Хто бы после права и присеги того жъ искалъ, што передъ правомъ утратилъ.

⇐ ПредыдущаяСтр 20 из 34Следующая ⇒

Тежъ уставуемъ: естли бы хто чого на комъ искалъ а пустилъ бы его на присегу або тежъ с права ему была бы сказана присега, а онъ бы присегнулъ, а потомъ бы оный, который его обжаловалъ, тое жъ речы, што правомъ утратилъ, на немъ по другое искалъ, менуючы, ижъбы несправедливе присягнулъ, и того хотелъ на того, который присягнулъ, доводити, тогды такий доводъ водле права не маеть быти ему допущонъ, але ижъ по прысязе тое жъ речы искалъ, которую у права утратилъ, маеть чотыри недели на замку нашомъ седети, а шкоду оправити, на чомъ слушный доводъ сторона учинить. А где бы, ничого такового не примовляючы и словы не соромотечы, толко речы сужоное у другий разъ искалъ, тогды седенья не будеть винен, толко маеть вины строне тры рубли грошей, а на врядъ, перед который позванъ будеть, виненъ тры копы грошей заплатити, а заплатившы тые вины, тотъ судъ перъвшый при моцы зостати маеть.

Артыкулъ 76.

О светъкахъ, якие маютъ быти у права прыймованы.

Уставуемъ тежъ, ижъ на всякую речъ у кождого суда светки мають быти веры хрестияньское, люди добрые, веры годные и неподозроные. Вед же судъ перъвей, нижли сторонъ або светковъ ку сведецьству припустить, маеть ихъ напоменуть и розважити, абы паметали на пана бога, на справедливость его и на почстивость свою. А в речахъ важныхъ крвавыхъ, где идеть о горло, светки по розну у суду пытаны быти мають, але однакъ при бытности сторонъ. А где бы который светокъ с прычынъ слушныхъ, значныхъ, явныхъ, досконалыхъ, лечъ не за доводомъ якимъ стороны противное, тежъ черезъ светки, але албо писмомъ якимъ слушънымъ правнымъ, албо з властныхъ устъ его черезъ врядъ нашъ дознанъ былъ светкомъ неправдивымъ, фалшывымъ, таковый светокъ маеть быти самъ каранъ тымъ, на чом бы онъ сведецьствомъ своимъ неправдивымъ другому ближнему своему ушкодити мелъ. Однак жо и таковому светку, естли бы собе крывъду и безъправъе в розъсудку врядовомъ розумелъ, апеляцыя вольная зоставати маеть до суду головъного. А к тому мають быти припущоны ку сведецьству и татарове тые, которые на службу нашу военъную ездять, яко то в прывилью продка нашого описано, мають.

Артыкулъ 77.

О доводехъ и отводехъ.

Уставуемъ: кгды судъ, выслухавшы жалобъ и отпоровъ сторонъ, скажеть которой колвекъ стороне доводъ або отводъ, а оная сторона на оный часъ, на который мела доводити або отводити, не доведеть або се не отведеть, таковая речъ свою тратить маеть. А вед же естли бы заразомъ сторона которого светка або и двух ставити не могла, тогды судъ тое и до завтрее отложыти маеть. Вед же онъ того або тыхъ светковъ, на которыхъ ставен[ь]е возметь, до завтрея заразомъ тамъ у суду имены меновати виненъ. А то вжо будеть подъ страченьемъ права завитый рокъ. А доводы и отводы на всякую речъ мають быти напервей черезъ писмо або черезъ светки. А то суть напевнейшые и накгрунътовънейшие доводы будуть. Тежъ доводы и отводы черезъ присягу, кому писма або светковъ не достанеть, тежъ и черезъ певные знаки, яко о кождомъ доводе таковомъ зособна нижей написано.

Артыкулъ 78.

Которые ку сведецъству припущоны не мають быти.

Уставуемъ тежъ, ижъ ку сведецьству не мають быти припущоны тые, которые суть правомъ переконани въ якомъ зломъ учинку, за што горломъ бываеть карано, што там же передъ урядом тотъ, хто ему наганить, доводити маеть. А естли бы не довел, тогды ку доводу прыпущонъ [в оригинале: " брыпущонъ" ] будеть. К тому не мають светъчити слуги и подданые за пановъ, ани тежъ противъ пановъ; шаленый, то естъ который розуму не маеть. По тому жъ светъками быти не мають одинъ другому тые, которымъ сполне вину дадуть або помочниками ихъ будуть. Также и выволанцы светчыти не могуть, поки ся з обвиненья своего не выправить. Теж естли бы который въ якой речы светчылъ, же на томъ местъцы, где ся што станеть, самъ былъ и то виделъ або слышалъ, а потомъ в другой речы, которая бы на инъшомъ местъцы того жъ дня, яко и першая, о которую светъчылъ, сталася от того местъца оподаль, яко бы подобенъство не было, жебы того одного дня на обудву местъцахъ быти могъ и хотелъ также светъчити, тогды таковый ку тому, ани наперодъ ку жадному сведецъству не маеть быти прыпусканъ.

Артыкулъ 79.

О светкохъ, што бы хто хотелъ ку нимъ мовити.

Естли бы хотела сторона противная ку светкомъ што мовити и ганити имъ, тогды маеть тут же заразомъ передъ правом и перъвей, нижли ихъ ку сведоцъству прыпустить або ку прысязе, ку нимъ мовити и на нихъ доводити и, не спущаючи с права, то конъчыти. А где бы на которого светка што велъ, а не довелъ, тогды маеть того светъка там же у права навезати водлугъ стану его, а ку сведецъству будеть прыпущонъ. А переведет ли, тогды тотъ светокъ светкомъ быти не можеть, а сторона поводовая на того местъце инъшого светка маеть ставити, и на ставен[ь]е другихъ светковъ маеть стороне часъ быти узычонъ на тыхъ жо рокохъ водлугъ далекости местъца, где ся што стало, або якъ далеко того светка поведеть. А трафить ли се то на конъцу роковъ або для далекости дороги ставити бы его не могъ, тогды на ставенье светковъ такихъ до другихъ роковъ подъ страченьемъ [в оригинале: " страченымъ" ] права отложити маеть. Але сторона заразъ тыхъ светковъ у суду имены меновати маеть, на которыхъ постановенье просити будеть. А не будет ли мочы за смерътью або зъ якихъ иныхъ слушныхъ правныхъ причынъ которого менованого светка поставити, тогды на того местъце волно будет инъшого светка поставити, толко бы веры годного, неподойзреного, а припустивъши светковъ ку сведецъству, к нимъ по праве ничого мовити не маеть.

Артыкулъ 80.

На своихъ светкохъ по праве нихто ничого искати не маеть.

Уставуемъ: хто бы у якой кольвекъ речы передъ правомъ выдалъ светковъ, а тые бы светки противъ самому посветьчили, тогъды онъ на тыхъ светкохъ своихъ по праве и сведецъстве того пойскивати и до права ихъ поволокати не маеть.

Артыкулъ 81.

Сведецъствомъ трехъ або двухъ светковъ маеть сторона речъ свою одеръжати, и хто бы теж, отставивъшы доводъ, пустилъ стороне на присягу.

Тежъ уставуемъ, ижъ сторона, доводечы речы своее, маеть доводити трема светками, людми веры годными и неподойзреными. А естли бы хто трехъ светковъ не мелъ, тогды в недостатку третего при двухъ сведецъстве самъ маеть прысегнути и тымъ речъ свою одеръжати. А ведъ же не о честь, не о кгвалтъ, ани о наездъ домовый, и тежъ где бы не шло стороне обжалованой о горъло, такъ тежъ и о земли, на што особливе на местъцахъ своихъ суть доводы написаны. А хто бы, отставляючы доброволне доводъ, светковъ трехъ пустилъ стороне своей противной на присягу о которую кольвекъ речъ, тогды тая сторона, кгды ся доброволне за присягу озметь и присягнеть, маеть речъ свою одеръжати. А естли присягнути не всхочеть, тогды речъ свою тратить. А хто бы, маючы трохъ светковъ, а надъ них самъ доброволне за присягу братисе не хотелъ, тогды то ему волно будеть и сведецъствомъ трехъ светковъ без прысяги речъ свою одеръжить. И кгды кому с права присега сказана будеть албо ся хто за нее добровольне у суду озметь, тогды урядъ для розмышленья сторонъ маеть присегу на день третий зложити, а тамъ дня третего сторона противная, противъ которое маеть быти прысега чинена, маеть, роту тое присеги от писара с подъписью руки его взявши, оную сторону свою до присеги передъ вознымъ и стороною двема шляхътичами вести, а возный роту выдавати маеть. А не всхочет ли хто стороны своее противное до присеги вести, такий речъ свою тратить. А оный, хто мелъ прысягати, а не былъ веденъ до прысяги, вжо без прысеги тую речъ, ему сказаную, одеръжати маеть. А часъ пилности присяги маеть быти того дня третего до полудня, местъце присязе там же передъ судомъ, а чынити прысегу маеть кождый водлугъ своего набоженъства, якого ужываеть.

Артыкулъ 82.

О доводехъ листовъныхъ.

Могуть тежъ быти доводы листовъные, то естъ записы на именья и иные выписы або оповеданья и сознанья книгъ канъцляреи нашое и с книгъ судовыхъ земъскихъ и замковыхъ и черезъ церокграфы подъ печатьми и подъ написаньемъ руки власное, такежъ квитами и реестрами ревизоръскими, на отмены даными, и иными листы и реестры заведучыми або увяжчыми, яко о томъ шырей нижей на местъцы своемъ естъ написано.

Артыкулъ 83.

О комисеяхъ нашыхъ, г[о]с[по]д[а]ръскихъ, в которыхъ речахъ мають быти даваны.

Уставуемъ тежъ, ижъ листы нашы комисейные ку вчиненью справедливости толко в тыхъ речахъ, нижей описаныхъ, мають быти даваны, то естъ о границы межы именьями нашыми и шляхетъскими, кгды ся хто с подъданыхъ нашыхъ народу шляхетъского якого кольвекъ стану особа утечеть до насъ, менечи собе крывду в кгрунте своемъ от воеводъ, старостъ, деръжавецъ, тивуновъ и якихъ колвекъ врядниковъ з ыменей нашых або от подданыхъ нашихъ. Тогды мы заразомъ без жадное проволоки на розсудокъ и росправу таковыхъ розницъ о кгрунты маем комисаровъ нашихъ трехъ особъ, а меновите кашталяна або маръшалъка и к тому подкоморого того повету и з ними третего шляхътича, в том же повете оселого. А в которомъ повете кашталяна, ани маръшалъка не будеть, там с подкоморим двухъ шляхътичовъ того жъ повету албо кого з урядниковъ нашыхъ, толко родичовъ и обывателей того панства нашого, великого князства литовъского, давати и высылати. А стороне жалобной волно будеть также за листы нашыми з стороны своее толко жъ особъ шляхетъского народу узять. Тежъ мають быти комисей нашы даваны о выкупенье именей нашыхъ, г[о]с[по]д[а]ръскихъ, также и з духовъными, яко о томъ в розделе третемъ в артыкуле 30 третемъ естъ описано. А о иншие речи вси якъ шляхъта межи собою, такъ и вси панове духовные и светъские мають ся справовати передъ судомъ належнымъ.

Артыкулъ 84.

⇐ Предыдущая 15 16 17 18 192021 22 23 24 Следующая ⇒