъ подписати, которую цедулу самого выроку водлугъ зезволенья судиного с подъсудкомъ писар маеть написати, а по выроку тую цедулу до писара отдати, водлугъ которое писаръ оную справу в книги записати маеть; и не маеть выдавати сторонамъ листовъ судовыхъ, ажъ передъ судьею и подъсудъкомъ вычитаеть, перъвей до книгъ уписавши. А листы судовые и всякие выписы и иные всий [! ] листы того вряду земъского маеть писаръ рукою своею подъписывати.

Артыкулъ 4.

Абы особы врядовые сами судили, а не хто инший на ихъ местъцу, и о томъ, кгды бы хто з нихъ захорелъ або свои властъные справы въ иншомъ альбо в томъ же повете мелъ, и о даванью листовъ упоминальныхъ.

Уставуемъ, абы судья, подъсудокъ и писар сами через себе, а не черезъ свои наместъники суды и роки отправовали, окроме того, если бы которий з них самъ захорелъ або бы тежъ свои властные потребы мелъ, або быхмо мы, г[о]с[по]д[а]ръ, которого з нихъ в справахъ наших, г[о]с[по]д[а]ръскихъ, и земъскихъ альбо в посельстве отослали, тогъды маеть о собе на роки товаришомъ своимъ и шляхте дати знати, же на тых рокохъ для которое с тых вышей помененыхъ причинъ не можеть быти. А мы, г[о]с[по]д[а]ръ, даемъ моцъ, ижъ тые два врядники судовые, на оных рокохъ земъских будучие, з шляхътою, которие ся на тотъ часъ зъедуть, от дня зачатью роком, в статуте помененого, третего дня, не жъдучи иных неприбылых, мають на местъце оного третего врядника кого другого чоловека доброго, цнотливого, веры годного, в праве и писать умеючого шляхтича, тамъ же в томъ повете оселого обрати и местце его засадити. А гдѣ бы шляхтича на местъце того врядника неприбылого на обранье одное особы не згодилися, тогды тые два врядники земъские, которые прибудуть, в незгоде шляхъты прихилившисе до тых, которые бы особу учстивую, богобойную и у права умеетъную подавали, мають за товариша третего, в местъце не прибылого, тою особою засадити. А тот, кого оберуть, присегу учинивши, вси справы судовые посполъ с тыми двема [в оригинале " двета" ] урядниками отправовати маеть. И вжо тые уси роки оная обраная особа отсуживать и всякие пожитки приходячие на себе брати будеть, хотя бы и тотъ урядникъ, которий не в часъ приехалъ, прыбылъ, тогды вжо местъца своего на тых рокохъ заседати не маеть. Ведъ же в тых двухъ днех с початъку роковъ, поки третего дня местъце неприбылого врядника засажоно будеть, предъсе перед тыми двема врядниками стороны пилность до права чинити и воланья через возныхъ ку праву на позвех записывати могуть. А гдѣ бы и тому обраному якая справа в речахъ его властныхъ на тых рокохъ и в ономъ же повете припадала, ино тые жъ врядники два зъ оною жъ шляхтою, которая на онъ часъ будеть, не жъдучи иных, на тую его только справу кого иного обравъшы, местъце его засадити мають. А ведъ же тотъ врядникъ земъский, которий на тыхъ рокохъ быти не могъ, на другихъ рокохъ под тою жъ присегою, которую на врядъ свой учинилъ, маеть передъ шляхътою поведити, ижъ правдиве не моцонъ былъ або свои властные потребы на рокох въ иншомъ повете мелъ, а не ку зволоце стороне и ни ку чыей шкоде тымъ се вымовилъ. А гдѣ бы которий с тыхъ врядниковъ земъских безъ правдивое обложное немоцы або властъное пилное потребы своее в другомъ повете на рокохъ, не маючи роковъ судовыхъ, омешкалъ, а то бы се до трех разовъ на него показало, таковый уряд свой тратить. А писаръ можеть подъписка або двухъ, або колко ему потреба будеть, мети а пилне того догледати, абы верне и правдиве, не проволокаючы, але заразомъ до книгъ записывано было. А гдѣ бы се што такового в справе от них помылило, не повинъна будеть шляхта подъписковъ смотрети, але на самомъ писару за оную помылъку шкоды своее доходити мають. То ж се и о писару кгродъскомъ в омылце яко[го] писанья розумети маеть. А гдѣ бы которий с тыхъ врядниковъ земъских судовыхъ у того ж суду, гдѣ самъ врядникомъ естъ, мелъ властные справы [в оригинале " травы" ] свои такъ за позвы, яко бы кгды и сознанье якое чинити мелъ онъ кому албо хто ему, тогды такимъ же обычаемъ оные два врядники з шляхтою на местъцо его иного обрати мають, яко вышей описано. А на тую его справу обраный без присеги справовати маеть. А пакли бы два з нихъ которые врядники промежку себе запозвалисе до того жъ суду земъского, тогды третий врядникъ товаришъ ихъ з шляхтою, тамъ будучою, будеть мети моцъ на местъцо оныхъ двухъ врядниковъ, в праве з собою стоячих, тежъ двухъ особъ тымъ обычаемъ, яко вышей о одном написано, ку розъсуженью тыхъ справъ обрати. И естли бы на местъцо писаръское кого иного обрали, тогды его подъписъ такъ будеть важна, яко и писаръская. А о бранью позвовъ и листовъ упоминальныхъ и иныхъ листовъ правныхъ в потребахъ властныхъ писаровыхъ, также суд[ь]и, подъсудъку, и въ ихъ речахъ и тежъ кому иншому противныхъ около бранья листовъ упоминальныхъ и иныхъ листовъ правныхъ, окромъ позвовъ, мають се они заховати водлугъ арътыкулу шостого в семъ же розъделе четвертомъ. А хто подъ часомъ засаженья на судъ инъшое особы кривду якую в суде менити собе будеть, тотъ того ж и позывати о то мает. Ведь же вины, платежу пенежного относити на собе не будеть.

Артыкулъ 5.

⇐ Предыдущая 7 8 9 10 111213 14 15 16 Следующая ⇒