Цена речамъ, дома робленымъ, одежы належачим и иншим.

⇐ ПредыдущаяСтр 32 из 34Следующая ⇒

За кожухъ бараний музский одевалный копу грошей.
За кожухъ бараний жоноцкий торлопъ семъдесятъ грошей.
За китликъ полъкопы гроше[й].
За сермягу двадцать грошей.
За простицу синюю або черленую дванадцать грошей.
За простицу чорную осмъ грошей.
За локоть сукна простого сермяжного три грошы.
За локоть полотна тонкого ткацъкого кужелного шесть грошей.
За локоть серпанъковъ шесть грошей.
За локоть наметокъ два грошы.
За локоть полотна кужельного простого тканья два грошы.
За локоть пачесного полотна грошъ.
За локоть згребници полъгроша.
За локоть скатертей водлугъ важности пряжы и ткан[ь]я такъ же, яко и за полотно.
За локоть ручниковъ по половици цены скатертное.
За коверцы домовое роботы, за опоны, также за постелю и иные потребы и спряты домовые за доводом водлугъ уваженья урядового.
За топоръ шесть грошей.
За серпъ два грошы.
За косу шесть грошей.
За хомутъ мужыцкий ременный шесть грошей.
За простый два грошы.
За дугу два пенези.
За вожы лычаные полъгроша.
За конопные грошъ.
За сани мужыцкие дровни простые два грошы.
За колеса мужыцкие простые шестъ грошей.
За седла, узды, шлеи, лейца, узденицы, возы и иншые рыштунки водлугъ доводу и уваженья врядового.
За топоръ великий, скглютъ и иншый топор дойлидъский, беднарский, сталмаский, также за пилы, свердла, долота, гебли, спусты и иншые начынья, дойлидскому, столяръскому и сталмаскому, млынаръскому, по тому жъ ковалскому, слесарскому и инъшыхъ всихъ ремесниковъ [в оригинале: " ремесникокъ" ] розныхъ ремеслу начынья належачие, мають быти сужоны и плачоны водлугъ доводу и уваженья слушного врядового.

Артыкулъ 12.

Цена собакамъ.

За пса домового брехуна три копы грошей, за наследника и за набрешника зверинного три рубли грошей, за бобрового пса три рубли грошей, за курча и за хорта три копы грошей, за выжла две копе грошей, за узлайника звериного три копы грошей, за щаю полторы копы грошей, за подстрелчого пса три копы грошей, за пса обсочного три рубли грошей, за меделянъского пса три рубли грошей, за хорта подсоколего три рубли грошей.

Артыкулъ 13.

Естли бы песъ непривязаный укусилъ або образил, и тежъ хто бы пса забилъ.

Тежъ уставуемъ: кгды бы кого песъ уелъ с чиего присчванья, а онъ бы, ставши за позваньемъ перед судомъ, к тому посчванью ся не зналъ, таковому судъ маеть въсказати отприсегнутися, ижъ того не вчинилъ. А кгды бы присегнути не хотелъ, тогды жалобная сторона, кгды его в том поприсягнеть, повиненъ его будет навезати, яко бы его самъ своею рукою ранилъ. Пакли бы хто кому пса умысльне, а не от руки забилъ або застрелилъ, таковый будет повиненъ оного пса платити водле цены, вышей описаное. Нижли, естли бы его забилъ от руки киемъ або якою бронею, себе боронечи, не пометом, ани стрелбою, таковый за оного пса ничого платити не будеть повиненъ.

Артыкулъ 14.

Хто бы в дому своемъ мелъ пса або быдля, которое бы в суседъстве шкодило.

Уставуем: естли бы в кого песъ домовый албо быдля якую шкоду у околицы чинило, а тотъ домовый г[о]с[по]д[а]рь, о томъ ведаючи, оного быдляти стеречи, а пса на привези держати и мети не хотелъ, тогды таковый будеть повиненъ всю шкоду, в суседъстве черезъ такое быдля або пса вчиненую, платити и оправовати, на што слушный доводъ будеть вделанъ. Если ж бы быдля такое человека образило, тогды тое быдля тому, кого образилъ, выдано быти маеть. А также тежъ, хто бы мелъ коня васнивого, который бы билъ, тогды повиненъ звонокъ на немъ на похвахъ албо на нозе мети для того, абы, то видячи, на него не наездъжали. А хто бы без звонка на такомъ кони ездилъ, а онъ бы кого образилъ, тогды тотъ конь за то ображоному выданъ быти маеть.

Розделъ четвертыйнадъцать. О злодействе всякого стану.

Артыкулъ 1.

О пойманомъ з лицомъ слузе и подданомъ чиемъ, где маеть быти веденъ.

Кгды бы хто чиего слугу, боярина, чоловека тяглого або челядника неволного зъ якимъ лицомъ, речьми крадеными поймалъ обычаемъ и порядъкомъ, нижей в семъ розделе описанымъ, такъ в дому его, яко и на поли албо на дорозе, толко бы на кгрунте пана того чоловека, тогды такового лицованого чоловека маеть вести до пана его, чий будет, до того двора, ку которому оный ч[о]л[о]в[е]къ належит. А где бы трафилося кому чиего слугу чоловека поймати з лицомъ не на именью пана его, але где индей на дорозе албо на чужомъ кгрунте будучого, албо тежъ в местечку, в селе иншого пана, будь тежъ в месте нашомъ, где несудовый врядъ и не торгового дня албо в селе нашомъ, такового стороне жалобной волно будеть вести где въсхочеть, албо до вряду нашого, г[о]с[по]д[а]рьского, кгродъского того повету, албо тежъ до пана его, и поведет ли до пана, ино подавши его с тымъ лицомъ оному пану самому, а в небытности самого пана - ино вряднику, тивуну его або рыкуни, а межи становъ меншыхъ убожъшихъ, где врядника, тивуна не будеть, ино жоне або сыну дорослому, маеть з нимъ справедливости просити, а тотъ панъ, або в небытности панъской – врядникъ, виненъ будеть ему справедливость неотволочную надалей до двухъ недель учинити водлугъ сего статуту. И прийдет ли с права до зводу, тогды [з]водъ до остаточного стопня права там же на том местцу мает быти чинен тым же обычаем, яко нижей въ другом артыкуле сего розделу о зводе на врядех наших ест ширей описано, и до розсудку правного того человека, з лицомъ поданого, тот, кому его подадутъ, мает в доброй опатръности и за своею сторожею, от жалобное стороны сторожи не потребуючы, ховати. А естли бы то пан або врядникъ его справедливости ему о то учинити не хотелъ або ее не водлугъ права сего посполитого с кривдою стороне жалобной чинилъ, таковый, будучи о то до вряду нашого суду належного позванъ, повиненъ будеть самъ передъ врядомъ нашимъ стати и того въ злодействе обвиненого поставити.

А врядъ нашъ в той речы промежку нихъ розсудити и винъного водлугъ права карати маеть. Естли ж бы тотъ злодей утекъ у того пана своего, або панъ оное лицо стратилъ и передъ судом нашимъ злодея бы не поставилъ и лица не положилъ, таковый самъ албо его врядникъ, кому тотъ злодей былъ поданъ, повиненъ будеть первей на томъ присегнути, ижъ тотъ злодей утекъ або лице згинуло без рады, ведомости, фолги и не за опатръностью або недбалостью его. А по такомъ отприсяженью предсе жалобной стороне шкоду заплатити, на чомъ присягнеть албо який иный слушный доводъ учинить, што ему при оном лицы будет згинуло. А естли тотъ злодей в такой вине былъ обжалованъ, за што горломъ карають, предсе и потомъ, где колвекъ можеть быти постигненъ, горломъ каранъ быти маеть. Пакли ж бы за приведеньемъ до двора которого пана або дому шляхетъского ч[о]л[о]в[е]ка его лицованого оный панъ або его врядникъ, тивунъ и хто жъ колвекъ, въ дворе будучый, стороне поводовой, возному и людемъ стороннимъ оказатися албо, оказавшися, обвиненого въ злодействе до себе взяти не хотелъ, такового ч[о]л[о]в[е]ка волно будетъ стороне укривжоной вести до вряду нашого судового кгродского и тамъ собе з нимъ на вряде нашомъ справедливости доводити.

Артыкулъ 2.

О чыненью справедливости з села въ обвиненью злодейскомъ.

Коли бы теж што у кого украдено, а увидится ему шкода от которого села, а шкодника своего не ведаеть, тогды маеть просити права на тое село у пана его. А естли бы далъ всему селу вину, тогды три мужы з оного села, которыхъ онъ обереть, мают присегнути, якъ в томъ селе шкодника его не ведают и сами шкодниками не суть. А пакли бы о тое не присегнули, тогды оное село все тую шкоду всю тому шкоднику мают платити, а собе злодея искати. А где бы в томъ селе люди были розныхъ панов, тогды укривжоный маеть всихъ тыхъ пановъ однымъ листом упоминалнымъ и на одинъ рокъ о вчиненье такое справедливости обнести и с того листу копии одному которому ч[о]л[о]в[е]ку кождого пана в томъ селе черезъ возного подавати. А который панъ або его врядникъ за листомъ упоминалнымъ справедливости не вчинить, тот панъ самъ, будучи о то припозванъ, за доводом стороны жалобное шкоду ему платити виненъ будеть. Такое жъ ся право в той мере и о селахъ нашихъ, г[о]с[по]д[а]рьскихъ, розумети маеть.

Артыкулъ 3.

О поиманом з лицомъ в местехъ нашихъ, г[о]с[по]д[а]рьскихъ, и о зводехъ злодейства, с чимъ колвекъ хто поиман будеть.

Уставуем: кгды бы хто шляхетъского народу чоловекъ яко и простого стану, будь нашъ, г[о]с[по]д[а]ръский, подъданый албо князский, панский и земяньский, также и чоловекъ лезны[й], безъ службы мешкаючый, або и слуга чый безъ бытности пана своего, албо тежъ гость приеждчый в которомъ месте нашомъ, где суть вряды судовые кгродъские, былъ пойманъ на злодействе на самомъ учынку горячом, албо тежъ лице - речы краденые были в него познаны, такового не до пана его, чыимъ бы ся слугою албо подъданымъ озывалъ, але до того жъ вряду нашого судового кгродъского, подъ которымъ пойманъ будеть, а чоловекъ местъский права ма[й]деборъского пойманый, в томъ же месте мешкаючий, до своего враду местъского веденъ быти маеть. А врядъ, взявши такового до везенья, и естли ся который чыимъ слугою або подъданымъ менити будеть, маеть о томъ пану его знати дати, заховуючыся в томъ водълугъ артыкулу двадцать девятого в розделе четверътомъ, и рокъ тому пану ку прислуханью того права ознаймити, и прибудет ли панъ самъ або кого на свое местце на рокъ ознайменый пошлеть, а врядъ при бытности его такого обвиненого водле права судити и сказывати будеть. А естли самъ панъ не прибудеть и никого не пошлеть, то вжо вряд нашъ предся на тотъ рокъ зложоный судити и коньчити маеть водле права.

По тому жъ ся врядъ нашъ около даванья знати паномъ о ихъ слугахъ и людяхъ маеть заховати, и кгды хто пойманый на дорозе або где индей, яко о томъ въ артыкуле перъвшомъ сего розделу есть описано, до вряду приведенъ и до везенья подан будеть, а часу права, кгды бы обвиненый в злоде[й]стве поведилъ заводъцу, от кого тое лицо маеть, тогды маеть на том же вряде нашом того заводцу поставити або сознаньемъ врядовымъ себе очыстити: где будет то купил и на котором вряде то оповедалъ и въ книги записалъ. А естли бы тотъ заводца того обвиненого в злодействе передъ врядомъ заступилъ, а тотъ бы заступца брался на иншый зводъ, хотечы вести от суда вряду нашого на инъшого заступъцу и до инъшого вряду, то ему не маеть быти дано, але кождый заступца до остаточнего [в оригинале: " остатоснего" ] зводу маеть быти становенъ передъ тымъ врядомъ нашимъ, где ся початокъ сталъ зводу. А лице во вряде будеть ку зводу тотъ выкупати, хто ся зводить. А вед же за выскупованье [! ] лица болшей врядъ не мает брати, толко по дванадцати грошей и за кождымъ зводомъ якъ от самого вязня, выпущаючы его, такъ от лица, которое будет ку праву ставено, и кождому таковому, хто ся выводит з маетности оного, на ком лице застанет, навезка водле стану сказована быти мает. А пакли бы ув оного злодея маетности такъ много не было, чим лице во вряде выкупити, тотъ вряд маеть лице жалобной стороне даромъ вернути. А злодей яко за злодейство, такъ и за вси навезки и шкоды маеть горломъ приплатити. А естли бы заводцы перед врядомъ нашымъ до остаточного зводу не поставил, а сознаньемъ врядовымъ себе в томъ злодействе не очистилъ, тогды тот каранъ быти мает яко злодей, а шкода, на чом сторона жалобливая присягнет, то мает быти плачоно з дому оного злодея. А где бы остаточный заводца себе не очистилъ выписомъ врядовымъ, где оную речь купилъ, або, ижъ то его конь або волъ доморослый, сведецъствомъ слушнымъ ся выправилъ [по смыслу напрашивается " ся не выправилъ", но так в оригинале], таковый яко навезокъ, такъ и шкодъ никому платити не будеть повиненъ, нижли естли бы тую речь купилъ, пенези свои тратить. А пакъли бы сторона поводовая, которая позвала, менила коня або вола своимъ доморослым, або речь, дома уробленую, якъ сукно и якую колвекъ [в оригинале: " полвекъ" ] иншую речь, а сторона жалобливая, которая будеть з лицомъ приведена, будучи тежъ неподойзреною, менила быти своимъ доморослымъ або доморобленымъ, а подобенъство ку тому ся стегало, хотя бы и обедве стороне выдали светковъ годныхъ, тогды за подобенъствомъ и за сведецъствомъ сторона обжалованая при своихъ светкохъ [в оригинале: " светокохъ" ] близшая будет ку выводу присягою, иж то его естъ доморослое або дома робленое, бо тому бы вжо шло о горло. А вед же судъ подобенъства всякие на доброй бачности мети маеть и в речахъ вонтъпливыхъ склонънейший маеть быти ку вызволенью, нижли ку каранью. А простого стану ч[о]л[о]в[е]къ, который первый або другий раз около таковыхъ речей будеть обвинен, тотъ ку таковому отводу маеть быти припущонъ, а по выводе такового толко от горла обжалованый воленъ будеть, а навезки собе домагатися не маеть.

Артыкулъ 4.

⇐ Предыдущая 25 26 27 28 29 30 313233 34 Следующая ⇒