О мещанехъ и о людяхъ нашыхъ в крывъдахъ ихъ от шляхты.

Уставуемъ: естли бы хто с кн[я]жатъ, пановъ, шляхты всякого стану, такъ и подданые ихъ вчинили кривду якую колвекъ мещаномъ местъ нашихъ, где права майдебуръского не мають, такъ тежъ и людемъ именей нашихъ, г[о]с[по]д[а]ръских, таковыхъ о вчиненье справедливости воеводове, старостове и деръжавцы нашы мают сами або врядники ихъ упоменути позвомъ водле артыкулу сорокъ осмого сего ж розделу, абы сам зъ себе и с подданыхъ своихъ справедливость учинилъ. А естли бы за тымъ справедливости не вчинил, тогды на перъвшыхъ рокохъ судовыхъ, яко на завитомъ року, под страченьемъ права маеть стати и подданыхъ своихъ, кому будеть вина дана, поставити. А судъ маеть яко с тымъ самымъ паномъ, такъ и с поддаными его, от которыхъ бы се мещаномъ або людемъ нашимъ крывда деяла, яко на завитомъ року, справедливость учинити и с права, в чомъ бы противъ мещаномъ и людемъ нашимъ зостали винъни, кождый грабежъ, на чомъ доводъ слушный учынять, з навезкою казати платити. А естли без причынъ правныхъ не станеть, тогды на таковомъ для непослушеньства, яко на завитомъ року, за доводом подъданымъ нашымъ сказанье в жалобе ихъ учинено быти маеть.

Артыкулъ 69.

О мещанехъ права майдебуръского.

Такъ уставуемъ: естли бы кому з мещанъ нашыхъ права майдебуръского которая крывда деяла от кн[я]зей, пановъ и земянъ и подъданыхъ ихъ, а они бы се сами доброволне усправедливити не хотели або справедливости с подъданыхъ своихъ не вчинили, тогды такового кождого мещанинъ маеть до суду земъского поветового позвати и далей поступовати противъ ему подълугъ поступку права и статуту земъского.

Артыкулъ 70.

О участникохъ, которые якое речы доходити усхочутъ, ижъ другихъ своихъ учасниковъ на одны роки судовые земъские, яко на рокъ завитый, позывати мают.

Тежъ коли о речъ сполечную которую жъ кольвекъ вси учасники весполъ у права мовити и ее доходити усхочуть, а ижъ одинъ учасникъ безъ другого самъ того чинити, ани ку кривде иньшихъ учасниковъ своихъ никоторое речи сполечное протягивати не можеть, прото естли бы иньшие учасники вси посполу которое речи сполечное в праве доходити и о нее мовити не хотели, тогды тотъ, который доходити усхочеть, маеть о то поступкомъ сего статуту прыпозвати оныхъ участниковъ своихъ на роки судовые передъ урядъ земъский, в которомъ оные участники его оселостями своими будуть, яко на завитый рокъ. А неоселыхъ место позвовъ листомъ упоминальным урядовымъ обнести, жебы на року его позваномъ весполокъ з нимъ до права становилисе. А где бы на первшыхъ рокохъ земъскихъ хто с тыхъ участниковъ за позвы або за листомъ упоминальнымъ не сталъ и сполне части своее доходити не хотел, тогды вжо оный участникъ, который речы сполечное доходити усхочеть самъ одинъ, только своее части доходити можеть и безъ иньшихъ участъниковъ. А позваный повиненъ вжо будеть ему самому, хотя бы иньшихъ участниковъ при немъ не было, отказывати и усправедливитися. А тымъ другимъ участникомъ потомъ волно будеть своихъ частей на деръжачомъ, коли похочуть, правомъ доходити, толко бы давности земъское не промолъчали, выймуючи только тыхъ участниковъ с такового позыванья и обосланья листами врядовыми, которые бы были на послузе нашой або на наукахъ и по рыцеръству у чужих паньствахъ, бо тым, прыехавшы до тутошнего паньства, также волно будеть своихъ частей доходити, одно бы по тому ж, прыехавши до того паньства, давности земъское не омешкали. А ведь же то ся розумети маеть толко о тыхъ, подъ которым участники усее близъкости своее доходять. А братья, близские и якие кольвекъ кревные кожды [! ] своего кревного о невыделенье своее части самъ безъ другихъ позывати и доходити ее можеть, и кгды с права части своее дойдеть, тогды ему, колько на него часть приходить, до вечного дѣ лу поступлена и выделена быти маеть.

Артыкулъ 71.

О дохоженью близькостью або якимъ инымъ правомъ именей, в розныхъ поветехъ лежачихъ.

Хочемъ то мети и уставуемъ, ижъ кгды бы хто подъ кимъ хотелъ пойскивати близькостыо або якимъ инымъ правомъ именей, в ро[з]ныхъ по[вет]ехъ [в оригинале: " роныхъ позвехъ" ] лежачихъ, а право бы однакое, будь прирожоное або набытое, сторона жалобная на вси тые именья менила, тогды волно будеть того, хто тые именья держит, позвати о вси именья до одного, которого похочеть, суду поветового, где хотя одно которое с тыхъ именей лежить. И если жалобная сторона у томъ одномъ повете тые именья зыщет, тогды врядъ инъшыхъ поветовъ, в которыхъ тые именья лежать, мають и повинъни будуть водлугъ листу судового оного повету и суду, до которого было позвано, стороне поводовой увязанье в другие именья, въ ихъ повете лежачие, дати и далей, прыводячы оный судъ ку выконанью водлугъ сего статуту до остатнего стопня права, противъ стороны противное в томъ поступовати.

Артыкулъ 72.

Хто бы, будучи позваный о именье, а стороны своее жалобное не признавалъ бы за потомка тое особы, по комъ чого ищеть.

Где бы ся то трафило, ижъбы хто, тяжучися с кимъ о имен[ь]е, а отпоръная, то естъ позваная сторона не признавала бы стороны жалобное быти сыномъ або девкою того отца або матки тое албо якимъ колвекъ потомкомъ, близкимъ тое особы, по которой жалобникъ чого искати будеть, тогды врядъ в таковой речи маеть зъ обудву сторонъ листовъ и инъшыхъ доводов достаточне выслухати. А которое стороны доводъ будеть лепший, слушнейший и яснейший, тую сторону самотретюю зъ шляхтою, ему ровною, будь с повинъными кревными его або в недостатку кревныхъ з людми обчими, только вѣ ры годными, до прысеги припустити маеть. А кгды жалобнику присега сказана будет и онъ ее учинить, а отпоръная сторона не мела бы на тое имен[ь]е якого права прирожоного або набытого и давностью земъскою задеръжаного, тогды жалобникъ вжо тое именье за слушнымъ доводомъ одеръжати маеть. А еще отпоръная сторона за то, же ему непризнаньемъ своимъ быть его близкимъ до того, чого искалъ, трудность задавала, маеть заплатити двадъцать копъ грошей. А естли отпоръная сторона право якое на тое именье мети будеть, тогды и о тое право врядъ маеть розсудокъ свой водлугъ права там же заразомъ на томъ року вделати. А будет ли присега сказана стороне отпоръной, и учинить ее, тогды по присязе при томъ именью зоставенъ будеть.

Артыкулъ 73.

О томъ, ижъ, будучи хто с которого именья о што до вряду позванымъ, не можеть его, не росправивъшися, иншому пущати.

Забегаючы продлуженью справедливости людъское, уставуем, хотячи то вперодъ мети, ижъ естли бы хто с кимъ право вести и зачалъ о именье, о люди, кгрунты, о долъги або о иншие якие колвекъ речи, крывды и шкоды, с которого именья починеные, такъ от особъ самыхъ пановъ, яко ихъ слугъ и подъданыхъ, а тотъ позваный, будучы в позвехъ и не сконъчивши права, кому иншому тое именье або люди, кгрунты, о што позывано будеть, в деръжанье якимъ же кольвекъ способомъ пустил, тогды жалобникъ, предся беручи позвы на имя того, кого позывати почалъ, и на томъ же именью ихъ покладати маеть, с которого перъвей почалъ позывати. А врядъ нашъ жалобнику на ономъ же именью, на которомъ позвы класть почато, отправу до конца чинити маеть водлугъ сего статуту. А деръжачий ничимъ того забороняти не маеть, але в томъ заводъцы своего смотрети маеть, хто ему пенъное именье завелъ. Пакли бы тотъ, хто именье деръжати будеть, упоръне вряду спротивилъся, а отправы вчинити не допустилъ и боронилъ увязан[ь]я, тогды противъ таковому врядъ нашъ и сторона мають далей поступовати водлугъ арътыкуловъ о отправахъ речей сужоныхъ, в семъ же розъдѣ ле описаныхъ.

Артыкулъ 74.

О заруки на речъ сужоную.

Тежъ уставуемъ: хто бы на комъ што правомъ презыскалъ, то естъ именье, люди або земли и який же кольве кгрунтъ лежачий, тогды маеть в то ему увязанье с права дано быти, а зъ уряду зарука маеть быти положона, абы тотъ, хто на праве упустилъ, в то ся через то не вступовал и увязанья не боронилъ. А пакли бы увязанья не допустилъ и самъ через себе або черезъ кого кольвекъ такового увязанья боронил, будь рукою або словы мовечи, же увязанья не поступуеть, або тежъ по увязанью такъ самъ, яко теж через приятеля або урядника, слугъ и подъданыхъ своихъ в то вступовалъ, тогды, в томъ за позвы правом переконаный, тую заруку, з уряду положоную, маеть платити стороне жалобливой. А ведъ же зарука болшая не маеть быти покладана, только водле важности тое речы, о што идеть. А тотъ, кому што присужоно, предъсе то маеть деръжати и повторе урядовъне в то, што было присужоно, и тежъ за заруку у властные люди або кгрунты противного водле права увязанъ быти маеть.

Артыкулъ 75.

⇐ Предыдущая14151617181920212223Следующая ⇒

Поделиться:

Популярное:

1. Которого часу от врядовъ нашихъ отзовъ быти маеть.
2. О беспечности возного, будучи ему на справахъ, вряду его належачихъ, такъже и стороне, при немъ будучой.
3. О вольности выеханья с панствъ нашихъ до инъших паньствъ хрестиянских, кромъ земль неприятелских, и о опеках таких именей.
4. О небранью мыта от шляхты и подводъ ихъ.
5. О неданье шляхты и ихъ именей, людей, кгрунътовъ и всякихъ волностей и тежъ наданья листовъ и привильевъ противъ сему статуту.
6. О установенью черезъ воеводъ, старостъ судовыхъ врядников ихъ судовыхъ кгродскихъ и о довоженью з ними справедливости.