XI. Kisi nems mulas sinifons-li?

Yanul penemon ma ‘Ianus’: god Romänik prima.

Febul penemon ma ‘Februa’: pönidazäl Romänanas.

Mäzul penemon ma krigagod: ‘Mars’.

Prilul pedefomon de värb latinik: ‘aperire’ (= maifükön).

Mayul penemon ma ‘Maia’: jigod Romänik tala.

Yunul penemon u ma ‘Iuno’: jigod mata u ma el ‘consul’ Romänik: ‘Brutus’.

Yulul penemon ma ‘Iulius Caesar’.

Gustul penemon ma lampör Romänik: ‘Augustus’.

Setul pedefomon de numavöd latinik: ‘septem’ (= vel).

Tobul pedefomon de numavöd latinik: ‘octo’ (= jöl).

Novul pedefomon de numavöd latinik: ‘novem’ (= zül).

Dekul pedefomon de numavöd latinik: ‘decem’ (= deg).

Se Volapükagased (Zänagased pro Volapükanef). 1958. Pad: 16.

Hüm Volapüka	The Volapük Anthem
Sumobsöd svistama stäni! Neflenami obs hetobs. Dakipobsöd ga baläli! Volapüki beyubobs. Vokädobsöd ko cifal: “Menefe bal, püki bal!”	Let us raise our flag of union! All unfriendliness we hate. Let us stand in one communion! Volapük we celebrate. With our chief by us be sung, “Unto all mankind, one tongue!”
Kis okanon-li plu svistön lölika vola menis? Kis plu ogudükumon-li ka pük bal onas stadis? Klu vokädobsöd bu val: “Menefe bal, püki bal!”	What is more to friendship moving For the men of all the earth? What is more their lot improving Than of our one tongue the birth? Let us shout to old and young, “Unto all mankind, one tongue!”
Cifal püka ga lifomös! Lifonsös slopans ona! Volapük ai floronös, e spiked jönik ona! Klu tonosös love tal: “Menefe bal, püki bal!”	Prosper, leader of our language! Prosper all who learn or teach! Volapük shall never languish, Nor its world-wide sweetest speech! Through the world by us be rung, “Unto all mankind, one tongue!”

Se Volapükagased (Zänagased pro Volapükanef). 1958. Pad: 17.

POEDOTS

Esepülobs libi

Fa ‘Johann Schmidt’ (Pepoedon ün 1943)

Esepülobs libi

dü dag e tep vemik;

no elogobs strali

lita zü sark blägik.

Esepülobs libi,

e komanef smalik

no älogon meni

votik ko dol legik.

Mens äcogons in doms,

us älilobs smili,

du ün neit ko toms

esepülobs libi.

Se Volapükagased (Zänagased pro Volapükanef) 1958, Nüm: 4, Pad: 18.

Viol

Fa ‘Johann Schmidt’

Viol floron in jad e dag,

ti no logon deli,

toä glofon dis bled e stag,

gevon benosmeli.

Koveniko us in kein

lifon in mük e stil,

ga i pro on vam e rein

padosedons de sil.

Se Volapükagased (Zänagased pro Volapükanef) 1958, Nüm: 4, Pad: 18.

RÄTS

Feapladamarät fa ‘Johann Schmidt’.

Bim semik ädosturon

ad dils fol ädabrekon,

e dils at in pem brulik

ätegons vegi lölik.

Pos jenot somik leod

vo reton; binon neod.

Mens su top äkobikons;

dins jekik ye äjenons

ven nu mens in mod votik

äpladons dilis valik.

Süpiko fil e sulfin

äpubons sa hölaplin.

(biad — diab)

Se Volapükagased (Zänagased pro Volapükanef). 1958. Pad: 18.

Ceinarät

Ko ‘h’ binob in kadapled,

ko ‘g’ binob te in nated.

Ko ‘l’ binob in men alik,

ko ‘f’ e ‘n’ in dom alik.

(had, gad, lad, fad, nad)

Se Volapükagased (Zänagased pro Volapükanef). 1958. Pad: 18.

O Siörs lestimik!

Kodü tups in jäfidäms distöfik Redakana äsi sekü vaken posik oma, Reidanef odageton nümis: 4 e 5 gaseda obsik medü köv ot ünü setul yela 1958id.

Guvan.

Se Volapükagased (Zänagased pro Volapükanef). 1958. Pad: 19.

NULODS NITEDIK NOLAVA

XII. Glans.

Bufod labon glanis tel pödü logs oka; ats skretons flumoti yelovilik ä korodöli. If dog seimik vilon sumön nimi at me lemud oka, flumot et paskreton e dog stadükon bufodi libio, nog büä okanonöv konsumön oni!

Se Volapükagased (Zänagased pro Volapükanef). 1958. Pad: 19.

XIII. Lireyans in ‘New York’.

In ‘New York’ lireyans mödikum lödons kas in zif: ‘Dublin’. Padigidons vemo in ‘New York’, pato as poldans.

Se Volapükagased (Zänagased pro Volapükanef). 1958. Pad: 19.

XIV. Lödöp ela ‘Croesus’ petüvon-li?

Vönotavans niveras Lamerikänik di ‘Harvard’ e di ‘Cornell’ etüvons pladi zifa Lüdänik mu vönädika: ‘Sardis’, in kel reg märöfiko liegik: ‘Croesus’ älödom.

El ‘Sardis’ äbinon cifazif Lüdäna ün tumyel mälid bü Kristus e zuo äbinon bal metropoelas timäda et.

Dis failots zifa Romänik eseseboy gretikis lufladis pebepänöl e mönis grupa domas.

Se Volapükagased (Zänagased pro Volapükanef). 1958. Pad: 19.

XV. Fidedakösömots.

Ün zänodatimäd äkösömoy fidedön telna a del, sevabo: tü göds za düp: 10 (deg) e tü poszedels za düp: 4 u 5. Pas ün tumyel XVIid (degmälid) tabastofeds e särväts ägeböfikons. Jü tumyel XVid (deglulid) äkösömoy fidön zibis neluimöfik me nams! Ägleipoy onis me doats.

Fok e spun egeböfikons mödo latikumo.

Se Volapükagased (Zänagased pro Volapükanef). 1958. Pad: 20.

XVI. Tsyinans.

Kludöfü numats fa reiganef Pöparepüblika Tsyinänik penotüköls tefü num tsyinanas in Tsyinän, su Taiveän, in Siyop sulüdalofüdik e votaseimo, balions 650 tsyinanas dabinons; ab jäfüdisevans lesions, das num at binon mödo gretikum e das sötoy kalkulön balionis plu 700! If pöpamapluikam blebon leigik jü yel: 2000, taled obsik omuton lotidön milbalionatis 2,7 de tsyinans ünü yels 52 pos ayel, sevabo: num tsyinanas binon leigädovik ko num valodik volapöpama nuik!

Se Volapükagased (Zänagased pro Volapükanef). 1958. Pad: 20.

XVII. Leigod.

If kanoyöv smalükön soli ad gretot sabagrana, täno tal binonöv stöfadilil zütülöl fagotü zimmets 15 de sabagran. Stel nilikün fagöl mö litayels “te” fols, binonöv sabagran fagotü milmets 40.

If fomäloyöv stadi sola soiki, das sol binon-la sabagran in ‘Amsterdam’, täno fimastel nilikün binonöv sabagran in zif: ‘Leiden’!

Se Volapükagased (Zänagased pro Volapükanef). 1958. Pad: 20.

XVIII. Saturn.

Litareol, kel kodon das saturn binon planet nitedikün solasita obsik, binon vemo vidik e ze mänsidik. Züon saturni zänodo, nendas kontagon planeti seimo. Me sidaleskops kanoy logön, das reol at binädon voiko me reolis balatik kil. Reols at binädons me balions stöfadilas fimik so densitikas bal sus votik, das magäd davedon, äsva tefos-la reoli gretik bal.

Se Volapükagased (Zänagased pro Volapükanef). 1958. Pad: 20.

⇐ Предыдущая567891011121314Следующая ⇒

Поделиться: