Которого часу от врядовъ нашихъ отзовъ быти маеть.

⇐ ПредыдущаяСтр 22 из 34Следующая ⇒

Уставуемъ: естли бы ся кому от врядовъ нашых в сказанью судовомъ кривда видела, таковый маеть того жъ часу, от суду не отходячы, заразомъ скоро по сказанью судовомъ пры бытности стороны своее противное отозватисе до насъ, г[о]с[по]д[а]ра, або до суду головного обычаемъ вышей мененымъ. А такъ передъ судомъ нашимъ, г[о]с[по]д[а]ръскимъ, або головнымъ болшей ку помочи собе ничого брати и прикладати не маеть, толко то, што было передъ судомъ перъвшымъ, от которого апелевалъ. А где бы хто заразом того жъ часу, яко вышей доложоно, не отозвалъся, токовому вжо апеляцыя допущона не маеть быти и вряду такового о то позывать не можеть водле арътыкулу четыръдесятого сего ж розделу.

Артыкулъ 91.

О промолъчанью давности земъское о именье лежачое и о презыски, с права сказаные.

Уставуемъ, ижъ хто бы о именье лежачое давность земъскую десеть летъ в молъчанью былъ, не позывалъ, ани листами упоминальными оносилъ [! ], таковый вжо вечне о то молъчати маеть, хотя бы ся и впоминалъ, и ку праву позывалъ и в року стоялъ, а речы конъца не довелъ, а потомъ также от обношенья листом упоминальнымъ, або от заложенья позвы, албо и переведъшы право, а в деръжане именья не вошедши, давность земъскую десет летъ промолъчалъ и не впоминался, таковый вжо о таковое имен[ь]е вечне молчати маеть. По тому жъ, естли бы хто на комъ якую суму п[е]н[е]зей с права презыскавъшы, а после суда и сказанья врядового, не ужываючы и не домагаючыся отправы той речы сужоной, черезъ десеть [лет] в молчанью того былъ, таковый такежъ о то вечне молъчати маеть. Пакли бы тежъ, одеръжавшы хто сказанье врядовое на якую суму п[е]н[е]зей, а отправы за то за перъвшого вряду, хто то ему присудилъ, не одержалъ, а давности земъское десети летъ не омешкалъ бы, в такой речы другий врядъ без позван[ь]я о то, одно вгленувъшы в листъ судовый первшого вряду, водлугъ того отправу вчинити маеть.

Артыкулъ 92.

О кгвалътовное выбитье зъ спокойного деръжанья.

Тежъ уставуемъ: хто бы кого кгвалътовне без права выбилъ зъ спокойного держанья, з двора и с пашни дворъное, з места, з млына, з бояръ, з людей и зъ ихъ кгрунтовъ, будь в дому шляхетском, в месте або на селе бой який вчинившы або и такъ без бою отнял и собе приверънулъ именье, люди за правомъ прирожонымъ держачое, або во што бы хто за правомъ якимъ набытымъ врядовне при возномъ и шляхте в держанье вошолъ, а то бы будь самъ особою своею албо хотя черезъ врядника, слугъ, бояръ або подданыхъ своихъ учинилъ, тогды оный укривжоный маеть безъ мешканья тую кривду свою на вряде судовомъ оповедати и записати, и вознымъ и стороною обвести, и знаки кгвалту, естли якие будут, оказати. А потомъ надалей в десети неделяхъ от выбитья або отнятья маеть припозвати самого того пана, хто его, будь сам албо черезъ слугъ, подданыхъ своихъ, с чого выбилъ або отнялъ, до вряду замкового на рокъ завитый за четыри недели такъ от очевистого, яко и заочного поданью позвовъ. А тамъ передъ врядомъ кгродскимъ, кгды обедве стороне стануть ку праву, а позваная сторона естли бы ся того кгвалтовного отнятья и держанья своего того именья або людей заперла и до того не знала, тогды тое именье або люди мають быти заразъ сказаны жалобнику в держанъе. А кгвалту, бою, ранъ або забойства и тежъ шкодъ починеныхъ, в позве описаныхъ, похочеть ли сторона жалобная доводити, то ей волно бедеть [! ]. И врядъ нашъ за слушнымъ доводом, яко о кождомъ кгвалте доводъ естъ нижей описанъ, маеть сказанье противъ стороны обвиненое учинити водлугъ вины и учинку порядкомъ сего статуту. А по всказанью и отправу на властном имен[ь]ю винъного чинити до остаточнего стопня права, роков статутовыхъ, заплате п[е]н[е]зей сказаныхъ, не складаючи. А прийдет ли до того с права, и горломъ карати. А где бы сторона обвиненая, признавшися до держанья того именья або людей, поведила то, же онъ жалобника с того, о што онъ жалуеть, кгвалтовне не выбиялъ, але то держить за правомъ якимъ слушнымъ и хотел бы то якимъ правомъ хотя и на писме покозати [! ], тогды предся той стороне отпоръной не маеть быти на выводъ давано, але жалобная сторона маеть ку доводу припущона быти. И доведет ли будь писмомъ якимъ або сведецьствомъ суседовъ околичныхъ якого колвекъ стану, толко людей добрыхъ, веры годныхъ, ни в чом не подойзреныхъ, сема чоловеки и присегою своею спокойного держанья своего того именья або людей, тогды то, с чого былъ выбитъ, судъ ему заразомъ в держанье и к тому кгвалту двадъцать коп грошей сказати маеть. А за бой, раны, забийства, естли ся при таком кгвалтовномъ отнятью стануть, также шкоды, в тотъ часъ поделаные, врядъ при знакохъ слушныхъ и при оповеданью врядовомъ за тою жъ присягою, которая яко на выбит[ь]е кгвалтовное, такъ на ранахъ и шкодахъ однымъ разомъ чинена быти маеть от стороны жалобное, сказывати маеть, а шкоды з навезкою сказуючи, и отправу чинити на именью виноватого водле науки сего статуту. А той противной стороне, которая се зъ якимъ правомъ своимъ у суду окажеть, врядъ волное мовенье впередъ у суду належного заховати маеть. А хто бы, минувшы врядъ кгродский, хотелъ о выбитье зъ спокойного держанья, хотя и в томъ часе от выбитья в десети неделяхъ, вышей в семъ арътыкуле споминаныхъ, до вряду земъского пазвати, то кождому волно будеть. А врядъ земъский тымъ же обычаемъ, яко веръху поменено, такие речы розсуживати маетъ. А што колвекъ который врядъ кгродъский або земский за такими позвы о выбитье зъ спокойного деръжанья кгвалту, навезокъ и шкодъ присудить, тому роки заплате, в статуте описаные, не мають быти покладаны, але заразомъ по сказанью сторона поводовая яко в деръжанье того, щого была выбита, через возного впущона, такъ и отправа ей за презыски сказаные на властъномъ именью стороны противное вчынена быти маеть под заруками на сторону и врядъ, яко о порядку отправъ иншых всихъ речей сужоныхъ естъ описано.

Артыкулъ 93.

О напомненью врядовомъ около заплаты сумы п[е]н[е]зей, с права сказаное, первей нимъ возный паедеть за то увязывати.

Забегаючы мы тому, абы нихто непослушенъства своего праву посполитому неведомостью покрывати и обмовляти не могъ, уставуемъ, ижъ, кгды которая сума п[е]н[е]зей от которого кольвекъ вряду нашого сказана кому на комъ будеть, за нестан[ь]емъ тое стороны противное, на комъ што скажуть, а будет ли тая сказнь вчынена в речы такой, в которой сесь статутъ роковъ заплате п[е]н[е]зей складати не допущаеть, тогды врядъ нашъ, выдаючы стороне поводовой, которая презыскъ одеръжить, лист свой увяжчый до стороны противное, предъся маеть на томъ листе своемъ часу ему ку заплате тыхъ п[е]н[е]зей сказаныхъ узычити от поданья ему або от положенья на именью его через возного и двухъ шляхтячов копии з листу увяжъчого за чотыри недели, напоминаючы его, абы на тотъ рокъ тые п[е]н[е]зи водлугъ сказан[ь]я ихъ заплатилъ. А в томъ листе увяжъчомъ зарука маеть быт[ь] покладана такъ великая, якъ будеть важность речы сужоное. А где бы за чотыри недели тое сумы всказаное не заплатилъ, тогды за тымъ же листомъ увяжъчымъ возный отправу на имен[ь]и его за то учинити маеть водле арътыкулу, нижей описаного. А где бы сказанье врядовое вышло тежъ заочне, але на такую суму п[е]н[е]зей, которой роки заплате водлугъ замеренья сего статуту будуть положоны, тогды предъся тотъ рокъ або тые роки, яко ихъ великость сумы сказаное укажеть и на листе увяжчомъ описаные будуть, мають початися личити не от сказанья врядового, але такежъ от поданья албо положенья на именью виноватого копѣ и з листу увяжчого. Нижли которая сума п[е]н[е]зей за очевистымъ у права мовеньемъ сторонъ або ихъ умоцованых [в оригинале: " умоцонаных" ] сказана будеть, в томъ такового обвещенья и напоминанья не будет потреба, але водлугъ припадку речи и науки сего статуту або заразом по суде отправа будеть дана, або от сказан[ь]я судового роки статутовые пойдуть и личитися почнуть. Также ся не толко о суме п[е]н[е]зей але и о иншихъ речахъ якихъ рухомыхъ, с права ку отданыо присужоныхъ, розумети маеть. А где бы хто на роки, от насъ або от вряду нашого водлугъ сего статуту положоные, п[е]н[е]зей присужоныхъ заплатяти не хотелъ, тогды противъ такового отправа чинена быти маеть водлугъ арътыкуловъ, нижей о томъ постановеныхъ. Тое жъ ся маеть розумети и о речахъ, з выроку нашого, г[о]с[по]д[а]ръского, присужоныхъ и до вряду на отправу отосланыхъ.

Артыкулъ 94.

О отправе сумы п[е]н[е]зей, с права присужоное, где бы хто ее водлугъ сказанъя врядового не заплатилъ, и тежъ о увязанье в ыменье прысужоное.

Пакли бы хто сумы п[е]н[е]зей, от которого колвекъ вряду нашого земского або кгродского, будь тежъ подъкоморъского або комисаръского, присужоное, албо пакъ з нашого, г[о]с[по]д[а]ръского, любо тежъ судей головныхъ выруку [! ] на отправу до вряду отосланое, будь заразом по сказанью водле описанья сего статуту або на роки, в нем вышей описаные и узычоные, стороне своей противной не заплатилъ, тогды возный, от вряду нашого на увязанье стороне жалобной приданый, маеть с трема шляхтичами, веры годными, для того увязанья до именья стороны противное, на ком што сказано будет, ехати и сторону жалобную водлугъ листу увяжчого за суму, ей сказаную, в люди, именье, кгрунты и инъшую маетность стороны противное водлугъ порядъку и науки, в семъ статуте около того нижей описаное, увезати и то ему в деръжанье до заплаты сумы п[е]н[е]зей подати. А где бы хто возному увязанья не поступилъ и боронилъ самъ або через врядника, тивуна, слугъ, бояръ и подъданыхъ своихъ и через кого кольвекъ иного, не толко учынком якимъ спротивенство показуючы, але хотя словне мовечы, же не поступуеть увязанья, и то бы возный и с тою стороною трема шляхтичы згодне передъ врядом земъскимъ або кгродскимъ сознали, тогды таковы [! ] противникъ вжо в заруку, на листе увяжчомъ описаную, попадаеть. А врядъ тотъ, который будеть тую реч судилъ албо до которого от насъ, г[о]с[по]д[а]ра, албо от головного суду на отправу отослано будеть, естли земъский, тогды судья або подъсудокъ, а естли врядъ кгродский, тогды воеводове, старостове або ихъ наместъники, подъстаростий або судья кгродъский, маючы при собе возных двухъ того жъ повету и пети шляхътичов, оселых в томъ паньстве, великом князъстве, людей добрыхъ, веры годныхъ и ни в чомъ не подойзроныхъ, о которую сторону жалобная сторона старатися повинна, мает на тое увязанье ехати от данья ему знать через того возного, первей на увязанье посланого, надалей за чотыри недели, и тамъ сторону поводовую яко за тую суму, с права сказаную, такъ и за заруку, в листе увяжчомъ положоную, въ именье противника увязати и на конецъ отправу на немъ водлугъ порядъку сего статуту учинити, заховуючыся в томъ увязанью противко обеюмъ сторонамъ верне, правдиве, подъ тою жъ присегою своею, на врядъ его учиненую. А хотя бы по всказанью врядовомъ тотъ самъ, противъ кому сказанье выйдеть, або на комъ што присужоно будеть, перъвей ним до увязанья прийдеть, умеръ, тогды возный або врядъ самъ без жадного иншого припозыванья, але за тымъ же сказаньемъ отправу и увязанье противъ детей, потомковъ и близскихъ его водлугъ порядъку сего статуту выконывати маеть. Где бы тежъ тотъ, хто презыскъ одеръжить, не взявши заплаты, и первей увязанья з сего света зшолъ, тогды детямъ, близскимъ его, кому бы тотъ презыскъ за правомъ прирожоным албо тежъ обчому кому за записомъ належалъ, также без позыванья, толко лист увяжчий отменивши, отправа чинена быти мает. А за працу тому вряду самому увяжчого от копы два грошы тот, на ком отправу чинять, платити мает, и вряд за тотъ свой доход особливе в люди або земли виноватого увезатися и стороне той жалобной або кому иному в том завести может. А кгды прийдет увязывати у власное именье стороны жалобное, близкостью або якимъ инымъ правомъ презысканое, або в люди, кгрунты, кромъ такого именья, которое бы было кгвалтовне зъ спокойного деръжанья отнято, о чомъ естъ наука в особливыхъ арътыкулехъ. Тогды врядъ около увязанья в тое именье тым же порядъкомъ, вышей описанымъ, заховатися маеть. Одно жъ за працу вряду увяжчого вжо сама сторона поводовая от службы або волоки, оселое людми, по два грошы, а от дворъное и пустовъское пашное земли або волоки по одному грошу платити будеть, а от инъшыхъ кгрунтовъ, которые бы ся на пашню не згодили, ничого платити не будеть винъна. А тую отправу врядъ в томъ часе, вышей замерономъ, выконывати маеть подъ виною петмадесятъ копами грошей стороне поводовой, о которую вину врядъ до тых жо судей головныхъ позванъ быти маеть, а по заплате вины предъсе тую отправу чинити виненъ будеть.

Артыкулъ 95.

⇐ Предыдущая 17 18 19 20 212223 24 25 26 Следующая ⇒