Сура 103. аль-ГIаср (Рагъдан вахт)

 

Мергьяметлу, Регьимлу Аллагьдин тIварцIелди!

1. Кьин кьазва рагъдан вахтунал (ва я: михьиз заманадал),

2. Гьакъикъатда, инсанар зиянвиле (хасаратвиле) ава,

3. Анжах, чпи инанмишвал авуна, диндар амал авурбур, сада-садаз гьакь кьиле тухун веси авурбур, сада-садаз сабур авун веси авурбур, квачиз.

 

Сура 104. аль-Гьумазагь (Кьуьруькралди [уюнар-ишарайралди] айибдайди)

 

Мергьяметлу, Регьимлу Аллагьдин тIварцIелди!

1. Мусибат (писвал, азаб) я – гьар са гзаф гъибет ийидай пислемишзавайдаз, гзаф айибдай рахшандар ийизвайдаз (ва я гьар са гзаф «кьуьруькралди айибдайдаз», гзаф «чинал айиб гъизвайдаз»),

2. Вичи, мал-девлет кIватI авуна ам гзаф гьисабзавай.

3. Ада гьисабзава хьи, вичин мал-девлетди вич гьамишалугъ амукьдайвал ийидай хьиз.

4. Ваъ хьи! Гьакъикъатда ам гадарда «кукIварна барбатI» ийидайдаз (ЦIуз).

5. Ва ваз вуч чида (ваз гьинай ва ни чирда) вуч ятIа «кукIварна барбатI» ийидайди (ЦIай)?

6. Аллагьдин ЦIай я – куькIуьрна къизмишнавай,

7. Вич (беденриз) гьахьна рикIерив агакьдай.

8. Гьакъикъатда ам абурал вири патарихъай агална (кIевна) жеда

9. (Чеб кутIунна, ва я ЦIай вич) Яргъи авунвай дестекра аваз.

 

Сура 105. аль-Фи́ ль (Фил)

 

Мергьяметлу, Регьимлу Аллагьдин тIварцIелди!

1. Бес ваз ви Раббиди филдин сагьибриз гьикI (вуч) авунатIа акуначни?!

2. Бес Ада абурун чIуру къастар ягъалмишвиле туначни (чIурна кьилиз акъат тийидайвал авуначни)?

3. Ва Ада абурал луж-луж къушар ракъурна,

4. Гадариз абурал канвай чепедин ккIалар,

5. Ва Ада абуру «са паяр тIуьнвай, кIурни хганвай (кьуранвай къацарин) пешериз» ухшар авуна.

 

Сура 106. Къурайш (Къурейшар)

 

Мергьяметлу, Регьимлу Аллагьдин тIварцIелди!

1. Къурейшрин арада туькIвейвал (садвал, дуствал) авурвиляй, (ва я Тажуб хьухь куьн къурейшрин туькIвейвилиз)

2. Абурун арада хъуьтIуьн ва гатун сеферра (алвердин рекьера) туькIвейвал авурвиляй (ва я ТуькIвейвилиз абурун, хъуьтIуьн ва гатун сеферра (алвердин рекьера))

3. (Гьавиляй) Къуй абуру и КIвалин (Кябедин) Раббидиз ибадат авурай,

4. Вичи – чпиз тIуьн гайи кашдин ериндал (абурун уьлквейра кашар авай кесибвиляй) ва чпиз саламатвал гайи кичIевилин ериндал (ва абур чеб тIимил аваз, яракь авачиз зайиф тир душманрин хура).

 

Сура 107. аль-Ма́ гIу́ н (Куьмек гун [садакьадалди ва я менфятдалди])

 

Мергьяметлу, Регьимлу Аллагьдин тIварцIелди!

1. Акунани ваз Эвез (Ахиратдин гьакь-гьисаб) таб яз кьунвайди?!

2. Ам я – вичи етим векъидаказ чукурзавайди,

3. Ва кесибдиз тIуьн гуниз (масад) гьевеслу тийизвайди.

4. Ва мусибат (писвал, азаб) я капIзавайбуруз -

5. Чеб чпин кпIуникай къайгъусузвиле авайбур (мунафикьар),

6. Чпи (хъсан крар) «къалурун патал» ийизвайбуруз (жадувализ),

7. Ва (чпи, са затI са къаб са алат ишлемишиз менфят къачуна гахгудайвал) садакьадин куьмек тагузвайбуруз.

 

Сура 108. аль-Кавсар (Гзаф хийирар [няметар])

 

Мергьяметлу, Регьимлу Аллагьдин тIварцIелди!

1. Гьакъикъатда Чна ваз гзаф хийирар (ва я Женнетдин вацI «Кавсар») ганва!

2. (Гьавиляй) КапI ая вуна ви Раббидиз ва (Адаз къурбандар) сухна тукIукI.

3. Гьакъикъатда, вун гзаф такIанзавайди (ваз мидявалзавайди) гьам я – гьар са хийирдикай атIанвайди (вичин тIвар ван атIана амукь тийидайди).

 

Сура 109. аль-Ка́ фиру́ н (Кафирар)

 

Мергьяметлу, Регьимлу Аллагьдин тIварцIелди!

1. Лагь: «Эй, кафирар (Аллагьдихъ кафирвалнавайбур)!

2. Ийидач за ибадат куьне ибадатзавай затIариз

3. Ва туш куьнни ибадат ийидайбур за Ибадатзавайдаз,

4. Ва туш зун ибадат ийидайди куьне ибадат авур затIариз,

5. Ва туш куьн ибадат ийидайбур за Ибадатзавайдаз,

6. Квехъ куь дин ава (ширк), зав зи Дин гва (Ислам)!

 

Сура 110. ан-Наср (Куьмек)

 

Мергьяметлу, Регьимлу Аллагьдин тIварцIелди!

1. Аллагьдин куьмек ва «гъалибвал гана ачухун» атай чIавуз (Мекка ачухайла),

2. Ва ваз инсанар еке дестейралди Аллагьдин диндиз гьахьиз акурла,

3. (А чIавуз) Пак ая вуна гьамд гъиз ви Раббидиз, ва Адаз астагъфир ая. Гьакъикъатда Ам – туба авуниз гзаф Куьмекдайди, Тубаяр Гзаф Кьабулдайди я!

 

⇐ Предыдущая567891011121314

Поделиться: