О вдове, которая зостанеть з детми, летъ не дорослыми, и о детехъ без опекуновъ отумерълыхъ.

⇐ ПредыдущаяСтр 25 из 34Следующая ⇒

Уставуемъ: которая бы вдова зостала по мужу своемъ з детьми малыми, летъ не дорослыми, а мужъ бы опеку детей и именей ей, жоне своей, записалъ, тогды она водлугъ тестаменъту и опису мужа своего будеть тою опекою владнути, на всемъ се слушне и пристойне радечи и справуючы, яко бы было без шкоды детиное и утраты а знищенья именей ихъ. Ведъ же где бы такая белая голова в той опеце, ей от мужа ее звероной, нерадне се заховала и детямъ именье и скарбы утрачала, тогды стрыеве, а не будет ли стрыевъ, и иншые близские тыхъ детей мають ее о то позвы притягнути на рокъ певный завитый передъ урядъ судовый земский. И доведуть ли того, же утрачаеть, маеть опеку, именье и дети спустити кревнымъ, а сама зостати на оправе своей. А не будет ли оправы, тогды мають ей выделити ровъную часть межи детьми, которую будеть деръжати и ее уживати водлугъ того, яко около такихъ невенованыхъ жонъ вышей в семъ розъделе естъ описано.

А ведъ же утрата от нее на йменьяхъ инакшая не можеть се показати, одно естли бы непобожными податками, винами, серебъщизнами людей въ оныхъ именьяхъ обтяжала, гумна и иные статки домовые нерядне роспрошала, а ничого в домъ детямъ не прыбавляла. А где бы стрыевъ и иншыхъ кревныхъ не было, тогды судъ земъский оного повету за донесеньемъ ведомости до нихъ маеть такую утратную вдову позвати передъ себе на роки судовые именемъ детей рокомъ завитымъ. А тамъ, где се тая утрата такая окажеть, мають опеку тую от нее взяти. А на тое местъце врядъ судовый земъский мають опекуна, в томъ повете добре оселого, там же на тыхъ рокохъ установити и в декретъ свой меновите вписати, а дети, именья и вси скарбы ему, врядовне все списавши и до книгъ уведши, подати, который опекунъ маеть вси в целости до летъ детинъныхъ держати и такъ ся заховати, яко в артыкуле четвертомъ розделу шостого описано естъ. А в томъ часе, нимъ тую утрату по ней обачать, она бы што детемъ утратила, тогды будеть тую всю шкоду детемъ своимъ платити з вена або з властного именья своего. А где бы отецъ з сего света зъшолъ, детей своихъ и именей, имъ належачихъ, никому в опеку не злетившы и не описавши, тогды опека детей такихъ, летъ не дорослыхъ, и именей ихъ належати будеть стрыемъ або и инымъ близьскимъ. Нижли для лепшого и пилнейшего выхованья дети малые от матки своее до опекуновъ браны быти не мають, але мають зостати при матце: девка — до пойшстья ее замужъ, а мущизна — до летъ такихъ, въ якихъ вжо на науку до школы давати годно, то естъ до семи лет. А опекунове такимъ детемъ, поки при матце будуть, опатрен[ь]е и выхованье слушное водлугъ можности именья детиного и узнанья врядового на одежу и выживенье на кождый годъ повинни будуть давати до рукъ матки ихъ. Але матка девокъ своих без рады и ведомости опекуновъ ихъ в станъ малженьский змовъляти и отдавати не маеть.

Артыкулъ 12.

О вдовахъ, которая бы за простого чоловека, не шляхтича, замужъ пошла.

Уставуемъ: которая вдова, будучи стану шляхетъского, маючи именья [в оригинале: " имънья" ] отчизные або матерыстые, пошла замужъ без ведомости, рады и позволенья приятелъ своихъ кревныхъ за простого стану ч[е]л[о]в[е]ка, не шляхтича, таковая от всихъ именей своихъ яко отчизныхъ, такъ и матерыстыхъ и спадковыхъ вечности отпадываеть. Але тые именья мають прийти на дети першого мужа албо, где бы детей не было, тогды на близьскихъ, которые дети або близьские предсе будуть повинъни таковой вдове за тые именья ее отложити суму пенезей не подле шацунъку статутового, але по половицы, то естъ за каждую службу людей — десеть копъ грошей, а за землю пустовскую — пять копъ грошей, а инъшый кгрунътъ — по половицы сумы, яко в томъ статуте о томъ шырей написано. А вено описаное все тратить, и не повинни будуть дети и близьские таковой вена откладати.

Артыкулъ 13.

О вдове [в оригинале: " двове" ], которая бы хотела по смерти мужа своего за другого мужа пойти.

Хочемъ мети, абы малженъство светое в почъстивости было заховано, и для ведомости плоду абы каждая вдова шляхътянка по смерти мужа своего шесть месецей за другого мужа не смела пойти. А которая ближей пойдеть, тогды вено свое, от мужа своего записаное, тратит. А пакли бы вена описаного не мела, тогъды детем перъвшого мужа своего, а не будет ли детей, ино кревнымъ, близьским его повинъна будет, кгды на ней того за позвомъ у суду земского доведуть, вины заплатити дванадъцать рублей грошей.

Артыкулъ 14.

О спадки, которые заровно на сына и на дочки приходять, и о внесенъю матчиномъ, естли бы никому не записала.

Тежъ уставуемъ, ижъ всякая маетность матерыстая, безь росправы и опису слушного отумерлая, такъ именей лежачихъ, яко и рухомыхъ речей тыхъ, то естъ грошы готовые, золото, серебро, перъла, каменье дорогое, шаты и уберы всякие, цынъ, медь, кони, возы, коберъцы, опоны и инъшие всякие статки и спраты домовые, также и внесенье матчино, которое бы никому не было записано, то все маеть ити в ровный делъ межи всихъ детей, яко сыновъ, такъ и дочокъ. Нижли спадки отчизные именей [в оригинале: " уменей" ] лежачихъ, скарбовъ и маетности рухомое толко на сыновъ и на близьскихъ по мечу приходити будуть такъ, яко и на инъшомъ местъцу шырей о томъ написано, звлаща где бы черезъ отца записомъ або тестаменътомъ росправено и росписано не было.

Артыкулъ 15.

О поровнанъе внесенья розныхъ жонъ передъ розделомъ детинъного именья.

Теж уставуемъ: кгды бы одинъ шляхтичъ мелъ колко жон, а оные жоны мели бы ровные внесенья свои в сумахъ пенежныхъ, а, не записавши мужу внесенъя своего, померли, тогды сынове, колко ихъ будеть з оныхъ жонъ, вси именья отчизные мають межы себе на ровные части поделити. А естли бы которое жоны внесенье болшое было, нижли иншыхъ жонъ, тогды будуть повинни дети иншыхъ жонъ напервей передъ розделомъ именей своихъ выровнати оное болшое внесенье матъки братьи своее; и што большъ сумы того внесенья которое жоны над внесенье иншых жонъ выносити будеть, тотъ злишокъ сынове иншыхъ жонъ той братьи своей, которыхъ матъки внесенье болшое было, ровънымъ рахункомъ съ частей своих винни будуть заплатити, пущаючы тежъ и рахуючы тотъ злишокъ заровно и на часть тыхъ братьи своее, которымъ то по матъце ихъ прыходить, тогъды жъ именья отчизные на ровные части межы себе поделити.

Артыкулъ 16.

Естли бы которая вдова замужъ пошла.

Уставуемъ тежъ: естли бы которая вдова замужъ пошла, а напервей, будучы за перъвшымъ мужомъ своимъ, вено, оправленое от мужа своего, мела, тогды вжо от другого мужа не маеть вена записаного мети. Нижли естли бы тотъ другий мужъ ее умеръ, а дети по собе зоставилъ, тогды она межы детми своими ровъную часть въ именью взяти маеть, а на томъ до живота мешкати. А естли бы одно дитя зостало, тогды от того дитяти албо от ближнихъ маеть на въдов[ь]емъ столцу толко на третей части зостати, а по животе и тая третяя часть маеть спасти на близскихъ. А ведъ же, седечы на вдовъемъ столцу, не маеть того именья утратити, але се во всемъ заховати водле того, яко вышей о томъ написано. Однако жъ тую волност[ь] мужу заховуемъ, ижъ волно ему будеть и такой жоне своей, вдовою понятой, што всхочеть маетъности своее лежачое и рухомое записати. А которой жоне што от мужа лежачого именья записано будеть, таковая вжо от детей, ани от близскихъ части, вышей споминаное, въ именью мужнемъ домагатися не мають.

Артыкулъ 17.

О именью, на которомъ мужъ жоне оправу учинить.

Тежъ уставуемъ, ижъ хто кольвекъ, описавши оправу жоне своей на которомъ именью своемъ, тотъ того именья своего никому иншому никоторымъ правомъ заводити не можеть, хотя бы и призволенье от жоны на писме мелъ и показывалъ, без очевистого передъ врядомъ сознанья ее. А и врядъ тежъ кождый на таковомъ венованомъ именью никому отправы никоторое за выступъ и вину мужа ее чинити не маеть, окромъ доброволного и очевистого передъ врядомъ самое панее венованое прызволенья. И к тому, где бы за выступъ який женний, зъ именья ее веновного вчыненый, што на ней самой за невчыненьемъ з нее через мужа справедливости с права сказано, тогды то на томъ же именью ее веновномъ отправовано быти маеть.

Артыкулъ 18.

О крывдахъ, которые ся деють от мужа з ымен[ь]я, веновного жоне.

Естли бы мужъ, записавши которое именье жоне своей у вене за внесенье ее ажъ по животе своемъ, а самъ бы с того именья кому якие кривды чинилъ, тогды в такихъ речахъ предъсе позвы мають быти покладаны на том же именью, с которого се крывды деють. И мужъ таковый виненъ будеть за тыми позвы до суду становитисе. А жона хотя бы позовъ с такого именья зносила и право свое веновное слушное оказывала, врядъ предъсе за тымъ позвомъ на мужа ее водлугъ права сказанье чинити будеть. А отправа за то на иншой оселости его, естли которую в том же або хотя в ыншомъ повете мети будеть, чинена быти маеть водлугъ науки сего статуту, вышей около отправъ описаное. А не будет ли болшей именей мети над тое, жоне венованое, тогды и на маетности его рухомой, естли которую вряду окажеть, а в недостатку маетности и на самой особе отправа чынена будеть.

Артыкулъ 19.

О бесплодъной жоне.

Кгды бы которая жона, будучи замужомъ, безъплодне умерла або хотя бы и плодъ мела, а тотъ бы плодъ первей ее смеръти або и по животе ее, летъ зуполныхъ не дошедши, зъ сего света зъшолъ, а она бы, маючи певное внесенье за выправою от родичовъ своихъ, а того бы внесенья никому не записала, таковое внесенье само безъ привенку засе в тот же домъ, с которого вышла, вернутисе маеть родичомъ ее, которые ее замужъ выправовали. А не будет ли родичовъ, ино братьи рожоной. А которая бы жона, безъплодне змершы або и плодъ мевшы, але живого его по собе не зоставившы, або бы тежъ тотъ ее плодъ по ее смерти, летъ не доросъши, змеръ, а она бы мела внесенье и выправу певную от братьи зъ четвертое части, а никому бы того не записала, а еще бы сестра ее была не выпосажона и замужъ не выдана, тогды такое внесенье ее не на братью, але на сестру, замужъ не выданую, приходити будет. Одно жъ естли бы оное внесенье сестры своее братья собе взяти хотели, тогды вместо того сестре невыданой зо всее четвертое части, чого стояти будеть посагъ, выправу дати повинъни. Кгды жъ четвертая часть водлугъ давныхъ правъ особливе на выправу девокъ замужъ отложона безъ всякое розьности, хотя бы ихъ было и наболей або тежъ и одна. А естли бы отецъ колко дочокъ за своего живота выдалъ, а еще бы одна або колько ихъ невыданыхъ зостало, тогды той албо тымъ позосталымъ не зо всее четвертое части, але водлугъ ихъ права и личъбы с части тое четвертое выправа дана быти маеть. Пакли ж бы сестры, не выданое замужъ, не было, тогды тое внесенье по безплодной сестре маеть прийти на братью и на ихъ дети, потомки. А где бы братьи и ихъ потомковъ не было, тогды тотъ спадокъ внесенья сестры безплодное змерълое на сестры иншые, хотя и выправеные, и на ихъ дети, потомки прыйдеть.

Артыкулъ 20.

⇐ Предыдущая 20 21 22 23 242526 27 28 29 Следующая ⇒