На благословение хлебов тропарь святых дважды и Богородице Дево: единожды.

Тропарь, глас 4:

Днесь светло красуется Церковь Крымская / и радостно торжествуют православных множества, / совершая память Таврических всех святых, / от апостол Христовых до ныне прославленных, / с ними же новомучеников и исповедников века двадцатого, / ихже предстательством и молитвами / даруй Господи всем нам помощь Божественную / непоколебимы пребывати в Православии, / Твою богатую милость, благоденствие и спасение душ наших.

На утрени

На Бог Господь: тропарь святым дважды, Слава и ныне, Богородичен: Еже от века утаенное.

По первом стихословии седальны, глас 1:

От гор и пещер Таврических вы в Горний Сион взыдоша, / достоблаженныя угодницы Христовы, / сего ради празднества соборныя вашея памяти совершающе, / вкупе с вами преисполняемся неземнаго торжества / и Божественнаго хваления.

Слава:

Священнейшую вашу память благочестно сотворяюще, Христотобивыя подвижницы и насельницы райских Чертогов, молим вас: у Бога нам испросите мир и тишину, отечеству - благоденствие, а клиру и пастве - велию милость.

И ныне, Богородичен:

Небесной Госпоже и Деве Марии/ днесь принесем преиспещрепную песнь, /юже молитвенно возносим Ей, / вкупе с великоименитым Собором праведников / и сынов Отца Небеснаго.

По втором стихословии седальны, глас 7:

Разум приим от Бога превыспренный, / преподобныя отцы Таврии, / ея пламенныя исповедницы и презельныя постницы, / неустанныя молебницы о душах наших. / Вы красная мира сего в уметы вмениша, / миром душевным обогатишася на веки.

Слава:

Благих и верных рабов Своих, страстоносцев, / в краю нашем прославленных, / чрез лютыя страдания Господь призваша к Житию вечному, / величающе их подвиги, / паки под кров молитв их притекаем.

И ныне, Богородичен, глас тойже:

Госпоже мира горняго и земнаго, Дево воспетая, / днесь вси чада Твоя возвеселишася и возрадовашеся, / зряще сие торжество небесныя и дольния Церквей. / Паки яви нам Твое заступление и утешение.

По полиелеи величание:

Величаем вас, / святии вси в земли Тавричестей просиявшии, / и чтим святую память вашу, / вы бо молите о нас / Христа Бога нашего.

Псалом избранный: Услышите сия, вси языцы:

 

По малой ектении седальны, глас 5:

Яко солнце полуденное, / пресветло нам возсия Богокрасный Собор угодников и чудотворцев Христовых, / в Таврии прославленных, / они для нас явишася всенадежным ветрилом веры, / во еже от обуревания грехов спастися.

Слава:

Церковнаго неба вы есте звезды присносияющия и Богосветлыя, / озарающия нам путь в нощи неведения и маловерия, преподобныя отцы и достохвальныя пустынницы, / в Таврикии от века прославленныя, / ведомыя и сокровенныя, / озарите души наши светом любве и Боговедения.

И ныне, Богородичен, глас тойже:

Смиренномудрием осиянных/ долготерпением исполненных, / любовию просвещенных и согреянных, / святителей Христовых воспоим, / ублажим и полцы мучеников/ почтим и лик преподобнический, / сии угодницы возлюбиша Господа и Его пречистую Матерь, / Ейже хвалы и благодарения по силе приносим.

Степенна, 1 антифон 4-го гласа. Прокимен, глас 4: Во всю землю изыде вещание их, / и в концы вселенныя глаголы их.Стих: Небеса поведают славу Божию: Евангелие от Луки, зач. 24. Слава: Молитвами всех святых, в Таврии просиявших, Милостиве: И ныне: Молитвами Богородицы, Милостиве, очисти:

По 50-м псалме стихира, глас 6:

Единое на потребу имущи попечение: / aпостоли и святителие, царие и царицы, князие и княгини, мученицы и преподобныя, / вы в добродетелех преуспеша, молитвами окрылишася, терпением украсишася, в земли Тавричестей просияша / и оттоле к Горним Селениям удоб востекоша, / идеже с небожителями и безплотными утешаетеся, / наши духовныя стражие и покровителие.

 

Канон Божией Матери со ирмосом на 6 и святых на 8, глас 6-й, егоже краегранесие: Всем угодникам божиим земли таврическия благодарственное приносим пение.Катавасия по Уставу.

Песнь 1

Ирмос: Волною морскою Скрывшаго древле гонителя-мучителя под землею скрыша спасенных отроцы: но мы, яко отроковицы, Господеви поим, славно бо прославися.

Припев: Вси святии земли Таврическия, молите Бога о нас.

Всехвальныя апостоли Андрее Первозванный и Симоне Зилоте, / благовестницы Таврии, святителю Аполлинарие Равеннский, проповедниче Скифии, / трудами вашими мрак удолий просветишася, тьма язычества отгнашеся, / насадишася и утвердишася Православие.

Сеть апостольския твоея ловитвы бысть воистинну крепка, / преславне и Богоглаголиве святителю Клименте с ученики Корнилием и Фивом./ Ты от нечестивых в Риме пострадаша и в Инкерманския каменоломни сослан бысть, / идеже мнози пещерныя храмы устроиша/ и правую веру утвердиша.

Еже с небесе духа Святаго со апостолы приявшия и к их лику Церковию причтенныя, / святыя царие Константине и Елено. / Вы сей благодатию чудодействуя, дивно, капища в Таврии разориша./ Крест Христов тамо водрузиша и утвердиша жертвенницы Ведомому Богу. Благословите сие песнопение, /прехвальныя угодницы Спасовы.

Мысленных волков от паствы вы далече отгнаша, равноапостольныя святителие Асхолие Солунский и Никито Ромесианский, первоучителие Готфии и Скифии. / Молитеся. прилежно о просвещении паствы и спасении душ наших.

Угодницы Христовы, святыя равноапостольныя братие Кирилле и Мефодие, / вы Закон Божий возвещаше в Хазарии и Таврии, / в Фульсте языце/ близ Сурожа/ вами пресечеся поклонение дубу, / в Херсонесе вы обретоша мощи святаго Климента, / дивнаго во святых угодника.

Горняя сташа ты мудрствовати, а не земная, / святая равноапостольная княгине Ольго, / егда ты чрез Таврию притекла в Царьград, / идеже крестишася, / защитительнице и покровительнице Земли Русския / и ея велегласная благовестница.

Огласишася поморие Таврическое священным пением и молитвословием, / егда великий князь Владимир соделашеся избранным сосудом Святаго Духа / и, просветишася чрез святое Крещение, / приим многую святыню во граде Херсонесе, / к горам Киева притекоша.

Слава и ныне, Богородичен:

Дево безневестная/ всех Царице и Богородице Дево/ Ты благоволиша явити/ Свой первописанный образ Иерусалимский новопросвещенней Таврии. Сия икона пречудно просияша исцеленьми не точию в пределах Херсонеса, но и в велицем граде Киеве, а последже и в Новеграде.

Песнь 3

Ирмос: Прежде век от Отца Рожденному нетленно Сыну и в последняя от Девы, воплощенно безсеменно, Христу Богу возопиим: вознесый рог наш, Свят еси, Господи.

Небеснаго Града прилежно взыскуя и словесное стадо Христово добре пасяще, / вы, иерарси Господни, Евангеличе и неведомый святителю, Томитанския и Скифския, / Домне и Кадме Босфоро-Киммерийская, / пречестныя отцы Перваго Вселенскаго Собора, / утвердившия догматы веры в краю нашем.

Изрядныя и предобрыя архипастырие Христовы, / неустанныя сеятели Слова Божия на нивах сердечных, / святителие Феофиле Босфорский, Вретанионе Скифский, Еферие II-й Херсонесский, Генфолие Готфский, бодренныя проповедницы, / достохвальныя просветителие, / молитеся о пастве, / да не оскудеет в ней дух кротости и братолюбия.

Камнями веры твердейшими вы воистинну сташа, /святителие Спасовы Геронтие и Феотиме I-й, Скифския, Иоанне Златоусте с учеником Унилою Скифским, / Церкви предстателие, ея неусыпныя учителие, догматов церковных хранителие/ и еретических плевел искоренителие.

Ангелы во плоти и человецы небесныя вы есте, / архипастырие Богоразумныя Тимофее, Павлине, / Скифския Церкве предстоятелие, / и Анатолие, Патриарше Цареградский. / Вы с кротостию окормляше паству, от волков мысленных ю соблюдаше, / сего ради явишася не токмо духовныя стражие, / но и всея Таврии сокровище/ и нетленное украшение.

Молитвенников наших достоблаженных, / святителей Лонгина и Александра Херсонесских, / Евдоксия Босфорскаго, Валентиниана Скифскаго, / прехвальных иерархов Христовых / днесь восхвалити подобает, иже злочестие еретическое посецая, / на Вселенских Соборах Православие утвердиша.

Беды мнози и злострадания от неверных вы подъяша, / архипастырие Стефане Херсонесский, Мартине Исповедниче, Инкерманский чудотворче, / неведомый затворниче Сосфенский, подвижниче Херсонесский и Хазарский, / Стефане Исповедниче, Сурожский. / Молитеся о пастве, да и мы скорбей и напастей избегнем.

Отцы чадолюбивыя и сирот милостивыя питателие, / немощей скорыя и безмездныя врачевателие / и вселенныя учителие и святителие, / Стефане Новый Сурожский, Никито Готфский и Андрее Босфорский, / Седьмаго Вселенскаго Собора предстателие, / и Филарете Сурожский, / вы златословесными ученьми зело просветиша и обогатиша паству.

Слава и ныне, Богородичен:

Живоносный Источник благодати Ты еси, Дево, / источающая во всяком роде и роде токи исцелений, / даровавшая великомученику Никите, Готфскому и Таврическому, / Свой образ, именуемый Новоникитский, / егоже не персех он с любовию носиша./ Научи и нас сему Боголюбию, о, Дево Всепетая.

Седален святых, глас 3:

Заповеди Господни свято соблюдая и богомыслием просвещаяся/ вси угодницы и чудотворцы Божии земли Таврическия, / вы душевредныя лености бегаше, яко сетей велиаровых, / на врагов невидимых силою Креста ополчашеся, / и за сие возвеселишася вы пред лицем Ангелов радостию безконечною.

Слава и ныне, Богородичен:

Царице Небесной присно возсылая славословие во дни и в нощи, / святии воздержницы и пустынницы края Таврическаго, / вы велию благодать от Нея стяжаша, / молящеся пред созвездием Ея чудотворных икон, / и жало смерти вас не одолеша, / и возрадовашеся дух ваш, зряще Селения вечныя.

Песнь 4

Ирмос: На Кресте Твое Божественное истощание провидя, Аввакуме, ужасеся, вопияше: Ты сильных пресекл еси державу, Блаже, приобщаяся сущим во аде, яко всесилен.

Избранницы Божии, велегласныя благовестницы и служителие Святыя Троицы, / Богоблаженныя святителие, Иоанне Исповедниче Готский, / Георгие Исповедниче Митиленский и Херсонесский, / Георгие II-й Херсонесский, / Фотие Патриарше Цареградский и Таврический, / паки величати не престанем вас, / яко память ваша незабвенна пред Богом.

Изрядных иерархов днесь воспоим: / святителя Полиевкта Цареградскаго, / крестителя святыя Ольги, / первосвятителя Михаила Киевскаго, Иоакима Корсунянина, благовестника Новгородскаго, Николая Тмутараканскаго, / великих просветителей россиян и Таврическия Церкви похвалу и доброту.

Моисею подобящеся, / вы святителие и архиереи Божии, Савво Сурожский, Леонтие Цареградский и Таврический, Василие Сурожский и Алексие, митрополите Московский, / вы на гору чистоты и бесстрастия взыдоша, / преобильныя благодатныя дары восприяша, / весь край наш светом Христовым просветиша.

Зряще ангельския светлости, Апостолов велелепие, / лик патриархов и сонмы мучеников, / преосвященныя святителие Варсонофие Тверский, Амвросие и Никифоре, Таврическия, Григорие V-й патриарше Цареградский, / молите с ними Человеколюбца Христа, / во еже даровати нам отпущение грехов.

Единицу несозданную, Божие Слово, / благословили вы еси, святителие земли Таврическия, / Треми Лицы разделяему, непресекому и неслиянну. / Молитеся архипастырие Христовы Онисифоре, Иннокентие, Поликарпе и Серафиме, о правоверной пастве.

Многосветлыя звезды на небе церковнем вы есте, / святителие Божии Димитрие и Никаноре Таврическия, Иосифе Владикавказский, Ермогене Таврический, / да вашим молитвенным покровом соблюдаемыя, / приступим мы ко Христу и причастницы Жизни вечныя будем.

Лозы доброплодныя в Вертограде Христовом явишася вы, /иерарси Господни Борисе и Флавиане, сподвижницы святаго равноапостольнаго Николая Японскаго, Иустине Уфимский. / Величаем вас, яко вы есте пречестныя отрасли Церкви Таврическия, ея молитвенницы и покровителие.

Слава и ныне, Богородичен:

Икона Твоя, Госпоже пречистая, / именуемая Панагия-Бахчисарайская, / издревле просияша, яко цельбоносная святыня, на велицей скале, / идеже явишася источник и обитель основашеся. К образу сему притекше не токмо верныя, но и агаряне. Пред иконою сею молящеся, / паки уповаем на Твоя неоскудныя и богатыя милости.

Песнь 5

Ирмос: Союзом любве связуеми, апостоли, Владычествующему всеми себе Христу возложше, красны ноги очищаху, благовествующе всем мир.

Таин Божественных благовестницы вы есте, / правоверныя царие Иустиниане и Феодоро, Цареградския и Скифския, - Ирино Хазарская, / вы святую Церковь укрепиша в краю нашем / и силою веры стяжали еси богомудрие, / сего ради просветишася души ваша.

Агнцу безлетному Христу вы зело поревновали еси, / благоверныя князие и исповедницы Христовы, Аскольде и Дире Киевския, /исповедниче Глебе, сродниче святыя Ольги, в Скифии пострадавый, Владимире Новгородский и Херсонесский, Романе Тмутараканский, / вы полцы неверных победиша, / и Ангелы немолчно славославят подвиги и труды ваши.

Верныя и благия рабы, вшедшия в радость с Господом, вы есте, / благоверныя князие Феодоре Трапезундский, Мстиславе Киевский, Феодоре Ярославский вкупе с Мариею, / для блага земли Таврическия вы зело потрудишася, / сего ради и предстоите днесь в сонме избранников.

Равноангельное житие ваше похваляем, / ублажаем и праведное служение ближним, / за сие вы удостоишася и предстояния пред Богом, / правоверне Стефане Феодосийский, Григорие Мангупский, Иоанне Острожский и Таврический, Исайе воеводо Мангупский.

Иноческих полков пречестное украшение вы есте, / благоверныя князие Феодоре Острожский и Константине Мангупский, Константине Острожский и Перекопский, Василие Острожский, Феодоро, цариице-инокиня Сурожская, / пресветлыя сосуды, елеем молитвы исполненныя / и в наших душах негасимый светильник веры возжигающия.

Чада, Самим Отцом Небесным возлюбленныя и желаемыя, / явишася пред Ним вы, / преподобныя отцы-пресвитеры Авдие и Евтихие, просветители Готфии, Иоанне-Кассиане, Новый Богослове Херсонесский, Тимофее и Феостирикте Балаклавския, Кирилле Готфский, Давиде Босфорский.

Еже о пастве исполнив смотрение, / Богоносныя отцы Лонгине Готфский, Петре Скифский, Афанасие и Кирилле, Цареградския и Таврическия, Николае Исповедниче Студийский, Иосифе Песнописче Херсонесский, Григорие, пресвитере Киевский, / наставниче святыя Ольги, / вы преселишася от земли к небесем, / отонюдуже низпослите мир пастве Таврии.

Слава и ныне, Богородичен:

Святая икона Твоя, Богородице Дево, / по воле Твоей написанная апостолом Христовым Лукою / и наименованная Корсунскою, / прибыша из Царяграда в Херсонес / при Крещении святаго Владимира, / поморие Тавриды освятиша и паству возвеселиша.

Песнь 6

Ирмос: Зверю бездны предается пророк Иона, глубине морской, прообразуя Твое, Слове, тридневное востание. Тем и взываше: из глубины преисподния возведи живот мой, Благоутробне.

Крестным путем шествуя / и молитвами облагоухавшия пустыни и удолия Таврикии, / вы подвигами иноческаго жития укрепиша паству /и души своя, яко жертву чисту, / Богови принесоша, / преподобныя отцы Лампаде Отшельниче, Никоне Тмутараканский, Никоне Сухий, Таврический, Несторе Печерский, Памво Боголюбивый, Евстафие старший, Евстафие Младший вкупе с Феодосией и Aполонице Благоговейный, Херсонесския подвижницы Божии.

Истину Христову житием непорочным и ангелоподобным проповедуя, / в скорбех с Божиим Сыном сораспинаяся, / Богоносныя отцы, неведомый по имени, в Инкермане чудотворениями просиявший, / Иоанне старче Балаклавский и Оптинский, / Андрее исповедниче Каирский и Таврический, / Лаврентие прозорливый, Антоние Постниче Феодосийский, / научите нас Господу благоугождати.

Яко немеркнущия светильницы, / десницею Божией на тверди небесной возженныя, / явишася вы, преподобныя отцы, / души за ближних полагавшия, / Вонифатие Херсонский, Макарие Алуштинский, / Иоанне Керченский, Павле Симферопольский, Стефане и Исаакие Таврическия.

Богодарованныя угодницы Божии, / жены-праведницы, Феодоро Цареградская, Анфуса Хазарская и Параскево, отшельнице Сурожская, / вы Ангелам в житии поревноваша, / от Бога венцы нетленныя восприяша, / сего ради вас в сонме Таврических святых ублажаем.

Ластовица сладкогласная, в пустыне Инкерманской восхвалявшая Творца, / святая мученице Флавия-Домитилла, / ученице святаго Климента, / доблии страдальцы Инно, Пинно, Риммо, /сподвижницы апостола Андрея, / нетленное богатство града Алушты, / обогатите души наши / сокровищем веры и благочестия.

Агнцы непорочныя за веру от агарян избиенныя, / четыредесяте отроков Зуйских, / вы души просветиша страданьми добротворными/ и обручишася Жениху Небесному, / в Чертозех светловидных удобь вселилися еси/ предивныя избранницы Божии/ и пламенныя свещи девства. Молитеся о пасомых, / ублажающих вас во веки.

Грядущаго града Иерусалима взыскуя, / вы, святыя страстоносцы, великомучениче Меркурие Скифский, / Савво Стратилате с седмьюдесятью воины, / бессребреницы Космо и Дамиане Таврическия, мучения претерпеша за Христа. / Темже притекающе к вам, / недугов исцеление приемлем.

Слава и ныне, Богородичен:

Образу Твоему многоцелебному, / Госпоже и Дево, / издревле явленному в Херсонесе, / князем Ольгердом в Вильно принесенному, / вси вернии поклоняются/ и мольбы приносят. Приими и ныне прошения наша, / Вседержавная Царице, / яко Тя воспеваем.

 

Кондак святых, глас 3:

Яко жертву непорочну и благоугодну Христу приносяще, / Православная Церковь Крымская светло празднует, / совершающе соборную память святых угодников Таврических, / от земли нашея востекших / и насельниками райских селений бывших. / И мы вси под кров их молений притекающи, / избавляемся от належащих бед и зол, / воспевая купно с ними Святую Троицу, /дарующую нам спасение и велию милость.

Икос:

Днесь Таврическая Церковь вкупе с Небесною/ прославляет всечестную память Богосветлаго Собора, / в краю нашем прославленных угодников. / Трудами апостолов Андрея и Симона насажденная, / усердием святаго Климента и его учеников утвержденная, / преудобренная подвигами прочих иерархов и отшельников, / преукрашенная кровьми мучеников, / святая Церковь в Таврии, /яко крин процветоша, породиша водою и духом святаго Владимира Великаго/ и сонмы угодников Божиих. Сего ради, вкупе со всеми небесными силами воспеваем сию песнь хвалебную: / Радуйся, Боговенчанный Соборе святых Таврии, / радуйся, предивный цветниче Иисусов, / радуйтеся вси святии, добрыя делателие Вертограда Христова, / на земли Тавричестей и на Небесех просиявшия.

Песнь 7

Ирмос: Неизреченное чудо: в пещи Избавивый отроки из пламене во гробе мертв, бездыханен полагается во спасение нас, поющих: Избавителю Боже, благословен еси.

Доблии мученицы Христовы, / Орентие, Фарнакие, Еросе, Фирмосе, Фирмине, Кириаче и Лонгине Скифския/ Онисифоре и Порфирие Инкерманския, / мучителей не убояшеся, друг ко другу рече: / злодеев не убоимся, / не уныем и временных мук. / Се бо отверзеся Рай, и Ангелы им венцы простроша, воспевающе: / Избавителю Боже, благословен еси.

Аще и обагришася кровьми страданий ризы и телеса ваши, святыя великомученицы Георгие Победоносче и Никито Готфский, / велицыи покровителие Таврии, / но огнь мучений росою благодати оросишася и, яко ратоборцы Господни, вы венцы от Него восприяху, со безплотными вкупе в веселии глаголюще: / Избавителю Боже, благословен еси.

Река пламени и огня вас не смутиша, / святыя мученицы, в Готфии на церковней молитве пострадавшия, вси триста осмь страдальцев к Богу возопиша, и Он восприял их Кровы света и прохлады, / а телеса их в Гурзуф принесены бысть, / идеже вернии, к ним притекающе, исцеление приемлют и ко Врачу Небесному вопиют: Избавителю Боже, благословен еси.

Свирепства гонителей не убояшеся/ и в пламени мучений не сгораемыя / святый страдальче Ерминингельде Готфский / и два неведомых страдальца-воина Ески-Керменския, вы души своя в Пренебесный Жертвенник принесоша, идеже Подвигоположнику Христу возгласиша: / Избавителю Боже, благословен еси.

Таврическия Церкве столпы непоколебимыя, / мученицы и исповедницы Святыя Троицы, / Павле и Иоанне Таврическия, / Евстафие, отроче Феодосийский, / вы лесть агарянскую отринуша, / во броня веры облечеся и, чудо спасения вечнаго улучающе, прославляюще Всемогущаго Бога: / Избавителю Боже, благословен еси.

Вы чашу горьких мук на поле брани испиша, сто тысящ воинов - защитников Православия, / противу агарянских полчищ восташе, / души праведныя за ближних положиша / в Севастополе, Инкермане, Бахчисарае, Керчи, Евпатории и на реце Альме. / Молитеся, Царя Небеснаго слузи, да козней и ополчения вражиих избегнем, во еже вкупе с вами Воеводе Небесному воспевати: / Избавителю Боже, благословен еси.

Егда вы с пламенною ревностию благовестиша в Таврии Божество Истинное, / святыя священномученицы Василие, Ефреме, Капитоне, Евгение, Еферие, Елпидие и Агафодоре Херсонесския, / тогда и враг невидимый не дремаша / он наустиша предати вас мукам, / но и в пещи искушений злато веры возблисташе, и вы к Единому Утешителю возопиша: / Избавителю Боже, благословен еси.

Слава и ныне, Богородичен:

Невесто Неневестная, икона Твоя, нарицаемая Минская, / из Херсонеса святым Владимиром Великим в Киев принесена бысть / и тамо в Лавре просияша, / по агарянском разорении образ сей предивно, вверх по Днепру, приплыша в Минск, / идеже прославишася паки токами чудес и исцелений, / а вернии славословиша Господа: /Избавителю Боже, благословен еси.

Песнь 8

Ирмос: За законы отеческия блаженнии в Вавилоне юноши, предбедствующе, царюющаго оплеваша повеление безумное и, совокуплени, имже не сваришеся огнем, Державствующему достойную воспеваху песнь: Господа пойте, дела, и превозносите во вся веки.

Небеснаго Воеводы предоблий ратниче ты еси, / священномучениче Филие, святителю Томитанский и Скифский, / ты всего себе Владыце принесл еси и сего ради исшел еси противу рати демонов/ и долготерпением препобедиша их. / Темже, на небеси, яко победоносец предстоящи, вопиеши: / Господа пойте, дела, и превозносите во вся веки.

Ежелетнюю твою память совершающе, / священномучениче Никифоре Феодосийский, / с любовию похваляем подвиг твой, / яко ты, Божественному Крестоносцу подражая, / на древе за Него от агарян повешен бысть. Уповаем, яко молитвами твоими / души наши убелятся и просветятся, да вкупе с тобою не престанем воспевати Богови: Господа, пойте, дела и превозносите во вся веки.

Подвижницы Христовы многострадальныя, / священномученицы Давиде и Данииле Феодосийския, / вы страданьми неверных просветиша, / правоверие утвердиша, / да паства, молитвами вашими ограждаемая от напастей и прилогов вражиих, / Всемилостивому Спасу вопиет: / Господа пойте, дела, и превозносите во вся веки.

Ревнуя о просвещении и спасении Таврическия паствы, / ты, святителю Моисее Феодосийский, / уподобишася древнему Моисею, / и, яко добрый архипастырь, душу за пасомых положиша, / за веру пострадаша. / Молися Пастыреначальнику Христу, / да и мы вечных мук избавимся, / с тобою возглашая: / Господа, пойте, дела, и превозносите во вся веки.

Игумена Парфения, / священномученика Кизильташского и Сурожского, / днесь ублажим, / яко он краснейшим прозябением добродетелей в Дому Божии процвел еси, / за Христа от агарян пострадаша, / а днесь нашу молитву Ему принесет, / яко благовонное кадило, / во еже и нам тепле восхваляти Святую Троицу: Господа пойте, дела, и превозносите во вся веки.

Наследницы Чертогов Божественных, / светилъницы Триипостаснаго Бога, / вы, Епиктете и Серапионе, пресвитеры и Астионе иноче, / преподобномученицы Скифския, / ангельски на земли подвизашеся, / темже и за Христа пострадаше, / и со Ангелы срадовашеся дух ваш, / егда вы Творца славословите: / Господа пойте, дела, и превозносите во вся веки.

Слава и ныне, Богородичен:

Образ Твой, Владычице, зовемый София, Премудрость Божия, / издревле просияше в Херсонесе и Суроже, / врагов уловляя и верных от клятвы свобождая, / Молися, Дево, яко милосердая Царице, нас невредимых сохрани, / имя Твое боголепно славящих и вопиющих: / Господа пойте, дела, и превозносите во вся веки.

Песнь 9

Ирмос: Странствия Владычня и Безсмертныя Трапезы на Горнем месте высокими умы, вернии, приидите, насладимся, вошедша Слова, от Слова научившеся, Егоже величаем.

Святых четыредесят дев-постниц вкупе с их учителем диаконом Аммуном ублажим, / яко сии преподобномученицы за Христа добльственно пострадаша в Скифии, / Ангелов преудивиша, верных укрепиша, / Церковь возвеселиша и благоукрасиша.

Иже Крестом ограждаемы, врагу противляшеся, / святыя мученицы Сапсале пресвитере и Савво Благоговейный, / Вы идольское приношение отвергоша, / земныя блага во уметы вмениша. / Сам Жизнодавец исцели ваши язвы и раны, / да низпослите исцеление недугов, / преславнии Готфская подвижницы.

Мужески за Христа пострадаше ты, / преподобномучениче Евстратие Киево-Печерский, / от агарян в Херсонесе на кресте распеншеся, / на подвиг исповедничества воспламениша пятьдесят сподвижников и соплеменников/ и с ними мзду вечную восприяша.

Постническим житием, яко златотканною ризою украшенный, чашу страданий от неверных испивый, / ты образ Спасова пастыря мирови явил еси / и всякия добродетели исправил еси, / неведомый пресвитере Сурожский, / темже дароваше Господь нетленным мощем твоим токи чудес и исцелений.

Елеем милостиваго жития твоего исцели наши недуги, / уврачуй страсти, Ангеломудрый Пахомие, / преподобномучениче Таврический, / от зловерия агарянскаго пострадавый. / Темже и безсмертныя Трапезы вкушаеши/ и паству пленения греховнаго свобождаеши, / предивный святче Господень.

Невечерним Светом осияваемая, / от ликов Ангельских ублажаемая, / преподобномученице Параскево, / агнице Христова смиреннейшая, / града Феодосии украшение и покрове, Горняго Сиона насельнице и благ вечных наследнице.

Иноческих полков первостоятельнице, / угоднице Спасова избраннейшая, / преподобномученице Анастасие, / града Бахчисарая утверждение и ограждение незыблемое, / ты подвиги страданий за Христа, яко фимиам благовонный, / к Алтарю Небесному принесоша.

Слава и ныне, Богородичен:

Единороднаго Сына преблагословенная Мати, / даровавшая граду Херсонесу чудотворную икону, / юже святый Владимир в Киев принесе, / отонюдуже сия святыня явишася на западе и Холмскою наименовашеся. / Паки уповающе на Твоя милости, / веруем, яко и впредь соблюдеши нас/ и даруеши нам спасение.

Светилен, глас 2:

На крилех Богоразумия, яко орли небопарныя возлетая горе, / вы, чудотворцы и угодницы Спасовы, / помыслы к Небесем вперяше, / пустыннолюбно пожиша в вертепах Таврических, / яко в светлицех и горницех, и явишася мирови столпами и утверждением Истины. / Сего ради Солнце Правды-Христос Бог просветиша и прославиша вас, / достойныя насадителие и благия делателие Своего Винограда.

Слава и ныне, Богородичен:

Всех Ангельских Чинов и Горних Воинств Святейшая и превысшая, / паки воспеваем Тя, / яко и по Успении Своем нас не оставила еси, / Мати Света, / но милостиво даровала созвездие Своих чудотворных икон, / иже издревле просияша в Таврии. / Благодарим Тя, скорая Помощнице, / яко скончашеся и свершися/ сей венец благохвалений / и паки умильно Тя просим: /умоли Царя славы даровати нам и венцы нетленныя.

На хвалитех стихиры на 6, глас 3:

Восхваляем вас, Боговещанныя благовестницы, / апостоли Андрее и Симоне, / Богомудрыя Кирилле и Мефодие, / и вси в подвизех равноапостольных прославльшиися мужие и жены, / вы в Таврикии Церковь насадиша и приумножиша, / и сия Нива Божия доселе плодоносит.

Како не дивимся твердости святителей и исповедников спасовых, / всех Его иерархов, чадолюбивых отцев, / соблюдших паству от челюстей вражиих, / Се ныне и присно веселитеся, / яко мзда ваша многа на небесех.

Святителя Климента и Мартина Исповедника/ и прочих священномучеников подвиги како не воспоим? / Сии архипастырие зверонравных мучителей укротиша, / зиму зловерия отгнаша, / трапезу нам добре уготоваша, еяже мы с верою приобщишася - спасены будем.

Нечестивым царем Угерихом в Гофтии сожженныя/ пресвитере Вафусие и два сына, / пресвитере Верке с двумя дщерьми, / иноче Арпило, миряне Авиве, Агне, Реасе, Игафраксе, Иское, Силе, Сигице, Сонириле, Суимвле, Ферме, Филле, Констансе, царевиче Агафоне, жены Анно, Алло, Лариссо, Моирко, Мамико, Уирко; Анимаисо, / царице Гаафо, царевна Дуклидо, всего триста осмь страдальцев, / Царем царствующих восприятыя в места отрады/ и в соборе Архангела Гавриила предстоящия.

⇐ Предыдущая3456789101112

Поделиться: