Ижъ запозваныи словы непотребными, такъ тежъ и иный з стороны, прыповедавшисе с правомъ своимъ, кромъ позву, не маеть права розрывати.

⇐ ПредыдущаяСтр 18 из 34Следующая ⇒

Уставуемъ: если бы позваная сторона, будучы у права, а отступивъши от позву, стороне поводовой што такового нового задала або тежъ хто иный до того се стороны с правом своимъ приповедал, хотечи право розоръвати [в оригинале: " розоръоати" ], а проволоку вчинити або собе што безъ позву правомъ выйграти, таковымъ сторонамъ то у суду ити не можеть, але маеть судъ, отложивши то на сторону, предсе стороне поводовой справедливость чинити водле позву о то, о што кого позвала, и то кончити и сказанье чинити водле права. А тому третему, который бы се зъ стороны до тое жъ речы зъ справомъ [! ] своимъ прыповедалъ, судъ, не припущаючи его заразъ ку праву, маеть ему толко вперодъ волное мовенье до права в той речы заховати с тымъ, хто з выроку ихъ при имен[ь]ю або которой речы зостанеть. А в ыншыхъ припалыхъ речахъ, которые бы се ново межы тыми двема, за позвы у права стоячыми, прыточили, судъ маеть имъ сказати, абы ся о то на иншие роки до суду належачого позывали. А естли бы ся што такового межи ними о почъстивость дотыкало, судъ маеть ихъ обеюхъ сторонъ на вырокъ нашъ, г[о]с[по]д[а]ръский, отослати на съемь вальный, и тамъ на сойме обедве стороне безъ жадныхъ позвовъ мают ся передъ нами, г[о]с[по]д[а]ремъ, ставити ку росправе, а о што ся запозвали, то предъсе судъ маеть судовъне межы ними росправовати и кончыти водлугъ права.

Артыкулъ 66.

Яко братью неделную або вчасниковъ, то естъ себровъ, позывати.

Уставуемъ: естли бы колько братьи або участниковъ деръжали одно именье себреное, люди тяглые або данъные неделеные, а кому бы се от того именья и людей кривда деяла в чомъ колвекъ, а они бы яко з себе, такъ и с таковыми людми справедливости чынити не хотели, ино естли от подъданыхъ, тогды жалобливая сторона листъ урядовый черезъ возного на томъ именью положити маеть, абы ся той жалобливой стороне справедливость стала. А естли бы ся в томъ стороне жалобливой справедливость не стала, тогды якъ о вчыненье справедливости с подъданыхъ, такъ теж, естли и от самыхъ особъ крывъда якая будеть деять, всихъ учасниковъ о то передъ судъ одънымъ позвомъ маеть позвати и на томъ же именью позовъ положити. А хотя бы ся оны учасники вси не зъехали, тогды суд на рокохъ судовыхъ будеть сказанье подле права на именью чынити водлугъ того, яко о томъ о рокохъ судовыхъ написано.

Артыкулъ 67.

О крывдахъ, которые бы ся кн[я]земъ, паномъ, шляхте и ихъ слугамъ и подъданымъ от воеводъ, старостъ, деръжавецъ и тивуновъ, лесничыхъ и мостовничыхъ нашихъ, от ихъ особъ або от врядниковъ ихъ, будь тежъ от подъданых нашыхъ деяли.

Хотячы мы, г[о]с[по]д[а]ръ, в томъ панстве нашомъ, великомъ князъстве литовъскомъ, покой посполитый чиненьемъ прудкое и латвое справедливости розмножати, уставуемъ, ижъ кому бы се з обывателей того паньства — княземъ, паномъ, шляхте такъ стану духовного, яко и светъского и тежъ ихъ слугамъ, бояром и подъданымъ — деяли якие крывды и шкоды в речахъ поточных, в кгвалътехъ, боехъ, грабежохъ и в захоженью людей отчызныхъ до местъ и селъ нашыхъ, г[о]с[по]д[а]ръскихъ, и иныхъ тому подобныхъ от воеводъ, старостъ, деръжавецъ, войскихъ и тивуновъ, лесничых, мостовничыхъ и иныхъ врядниковъ нашыхъ, будь от самыхъ особ або ихъ врядниковъ и слугъ з воеводъствъ, староствъ, державъ и тивуньствъ ихъ, тогды такий кождый воевода, староста, деръжавца и тивунъ, и каждый врядникъ нашъ естли бы што самъ учинилъ албо бы з урядниковъ, слугъ своих справедливости кому за упомненьемъ черезъ листъ вряду нашого земского або кгродъского учинити не хотелъ, маеть быти о то позванъ на рокъ завитый водлугъ учинку до суду належного земского або кгродъского в томъ повете, где тотъ замокъ або дворъ, або волость наша, держава его лежить, або где врядъ его естъ, абы самъ сталъ и того, на кого жалоба будеть, поставилъ и в том ся з укривжонымъ росправилъ. А будеть ли кому кривда вчинена зъ староства судового того жъ повету, будь от самого воеводы, сторосты [! ] або от его врядника, слугъ, в речахъ, кгродъскому суду належачихъ, о то маеть быти позывано водлугъ арътыкулу трыдъцать девятого в том же розделе до другого суду кгродъского, в ыньшомъ повете наближей о границу к тому повету прилеглого, которие кождые позвы, не могут ли быть очевисте поданы, мають быти покладаны черезъ возного в том же замъку або дворе и волости нашой, откуль ся кому кривда деет. А за тыми позвы воеводове, старостове и иные вси врядники наши сами або черезъ умоцованыхъ своих виньни будуть у суду становитися и росправу з жалобною стороною прыймовати, будучи того вряду послушни во всемъ до остатнего стопня права. И было ль бы што на которомъ з урядниковъ нашихъ за его властную вину с права сказано, тогды тые презыски не мают се стегати на кгрунътъ и добра наши, г[о]с[по]д[а]ръские.

Але за то отправа маеть быти чинена на властномъ именью такового врядника, которое будеть мети в том же повете. А где бы который державъца або тивунъ в томъ повете, где его держава лежить, оселости своее власное не мелъ, тогды судъ водлугъ поступку права, сказан[ь]е на нем учинившы, мает отослати на отправу до иного вряду и суду, в которомъ повете, звлаща в здешнемъ паньстве, великомъ князстве, онъ оселость свою мети будеть. А оный врядъ повету другого виненъ будеть укривжоному отправу на именью его водлугъ того суду и обычаю права учинити под виною в артыкуле деветьдесятъ четвертомъ в сем же розделе описаного. А который бы деръжавца нашъ и иный врядникъ нашъ нигде оселости в томъ паньстве нашомъ, великом князстве, не мел, а было бы кому, укрывъжоному от него, у которого вряду нашого што на немъ сказано, а онъ бы сказанью врядовому досыть чинити не хотелъ, тогды, кгды тотъ укрывжоный з листомъ судовымъ до насъ, г[о]с[по]д[а]ра, утечетьсе, мы ему черезъ посланца нашого отправу на маетности его рухомой учинити росказати маемъ, во всемъ водле сего статуту ажъ до остатнего стопня права поступуючи. А где бы который врядникъ нашъ былъ позванъ о неучиненье справедливости з урядника албо слугъ своихъ, тогды тыхъ, которые обвинены в чомъ будуть, мають передъ судом ку росправе становити. А естли в чомъ винъни зостануть, то на тыхъ жо обжалованыхъ отправено быти маеть. А пакли бы хто от подданыхъ нашыхъ якого жъ колвекъ стану, деръжавы чиее кривду собе в речахъ поточныхъ менилъ, а воевода, староста, державца и который же колвекъ врядникъ нашъ справедливости з нихъ укривжоному чинити бы не хотелъ самъ або черезъ врядъ свой, тогды маеть быти упомненъ водлугъ артыкулу сорокъ осмого сего жъ розделу, кладучи черезъ возного таковое упоминанье на той же державе, с которое ся кривда дееть. А воеводове, старостове и иншые вси врядники наши справедливость с подданыхъ нашыхъ, отправу на винъныхъ водлугъ выступку кождого ажъ и до остатнего стопня права водлугъ статуту сего чинити повинни будут, и отозву имъ нигде не допускаючы, окромя речей крвавых, где бы шло о горло, тому яко шкрутыния, такъ отзовъ допущон быти маеть, вынемшы, где бы на горачомъ учинку або явномъ якомъ выступе пойманъ або з лицомъ прыведенъ былъ, тому отзовъ ити не можеть. А естли бы воевода, староста, державца и который же кольвекъ врядникъ нашъ за упомненьемъ врядовымъ року не зложилъ або, и зложывшы рокъ, справедливости не вчинилъ, тогды таковый кождый урядникъ нашъ на рокъ завитый передъ судъ земъский албо кгродъский позванъ быти маеть. А воевода, староста и который же кольвекъ врядникъ нашъ передъ тымъ врядомъ, до которого позванъ будеть, сам стати и подъданыхъ нашихъ обжалованыхъ до росправы поставити маеть. И покажет ли се то с права, же справедливости жалобнику не вчинилъ, тогды таковый кождый воевода, староста и который же кольвекъ врядникъ нашъ за то вины стороне жалобливой тамъ же, где се то приточить, рубль грошей заплатити маеть, а врядъ тотъ тамъ же заразомъ с тыхъ обвиненыхъ подъданыхъ справедливость вделати повиненъ будеть. А где бы от таковыхъ врядниковъ с подъданыхъ нашых шляхътичу справедливость чинена была, а судъ вряду того не водлугъ права бы ся жалобнику виделъ, тогды о то стороне жалобливой отозватисе с тымъ волно будеть до суду головного трыбунальского. А воеводове або старостове и иные врядники нашы у того суду головного за тою апеляцеею винни будуть сами або через умоцованыхъ своихъ пилновать. И покажет ли се то передъ тымъ судомъ, же шляхътичъ неслушне се отозвалъ, тогды судъ таковый змоцнити маеть. А шляхътичъ тотъ вряду тому, от которого апеляцыя уростеть, повиненъ будеть вины заплатити рубль грошей. Так же се тежъ розумети маеть и о тых, которые якие добра нашы, будь правомъ дожывотнымъ або в сумахъ п[е]н[е]зей заведеные, от насъ, г[о]с[по]д[а]ра, деръжати и на такихъ добрахъ — такъ на сумахъ п[е]н[е]зей, яко на маетности его рухомой, также и на доходехъ его, с тыхъ добръ прыходячыхъ, а наконецъ и на особе его до остатънего стопня отправа чинена быти маеть. Ведъ же где бы хто до такового увязанъя прышолъ, не маеть надъ уставу нашу ничого доходовъ болшъ з добръ нашыхъ брати и в скаръбе нашомъ о таковомъ своемъ деръжанью ведомость учинити для того, ижъ по смерти оного дожывотника таковые добра нашы волно без откладанья сумы пенезей, на томъ доживотнику презысканое, до столу нашого ворочатисе мають, а своее сумы смотрети маеть на маетности оного дожывотника, где бы кольвекъ на него прыходила. Нижли естли бы от столу нашого заставою добра нашы деръжалъ, а на той суме п[е]н[е]зей ему отправа учинена, тогды з скаръбу нашого оному тая сума откладана быти маеть.

Артыкулъ 68.

⇐ Предыдущая 13 14 15 16 171819 20 21 22 Следующая ⇒