Сура 54. аль-Къамар (Варз)

 

Мергьяметлу, Регьимлу Аллагьдин тIварцIелди!

1. Мукьвал хьанва (Къияматдин) Сят, ва варз пад-пад хьана.

2. Ва абуруз аламат (ишара) акурлани, абур элкъвезва (адакай) ва лугьузва: «Ахлатдай (ва я зурба) суьгьуьр я! »

3. Абуру таб яз кьунай ва чпин (нефсинин) гьевесриз табий хьана, ва гьар са кар кьилиз акъатна тестикь жеда (хъсан ксариз саваб, пис ксариз азаб жеда).

4. Гьакъикъатда, абурув чпе ибрет авай абур асивиликай хуьдай хабарар агакьнава.

5. (Абурув агакьнавайди) АкьалтIай камаллувал я, амма (ахьтинбуруз) игьтиятвал авунин хабар гудайбурукай вуч менфят жеда кьван?!

6. Ва элкъуьгъ вун абурукай. Ва эвердайда эвердай юкъуз такIан къведай шейинихъ,

7. Чпин вилера агъузвал (беябурвал) аваз экъечIда абур сурарай на лугьуди абур чкIанвай (виринра, лув гудай хъипи, суьруь) чIехи цицIер я.

8. Абуру, гарданар яргъина эверзавайдан патав гьерекатда, ва кафирри лугьуда: «Им – «лап четин» югъ я! »

9. Абурулай виликни Нугьан халкьди таб яз кьунай (расулар) ва абуру Чи лукI (Нугь) таб яз кьуна ва лагьана: «Ам -дилиди я! », ва адаз – гьараюнарна къурхуяр ганай.

10. Ва ада вичин Раббидиз эвер гана: «Гьакъикъатда зун магълуб хьанва (зал винел пад къачунва), заз куьмек це! »

11. Ва…ахъайна Чна цавун варар, къатиз экъичдай яд авай,

12. Ва хъиткьинарна Чна чил булахралди, ва гуьруьшмиш хьана яд (цавун ва чилин) кьисмет-кьадарнавай карда.

13. Ва тухвана Чна ам «тахтайрикай ва мисмаррикай тирда» аваз (яни гимидаваз).

14. Физваз целай ам Чи Вилерик кваз*(Чи акуник ва хуьник кваз) – эвез яз вичихъ (вичин халкьди) гьа эвелдилай кафирвал авурдаз (Нугьаз).

15. Гьакъикъатда, Чна ам (Нугьан кьиса, ва я гими) аламат (делил) яз туна, амма рикIел гъана ибрет къачузвайбур авани?

16. Ва (абуруз) Зи азаб ва Зи игьтиятвал авунин хабар гунрин эхир гьихьтинди хьанай?!

17. Гьакъикъатда Чна регьятарнава Къуръан кIелиз ва рикIел гъиз*(гафар – кIелиз ва хуралай чириз, ва манаяр- гъавурда акьаз ва абурал фикириз менфят къачуз), амма авани кьван кIелиз рикIел гъизвайди?

18. ГIа́ д*-ди (расулар) таб яз кьунай, бес гьихьтинди хьанай Зи азаб ва Зи игьтиятвал авунин хабар гунрин эхир?!

19. Гьакъикъатда, Чна давамлу бедбахтвилин юкъуз абурал «гу-у-в-в алай», къайи, къати гар ракъурна.

20. Ада (гару) инсанар къуватдалди кьаз акъудзавай (чкайрилай), на лугьуди абур акъатна ярх хьанвай хумравдин тарарин къен ичIи танар я.

21. Бес гьихьтинди хьанай Зи азаб (абуруз) ва Зи игьтиятвал авунин хабар гунрин эхир?!

22. Гьакъикъатда Чна регьятарнава Къуръан кIелиз ва рикIел гъиз*, амма кIелиз рикIел гъизвайди авани?

23. С́ амуд *- ди игьтиятвал авунин хабар гунар таб яз кьуна.

24. Ва абуру лагьанай: «Бес чун чакай тир са инсандиз табий жедани мегер? АкI хьайитIа, чун ягъалмишвиле ва диливиле ава.

25. Бес гьадал яни «Зикр» (вагьй*) вегьенвайди (авуднавайди) чи арадай? Ваъ! Ам лавгъа тапархъан я».

26. Ва чир жеда абуруз пака лавгъа тапархъан вуж ятIа!

27. «Гьакъикъатда Чна абуруз имтигьан (ахтармишун) яз деве ракъурда, гуьзет ая абур ва кIеви сабур ая.

28. Ва хабар це абуруз яд чпин (чпинни деведин) арада пайнавайди. Гьар са «хъвадай нубат» – жеда анал (нубат тирди)

29. Абуру чпин юлдашдиз эверна, ва (сада-садал вегьиз) къачуна ада ва сухна тукIуна.

30.  Бес гьихьтинди хьанай Зи азаб (абуруз) ва Зи игьтиятвал авунин хабар гунрин эхир?!

31.  Гьакъикъатда Чна абурал ракъурна са къати ван, ва абур жугъун туькIуьрзавайдан «кьурай куьлериз» ухшар хьана.

32. Гьакъикъатда Чна регьятарнава Къуръан кIелиз ва рикIел гъиз*, амма кIелиз рикIел гъизвайди авани?

33. ЛутIан халкьди игьтиятвал авунин хабар гунар таб яз кьуна.

34.  Гьакъикъатда Чна абурал къванер квай тIурфан ракъурна, – анжах ЛутIан хзан квачиз, абур Чна йифен эхирда (экв ахъа жедалди) къутармишна.

35. Чи патай (абуруз) нямет яз, ва гьа икI Чна шукур ийизвайбуруз эвез гузва.

36. Гьакъикъатда ада абуруз чеб Чи «азабди кьуникай» игьтиятлувилин хабар ганай, амма абуру игьтиятлувилин хабар гунрин гьакъиндай шаклувал авуна.

37. Ва абур адал алахъна адан мугьманар чпин ихтиярда тун патал, ва Чна абурун вилер михьиз чIурна (чинлай вилер квахьдайвал авуна буьркьуь авуна), дадмиша гила Зи азаб ва Зи игьтиятвал авунин хабар гунар!

38. Ва гьакъикъада пакамахъ фад агакьна абурув тестикь тир (алудиз тежер) азаб.

39. Дадмиша гила Зи азаб, ва Зи игьтиятвал авунин хабар гунар!

40. Гьакъикъатда, Чна регьятарнава Къуръан кIелиз ва рикIел гъиз*, амма кIелиз рикIел гъизвайди авани?

41. Гьакъикъатда фиръавандин агьалийризни (тухумдизни) атанай игьтиятвилин хабар гунар.

42. Абуру Чи аламатар (ишараяр) вири таб яз кьуна, ва Чна абур кьуна (азабдалди) Гужлудан Къудратлудан кьуналди.

43. Я тахьайтIа куь кафирар атIабурулай хъсан яни ва я квез «кхьенвай кьулара» (ктабра) хиласвал (азабдикай саламатвал) авани?

44. Я тахьайтIа абуру: «Чун гъалибвал жедай сад тир кIватIал (жемят) я», – лугьузвани?

45. Бес кIаник акатда а кIватIал, ва абуру далу элкъуьрда (квехъ, катиз)!

46.  Амма (Къияматдин) Сят*- абуруз хиве кьунвай (тайинарнавай) вахт я, ва (Къияматдин) Сят*- бедбахтвилиз лапни заланди ва (азабдиз) лапни туькьуьлди я.

47. Гьакъикъатда, тахсиркарар ягъалмишвиле (ва я: зиянвиле Ахиратда) ва дили гьалда ава (ва я къати ЦIайара жеда),

48. Абур чпин чинихъди (чин кIаникна) ЦIуз галчIурдай юкъуз: «Дадмиша куьне Сакъар*-дин хкIун! »

49. Гьакъикъатда, Чна гьар са шей кьадар – кьисмет авуна, халкьнава.

50. Ва (са кар кIан хьайила) Чи эмир анжах сад (келима -«Хьухь» лугьун) я -(ва а кар лап фад жезва) «лап тадиз вил вегьена алудун» хьиз.

51. Гьакъикъатда, Чна куь «фикирдин кIапIалар» (куьн хьтин куфрдин жемятар) тергнай, амма рикIел гъизвайди авани?

52. Ва абуру авур гьар са шей (амалар кхьидай) ктабра ава.

53. Ва гьар са гъвечIи ва чIехи кар (цIарара) кхьенва.

54. Гьакъикъатда, (Аллагьдикай) кичIебур Женнетра ва (Женнетрин) вацIарин арада жеда,

55. Керчеквилин ацукьдай чкада (хуш яшамиш жез), Лап Къудратлу Пачагьдин (Гьакимдин) патав.

 

Сура 55. ар-РахIма́ н (Мергьяметлуди)

 

Мергьяметлу, Регьимлу Аллагьдин тIварцIелди!

1. (Ам я) Мергьяметлуди (ар-РахIман),

2. Ада чирна (инсандиз) Къуръан,

3. Халкьна инсан,

4. Чирна адаз гуз баян (инсандиз вичин фикирар лугьуз, рахаз чирна).

5. Рагъ ва варз (гьерекатна физваз) гьисабдал ала (ва я гьисабун я).

6. Набататри (ва я гъетери) ва тарари ийизва (кьведбуруни) «сажда».

7. Ва цав – ам хкажнава (-з халкьнава) Ада, ва эцигнава (адалатлувал) терезар Ада,

8. Куьне (адалатлувилин) терезрал чIурувал тавун патал.

9. Куьне дуьзара (алцумна) заланвал адалатлувилелди ва тIимилармир терезрал.

10. Ва чил – махлукьатар (инсанар) патал ам, эцигнава Ада.

11. Анал – емишар, тумунин кисеяр алай хумравдин ала тарар,

12. Ва (тварцин) кьил гъидай (пеш-нацI галаз) гару юзурзавай ва хуш ни галай набататар.

13. Бес куь (кьведбурунни: инсанрин ва джинрин) Раббидин гьи няметар куьне (кьведбуруни: инсанрини джинри) таб яз кьазва?

14. Ада инсан (Адам) кьурай ван ийидай чепедикай халкьна канвай ччеб хьиз,

15. Ва джинар Ада халкьна какадарнавай (къаришма) цIукай.

16. Бес куь (кьведбурунни) Раббидин гьи няметар куьне (кьведбуруни) таб яз кьазва?

17. (Ам я) Рабби рагъэкъечIдай кьве патанни (гатуз ва хъуьтIуьз) ва Рабби – рагъакIидай кьве патанни.

18. Бес куь (кьведбурунни) Раббидин гьи няметар куьне (кьведбуруни) таб яз кьазва?

19. Ада авахьиз ахъайна кьве гьуьл абур кьведни гуьруьшмиш жезва.

20. Абурун кьведан арада «манийвал (перде)» ава, элячIзавач абур (кьвед) сад- садал (гьар са яд вичин гьалда амукьзава уькIуьди ва хъваз михьиди).

21. Бес куь (кьведбурунни) Раббидин гьи няметар куьне (кьведбуруни) таб яз кьазва?

22. Абурай кьведай (кьве гьуьляйни) гевгьерар ва мержанар акъатзава.

23. Бес куь (кьведбурунни) Раббидин гьи няметар куьне (кьведбуруни)  таб яз кьазва?

24. Адаз талукь я туькIуьрна раснавай «гьерекатна физвайбур» (гимияр) гьуьлелай – (чеб) дагълар хьтин.

25. Бес куь (кьведбурунни) Раббидин гьи няметар куьне (кьведбуруни) таб яз кьазва?

26. Вири анал (чилел) алайбур фана (пуч) жеда.

27. Ва амукьда анжах чIехивилин (гьайбатлувилин) ва жумартлувилин Сагьиб тир ви Раббидин Чин*.

28. Бес куь (кьведбурунни) Раббидин гьи няметар куьне (кьведбуруни)  таб яз кьазва?

29. Адавай тавакъу ийизва цавара авайбуру чилел алайбуру (вирида). Гьар юкъуз Ам чIехи кардик ква (цавар чил идара авун, ризкьи гун, чан гъун чан къахчун, багъишламишун, кIевяй акъудун, дуьайриз жаваб гун…).

30. Бес куь (кьведбурунни)  Раббидин гьи няметар куьне (кьведбуруни)  таб яз кьазва?

31. Кьилди са квез «азад» жеда Чун (яни къайгъу чIугвада Чна куь – дуван, гьахъ-гьисаб ийиз) эй «сакъала’ни» (инсанар ва джинар)!

32. Бес куь (кьведбурунни)  Раббидин гьи няметар куьне (кьведбуруни) таб яз кьазва?

33. Эй, гзаф жемят инсанрин ва джинрин (чпин кьадар цIуд-цIуд, цIудралди гьисабдай гзафбур)! Эгер квевай цаваринни чилин къваларай экъечIна катиз алакьдатIа куьн элячIна ката! Ва жедач квевай элячIна катиз – анжах зурба къудрат аваз (жеда эгер ам квехъ аватIа ва ам квехъ авач).

34. Бес куь (кьведбурунни) Раббидин гьи няметар куьне (кьведбуруни)  таб яз кьазва?

35. Ракъурда квел (кьведбурални) ялав (цIун) ва гум (ва я цIурурнавай цур), ва жедач квевай (кьведбурувайни) куьмек гуз ва жагъидач квез куьмекчиярни.

36. Бес куь (кьведбурунни) Раббидин гьи няметар куьне (кьведбуруни)  таб яз кьазва?

37. Ва цав кьатI- кьатI хьайила ва ам яру къизилгуьл (цуьк) хьтинди, (цIразвай) гъеридин кIанер хьиз хьайила (…гьикьван пис, кичIе жедай кар я ам).

38. Бес куь (кьведбурунни) Раббидин гьи няметар куьне (кьведбуруни)  таб яз кьазва?

39. А юкъуз я джиндивай, я инсандивай вичин гунагьдикай хабар кьадач (ктабра аваз жеда).

40. Бес куь (кьведбурунни)  Раббидин гьи няметар куьне (кьведбуруни) таб яз кьазва?

41. Тахсиркарар (а юкъуз) абурун лишанрилай чир жеда, ва абур «кьилерин мег алай чкадилай» ва кIвачерин зангарилай вегьена кьада.

42. Бес куь (кьведбурунни) Раббидин гьи няметар куьне (кьведбуруни)  таб яз кьазва?

43. (Ва лугьуда абуруз): «Им я-тахсиркарри таб яз кьунвай Жегьеннем».

44. Абур адан (Жегьеннемдин) ва къатиз ргазвай цин арада къекъвез жеда (яни гагь абуруз ЦIу азаб гуда, гагь абурал ргазвай яд эличда).

45. Бес куь (кьведбурунни) Раббидин гьи няметар куьне (кьведбуруни) таб яз кьазва?

46. Ва вичин Раббидин вилик акъвазуникай (ва я Раббидин ЧIехивиликай) кичIе хьайидаз кьве Женнет жеда, –

47. Бес куь (кьведбурунни) Раббидин гьи няметар куьне (кьведбуруни) таб яз кьазва? -

48. Чпе кьведани (пешер емишар алай ) чIехи хилер авай.

49. Бес куь (кьведбурунни)  Раббидин гьи няметар куьне (кьведбуруни) таб яз кьазва?

50. Ана кьвенани кьве чешме ава авахьна физвай.

51. Бес куь (кьведбурунни)  Раббидин гьи няметар куьне (кьведбуруни) таб яз кьазва?

52. Ана кьвенани гьар са емишдикай кьве жуьреяр (жуьт) ава.

53. Бес куь (кьведбурунни) Раббидин гьи няметар куьне (кьведбуруни) таб яз кьазва?

54. Абур кьуьнт яна къвалахъ ярх хьана жеда тахтрал чпин месерин астIарар зарлу харадикай тир, ва кьве Женнетдин емишарни (хилер) агъуз хьана мукьвалллаз жеда.

55. Бес куь (кьведбурунни) Раббидин гьи няметар куьне (кьведбуруни)  таб яз кьазва?

56. Анрал (месерал) вилер агъузна чиле тунвайбур (абурун папар) жеда, чпик (абурун рушвилик) абурулай вилик я инсанди я джинди кя тавунвай.

57. Бес куь (кьведбурунни) Раббидин гьи няметар куьне (кьведбуруни) таб яз кьазва?

58. На лугьуди абур (Женнетдин папар) якъутар ва мерженар я.

59. Бес куь (кьведбурунни)  Раббидин гьи няметар куьне (кьведбуруни) таб яз кьазва?

60. Бес хъсанвал авунин эвез анжах хъсанвал (саваб) тушни?

61. Бес куь (кьведбурунни)  Раббидин гьи няметар куьне (кьведбуруни) таб яз кьазва?

62. Ва а кьведалай гъейри (абуруз) мад кьве Женнет жеда.

63. Бес куь (кьведбурунни) Раббидин гьи няметар куьне (кьведбуруни)  таб яз кьазва?

64. Абур кьведни (кьве Женнетни) -лап къацу мичIибур я.

65. Бес куь (кьведбурунни)  Раббидин гьи няметар куьне (кьведбуруни)  таб яз кьазва?

66. Ана кьве кьвенани гъургъур алаз яд акъатзавай къати кьве чешме (булах) ава.

67. Бес куь (кьведбурунни) Раббидин гьи няметар куьне (кьведбуруни)  таб яз кьазва?

68. Ана кьве кьвенани ава емишар, хумравдин тарар ва анарар.

69. Бес куь (кьведбурунни) Раббидин гьи няметар куьне (кьведбуруни) таб яз кьазва?

70. Анра (кьуд Женнетра) ава – (папар, къилихриз) хъсанбур, гуьрчегбур, -

71. Бес куь (кьведбурунни) Раббидин гьи няметар куьне (кьведбуруни)  таб яз кьазва?

72. Гьуьрияр (чпин вилин нинияр лап чIулав ва вилин лаз лап лацу тир) гуьрчег еке вилер авай – чеб алачухра хуьз кIевнавай, –

73. Бес куь (кьведбурунни) Раббидин гьи няметар куьне (кьведбуруни)  таб яз кьазва?

74. Чпикни (абурун рушвилик) абурулай вилик я инсанди я джинди кя тавунвай.

75. Бес куь (кьведбурунни)  Раббидин гьи няметар куьне (кьведбуруни) таб яз кьазва?

76. Кьуьнт яна къвалахъ ярх хьана жеда абур къацу, мягьтел жедай кьван хъсан, лап гуьрчег хъуьцуьганрал ва чпел гьахьтин хъсан шаршавар экIянавай месерал (ва я халичайрал).

77. Бес куь (кьведбурунни)  Раббидин гьи няметар куьне (кьведбуруни) таб яз кьазва?

78. Лап Берекатлу я ви Раббидин ТIвар, чIехивилин (гьайбатлувилин) ва жумартлувилин (гьурметлувилин) Сагьибдин!

 

Сура 56. аль-Ва́ къигIагь (Вакъиа)

 

Мергьяметлу, Регьимлу Аллагьдин тIварцIелди!

1. А Вакъиа (Алукьдайди, Къияматдин югъ) алукьайла,

2. Ам алукьун таб кар яз кьадайди гьич жедач.

3. (Ам а Вакъиа) Агъузардайди (бязибур) ва хкаждайди (бязибур) я.

4. Чил пис залзалади къатиз зурзурайла,

5. Дагълар кукIварна михьиз куьлуь авурла,

6. Ва абур чукIурнавай «гьавадик квай хьтин руг» хьиз хьайила,

7. Куьн жеда пуд жуьребур:

8. ЭрчIи патан (ва я бахтлувилин) сагьибар (эрчIи пата авайбур), – вуч ятIа бес эрчIи патан сагьибар?!

9. Ва чапла патан (ва я бедбахтвилин) сагьибар (чапла пата авайбур), – вуч ятIа бес чапла патан сагьибар?!

10. Ва вилик фейибур (диндар крара), вилик фейибур!

11. Абур – мукьвал авунвайбур я (Аллагьдиз),

12. Няметрин (хушбахтвилин) Женнетра, –

13. Са жемят (гзафбур) эвелимжибурукай (и чи уьмметдин. (2) – сифте хьайи уьмметрикай)

14. Ва са тIимил – эхиримжибурукай (и чи уьмметдин. (2)- чи уьмметдикай); -

15. Хуранвай (гьалкъайралди, къизилдин нехишар алай) тахтрал алаз (ацукьун, къаткун патал хъуьтуьл месер алай чарпайрал),

16. Кьуьнт яна къвалахъ ярх хьанваз анрал, сад садан къаншарда.

17. Абурухъ (цIийиз агакьнавай) гьамишалугъ жегьил аялар гелкъвез жеда,

18. ГетIеяр, (хъенчIин) кварар ва фенжанар гваз (чехир хъвадай чIехи къаб) – авахьна физвай (чехирдин) чешмедай,

19. Вичикай абурун я кьил тIар тийидай я акьул квахь тийидай,

20. Ва емишарни (гваз) – абуру хкядайбурукай,

21. Ва къушарин якIарни – абуруз кIанзавайдакай

22. Ва (жеда абуруз ана ва я гелкъведа абурухъ ана гьуьрияр) вилин нинияр лап чIулав ва вилин лаз лап лацу тир гуьрчег еке вилер авайбур,

23. КIевна хуьзвай гевгьердиз ухшарар тир.

24. Эвез яз (абуруз)- абуру авур амалдиз килигна.

25. Абуруз ана я буш я айиб (гунагь) алай рахунрин ван къведач,

26. Анжах: «Салам (квез)! Салам (квез)! » лугьун (малаикрин патайни, ва чпин арадани).

27. Ва эрчIи патан сагьибар (эрчIи пата авайбур), – вуч ятIа бес «эрчIи патан сагьибар»?!

28. (Абур жеда) «Сидр»*- рин юкьва (набатат, вичел алай) цацарни алуднавай,

29. Ва къалин аруш тир тIалѓ ь*- дин тарарин (лацу ва я хъипи цуьквер жедай къалин яргъи хилер чпелни хъсан ни галай гзаф цуьквер алай чими уьлквейра жедай акациядин, ва я сад-садан винел алаз емишрин кулер куьрс хьанвай бананрин тарарин) юкьва,

30. ЭкIянавай даим сериндик (хъендик),

31. Къатиз авахьзавай ятарин юкьва,

32. Ва гзаф кьадар жуьреба-жуьре емишрин арада,

33. (Гьич) Куьтягь тежедай ва къадагъани алачир.

34. Ва жеда абур (тахтрал) хкажнавай месерал.

35. Гьакъикъатда Чна абур (Женнетдин дишегьлияр ва я гьуьрияр) яратмишна (хас) яратмишуналди.

36. Ва Чна абур «рушвал гвайбур» яз авуна,

37. Итимриз (чпин) кIанибур, са яшдинбур яз,

38. ЭрчIи патан сагьибар патал.

39. (Абур жеда) Са жемят (гзафбур) эвелимжибурукай.

40. Ва са жемят (гзафбур) эхиримжибурукай.

41. Ва чапла пата авайбур, – вуч ятIа бес «чапла пата авайбур»!?

42. (Абур жеда) Къати зегьемдин гарук ва лап кузвай ргазвай це,

43. Пис чIулав гумадин хъендик (мичIивилик),

44. Вич я къайи (серинди) тушир, я хушди (акуниз).

45. Гьакъикъатда абур адалай вилик гурлувиле (бул няметра) авай (гьакьдикай элкъвена),

46. Ва абуру чIехи гунагьдал (ширкдал) кIевивал ийизвай,

47. Ва абуру лугьузвай: «Бес чун кьейила, ва чун руквадиз ва кIарабриз элкъвейла, чал чан хкидани кьван?

48. Ва чи эвелимжи бубайрални? »

49. Лагь: «Гьакъикъатда эвелимжибурни ва эхиримжибурни,

50. Дугъриданни кIватI хъийида малум тир Йикъан вахтуниз.

51. Ахпа куьне, эй рекьяй акъатнавайбур ва (чан хкун, гьакь) таб яз кьунвайбур,

52. Дугъриданни неда «закъкъум» тарцикай (Жегьеннемда авай туькьуьл пис тар).

53. Ва куьне адалди руфунар ацIурда,

54. Ва адан винелни куьне лап кузвай ргазвай яд хъвада,

55. Хъвада куьне «цихъ лап къаних ийидай азар квай» девейрин хъун хьиз.

56. Им – абуруз къунагълух я Эвездин Юкъуз.

57. Чун я куьн халкьнавайди, гьавиляй инанмиш хьанайтIа куьн (Къияматдин Юкъуз Чна квел чан хкидайди, вучиз лагьайтIа сифте куьн авачирла куьн халкь авур къудратлу Халикь, квел чан хкизни Ам къудратлу я)!

58. Акунани квез куьне «акъудна гадариз экъичзавайди» (куь папарин руфунриз)?

59. Ам (мая ва адакай аял) куьне халкьзавани, я тахьайтIа халкьзавайди Чун яни?

60. Чна куь арада кьиникь кьадар-кьисмет авунва, ва Чи вилик пад са куьнивайни кьаз жедач (Чун ажиз ийиз, магълуб ийиз гьич садавайни жедач),

61. Чна куьн квез ухшарбуралди (ва я куь куцар) дегишариз, ва куьн квез чинни тийидай жуьреда яратмишиз.

62. Дугъриданни квез сифте яратмишун (куьн) чир хьанва, рикIел гъанайтIа куьне (ва къачунайтIа ибрет: куьн сифте яз Халкьайди мад сеферда халкь хъийиз къудратлу я эхир)!

63. Акунани квез куьне цазвай цан (тум цаз)?

64. Куьн яни адав экъечIиз тазвайди, я тахьайтIа Чун яни (адав) экъечIиз туна чIехи ийизвайди?

65. Эгер Чаз кIан хьайитIа Чна ам кьуру куьлуь хьанвай кьалариз элкъуьрда ва куьн тажуб хьана жеда:

66. «Гьакъикъатда чун зиян (пуч) хьанвайбур я.

67. Ваъ, (аксина) чун магьрум хьанвайбур я».

68. Акунани квез куьне хъвазвай яд?

69. Куьне авуднавани ам булутрикай (циферай), я тахьайтIа Чун яни ам авудзавайди?

70. Эгер Чаз кIан хьайитIа Чна ам уькIуьди ийида, бес авунайтIа куьне шукур!

71. Бес акунани квез куьне (кIарас гуьцIна) хкудзавай цIай?

72. Куьне яратмишнавани адан тар, я тахьайтIа Чун яни (ам) яратмишзавайди?

73. Чна авунва ам (цIай) рикIел гъун яз (Жегьеннемдин цIай), ва метягь яз (герек авай ишлемишдай са затI яз) баябан чуьлда (рекье) авайбур ва гишинбур патал.

74. (Гьавиляй) Пак ая ви ЧIехи тир Раббидин ТIвар!

75. Ва кьин кьазва гъетерин акIидай чкайралди (ва я авудзавай Къуръандин паяралди)!

76. Гьакъикъатда, эгер квез чиз хьанайтIа, ам чIехи кьин кьун я.

77. Гьакъикъатда ам – багьа (хийирлу) Къуръан я

78. КIевна хуьзвай Ктабда авай.

79. ХкIазвач адак*(лазим кар патал, садни)- (чеб Аллагьди) михьи авунвайбурулай* гъейри.

80. Алемрин Раббидин патай авудна ракъурнава (ам).

81. Бес и «эхтилатдин» (Къуръандин) гьакъиндай куьне ялтахзавалзавани (ва я таб яз кьазвани)?

82. Ва куьне куь ризкьи (адан шукур авун, ам Аллагьдин патай тирди) таб яз кьун ийизвани?

83. Бес, чан (акъатиз) кIалхандив агакьайла,

84. Куьнни а чIавуз килигзавайла (рекьизвайдаз), -

85. Ва Чун адаз квелай лап мукьвал я, амма квез аквазвач, -

86. Бес эгер куьн (Къияматдин Юкъуз гьахъ-гьисаб) эвез техжедайбур ятIа

87. Вучиз куьн алахъзавач элкъуьр хъийиз ам (руьгь бедендиз), эгер куьн гьакьбур ятIа!

88. Эгер ам (рекьизвай кас) «мукьвал авунвайбурукай» (яни а пуд жуьредикай «вилик фейибур») яз хьайитIа,

89. (Адаз)- Ял ягъун, хуш ниэр ва няметрин Женнет жеда.

90. Ва эгер (ам) эрчIи патан сагьибрикай хьайитIа,

91. «Салам (ва саламатвал) ваз! (Вун) эрчIи пата авайбурукай я».

92. Ва эгер ам (гьакь) таб яз кьурбурукай, (дуьз рекьикай) ягъалмишвиле хьайибурукай хьайитIа,

93. Адаз «къунагълух» яз жеда (лап кузвай) ргазвай яд,

94. Ва Джагьи́ м*- да кун.

95. Гьакъикъатда им – якъиндин (са шакни алачир) гьакь (гьакъикъат) я.

96. Гьавиляй пак ая вуна ви ЧIехи тир Раббидин тIвар!

 

Сура 57. аль-ХIади́ д (Ракь)

 

Мергьяметлу, Регьимлу Аллагьдин тIварцIелди!

1. Пакнава Аллагь (паквалзава Аллагьдиз) цаварал ва чилел алайбуру. Ва Ам – Гужлуди, Камаллуди я.

2. Адаз талукь я цаваринни чилин гьакимвал. Ада чан гъизва ва чан къачузва, ва Ам гьар са шейинал къудратлу я.

3. Ам я – Эвелимжиди ва Эхиримжиди, Виридалайни Винеди, Вири Чизвайди (Лап Мукьвалди яз, ва я Ашкара тирди ва Чуьнуьх тирди) ва Ам гьар са шеъ чизвайди я.

4. Ам я – цавар ва чил ругуд йикъан къене халкь авурди, ахпа Ам Аршдал хкаж*(тестикь) хьана. Адаз чизва чилиз вуч гьахьзаватIа ва анай вуч экъечIзаватIа, ва цавай агъуз аватзавайди ва аниз хкаж жезвайди. Ам, гьина куьн хьайитIани, квехъ гала. Ва Аллагьдиз куьне ийизвай амал (крар) аквазва.

5. Адаз талукь я гьакимвал цаваринни чилин, ва (вири) крар Аллагьдин патав элкъуьрна хкизва.

6. Ада йиф йикъа твазва (югъ яргъи ийизва йифен гьисабдай) ва югъ йифе твазва (йиф яргъи ийизва йикъан гьисабдай). Ва Адаз – хурара вуч аватIани хъсан чизва.

7. Инанмишвал ая куьне Аллагьдихъ ва Адан Расулдихъ, ва харж ая куьне Ада куь ихтиярда тунвай затIарикай. Ва чпи инанмишвал авурбуруз квекай ва харж авурбуруз еке саваб жеда.

8. Вуч хьанва квехъ Аллагьдихъ инанмишвал тийиз куьне, Расулдини квез куь Раббидихъ инанмишвал авуниз эверзавайла ва Ада квевай (виликдай) куь икьрарни къачунвайла? Эгер куьн инанмишвалзавайбур ятIа…(лазим себебар вири хьанва).

9. Ам я Вичин лукIрал ачух тир аятар Авудзавайди, ада куьн мичIивилерай нурдихъ (экуьвилихъ) акъудун патал. Ва гьакъикъатда Аллагь куь гьакъиндай дугъриданни лап юмшагъди (мергьеметлуди), регьимлуди я.

10.  Квез вуч хьанва, вучиз куьне Аллагьдин рекье харжзавач, вични Аллагьдиз талукь тирла ирс цаваринни чилин (агьалийрин). Барабар жедач (савабдиз) квекай харж авурбур ва женг чIугурбур «гъалиб хьана ачухдалди» (Мекка). Абур, анла кьулухъ харж авуна женг чIугурбурулай дережадиз чIехи я. Ва гьар садаз (а кьве дестедикай)  Аллагьди «лап хъсанди» (Женнет) хиве кьунва, ва Аллагьдиз куьне ийизвай амалдикай хабар ава.

11. Вуж я Аллагьдив «хъсан бурж» вугузвайди (Адан рекье харжзавайди) ва Ада адаз ам гзаф сефер артухарда ва адаз лап багьа савабни жеда?!

12. А юкъуз ваз аквада муъмин итимар ва муъмин дишегьлияр (абурухъ галаз) абурун нур гьерекатна физ жеда абурун виликайни ва абурун эрчIи патахъайни.(Ва лугьуда абуруз): « Къе квез шад хабар я, – чпин кIаникай вацIар физвай Женнетар, даим яз анра амукьиз (куьн). Гьа ам я – чIехи агалкьун».

13. А юкъуз мунафикь итимри ва мунафикь дишегьлийри инанмишвал авурбуруз лугьуда: «Гуьзлемиша (куьне) чун, – чна куь нурдикай са тIимил менфят (ва я са цIук) къачун». Ва абуруз (малаикри) лугьуда: «Куьн куь кьулухъ ахлад ва (гьана) нурдихъ къекъуьгъ». Ва абурун арада цал (пару) эцигда, виче варар авай, вичинни (цлан) къенепата регьим жеда ва адан къецепад – адан аксина, азаб жеда.

14. Абур (мунафикьар) абуруз (муъминриз) эвериз жеда: «Бес чунни квехъ галачирни? » Абуру лугьуда: «Эхь, галай, амма куьне куьн фитнедик кутунай (чIуру крар, гунагьар ийиз), гуьзлемишнай (муъминриз писвилер), шаклувалнай, ва куьн (куь) буш мурадри (хиялри, умудри) алдатмишна, та Аллагьдин эмир къведалди. Ва Аллагьдин гьакъиндайни куьн «алдатмишчиди» (шейтIанди) алдатмишна.

15. Гила къе, квевай къутармишунин гьакъи кьабулдач ва кафирвал авурбурувайни, ва куь «хтана акъваздай чка» ЦIай я, ам квез «далдалух» (ва я лап лайихлу) чка я, ва элкъвена хкведай гьикьван пис чка я (ам)! »

16. Бес алукьнавачни вахт инанмиш хьанвайбуруз абурун рикIериз кичIевал (умунвал) жедай – Аллагь «рикIел гъун» ва (гьакIни) агъуз атанвай гьахъ (Къуръан) себеб яз, ва абур – виликдай чпиз Ктаб атанвайбур, чпизни гзаф вахт алатайла абурун рикIер «къван хьтин» хьайибур хьиз, тежедай? Ва гзафбур абурукай фасикьар я.

17. Чир хьухь (квез), гьакъикъатда Аллагьди чан хкизва чилел ам кьенвайдалай кьулухъ. Гьакъикъатда, Чна квез аламатрин (делилрин) баян ганва, белки куь акьулди кьатIун.

18. Гьакъикъатда, садакьаяр гузвай итимар ва садакьаяр гузвай дишегьлияр, ва Аллагьдив «хъсан бурж» вугайбур, – абуруз ам гзаф сефер артухарда, ва абуруз лап багьа саваб жеда.

19. Ва Аллагьдихъ ва Адан Расулрихъ инанмишвал авурбур – абур «сиддикьар» (килиг: 4-сура 69-аят) я. Ва «шагьидар» (джигьадда чан гайибур) – абуруз чпин Раббидин патав абурун саваб ва абурун нур жеда. Амма кафирвал авурбур ва Чи аятар* (ва я аламатар, делилар) таб яз кьурбур – абур Джаѓ ьи́ м*-дин (Жегьеннемдин) агьалияр я.

20. Чир хьухь квез, и дуьньядин уьмуьр анжах: къугъун, машгъулат, гуьрчегвилер авун, дамахарун куь арада ва мал-девлетар ва веледар гзафрун я, (ам) я марфадин мисал хьиз, вичин(яни адалай кьулухъ экъечIай) набататри лежберар (ва я кафирар) тажуб авур, ахпа абур чIехи жезва ва кьураз эгечIзава ва ваз аквазва ам хъипи хьана ахпани ам куьлуь кIусар жезва. Амма Ахиратда къати азаб ва багъишламишун Аллагьдин патай ва разивал ава. Ва и дуьньядин уьмуьр – анжах алдатмишунин метягь я (рикI ацукьарна алдатмишардай, фана жедай затIар, менфятар я).

21. Акъажунар ая куьне куь Раббидин патай багъишламишунихъ (гзаф себебар ийиз) ва Женнетдихъ вичин гьяркьуьвал цавунни чилин гьяркьуьвал хьиз тир, Аллагьдихъ ва Адан Расулрихъ инанмишвал авурбуруз гьазурнавай. Ам – Аллагьдин мергьямат я, Ада ам Вичиз кIан хьайидаз гузва. Ва Аллагь – чIехи мергьяматдин Сагьиб я.

22. Гьар са мусибат чилел хьайи ва куь кьилел атай – (ам) Ктабда (кхьена) ава виликмаз Чна ам арадал гъидалди (абур халкьдалди). Гьакъикъатда а кар Аллагьдиз регьят я,

23. (Чна квез и кардикай хабар гузва) Куьн, куь гъиляй акъатай кардал пашман тахьун патал ва куьне Ада квез ганвайдал лавгъа шадвилер тавун патал. Аллагьдиз гьар са такабурлуди лавгъади кIандач,

24. Чпи мискьивалзавай ва инсанризни чпи мискьивал эмирзавай. Ва вуж (кьулухъ) элкъвейтIа, гьакъикъатда Аллагь – Девлетлуди, Тарифдиз Лайихлуди я!

25. Гьакъикъатда, Чна Чи Расулар ачух делилар гваз ракъурна, ва Чна абурухъ галаз Ктаб ва Терезар авудна инсанри адалатлувал кьиле тухун патал. Ва Чна авудна ракь – виче зурба къуват (гуж) ва инсанриз менфятар авай. Ва чир авун (винел акъудун) патал Аллагьди ни Адаз (Адан диндиз) ва Адан Расулриз вичин рикIин сидкьидай вичиз (Ам) таквазни куьмек гузватIа. Гьакъикъатда, Аллагь – Къуватлуди, Гужлуди я.

26. Гьакъикъатда, Чна Нугь ва Ибрагьим ракъурнай ва Чна абурун кьведан несилра авуна (яни тайинарна) пайгъамбарвал ва Ктаб. Ава абурун арада дуьз рекье авайбур, ва гзафбур абурукай фасикьар я.

27. Ахпа Чна гуьгъуьналлаз ракъурна абурун гелераваз Чи Расулар. Ва гуьгъуьналлаз ракъурна Чна Марйаман хва Исани ва багъишна Чна адаз Инжи́ л. Ва адаз табий хьайибурун рикIера авуна Чна мергьемет (юмшагъвал) ва регьимлувал. Ва «килисайра яшамиш жез кешишвал авун»- ам абуру къундармишнавай кар я. Чна абурал а кар ферз авуначир – (амма абуру ам авуна) анжах Аллагьдин разивал къазанмишун патал. Амма абуру а кар лазим жуьреда кьиле тухуз хвенач. Ва инанмишвал авурбуруз абурукай Чна чпин саваб гана, амма абурукай гзафбур фасикьар я.

28. Эй, инанмишвал авунвайбур! КичIе хьухь Аллагьдикай ва инанмишвал ая Адан Расулдихъ, (а чIавуз) Ада квез кьве сефер артух пай гуда Вичин регьимдикай, ва Ада квез адалди куьн фидай нур багъишда, ва Ада квез (гунагьар) багъишламишда. Аллагь – Гъил Къачудайди, Регьимлуди я,

29. Чир хьун патал Ктаб-эгьлийриз, чпивай Аллагьдин мергьяматдикай са шейни къачуз алакь тийидайди, ва вири мергьемат (регьимар) Аллагьдин Гъиле* авайди ва Ада ам Вичиз кIан хьайидаз гузвайди. Ва Аллагь – чIехи мергьематдин Сагьиб я. 

 

Сура 58. аль-Муджа́ дилагь (Меслят къачуз субутзавай дишегьли)

 

Мергьяметлу, Регьимлу Аллагьдин тIварцIелди!

1. Гьакъикъатда, вичин гъуьлуьн гьакъиндай вавай меслят къачузвай (вичин фикирар лугьуз) ва Аллагьдиз шикаят ийизвай папан гафарин ван Аллагьдиз хьанва, Аллагьдиз куь (кьведан) сада-садаз гузвай жавабринни ван къвез. Гьакъикъатда, Аллагь – Ван Къведайди, Вири Аквадайди я.

2. Квекай, чпин папариз «вун заз зи дидедин далу хьиз я» («зигьа́ р»- авун, яни дидедал эвленмиш хьун гьарам тир хьиз вун заз къадагъа я) лугьузвайбур, туш абур (папар) – абуруз дидеяр! Абурун дидеяр анжах чеб хайибур я. Ва гьакъикъатда, абуру (ахьтин итимри адалди) нагьакьанди гафарикай ва тапарар лугьузва. Гьакъикъатда, Аллагь – Афивалдайди (Юмшагъвалдайди), Гъил Къачудайди я.

3. Ва чпин чпин папариз «вун заз зи дидедин далу хьиз я» лугьузвайбуру («зигьа́ р»- авурбуру), ахпа чпи лагьай гафарилай элкъвезвайбуру са лукIраз азадвал гана кIанда – абур кьвед (гъуьлни паб) араяр мукьвал хьана сад-садак хкIадалди вилик. Адалди – квез несигьат гузва, ва Аллагьдиз куьне ийизвай амалрикай хабар ава!

4. Ва низ жагъизвачтIа (лукI азад ийиз)- ада ара датIана кьве вацра сив хвена кIанда абур кьвед (гъуьлни паб) араяр мукьвал хьана сад – садак хкIадалди вилик, ва нелай алакьзавачтIа, ада пудкъад кесибдиз тIуьн гана кIанда. И кар – куьне Аллагьдихъ ва Адан Расулдихъ инанмишвал авун патал я. Ва ибур – Аллагьдин (эцигнавай) сергьятар я. Ва кафирриз азиятлу азаб жеда.

5. Гьакъикъатда чпи Аллагьдиз ва Адан Расулдиз аксивал ийизвайбур – абур чпелай вилик хьайибур агъуз авурвал агъуз ийида (алчахарда). Гьакъикъатда, Чна ачух аятар (делилар) авуднава, ва кафирриз агъузардай (алчахардай) азаб жеда.

6. (РикIел гъваш) А югъ, Аллагьди абурал виридал чан хкидай ва абуру авур амалрикай Ада абуруз хабар гудай. Аллагьди абур (амалар) гьисабна хвенва, амма абуру а крар рикIелай алуднава. Ва Аллагь гьар са шейинал Шагьид я.

7. Бес ваз гьакъикъатда Аллагьдиз цавара вуч аватIани, чилел вуч алатIани чизвайди аквазвачни? Жезвай туш пудан юкьва чинебан эхтилат хьана, абурун кьуд лагьайди Ам тахьана, ва я вадан юкьва хьана – абурун ругуд лагьайди Ам тахьана. Ва адалай тIимил ва я гзаф – Ам абурухъ галаз тахьана, гьина абур хьайитIани. Ахпа Ада чпи авур амалрикай Къияматдин юкъуз абуруз хабар гуда. Гьакъикъатда, Аллагьдиз гьар са шей чизва.

8. Бес ваз чпиз чинебан эхтилатар къадагъа авунвайбур аквазвачни, ахпа абур чпиз къадагъа авунвай кардал мад элкъвена хквезва, ва абуру гунагькар, мидявал ва Расулдиз асивал авуникай чинебан суьгьбетар ийизва. Ва абур ви патав атайла, абуру ваз салам гузва масакIа Аллагьди ваз салам гузвайвал тагана, ва чпи-чпикди лугьузва: «Гурай кван чаз азаб Аллагьди, чна лугьузвай гафариз килигна (эгер ам гьакъикъи Пайгъамбар ятIа)! » Бес я абуруз Жегьеннем виче абуру къати кунин азаб чIугвадай, ва элкъвена хкведай чка яз, ам гьикьван писди я!

9. Эй, инанмишвал авунвайбур(иман гъанвайбур)! Куьне чинебан эхтилатар ийидайла, куьне гунагькар, мидявал, Расулдиз асивал авуникай чинебан рахунар ийимир, амма хъсанвал авуникай ва Аллагьдикай кичIе хьуникай чинебан суьгьбетар ая, ва кичIе хьухь квез Аллагьдикай, Вичин патав куьн кIватI хъийидай.

10. Чинебан чIуру эхтилатар – шейтIандин патай я инанмиш хьанвайбур пашман хьун патал (алахънавай), амма адавай абуруз са зарарни гуз жедач, анжах Аллагьдин ихтиярдалди. Ва къуй са Аллагьдал таваккул*(умуд) авурай муъминри.

11. Эй, инанмишвал авунвайбур! Квез лагьайла «инсанар кIватI хьана ацукьнавай чкайра» (Пайгъамбардин ва я илимдин маджлисра) гегьеншара чка сада-садаз (яни чка ая) – гегьенш ая (чка це) куьне, ва Аллагьди квезни гегьеншарда (чка Женнетра). Ва квез «къарагъ куьн» лагьайла, куьн къарагъа – Аллагьди инанмишвал авурбур квекай, ва чпиз чирвилер ганвайбур дережайриз хкажда. Аллагьдиз куьне ийизвай амалрикай хабар ава.

12. Эй, инанмишвал авунвайбур! Эгер куьн Расулдихъ галаз чинеба рахаз хьайитIа, куь чинебан суьгьбетдилай вилик садакьа це. Ам квез хийирлу я ва михьивал я. Амма эгер квез авачиз хьайитIа, гьакъикъатда Аллагь Багъишламишдайди, Регьимлуди я.

13. КичIезвани квез куь чинебан суьгьбетрилай вилик садакьаяр гуз? Ва куьне (а кар) тавунвайла – ва Аллагьди куь туба кьабулна (ва а эмир дегиш хъувуна), – капI ая куьне, закат це, ва Аллагьдиз ва Адан Расулдиз муьтIуьгъ хьухь. Аллагьдиз куьне ийизвай амалрикай хабар ава.

14. Бес ваз акуначни чпи Аллагьдин хъел алай ксарихъ галаз дуствал ийизвайбур (яни мунафикьар чувудрихъ галай)? Абур квекай туш, ва туш – атIабурукай. Ва абуру таб тир (ва я таб кардал) кьинер кьазва чпиз чиз-чиз.

15. Аллагьди абуруз къати азаб гьазурнава. Гьакъикъатда лап писди я абуру ийизвай амал (крар).

16. Абуру чпин «кьин кьунар» хуьнуьхун (далдалух) яз кьунва ва адалди абуру Аллагьдин рекьелай алуднава. Ва абуруз агъузардай (алчахардай) азаб жеда.

17. Абуруз чпин мал-девлетди ва я чпин веледри Аллагьдикай (хуьз) гьич са шейинин куьмекни гудач. Абур – ЦIун агьалияр я, абур ана даим яз амукьда.

18. (РикIел гъваш) А югъ, Аллагьди абурал виридал чан хкидай, ва абуру Адаз кьинер кьада квез абуру кьинер кьазвайвал, ва абуру чеб (менфятлу) кардал алай хьиз гьисабда. Дугъриданни, анжах гьабур я – тапархъанар.

19. ШейтIанди абурал винел пад къачунва, ва ада «Аллагь рикIел гъун» (Адаз муьтIуьгъ хьун, ибадатун) абурун рикIелай алуднава. Абур – шейтIандин десте я. Дугъриданни! Бес шейтIандин десте – гьабур я зиянлувиле авайбур (и дуьньядани, Ахиратдани)!

20. Гьакъикъатда, Аллагьдиз ва Адан Расулдиз аксивал ийизвайбур, абур лап агъузарнавайбурун (алчахарнавайбурун) арада жеда.

21. Аллагьди кхьена къадар-кьисмет авунва: «Гьакъикъатда, гъалибвал къачуда За ва Зи Расулри! » Гьакъикъатда, Аллагь – Къуватлуди, Гужлуди я.

22. Жагъидач ваз чпи Аллагьдихъ ва Эхиримжи Йикъахъ инанмишвал ийизвай ксариз, абуруз Аллагьдиз ва Адан Расулдиз аксивал ийизвай ксар кIан хьана, гьатта абур чпин бубаяр ва я чпин рухваяр ва я чпин стхаяр ва я чпин (лап талукь) тухум хьайитIани. Абур – чпин рикIера Ада иман «кхьена тестикьарнавай» ва Вичин патай руьгь кутуна мягькемарнавайбур я. Ва Ада абур чпин кIаникай вацIар физвай Женнетра твада, даим яз ана амукьиз. Аллагь абурулай рази я, ва абур рази я Адалай. Абур – Аллагьдин десте я. Дугъриданни! Бес Аллагьдин десте – гьабур я агалкьун (бахтлувал) авайбур!

 

⇐ Предыдущая12345678910Следующая ⇒

Поделиться: