О светкохъ, якие мають быти припущоны до сведецъства.

⇐ ПредыдущаяСтр 26 из 34Следующая ⇒

Еще уставуемъ, ижъ светки о речъ земленую и о доводъ держан[ь]я земли, такъже и о кождую речъ не мають ку сведецству припущаны быти жыдове, одно люди веры хрестиянъское всякого стану и тые, которые привильемъ нашимъ ку сведецству прыпущоны, толко бы были люди добрые, цнотливые, богобойные и ни в чомъ не подозреные. Тогды таковые ку сведецству мають быти припущоны. А татарове, где бы се имъ трафило о кгрунтъ межы соб[о]ю и з людми хрестиянъскими право вести, а скажут ли имъ доводъ албо отводъ, тогды они водлугъ привильевъ своих и закону своего присегу чынити мають. А в таковой справе ихъ хотя и татарове, толко бъ люди добрые, цнотливые и веры годъные, светками быти могуть.

Артыкулъ 15.

Хто бы кому светки ганилъ.

Коли бы хто своволне и безъ слушное причыны стороне поводовой светки ганилъ, а онъ если бы водле права поставилъ деветь светковъ, а тотъ бы межи тыми деветма светки не обралъ трех веры годныхъ, а отставлялъ ихъ, хотечы имъ тымъ права сконъченъя переказити, а тотъ, яко поводовая сторона, другими се светки не опатрылъ, а мелъ бы тымъ на ономъ року завитомъ речъ свою упустити, тогды таковый, хто ганить светкомъ, маетъ там же заразомъ передъ подъкоморымъ того слушным доводомъ на писме доводити. А если бы того на нихъ, в чомъ имъ ганилъ, не довелъ и не показалъ, а подкоморый узналъ бы то, же имъ прожно ганилъ и отставлялъ, тогды таковый отставуючый тых светковъ кождого зособна зганеного светка водле стану повиненъ будетъ навезати водлугъ роду ихъ: шляхтича яко шляхтича, а хлопа яко хлопа, такъ, яко бы его ранилъ. А подкоморый або комисары навезку тую светкомъ таким заразомъ там же маетъ сказати, а светковъ тыхъ ку сведецъству припустити. А если бы на которого светъка або на колко ихъ того, в чомъ имъ приганитъ, и речъю самою довелъ, тогды тая сторона, чые светъки будуть, маетъ на местце того або тыхъ зганеныхъ иншых светковъ поставити - не может ли быть того дня, тогды назавтрее, а надалей третего дня. Пакли жъ бы се то трафило, жебы собе светкомъ з обу сторонъ наганили и одинъ на другого светъковъ того приганенья довелъ, тогды тые светки зганеные на обе стороне маютъ быти отставлены, а знову инъшыхъ светковъ, людей веры годныхъ, неподозреныхъ з обу сторонъ мають ставити и с тыхъ ку присязе обирать будуть.

Артыкулъ 16.

О землю обрубную и тежъ о суместные земли, яко мають доводъ чынить.

Тежъ уставуемъ: естли бы которой стороне о землю обрубъную ограничоную поводъ с права былъ сказан, тотъ светковъ своихъ маеть подле обычаю права девети передъ правомъ поставити, и якъ тотъ панъ або земенинъ, поколе с тыми светъками своими границу заведшы, прысегу самъчетвертъ с трема светками учинить, потоль маеть граница уделана быти. Нижли есъли бы право мели о землю сумежную, а не в одномъ местцу, але порозну нивами або обрубами лежачую, а была бы тая земля ку одному двору або именью шляхетскому, будь правомъ прырожоным або якимъ набытымъ прыслухаючая, тогды тые жъ одны светки могуть о кождую ниву, сеножать або обрубъ светъчыти. И объв[е]дъшы вси такие розные пенъные земли, потомъ сам тот пан, который ку доводу припущон будет с трема светками, одным разомъ на вси тые земли присягу учинити маетъ. А подъкоморый маеть имъ роту прысязе достаточную на вси тые земли одным разомъ, меновите их списавшы, казати имъ выдати.

Артыкулъ 17.

Хто бы мелъ вести право з воеводою, з старостою и державцою о землю свою, а тотъ бы мелъ именье в томъ же повете, где естъ врядникомъ.

Тымъ тежъ обычаемъ, если 6ы который врядникъ нашъ, маючы именье свое властное в томъ повете зъ староства або державы своее, с которымъ шляхтичомъ о землю свою копу вести мел, тогды маетъ справоватисе, яко вышей описано о кгрунтъ земъленый, маетъ поставити деветь светковъ, шляхту и иныхъ людей добрыхъ, веры годныхъ, а не подъданыхъ того вряду прысуду своего, але инъшыхъ сторонънихъ. И такъ тежъ подъкоморый маетъ смотрети листовъ, границъ, знаковъ, и чые листы будут або границы лепшые, тая сторона маетъ быти прыпущона ку доводу. Вед же если староста, деръжавъца не мелъ ближшими граничниками тое земли пенъное людей инъшыхъ обчыхъ надъ людей староства своего, тогды вжо пры инъшыхъ обчыхъ людяхъ и такими подъдаными нашыми доводити будет мочы.

Артыкулъ 18.

Хто бы кому границу або межу сказилъ.

Коли бы шляхтичъ шляхтичу границу сказилъ або огнемъ выжогъ, або вырубалъ кгвалтовне, або яко колвекъ инакъ выказилъ, або копцы роскопалъ, або межу сказилъ, або бы привлащаючы хто собе болшъ кгрунту, а границы и знаки новые по чужой земли кгвалтовне а безправне почынилъ, а было бы то на него правомъ переведено, тогды таковый маеть заплатити ображоному дванадъцать рублевъ грошей, а подъкоморому копу грошей, а за каждый копецъ скажоный три копы грошей. А если бы шляхтичъ шляхтичу межу переоралъ, тогды за переоранье межы три рубли грошей, а подъкоморому полъкопы [в оригинале: " полъсюпы" ] грошей, а границу або межу, черезъ него скажоную, маетъ засе передъ подъкоморымъ направити по-старому. А если бы простого стану чоловекъ шляхтичу границу порубалъ, выжогъ, сказилъ або межу переоралъ и значне зопсовалъ, тогды такий виненъ будетъ тому шляхтичу вины три рубли грошей заплатити, а границу и межу по-первому направити. А где бы чоловекъ простого стану другому тежъ простого стану чоловеку межу переоралъ и сказилъ, тогды за скаженье тое межы будетъ виненъ заплатити рубль грошей, а межу направити, бо если бы кому ся кривда в границы або межы видела, ино о то мают се правомъ спирати, а не кгвалтомъ. Вед же свою старую границу або ст[ен]у [в оригинале: " стту"; трактовка дается по транслитерации в изд.: Статут Вялікага князства Літоўскага. Тэксты. Даведнік. Каментарый. Мн., 1989] зарослую, где бы потреба указовала, поновити и поправити, то будет' волно учынити каждому на своемъ властномъ кгрунте и по старыхъ знакохъ и границахъ, вед же от подъкоморого коморника взявъшы и сторону через возного объвестившы, с кимъ границу тую маеть. А если бы сторона не выехала або не выслала, то предъсе передъ коморникомъ волно поновити, однакъ жо старыхъ знаковъ не псуючы. А коморникъ, бывшы при такой справе, маетъ то до книгъ подъкоморого созънать и знаки поновленые вписать.

Артыкулъ 19.

О лесъ сумесный и о проробки.

Уставуемъ: если бы хто мелъ лесъ суместный неделный, а который участникъ всхочетъ такий лесъ на пашню або на сеножать проробъливати, тогды тому волно будеть такий лесъ теребити и проробливати. Вед же такъ, ижъбы другого або другихъ участниковъ своих проробкомъ своимъ от ихъ кгрунтовъ не заходилъ, а ку тому большъ не займовалъ, одно яко часть на его того лесу приходити будеть. А другимъ участникомъ своимъ, жебы такъ много того лесу заставовалъ, яко имъ на части ихъ приходить, и такъже ровно доброго к[г]рунъту, який онъ займетъ. А если бы хто болшъ своее части и лепшого кгрунту проробилъ, а былъ бы о то до права позванъ, тогды з розсудку врядового виненъ будетъ то, што болшъ надъ частъ свою занялъ, вчастникомъ своимъ пустити на томъ же местъцы и такъже доброго, погожого и пожыточного местъца, яко бы всимъ вчастникомъ ровно было. А противъ дерева порубаного болшъ надъ его часть тежъ дерева вчастникомъ где на инъшомъ местъцу з своее властное части споручъ имъ такъ много и такъ доброго завести. А не будет ли по тому лесу мети, тогды пенезми за доводомъ заплатити, вед же половицою цены статутовое, нижей описаное. А где бы который участникъ потребовалъ делу мети в селе або пущы суместной, а инъшые бы вчастники не хотели з нимъ делити, тогды ему о тотъ розделъ волно будеть вчастниковъ своихъ до суду земъского на рокъ завитый позвати. А тамъ с права маеть быти имъ делъ съказанъ на ровный [! ] части водле права кождого з нихъ. А тотъ делъ маеть бытъ чыненъ тымъ порядкомъ, яко в розделе шостомъ около розделу промежку братьи постановено.

Артыкулъ 20.

О реку, где граничыть.

Тежъ где бы река граничила именья або бы чый кгрунтъ, поля, сеножати, лесы к реце прилегли, тогды кождый з берега своего мает ее до половицы уживати. Вед же в которыхъ местцахъ и краехъ сего панства нашого и на такихъ сполныхъ рекахъ здавна досихъмест былъ який обычай забиванья езовъ, затоковъ або сежъ, таковы[й] и впередъ захованъ быти маеть. А где бы которая река граничьная на чи [! ] берегъ, песокъ незначне сыплючи, прибавокъ чинила, тот прибавокъ маеть быти того пана, чый берегъ естъ. А если бы река кгвалтомъ инуды пошла, тогды старое речыщо маеть быти предсе границою, а того речища, будеть ли в ней який пожитокъ, также каждый з берега своего по половицы уживати мають. А у тое реки граничное, которая се инуды обернула, обадва береги того быти мають, чыимъ кгрунтомъ поидеть. А если бы хто реку перекопалъ умысльне ку шкоде суседа своего, а о то бы его ку праву позвалъ и того бы на него довелъ водле права, тогды маеть оному право сказати, абы засе реку по-старому загамовал, а за то будеть повиненъ стороне жалобливой кгвалту дванадцат рублевъ грошей заплатит[ь], яко бы границу сказилъ и вси шкоды, што в пожитокъ тое реки шкодовал, з розсудку оправити.

Артыкулъ 21.

⇐ Предыдущая 21 22 23 24 252627 28 29 30 Следующая ⇒